Samstag, August 17, 2013

آنجاق - حمید آرش آزاد

آفرين، احسنت، به‌به! چوْخ خوْش اوْلموش دونياميز
فايتون اوْلدو ديبده پاترول، بئنزه دؤنموش داشقاميز 
هنددن آلساق ياغي، تايلنددن گلسه دويو
دن- دؤشون‌ده چين وئره‌ر، في‌الفور قاينار شورباميز 
چون بورون جرّاح‌ليغي اوْلموش بيزه «خيرالعمل»
خير ايش‌لر سايه‌سينده، اصلاح اوْلدو سيماميز 
چاي‌لارا چون‌كي، پساب- زاد چوْخ تؤكور فابريقالار
هر چيمه‌ن- اوزگونچويه، ياخشي شفادير درياميز 
ديل‌ده بير سؤز وار، اوره‌ك‌ده باشقا نيّت‌لر گزير
دوشمنه هئچ‌ده گره‌ك يوْخ، چون‌كي، وار دوْست- آشناميز 
آغزي‌دا اوْلسا دمير، چون‌كي آغاج‌دير دسته‌سي
بس يارار كؤك‌دن بيزي، چون‌كي، تانيش‌دير بالتاميز 
اوْيناداندا تسبئحي، بارماق‌لاري چوْخ برك توتاق
چون اوْوج بيردن آچيلسا، بل‌له‌نرتئز  حوْققاميز 
قوْنشودا اوْلسا توْيوق، غاز گؤرروك اوّل‌دن اوْنو
تئز طاماح‌لاننيق، اگر چه ائوده وار هيندوشقاميز 
ديل‌ده، درويش مسلكيك، «پول»- سؤيله‌ريك: «ال چيركي‌دير»
شهرده قصر آلمي‌شيق، يايلاق‌دا واردير ويلاميز 
بير نفر قولدور  گؤره‌نده‌، تئز اگيل‌ليك يئددي قات
يوْخسول- عاجز كس‌لرايله، قوْوزانار تئز دعواميز 
تاپداريق آمريكاني، غربي شعاردا هر زمان
گزمك آختارساق، اوْلاراؤز غرب، اؤز آمريكاميز 
بيربئله ياخشي صفت‌لرله، تعجب ائتمه‌يك
زندگانليق خوش كئچير، هم‌ده گؤزه‌ل‌دير دونياميز! 
آچما اوستون هر سؤزون- «آرش»!-يئيين گئتمه، دايان
قوْرخورام سؤز چوْخ اوزون گئتسه، چالينسين حلواميز
*

Keine Kommentare: