Samstag, August 17, 2013

آللاه - بختیار وهابزاده

ایدراکدا یول آچمیش گئجه ده ن گوندوزه آللاه
گولدورمه سن اؤز کؤنلونو ، گولمه ز اوزه آللاه
دونیایه شفق لر کیمی تانریم سه په له نمیش
قلبین گؤزو یانمازسا ، گؤرونمه ز گؤزه آللاه
*
آللاه بیلیریک جیسم دئییل ، بس نه دیر آللاه ؟
ان یوکسک اولان حاقدا ، حقیقتده دیر آللاه
دوندونسه تکامل و گؤزللیک قاباغیندا
درک ائت ، بو تعجب ده بو حئیرت ده دیر آللاه
*
بیلدیک ، بیلیریک ، گیزلیدیر اینسانداکی قدرت
هرکس اونو فهم ائتمه سه ، عاجیزدیر او البت
اینسانین ازل بورجودور اینسانلیغا حورمت
اینسانلیغا ، حورمتده ، لیاقتده دیر آللاه
*
گرچک ده بودور گیزلی دیر او ذره ده وحدت
بیر ذره ایکن جمله قووشماق بونو نیت
گؤردوکلریمیز ظاهیری دیر ، بطنه نفوذ ائت
باطنده کی ، جوهر ده کی ، فطرتده دیر آللاه
*
فطرتده یاتیر ، سؤزده ، سؤزون اؤز یوکو فیکریم
سئچمیش ، سئچه جه ک ، دائما توکدن توکو فیکریم
من بیر آغاجام یارپاغی سؤزلر ، کؤکو فیکریم
سؤزلرده دئییل ، سؤزده کی حکمتده دیر اللاه 
*
اینسان ،  تپه ده ن دیرناغا سن آرزو دیلک سن
نفسینده دویومسوز ، فقط عشقینده ملک سن
ظولمون اوزونه حاق دئییلن شیلله نی چه کسن
شیلله نده ، موهورله نمیش او غئیرتده دیر آللاه
*
جاهیل ائنر آلچاقلیقا ، اؤز قلبینه یئنمه ز
وجدان دان اگر دؤنسه ده ، خئیریندن او دؤنمه ز
ظولمتده ، جهالتده ، عداوتده ، گؤرونمه ز
ایلقاردا ، صداقتده ، محبتده دیر آللاه
*

Keine Kommentare: