Donnerstag, August 08, 2013

دانیش تئللی سازیم - عاشق حسین جوان


ندير دردين سويله نييه سوسموسان؟
دانيش تئللی سازيم دانيش سن دانيش
کيمده ن اينجيميسه ن ،کيمدن کوسموسن؟
دانيش تئللی سازيم دانيش سن دانيش
سن کی ديل بيليرسن ،سوز آنلايرسان
شيرين آرزولاری تئز آنلايرسان
عاريف سن ،اشاره گوز آنلايرسان
دانيش تئللی سازيم دانيش سن دانيش
بلکه آيريليبسان اؤز سيرداشيندان
دوغما وطنينده ن، قان قارداشيندان
اودورمو داغليب هوشون باشيندان؟
دانيش تئللی سازيم دانيش سن دانيش
سنده می وطنی غملی گؤرورسن؟
ديلی باغلی چوخ سيتملی گؤرورسن؟
منتظر گؤزلری نملی گؤرورسن
دانيش تئللی سازيم دانيش سن دانيش
سؤيله،گؤرورسنمی ناحاق قانلاری؟
ظولمودن اود توتان خانمالاری
گناهسيز آسيلان قهرمانلاری..
دانیش تئللی سازیم دانیش سن دانیش
ندیر ایسته دیین ،آرزون ،دیله یین؟
قوش کیمی چیرپینیر وورور اوره یین
گونشدن پارلاقدیر خوش گله جه یین
دانیش تئللی سازیم دانیش سن دانیش
جوشا گل غصه نی پرده لرده ن آت!
سسینی ائشیتسین بوتون کاینات
سن ده مورادینا ،اؤز آرزونا چات
دانیش تئللی سازیم دانیش سن دانیش
نقده ر حیات وار سن ده زینده سن
صنعت عاشیغینین سینه سینده سن
اوجالت سسین پرده –پرده گونده سن
دانیش تئللی سازیم دانیش سن دانیش
وفاسیز دوست کیمی اونوتما منی
کونلومون سیرداشی ،یاخین همدمی
دولان قاریش-قاریش دوغما وطنی
دانیش تئللی سازیم دانیش سن دانیش
اوتوزبئش ایل سینه م اوسته چاغلادین
اوره ییمی تئللرینه باغلادین
خالقیمین دردینه سن ده آغلادین
دانیش تئللی سازیم دانیش سن دانیشا
ون دورد پرده ن ، دوققوز گوموش تئلین وار
کونوللره ، اوره‎کلره یولون وار
میلیون نغمه ن ، یئتمیش ایکی دیلین وار
دانیش تئللی سازیم دانیش سن دانیش
منیم آدیم عاشیق «حسین جاواندی»
سنین کیمی او دا شیرین زباندی
سؤزلریم خالقیما بیر ارمغاندی
دانیش تئللی سازیم دانیش سن دانیش.

Keine Kommentare: