Donnerstag, August 08, 2013

بو سحر - مدینه گلگون


نه گؤزلدیر بو سحرین ایشیغی
گوللر آچدی ، چایلار داشدی بو سحر
نه گؤزلدیر دوغما یئرین ایشیغی
کؤنلوم تزه نغمه قوشدو بو سحر
*
دایاندیلار گوللر یئنه اوز - اوزه
قانادلانیب قوشلار وئردی سس - سسه
طبیعتله دوردوم نفس - نفسه
یادیما او داغلار دوشدو بو سحر
*
یئنه یاغدی یاز یاغیشی ، نه یاغدی
تورپاق اوسته دامجیلار ایز بوراخدی
نه گؤزلدیر طبیعتین گول تاختی
یئرده گؤیده دوغمالاشدی بو سحر
*
بو باهارین موژده سیله گولموشم
بو باهارین پئشوازینا گئتمیشم
چیچکلرین نفسیندن بیلمیشم
اونلاریندا کؤنلو خوشدور بو سحر
*
گول مجلیسی گؤرمه میشدیم بئله من
نه آد وئریم بو چمنه ، چؤله من
سئوگیمیزی گتیرمه زدیم دیله من
سئحیرلندیم دیلیم چاشدی بو سحر
*
آیلار کئچدی ، آیلار اولدو ایل ، گولوم
کؤنلوم سن سیز هئچ آچیلمیر بیل ، گولوم
دورنالار لا سنده قاییت ، گل گولوم
تکجه سنین یئرین بوشدو ، بو سحر

Keine Kommentare: