بایاتیلار - سربازلارین زبان حالی

عزیز داغلی آتا - آنالار آللاه ایگیت لریزه رحمت ائیله سین. باشی ساغ اولسون. آللاه سیزه صبر وئرسین.
*

پادگان دا نلر اولدو، سرباز
ارزون اوره یینده سولدو
لو خبری گتیردیلر، سرباز
آنان بیر گون ده سولدو
*
اوره ییمده یوخدو دؤزوم، سرباز
دیلیم ده قورودو سؤزوم
یوخلوغون ائویمی ییخدی، اوغول
اؤلونجه آغلییار گؤزوم
*
پادگان داغ اولئیدی، بالا
دؤوره سی داغ اولئیدی
سربازلار اؤلن چاغی ، بالا
آناسی باش اوسته اولئیدی
*
اوزاق یئرده سرباز اولدون
گل تکی آچیلمامیش سولدون
دئییردین آز قالیر گلم سرباز
دشمن لره نشان اولدون
*
منبع: اینستاگرام

قورخو - خلیل رضا

من شئعر یازماقدان قورخورام  بیر آز
قیزا ایلک عئشقینی آچانلار کیمی،
ائله بیل قیز ائوی جئهیز ایسته ییر
بوتون غئیرتیمی، جسارتیمی.
*
من یازی ماسامدان قورخورام بیر آز
جانیمدا، جیسمیمده او قووّه وارمی؟
بَبَک قیلینجینین تایی دئییلسه،
شئعرین بو دونیادا ایشه یارارمی؟
قلم داش سدلری پارچالایارمی؟
*
قلم گؤتورمکدن قورخورام بیر آز
جانیمدا، جیسمیمده او قووّه وارمی؟
*

الهی بئله ده گؤزل اولارمی – ممد ایلقار

شاعر:  ممد ایلقار

الهی بئله ده گؤزل اولارمی
کیمدی قلم چکن نه گؤزل چکیر
اوز- اوزه، گوز - گوزه سئحیرلنمیشیک
نه من گؤز چکیرم، نه گؤز ال چکیر
*
گون آی اوزلوم، گؤزل لیکده بیرجه سن
بو گول لوکده، بیر من اولوم بیر جه سن
گول اوستونده آری یا باخ بیرجه سن
گؤر گولون نازینی نه گؤزل چکیر
*
سالما محمّدی، گؤزوندن گؤزل
گؤزوم گؤزمو گؤروب، گؤزوندن گؤزل
من اؤلموش نئیییم گؤزوندن گؤزل
نه بیر کؤنول دویور، نه گؤز ال چکیر
*

یارادان یار اولسا اگر انسانا

شاعر: بهمن وطن اوغلو
یارادان یار اولسا اگر انسانا
ساغالار یارالار، یاد دان دا چیخار ( یاد دان دا چیخار: از خاطرهم فراموش می شود )
آتسالار آتشه ابراهیم کیمی
آلوودان دا چیخا، اود دان دا چیخار
*
عاقیل آتالاردان بیر مثل ده وار
قضا اوز وئرسه، قویماق دیش قیرار
اوز وئرمه سه گؤره رسن کی سنه یار
قوهومدان دا چیخار، یاد دان دا چیخار ( یاددان: از بیگانه هم)
*
دردی درد بیلمه زه دئمه آ بهمن
بئل باغلاما عاغلی کمه آ بهمن
مینت لی چؤره یی یئمه آ بهمن
لذّت ده چیخار، داد دان دا چیخار
*

یازیغیم گلیر - بهمن وطن اوغلو

شاعر: بهمن وطن اوغلو
عؤمور یوللاریندا آغاردی بیرچک
آی ائللر ، آتالار عالیم دی گئرچک 
جوت اولسا میلچك ده قالیب گله جک  
تک اولان آصلانا یازیغیم گلیر
*
خیلقتین سیررینی دویا بیلمیرم
هر سؤزو آشیكار دئیه بیلمیرم 
نییه سیزیلداییر، نییه بیلمیرم  
ناله لی كامانا یازیغیم گلیر
*
گؤزومدن یاش آخیر اوزومه دن - دن
آمان آی آیریلیق اولمویایدین سن
بیر اؤلوم یاخشیدی سئویلمه مكدن 
طالعسیز جاوانا یازیغیم گلیر
*
ایگید ار آدلانار غئیرت اولاندا
اوزده حیا اولار، عیصمت اولاندا  
دیل بیلمز نادانا قیسمت اولاندا  
اهلی - حال جانانا یازیغیم گلیر
* 
بیر آن چاتیلمازمی قاشی اووچونون 
آخمازمی گؤزوندن یاشی اووچونون  
ده ینده گوللسی ناشی اووچونون 
یارالی جئیرانا یازیغیم گلیر
*
دؤورون گردیشینه اویا بیلمه ییب  
قلبیندن غباری یویا بیلمه ییب 
عشقینی كیمسه یه دئیه بیلمه ییب 
گیزلیجه یانانا یازیغیم گلیر
* 
ظالیم زامان، كیمی ائتدی بختییار  
اوركلرده كدر، حسرت، اینتیظار  
آمان آللاه داغلار بویدا دردی وار 
بهمن تک اوزانا یازیغیم گلیر
*

جان اوغلوم

شاعر: محرّم آستارالی

جان جان جان اوغلوم
آنا سنه قربان اوغلوم
شیرین شکر یاراتمیش
سنی یارادان، اوغلوم
*
جان جان جان اوغلوم
آنا سنه قربان اوغلوم
نئجه گؤزل یاراتمیش
سنی یارادان، اوغلوم
*
دنیایا گلدیین گون
سئوینج گتیردین منه
نه یاخجی کی واریمسان
هدیّه اولدون منه
*
جان جان جان اوغلوم
آنا سنه قربان اوغلوم
شیرین شکر یاراتمیش
سنی یارادان، اوغلوم
*
جان جان جان اوغلوم
آنا سنه قربان اوغلوم
نئجه گؤزل یاراتمیش
سنی یارادان، اوغلوم
*
سن سیز اولماسین گونون
ان گؤزل دیله ییم سن
گؤزلریمین چیراغی
هر زامان گره ییم سن
*
جان جان جان اوغلوم
آنا سنه قربان اوغلوم
شیرین شکر یاراتمیش
سنی یارادان، اوغلوم
*
جان جان جان اوغلوم
آنا سنه قربان اوغلوم
نئجه گؤزل یاراتمیش
سنی یارادان، اوغلوم
*
آنا دئین دیلینه
قربان اولوم آی اوغلوم
من سنین هر دردینه
درمان اولوم آی اوغلوم
*
جان جان جان اوغلوم
آنا سنه قربان اوغلوم
شیرین شکر یاراتمیش
سنی یارادان، اوغلوم
*
جان جان جان اوغلوم
آنا سنه قربان اوغلوم
نئجه گؤزل یاراتمیش
سنی یارادان، اوغلوم
*

دره لر

شاعر: نبی ثابت اوغلو

چینارلار قطار – قطار
قالخیب زیروه یه قاچار
داغا قیسیلیب یاتار

میشیل – میشیل دره لر
یاشیل – یاشیل دره لر
*
سیزلره وورغونام من
بئزه نیرسیز شفق دن
گونش چیخار افق دن
اووج – اووج زر اَلَر
دره لر دره لر دره لر
اووج – اووج زر اَلَر
*
قوش کیمی اوستونوزده
قاناد چالیم دره لر
شام لیقدا بیر آخشاملیق
قوناق قالیم دره لر
*

خسته یم

شاعر: وصال ابراهیم اف

یاندی باغریم کؤمور کیمی
بیر وفاسیز عؤمور کیمی
سن ده بیر گون گئده جکسن
عشق ندیر وفا ندیر
سئوگی ده جفا ندیر
اول آخیر بیله جکسن
سن ده بیر گون گئده جکسن
آیریلاجاغینی بیله بیله
ساده جه سئویرم ائله بئله
سنه وورغون سنه خسته یم
منیم محبت دیر آدیم
عشقیمی دویونجا دادیم
غملی ماهنی لارا بسته یم
داغ چکسن ده کوره ییمه
امضانی آت اوره ییمه
سن نن منه امانت اولسون
عشق ندیر وفا ندیر
سئوگی ده جفا ندیر
اول آخیر بیله جکسن
سن ده بیر گون گئده جکسن
آیریلاجاغینی بیله بیله
ساده جه سئویرم ائله بئله
سنه وورغون سنه خسته یم
*

کیشی - نصیر پایه گذار

یا کیشی اول، یا ناکیشی  
لازیم دیر کی، یانا کیشی  
اؤزون چکمز، یانا کیشی  
اصیل کیشی،  دئمز منم  
اوکی منم دئمز،  منم  
*
 

نصیر پایگذار

من سنی اؤزومه گونو گؤرورم

گنوده من سنه گونو گؤرورم

سن سن منیم گونوم آییم اولدوزوم

عؤمرومده گون تک بو گونو گؤرورم

دیلده - شاعر: حمیده رئیس زاده

دیلده دوگونله‌نیب سؤزوم، دای دئمیرم غم آچدیرا
باغلی قالان سئویم یولون درد اولا همدم آچدیرا
ساتمادا قالمیشام هله، عالمی آرپا بوغدایا
بلکه بو آل - ‌وئرین یولون حضرت آدم آچدیرا
*

جانیم نه قدیر وار منه جانان سن اولارسان

خاقانی شروانی

جانیم نه قدیر وار منه جانان سن اولارسان
جان دان دا عزیز اولسا بیری جان سن اولارسان
سن ایندیه دک قلبیم اوچون قلبدین ای یار
بوندان دا سورا جانیم اوچون جان سن اولارسان
هر یارام اگر اولسا اونون درمانی سن سن
هر دردیم اولارسا اونا درمان سن اولارسان
کؤنلونده نئجه ایسترسه ائله وئر منه فرمان
عمروم نه قدر وار منه سلطان سن اولارسان
بوندان بئله آلداتما منی کفر ایله دیل ایله
خاقانی یه هم کفر هم ایمان سن اولارسان
خاقانی دئییر گلسن اگر ای گل شهلا
البته کی خاقانی یه خاقان سن اولارسان
*

بیر سلاما دیمه دی - بختیار وهابزاده

بیر سلاما دیمه دی( بختیار وهابزاده)
او گون من سنی گؤردوم
سلام وئرمک ایسته دیم
اوزونو یانا توتدون
اوزونو یانا توتدون
*
سؤیله ایللردن بری
قلبیمیزین بیر ووروب
بیر دویدوغو ایللری
آخی، نه تئز اونوتدون؟
*
قوپ ای توفان، اس ای یئل
خزل اولوم تؤکولوم
نئچه واخت دیر ایلده، بسله دییم محبت
بیر سلاما دیمه دی
*
شیرین گولوشلریمیز، آجی فغانلاریمیز
بیر سلاما دیمه دی
گئتدین دالینجا باخدیم
جان آیریلدی جانیمدان
سن نئجه اعتناسیز
اؤته بیلدین یانیمدان؟
*
قوپ ای توفان، اس ای یئل
خزل اولوم تؤکولوم
نئچه واخت دیر ایلده، بسله دییم محبت
بیر سلاما دیمه دی
*
سن منه ظلم ائیله دین
منه ظولوم یاراشیر
بیر سلاما دیمه ین
عشقه اؤلوم یاراشیر
*

سنی مبتلا اولان آختاریر - حمیده رئیس زاده

سنی مبتلا اولان آختاریر، نه دئییم دوا دئمه‌ييم سنه
سنی باغرینا دالان آختاریر، نه دن آشنا دئمه‌ییم سنه
نفس آختاریر سنی دم‌به‌دم، بو چالیشمادا باش اولور قدم
دئمه‌سن یولو نه سایاق گئده‌م، دئمه بی‌وفا دئمه‌ییم سنه
دئدیلر بلیٰ دئمیشم ازل، اونودارکن اولدی یازیم خزل
نه ائدیم هارایلا غزل-غزل، ینی دن بلیٰ دئمه‌ییم سنه
سنه یول تاپان چکیلیر دارا، یئتیشیر یولوم او بوروقلارا
قاریشیر جانیم دورولوقلارا، نه سایاق صفا دئمه‌ییم سنه
اؤزومو زمانلارا حاخلاديم. اورک اؤلکه سین سنه ساخلادیم
سحری، گونشله آداخلاديم، نیه مدّعیٰ دئمه‌ییم سنه

دولانسین - علی آقا واحد

زولفونده نه لازیم گؤزلیم شانه دولانسین

قویما او حرمخانه یه بیگانه دولانسین
عیب ائیله مه کویوندا دولانسام گئجه – گوندوز
شمعین گرک اطرافینه پروانه دولانسن
ساقی دولانیم باشینا می جامینی گزدیر
سرمست اولوم باشیما پروانه دولانسین
اول زولفه کؤنول وئرمه دئییرلر منه، ال چک
اونسوز نئجه بس بو دل دیوانه دولانسین؟
*

نوحه ای از شباهنگ

شاعر: عبدالرحیم شباهنگ تخلص هندی
( تولد سال 1250 در تبریز – درگذشت سال 1346 در تهران ) شاعر و مرثیه سرای ترکی و نماینده مجلس شورای ملی بود.

آخرین دیداری چوخ گؤزلر بو قولسوز باش حسین
گل جمالون گؤرمه سم جان وئرمرم قارداش حسین
رشده یتدیم آستانونده چوخ اولدی زحمتیم
سایه ی لطفونده مشهور اولدی نام و شهرتیم
قابل بذل توجّه اولسا بو گون خدمتیم
تاج عزّت قویدوقون بیر باشه گل چک باش حسین
*
پرورش وئردون ، منه تعلیم اخلاق ائیله دون
نقص خدمت گؤردون امّا عفو و ایرفاق ائیله دون
کربلا حقّینده مندن اخذ میثاق ائیله دون
شکر للَّه باشیم اولدی باشیوه شاباش حسین
*
حقّ تعلیمون بیوکدور من ثنادن عاجزم
شاکرم دیلدن، ولی ذکر ادادن عاجزم
باش سینوب قولّار دوشوبدور دست و پادن عاجزم
سن اوزون لطفیله گل بالینیمه قارداش حسین
*
مدّت عؤمرونده بی مهر اولمادون بیر آن منه
هر نفسده ائیله دون مین نوعیله احسان منه
ای کلام ا... ناطق گل اوخی قرآن منه
خجلت دیرینیمه نطقون اولا پاداش حسین
*
حسن طالعدن قازاندیم چون شهادت قرعه سین
شوقیله جنگ ائیله دیم آلدیم فراتین شرعه سین
لبلرون یادیله امّا ایچمه دیم بیر جرعه سین
سیریده همرنگ اولور چون یاریله یولداش حسین
*
وارد اولجاق نهره طرد ائتدیم گروه ناکسی
دولماسون مشکه کنار ائتدیم سودان خار و خسی
بیر اوزون طومار غم آچدی سویون دلکش سسی
وای اگر بیر گون او احساساتیم اولسا فاش حسین
*
مشکی حفظ ائتمک اومیدی وئردی قوّت هوشیمه
دولدوروب محکم ائدوب آهسته سالدیم دوشیمه
گه اؤپردیم گه چکردیم جان کیمی آغوشیمه
قهر اولا اوخ نقشینی ترسیم ایدن نقّاش حسین
*
هر ایکی قولّاریمی بو مشکه ائتمیشدیم سپر
اوه گؤزیمدن قولّاریمدان ائیله دیم صرف نظر
مشکی دلدی، سو تؤکولدی، سعییم اولدی بی ثمر
سو یئرینه مشکیمه قان دولدی باشا باش حسین
*
گرچی یارم چوخدی، سانما من او چوخدان آغلارام
اوخ دلن مشکیمده سو یوخدور او یوخدان آغلارام
جان یاخان قان - قان دین پرّآن بیر اوخدان آغلارام
سانجیلئیدی قلبیمه بو اوخ منیم ایکاش حسین
*
سن اؤزون یاخشی بولورسن ای شه گردون حشم
اولماسا قول پرچم آچماز اهتزاز ائتمز علم
سرنگون اولدی علم چون قولّاریم اولدی قلم
بیرقیم گؤز - گؤز اولوب گؤزدن ؤوکر قان یاش حسین
*
قولّاریم دوشدی بدندن شهپر عنقا کیمی
هر بیری بیر چشمه سار اولدی جوشان دریا کیمی
بسکه قان آخدی بو چؤلده مشهر مینا کیمی
گون قاباقیندا یانان داشلاردا اولدی یاش حسین
*
گل گلنده دقّتیله باخ سران لشکره
باشیم اطرافینده واردور گؤر نه خوش بیر منظره
یوز قویوب اون یئتدی خنجر بیر یارالی حنجره
من کی باشدان گئچمیشم لازیم دگل پرخاش حسین
*
گل یول آختارسان یول اوستونده دوشن قول گؤسترور
مشعل آهیم عزیز مهمانینا یول گؤسترور
عاقبت حسّ اخوّت یول امین اول گؤسترور
همره اهل کرمدور دست گوهرپاش حسین
*
ناتوانم سون نفسده ظلّ رافت ایسترم
ذرّه ی بی قدرم امّا قرب عزّت ایسترم
لطف صحبت گرمی بزم محبّت ایسترم
فیض آلور خورشید عالم تابیدن خشخاش حسین
*
من کی قوملار اوسته یالقوز دوشموشم چوخ بی کسم
بیمناک اولمام ولو امّیدیمی جاندان کسم
تک سنون انجام کاروندن اخا دل واپسم
قورخورام محشر قوپا، نابود اولا داغ داش حسین
*
من شباهنگم اگر ظاهرده گل تک سولموشام
باطناً حبّ حسین ایله لبالب دولموشام
افتخاریم وار سعادت یار اولوبدور اولموشام
پاسگاه عشقیده سرباز حاضرباش حسین
*

نوحه - خورشید بانو ناتوان

زبان حال حضرت مسلم ابن عقیل (علیه السلام)
شاعر: خورشید بانو ناتوان

سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
سؤیله گینن گتیرمه سین کوفه یه نازلی اکبری
ظلم ایله قانینا باتار طرۀ مشک عنبری
سویله گتیرمه قاسمی قاتیلی ائیلییر شتاب
گلسه اولوریقین اونون قانیله اللری خضاب
گؤزلویوری که شمردون دین ائوین ایلسین خراب
رحم ائلسین او زینب بخت قرایه گلمسون
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
گلمه یه یوخدی فرصتیم قانیله نامه یازمیشام
گلسن اگرتوکر قانین ظلمیله فرقه ظلام
قارداشوین اوزون قولو گؤرمه روا اولا قلم
باجیلارین باش آچماسین دشت بلایه گلمسین
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
یئتسه اگرخبرسنه اؤلدی بو مسلم عقیل
ابن زیاد نعشیمی گرچه ائدیبدی چوخ ذلیل
غسل و حنوط اولمادی اولدی قناره ده قتیل
ایستمورم عیالیمی قویما عزایه گلمسون
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
باد خزان اسرسنون غنچه صفت عیالیوه
رحم ائله ای آقا بوگون قاسم خوش مقالیوه
جانی تصدق ائیله دیم اکبریمه جمالیوه
صاق اولا رهبریم حسین عمری فنایه گلمسون
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
فاطمه اوغلونا صبا گئت بئله ائیله شرح حال
کوفیه گلمه کوففه نین شهرین آلیب غم و ملال
بیرده عم اوغلوما دئنه تا منی ائیلسین حلال
مسلیمی اؤلدوروله اول داد و فغانه گلمسین
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
حسرتم اول جماله من آه چکرم بو سینه دن
کوفه ده واردی قاتلین گلمه آقا مدینه دن
قویما بالام خدیجه نی آیرلا اول سکینه دن
باشینه ال چک آغلییب شورو نوایه گلمسین
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
دارالعماردن چیخیب عرشه فغان و شیونیم
بیلمدیم هیچ نه نحویله دوندی خزانه گلشنیم
باشینا نه گلیب قالیب هاردا ایکی بالام منیم
باشی اولارتک هیچ کیمون درد و بلایه گلمسین
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
سؤیله اونون آناسینا باشینا قاره باغلاسین
ایکی بالادن آیریلیب آهی جهانی داغلاسین
توتسا عزا خدیجه ده سؤیله که گزلین آغلاسین
غم توزی تا عذار اول ماه لقایه گلمسین
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
فاطمه نین کنیز بو قصه نی ائیله سن تمام
بیر بیره دگدی مرد و زن شوره گلیبدی خاص و عام
نوحه ائدیربو(ناتوان)روزو شب آغلیور مدام
تاپماسا بیردرِنجات داربقایه گلمسون
خورشید بانو متخلص به ناتوان قفقازی

کرم قیل - حمیده رئیس زاده

کرم قیل بیر نظر واریوخ نه وار دنیاده کئفله‌نسین
عدم یوردوندا یوخلار باشلاسین ایجاده کئفله‌نسین
یئته‌نلر وصلینه وصل عالمیندن باشقا حال بولسون
مقام وصله گؤز تیکمیش منیم تک ساده کئفله‌نسین
جانیم قربان سنه باخ دالغالاندیر باده دریاسین
بوغولسون جنبه‌سیز پیمانه‌لر دریاده کئفله‌نسین
اجابت وعده وئردین اولموشام حاجت اجابت قیل
یول اوسته گؤز یاشیندان ایسلانان سجّاده کئفله‌نسین
اوزاخلاردان گلن واردیر باخیب گیزلین گولن واردیر
کرم قیل اؤیله کی ایثار الیندن باده کئفله‌نسین
اگر من‌لیک داغی یول کسسه باخ داغلار داغیلسینلار
دلالت اهلی باخسین تيشهٔ فرهاده کئفله‌نسین
دولاندیر بیر باخیش رطلین، قارانلیق بور-بوجاقلاردا
سحر تک دردینه اووسارلانان آزاده کئفله‌نسین
حمیده رئیس زاده ( سحر )

بیر غزل - حمیده رئیس زاده

باخیش برقی آچاردیر گؤزلرینده
حمیده رئیس زاده ( سحر )

باخیش برقی آچاردیر گؤزلرینده
چاخیر دریاسی واردیر گؤزلرینده
گؤرنده عشقه قارشی چیرپینان جان
محبّت پاسداردیر گؤزلرینده
باخیشلا پرده پرده جان باغیشلار
باخیش پروردگاردیر گؤزلرینده
تانیش لیق آختارانلارایتگین عشقه
تانیشلیقلار قطاردیر گؤزلرینده
قیام ائتمکده دیر مطلوبی یوخدان
قیامت آشکاردیر گؤزلرینده
سحر سانما آدامسیزسان غریب سن
حمایت برقراردیر گؤزلرینده
*

 

گلیرم - علی آقا واحد

بیرآزجا صبر ائله ای یار مهربان گلیرم
سنین یولوندا فدادیر بو جسم و جان گلیرم
وفالی بلبلونم حسرت جمالینله
چمن چیچکلری تک باغریم اولدو قان گلیرم
منه تسلی وئرن بیر سنین خیالیندیر
او دیلبره حالیم ائدین بیان گلیرم
بهشت اولا غربت گئنه جهنم دیر
وطن محبتی وئرمیر منه مجال گلیرم
منیم بو حالیمی « واحد » نیگارا تئز یئتیرین
اونودماسین او یار هر زامان گلیرم
*

گئجه لر

شاعر: بختیار وهابزاده

تئللرینی دولاییب
بوینوما سار گئجه لر
منیم سیرداشیمسینیز
گئجه لر آی گئجه لر
*
اوره ییمده سحرین
نئجه حسرتی وار
انتظار آنلاریندا
گئجه اوزون اولورموش
*
قوش دک اوچار خیالیم
هاردان هارا گئجه لر
من حسد آپاریرام
یاتانلارا گئجه لر
*
فیکریم داغدا آراندا
یوخو هارا من هارا
خیالیم سانجیلیبدیر
ساریشان اولدوزلارا
*
اوره ییمده سحرین
نئجه حسرتی وار
انتظار آنلاریندا
گئجه اوزون اولورموش
*

کرب و بلا چؤلونده

کرب و بلا چؤلونده ، طوفان دی یا محمد
گؤندر کفن حسینه ، عریان دی یا محمد
مهمان ائدیبله دعوت ، قویموبلا احترامین
بیر مشک سو گتیرسن ، احسان دی یا محمد
ابر ظلام توتموش کرب و بلانی یکسر
بو ابر بارشی گؤر ، پیکاندی یا محمد
لیلا نوایه گلمیش ، سس لر هرایه اوغلون
هجر آتشیله قلبی ، سوازندی یا محمد
دوشموش یانان چادر دا ، اصغر آناسی بیهوش
جانین آلیبلا گویا، بی جان دی یا محمد
قاسم وجودی دوشموش ، گل تک اولوبدو پرپر
بلبل کیمی آناسی ، نالاندی یا محمد
از بس کی یاره اوستن ، یاره دگیب حسینه
باشدان باشا وجودی ، شان شان دی یا محمد
جسمینده قویمویوبلار ، بیر پیرهن ده دقالسین
معناده بیر سویولموش ، قرآن دی یا محمد
گل گؤر ندجه دوشوبدور ، اوغلون بلا چؤلونده
گودال قتلگه ده ، عریان دی یا محمد
انگشتینی کسیبلر ، انگشتر اوسته « بجدل »
بو عالمه سلیمان ، حیران دی یا محمد
یوخ بیر نفر حسینین ، قویسون مزاره نعشین
گونلر ائوینده یاندی ، اودلاندی یا محمد
هئچ مسلمی بو حاله ، سالماز جهاندا کافر
امت ده گؤر نه ظلم و طغییان دی یا محمد
« باکی » سؤزون دایاندیر ، ائیله دوباره تکرار
کرب و بلا چؤلونده طوفان دی یا محمد

*
شاعر: باکی

گل دئییر

شاعر: باباوزیر اوغلو

سن سیز گلن یاز دئییل
قلبیم سنی گؤزله ییر
اؤلدورمک دیر قصدین منی
بو ظولومدور ناز دئییل
من الیندن نه لر چکدیم
داها بسدیر آز دئییل
سن سیز آچان گول دئییل
اؤتن عؤمور گون دئییل
حسرتیندن عمان اولان
گؤز یاشیمدیر سئل دئییل
باخیشلارین سئودیم سئودیم
دیلین ییخیل اؤل دئییر
هردن اوزاق گئن گزیرم
کوسورم باریشیرام
بیردن ائله آه چکیرسن
من اونسوز آلیشیرام
گؤزون قاشین گل دئییر
گل باریشاق گل دئییر
باخیشلارین سئودیم سئودیم
دیلین ییخیل اؤل دئییر
*

واخت گلدی

شعر: الهامه عادل قیزی

واخت گلدی ترک ائدیب گئدیرم سنی
درنا قاطاری ایله قاییداجاغام
قار – بوران دولدورسا کؤرک قلبیمی
سنین عشقین ایله اووناجاغام
*
سن گؤرن اول کی جاوان دئییلم
سئودا آتشینه یانان دئییلم
خوشبخت گونلریمی دانان دئییلم
اورک ده بو عشقی سویوداجاغام
*
هر گئجه قوناق تک یوخوما گلن
شیرین سؤزلر دئین اوزومه گولن
سؤزلریم یاشلی دیر، قوی قالسین
سیلمه سنلی خاطره لری اویوداجاغام
*

دؤنه - دؤنه

سؤز: ایکرم علی اف

تنهایام بو ائوده، سن چوخ اوزاقدا
باهار چیچه ییمیز قدر اوزاقدا
بیرداها دانیشیب گولمه ییم چتین
سونو ظولوم موش بو محبتین
سن منیم سئوگیمین قسمتین ایلکی
سن سیز بو حیاتیم – گونوم حیات دئییل کی
گؤزلریم یولوندا، داها قاییت گل کی
سنین له بو دنیا – عالم، ائله گؤزل کی
دؤنه – دؤنه عؤمرومه دنیا گتیر، گؤزل، تمیز
دؤنه – دؤنه دنیایا سئودا گتیر، گؤزل، تمیز
دؤنه – دؤنه سئودایا معنا گتیر، گؤزل، تمیز
دؤنه – دؤنه عؤمرومه سعادت گتیر
سندن اؤزگه دئییل کیمسه گره ییم
سن سیز زهر کیمی دوزوم، چؤره ییم
اؤزوم ده بیلمیرم نه علاجیم وار
گوجلو قوللارینا احتیاجیم وار
اِ بیر آخشام دا سن سیز گلیر
بیر ساباح دا سن سیز آچیلاجاق
آچیلاجاغیم؟
یوخلوغوندا آختاراجاغام سنی
حسرتیندن یانا – یانا یاشایاجاغام
گئتدیین یوللارین اوتونا، چیچه یینه دؤنه جه یم
قارانلیق ایچیندن گؤزلرینی گؤره جه یم
یالواراجاغام، قیشقیراجاغام، یاغیراجاغام
گل بسدی داها گل
*

بس نه دئییم

شاعر: سلیمان رستم

سئوگیلیم من سنه، جانان دئمه ییم، بس نه دئییم
حسنونو دردیمه،  درمان دئمه ییم، بس نه دئییم
بیرجه سؤزله جانیما جان وئردین
گونده مین یول سنه من جان دئمه ییم
بس نه دئییم، نه دئییم، نه دئییم
*
تیکیلیب گؤزلریم حسرتله یولونا
اولماسین اورتادا هجران دئمه ییم
سن جانیمسان گؤزلیم سن، گؤزلیم سن، گؤزلیم
اؤزومه بخته ور انسان دئمه ییم، بس نه دئییم
نه دئییم، نه دئییم
*
یوخ منیم باشقا گؤزللرده گؤزوم
سنین هجرانینا من نئجه دؤزوم
سنه قربان بو سلیمان دئمه ییم
بس نه دئییم، نه دئییم، نه دئییم
*

ایلک محبّت

شاعر سلیمان رستم  
سئوگی سیز بیر چیچک بیتمز ای کؤنول
انسان مرادینا یئتمز ای کؤنول
ندن دیر بیلمیرم گئتمز ای کؤنول
باشیمدان سئوداسی ایلک محبتین
*
بیر درده نئینه سین لقمانین الی؟
الیمه دیمه میش جانانین الی
دؤیدو قاپیمیزی هیجرانین الی
بودورمو وفاسی ایلک محبتین؟
*
من اونو سئومیشم بیر ایلک باهاردا
او منی ترک ائتدی بوران دا قاردا
هر یارا ساغالیر اونودولاردا
ساغالماز یاراسی ایلک محبتین
*

آنام یادیما دوشدو

شاعر: مروارید دیلبازی

ایلیق کولک لر اسدی
یاز گلمه یه تلسدی
منیم اوره ییم اسدی
آنام یادیما دوشدو
*
بنووشه دسته – دسته
قیزیل گول یارپاق اوسته
سولار آخیر آهشته
آنام یادیما دوشدو
*
چشمه گؤردوم دایاندیم
آلیشدیم اودا یاندیم
خیاللاردان اویاندیم
آنام یادیما دوشدو
*

من سنین یانینا قیشدا گلردیم

شاعر: علی آقا کؤرچایلی

من سنین یانینا، قیشدا گلیردیم
چیچک آختاریردیم، گزدیم هریانی
هر طرف بیاض قار، گول - چیچک هانی؟
تاپیب بیر دیبچکدن، آخیر کی دردیم
*
سونرا سؤیله دیم کی، باهاردا سنه
بیر دسته باغلارام، یاز گوللریندن
بودور یولا سالیب قاری قیشی من
سنین گؤروشونه گلمیشم یئنه

گلمیشم یئنه، سنین گؤروشونه
گلمیشم یئنه
*
دسته باغلامادیم، نه یه گرک دیر
باخ اودور نرگیس له، دولودور لک لر
لاله نین عطرینی، یاییر کولک لر
یاسمن – قیزیل گول، لئچک – لئچک دیر
*
عزیزیم اونلاری، قوپارتماق اولماز
گوللره چؤلده باخ، داغ دؤشونده باخ
اونلاردان من سراغ گتیردیم آنجاق
بیر الیمده باهار، بیر الیمده یاز
بیر الیمده یاز، بیر الیمده باهار
*

سئوگیلیم

شاعر: وقار احمد

دایان کسمه سؤزومو
صبیرلی اول، تلسمه
هارا سس وئر سسیمه
دینله منی سئوگیلیم
*
صافدیر اوره ییم ایچین
گناهیم یوخ آند ایچیم
قالمادی طاقت گوجوم
دینله منی سئوگیلیم
*
سؤزلریمده یوخ یالان
منم اودونا یانان
باغریم اولاجاق تالان
دینله منی سئوگیلیم
*
دوز دانیشان منم من
عشقه صادق منم من
سؤیله منه سن احسن
دینله منی سئوگیلیم
*

یاندیرار سنی

شاعر: ایوب سعدی

ایز قویما ایزیم اوسته
ایزیم یاندیرار سنی
سؤز دئمه سؤزوم اوسته
سؤزوم یاندیرار سنی
گؤزلرینه باخارام
گؤزوم یاندیرار سنی
*
چایلار کیمی آخارام
شیمشک اولوب چاخارام
گؤزلرینه باخارام
گؤزوم یاندیرار سنی
*
ایترم ایلیم – ایلیم
بیلینمز آییم – ایلیم
دؤزه بیلمز سن گولوم
دؤزوم یاندیرار سنی
*
آی تئللی، تئللی بورما
بئله یاخین دا دورما
اودلانارام، ال وورما
کؤزوم یاندیرار سنی
*
چایلار کیمی آخارام
شیمشک اولوب چاخارام
گؤزلرینه باخارام
گؤزوم یاندیرار سنی
*

آغلاما قربانین اولوم

شاعر: گولایه شینیخلی

فلک ظولومکاردی گؤز یاشی سیلمز
اوزولر اوره ییم بو درده دؤزمز
بو دنیا بیر داملا یاشینا دیمز
آغلاما قربانین اولوم آغلاما
*
بو نه یاشدی گؤزلرینن سوزولور
آغلاما قربانین اولوم آغلاما
آغلادیقجا بیل اوره ییم اوزولور
آغلاما قربانین اولوم آغلاما
یارالانمیش اوره ییمی داغلاما 
*
اجاق یانار آلاولانار قور گلر
یاشلارینان سینه مه زور گلر
قورخورام کی گؤزلرینه تور گلر
آغلاما قربانین اولوم آولوم آغلاما
یارالانمیش اوره ییم داغلاما
*
آغلاداجاق آغلادیقجا بیل گیلن
گؤزلرینین قان یاشینی سیل گیلن
دردین اولسا گولایه یلن بؤلگونن
اغلاما جیران بالاسی آغلاما
آغلاما قربانین اولوم آغلاما
*
 

سنی اونوتماق اوچون سئومه میشم من

شاعر: گولایه شینیخلی 

بیر غملی بلبلم دنیا دار قفس

عشقین نغمه سی دی بو ناله بو سس

اولماسان کسیلر آلدیغیم نفس

اونوت منی داها اونوت دئییرسن

سنی اونوتماق اوچون سئومه میشم من
*

دوران خاطیریمه دیه یدی آغلادیم

عؤمور یئلکه نیمی ایدی آغلادیم

ال غمین باش منیم دؤیدو آغلادیم

تور قوروب گؤزونده گؤرورسم می من

سنی اونوتماق اوچون سئومه میشم من
*

گؤرنلر سوروشدو گؤرن نه ایزمیش

دئمه رم سینه می ستم لر ازمیش

حسرتین ده اؤزون قدر عزیزمیش

اوغروندا آغاردیب ساچیمی دن دن

سنی اونوتماق اوچون سئومه میشم من
*

گول چیچک آچمادی سن سیز باهاریم

سنین وارلیغین دی دنیادا واریم

سن سیز عؤمور دئییل یاشادیخلایم

او گونون او آنین اولوب عؤمرو کن

سنی اونوتماق اوچون سئومه میشم من
*

حاق دی کؤنوللرده محبت آندی

بو یولدا اصلی ده کرم ده یاندی

مقدس هر عشقین قربانی جان دی

منه خوش دو اؤلوم دئمه رم نه غم

سنی اونوتماق اوچون سئومه میشم من
*

ایستی اوجاغیندا کؤزون ابدی

گؤزومه کؤچوبدو گؤزون ابدی

اؤزونده عزیزیم اؤزون ابدی

ایستر یاخیندا اول یاد اولان گن من

سنی اونوتماق اوچون سئومه میشم من
*

گولایه قولون دو سن عشق آللاهیم

آیاغین ده ین یئر زیارتگاهیم

ای کؤنول سلطانیم ای کؤنول شاهیم

منه مندن یاخین بو عالم ده سن

سنی اونوتماق اوچون سئومه میشم من

*

آی منیم گؤزلری کور محبتیم

شاعر: گولایه شینیخلی

نئچه قرینه لر یوروب گلمیسن
نئچه زنجیرلری قیریب گلمیسن
کیمنن عونوانیمی سوروب گلمیسن 
اونسوزدا چوخالمیش ذیللی ظولمتیم
آی منیم گؤزلری ، کور محبتیم 
*

بیرگی گئتدیک بو یوللاری بیز قوشا
چاخدین منی هر قایایا هر داشا
کؤنول وئردیم بیر خیالی سرخوشا
هدر اولدو هر چکیلن زحمتیم
آی منیم گؤزلری ، کور محبتیم
*
کرمین قوروتک قور گتیرمیسن
طیلسیم لی دونومو دار گتیرمیسن
آی وجدان سیز
حسرتدن گؤزومه تور گتیرمیسن
بودورمو بختیمه دوشن خلعتیم
آی منیم گؤزلری کور محبتیم

*

اولاجاغام

شاعر: بابا وزیر اوغلو

بودا سون آیریلیق سون دایاناجاق
قسمتین الیندن بیز هارا قاچاق
گومان کیمده اولدو بیلمیرم آنجاق
بیلیرم تک یانان من اولاجاغام

*
بیلمیرم سئوینجدن یا غم دن اولدو
بیلمیرم دوماندان یا چن دن اولدو
بلکه ده آیریلیق تک سندن اولدو
بیلیرم تک یانان من اولاجاغام

*
نییه آیریلیریق هارا گئدیریک
ووروب قلبیمیزه یارا گئدیریک
بلکه ایکیمیزده گومان ائدیریک
تک یانان من اولاجاغام

*
بلکه بیر یوخویدو اویانمالی سان
بلکه گئری دؤنوب دایانمالی سان
جهنم اودوندا سن یانمالی سان
سانماکی تک یانام من اولاجاغام

*

جاوانلیق

شاعیر: سمیر اشرف اف

یاش اؤتدو اوتوزو، گئتدی جاوانلیق
اولانلار دوشه جک یادا بیر آنلیق
اؤنومده بیر یولوار سونو قارانلیق
ایسته سم ده گئدیرم، ایسته مه سم گئدیرم
*
اؤتن گئنج لییمه، یانیم یانماییم
اوگؤزل گونلری آنیم آنماییم
یولوم چوخ اوزاقدیر قوی دایانماییم
ایسته سم ده گئدیم ایسته مه سم ده
*
گزدییم یاخشی یول، آما گؤز دئییر
چاتمادان دنیانی دولان گز دئییر
قارشی دا قوجالیق منی گؤزله ییر
ایسته سم ده گئدیرم ایسته مه سم ده
*

گؤیرچین

شاعر: رامیز تکانی
آی یازیق سن هارا بو یئرلر هارا
اوچ گئت سالما بورا مئیل گؤیرچین
جانلی قبریستانلیق آدلانیر بورا
بورا سنین یئرین دئییل گؤیرچین
اوچ گئت سالما بورا مئیل گریرچین
زندان اوستو آچیق غملی قفس دیر
بورانی یورد سئچمک منجه عبث دیر
ایکی قانادون وار بو سنه بس دیر
یئرینه اولسایدیم اینان گؤیرچین
من بوردا قالمازدیم بیر آن گؤیرچین
یاخین وطنیمین اوزاق غربتی
قلبیمه توش ائدیب دردی محنتی
دردیمیش آزاده حیات حسرتی
حسرتم اوبایا یوردا گؤیرچین
بیر گونوم یوز ایل دیر بوردا گؤیرچیم
گئنج لییم تضادلی طالعیم قارا
چرخیم تک چئوریلن تسبیهیم قارا
پار – پالتلاریم قارا چرره ییم قارا
قارا تورپاغادو یونوم گؤیرچین
اوچ سنین باشینا دؤنوم گؤیرچین
منی درد چکمک چون دوغوبدور آنام
دونیایا گلمه یه یامان پشئمانام
من درد سازاقیندا دونموش اینسانام
سویوق دؤرد دوواردا دونما گؤیرچین
تیکانلی محفله قونما گؤیرچین 
آماندی زیندانی چیخارت یادیننان
یوخسا خوشون گلیر دوستاق آدیننان ؟
گل ال چک معناسیز ترس عنادیننان
بو سرسم فیکریندن داشین گؤیرچین
سونرا بلا چکر باشین گؤیرچین
ای دوستوم آغ قوشوم قربانین اولوم
اوچ گئت ائله ائتمه بولود تک دولوم
منیم الهی دن باغلانیب یولوم
دولان بودونیانی گز آی گؤیرچین
آسوده سماده سوز آی گؤیرچین
سنین له دانیشیم دئی هانسی دیل ده ؟
اؤلدوم کی سؤزومون معنی سین بیل ده
کهنه دردلریمی بو تزه ایل ده
نولار تزه له مه رحم ائت گؤیرچین
منی راحات بوراخ اوچ گئت گؤیرچین
منیم چوخ بلالار چکیبدیر باشیم
من دن اوز دؤنده ریب دوستوم سیرداشیم
بوگون تامام اولور 33 یاشیم
آغلا منیم چون خیسین – خیسین گؤیرچین
دئی آللاه قاپینی آچسین گؤیرچین
سنین یووان وارمی ، بالان وارمی ؟ دئی
گؤزلری یوللاردا قالان وارمی ؟ دئی
بو یامان حالینا یانان وارمی ؟ دئی
دؤنده رمه باغریمی قانا گؤیرچین
آی بدبخت آی تنها آنا گؤیرچین
رامیزم آزادلیق منه نجات دیر
اوره ییم آنام چون چوخ ناراحات دیر
اوچ گئت سلامیمی آناما چاتدیر
گئت بیر گؤر نئجه دی آنام گؤیرچین
دئی مندن آناما سلام گؤیرچین
گؤیرچین گؤیرچین ای آق گؤیرچین
آغ پالتار گئیمییر دوستاق گؤیرچین

باشی کسیک گؤزل کؤتوک

شاعر: رامیز روشن
باشی کسیک گؤزل کؤتوک
بو داغی سنه کیم چکدی؟
بالتانی سنه کیم ووردو؟
پیچاغی سنه کیم چکدی؟
*
ایپک – ایپک یارپاقلارین
کولک لرله تالاندی می؟
بیلک – بیلک بوداقلارین
اوجاقلادرا قالاندی می؟
*
کوسدون مو طالعین آجی لیقیندان؟
ظالیم لر کئچمدی قوجالیغیندان؟
ییخیلمیش اوجالیقیندان
باشی کسیک گؤزل کؤتوک
گؤزل کؤتوک، سیزیلداما، گؤینه مه
نه بالتالار، نه پیچاقلار قالاجاق
اوجالیقدان ییخیلسان دا غم یئمه
سن ییخیلان اوجالیقلار قالاجاق
*
دونیانین کوله یی کئچر
قاری یاغیشی کئچر
قاطار – قاطار قوشو کئچر
داش آتارلار، داشی کئچر
سن ییخیلان اوجالیقدان
اومودلو گؤزلر تیکیلر
کؤرپه آغاجلار یئکه لر
یئکه لر، قالخار ، دیکه کر
سن ییخیلان اوجالیقا
*
مندن سنه سلام اولسون
باشی کسیک گؤزل کؤتوک
بالام اولسا، بالان اولسون
باشی کسیک گؤزل کؤتوک
اییلیم کؤکسونه باشیمی قویوم
گئجه لر لایلامی چالاسان منیم
بؤیرونده بیر ائوین داشینی قویوم
ائویمین دیره یی اولاسان منیم
گؤزل کؤتوک
یارالارین کؤز باغلاسین ساغالسین
بو دونیادا نه بالتالار
نه پیچاقلار قالاجاق
اوجالیقدان ییخیلسان دا
گئنه جانین ساغ اولسون
بو دونیادا
سن ییخیلان اوجالیقلار قالاجاق
*

نصیر پایه گذار

نصیر پایه گذار دان بیر گؤزل جناس

یاریمین بوینوندا، اینجه بیر اینجی
اینجه لر ایچینده اودور، بیرینجی
اونون گؤزلرینین کیمیاسی وار
بیر باخیشدا قیزیل ائیلر بیرینجی

*
اینجی: مروارید، دُرّ
بیرینجی: اول، اولین 
بیرینجی: فلز برنز را، یعنی با یک نگاه فلز برنز را به طلا تبریل می کند.

گئده جک

شاعر: رامیز روشن

چتینی بیز اؤلونجه دی
گئده جک ، هامی گئده جک
بیز دونیادان گئدن تکی
دونیانین قانی گئده جک
*
سولاجاق باغچاسی – باغی
قورویاجاق سون بوداغی
دئنیزین سویو بالیغی
ساحیلین قومو گئده جک
*
بیر تَهَر، پیس می ، یاخشی می
یولا سالیب سون آخشامی
سؤندوروب سونونجو شامی
ان سون آدامی گئده جک
*

ائله داریخمیشام

شاعر: دومان بختیاری
ائله داریخمیشام، ائله دورموشام
بو گئجه باشیمدا دار هاواسی وار
اوتاغیم اوشویور، شعریم اوشویور
قارا ساچلاریمدا قار هاواسی وار
*
سکوتا بورونن ثانیه لرده
یاشیل آرزولاریم چورومک ده دیر
قالانیب گؤزومه حسرتین داغی
دووارلار اوستومه یورومک ده دیر
*
داریخان کوچه نین قاش قاباغیندا
قارقیشام، قابارام، یارایام ایندی
بو چیلپاق گئجه ده، بو قار گئجه ده
گئدیرم اؤزومو آرایام ایندی
*
یئنه ده سن سیزلیک، یئنه ده آغری
یئنه ده باغچالار آغلاییرمنی
آجی لحظه لرده، یاغیشین سسی
یاشیل یارپاقلارا باغلاییر منی
*
 

بیر آرزوم وار سئوگیلیم

بیر آرزوم وار سئوگیلیم
سئوگین اولایدیم سنین
یانلیز منه باخایدی
سنین قارا گؤزلرین
*
محبتین قورایدی
اوره ییمده آشیان
قلبیمی یارپاق کیمی
سولدورمایایدی هیجران
*
سئویدین بو دنیادا
سنی سئودییم قدر
مندن باشقا هئچ کسه
باخمایایدی او گؤزلر
*
آه بو گیزلی دردیمی
سؤیله دیم بولاقلارا
سؤیله دیم چمن لر
سؤیله دیم یاماج لارا
*
شاعر: حکیمه بلوری

بیر یئرده - علی آقا واحد

بیر یئرده
بساطِ مئی ده سوز یوخ کی، دئییرلر، حال اولور آمما
اولا گر باده بیر یئرده، نگارِ ساده بیر یئرده»
ینه، زاهید، اقلاً بیر صفا وار، سُفره ی مئی ده
نه گوسترمیش کدورت دن سوای سجاده، بیر یئرده؟
آلیبدیر کؤنلومی، حیرتده یه م کی، گؤزلرین فکری
نئجه بیر صید اولوب قسمت، ایکی صیّاده بیر یئرده
اسیری من کیمی مینلرجه وار، اول سروِ رعنانین
نه بیر دم اؤلدورور، نه ائیله ییر آزاده، بیر یئرده
منیم بو داغلار کی، سینه مه، اول لاله رخ چکمیش
که هرگز ائتمه میش شیرین، اونی فرهاده بیر یئرده
مقام و شأنین ایسترسه ن، اوجالسین «واحد» عالمده
چالیش تا خدمت ائت، تکمیل اولان اوُستاده بیر یئرده
*

هارداسان

شاعر: سعید اقبالی 

هایاندا قالدی گلمدی
گونوم قارالدی گلمدی
بو آیریلیق دا گؤزلریم
سولوب سارالدی گلمدی
*
هارداسان کی بو شهر
اینجیدیر منی بتر
بوش یئرین گولوم سیخیر منی
یولدا قالدی گؤزلریم
هر گئجه گونوزلریم
یاندیریر منی یاخیر منی
*
بو سئوگی دن نه سویله مک
گؤزوم قالیبدی اوندا تک
ندن دی بس بو ایسته مک
اورک ده قالدی گلمدی
گلمدی گلمدی
*
گؤزوم گودوربو یوللاری
سوزور هله اونا ساری
هله گودور گؤزوم یاری
به هاردا قالدی گلمدی
گلمدی، گلمدی
*
هارداسان کی بو شهر
اینجیدیر منی بتر
بوش یئرین گولوم سیخیر منی
یولدا قالدی گؤزلریم
هر گئجه گونوزلریم
یاندیریر منی یاخیر منی
*

گئتمه یار

شعر: سعید اقبالی

گئتمه یار، گئتمه یار
سن منی ترک ائتمه یار
گئتمه یار گئتمه یار
اوره ییمی اینجیتمه یار
*
سنه محتاجم اینان
آی منی درده سالان
سندن اوتری اؤلورم
گئتمه بیر لحظه دایان
*
سنی مندن آیریسی
بو قدر چوخ ایسته مز
بئله کی من دئییرم
سنه عاشقم دئمز
*
اوره یی داش گؤزلیم
هامی دان باش گؤزلیم
سنین الیندن اولوب
گؤزلریم یاش گؤزلیم
*
گئتمه یار گئتمه یار
سن منی ترک ائتمه یار
گئتمه یار گئتمه یار
اوره ییمی اینجیتمه یار
*
هامی بیلسین بونو کی
سنی حدسیز سئویرم
سنه عاشقم دئمز
بئله کی من دئییرم
*
گؤزلریندن اوخورام
نه دئییرسن گؤزلیم
قوی بونو بیلسین هامی
سن منیم سن گؤزلیم
*
سنه محتاجم اینان
آی منی درده سالان
سندن اوتری اؤلورم
گئتمه بیر لحظه دایان
*
سنی مندن آیریسی
بو قدر چوخ ایسته مز
بئله کی من دئییرم
سنه عاشقم دئمز
*

دنیا

شاعر: رامیز روشن
منیم بالام بو دنیایلا اویناما
سن جاوان سان، دنیا قوجا دنیادیر
دشمن ندیر؟ دوست ائوینی، دوست ییخار
بیلن بیلیر دنیا نئجه دنیادیر
*
عؤمره – گونه اعتبار یوخ ازل دن
بیرده دؤنوب یاپراق اولماز خزل دن
بئشینیدن بیزه تابوت دوزلدن
بئله ییندن کفن تیکن دنیادیر
*
کیم نه آنلار بو زمانین ایشیندن
چوخلارینی گئچیردیبدیر دیشیندن
محکم یاپیش پاپاغینین باشیندان
باشدان پاپاق آلیب قاچان دنیادیر
*

وار گولوشونده

شاعر: بهرام نصیب اف
آل الوان گئییب چمن
گول آچیب تر یاسمن
سن دانیش قوی سسینی دینله ییم دویونجا من
*
یازین باهرین نفسی وار گولوشونده
سئویب سئویلمک هوسی وار گولوشونده
باخیشین جانلار آلیر، جانلار آلیر یار
عاشیقی درده سالیر، درده سالیر یار
گولوشون نغمه کیمی ، نغمه کیمی
گاه ائنیر، گاه اوجالیر، گاه اوجالیر یار
*
خلقیمین گؤزلی سن
عشقیمین ازلی سن
دویمارام سؤزلریندن
هر سؤزو مزه لی سن
*

تکجه منیم اولایدین

شاعر: جئیلان خانیم
سن بیر دنیز اولایدین،من ساحیل ده بیر قایا
کوکره یه یدین قالایدین، سینه مه چیرپینایدین
*
نه اولایدی سئوگیلیم، باخ بئله جه قالایدین
اوزورمنی تنهالیق،تکجه منیم اولایدین
*
سن بیر چمن اولایدین، من بیر شئحلی بنووشه
سن گونشه باخایدین، من ده سنه همیشه
*

آذربایجاندان دانیشاق

شاعر: علی رضا خیابانی

گل اوتوراق دیز -  دیزه بیز
آذربایجان دان دانیشاق
اوجامان ارک سهندیدن
بیز ساوالاندان دانیشاق
*
هجر ایله قوچ نبی دن
سولوب سارالمیش زمی دن
بورغانا دوشموش گمی دن
ظلولم کارخان دان دانیشاق
*
میصری قیلینج کوراوغلودان
ائل قالایانلار اوغرودان
ایری اوتورساق دوغرودان
داغدا دوماندان دانیشاق
*
گل سارانین میثاقیندان
اؤرپه ییندن یاشماغیندان
باشینداکی دوواغیندان
دردلی چوباندان دانیشاق
*
ستار خان دی قاراداغلی
ایگیت اوغلان ائله باغلی
ظلم الیندن اوره ک داغلی
چیرپینان جان دان دانیشاق
*
سولدوزودا یاد ائده لیم
محنتی برباد ائده لیم 
قوناق گئدیب شاد ائده لیم
اپپاق جاواندان دانیشاق
*
خیاوانلی وفالی دیر
عشقه دوشوب سئودالی دیر
دوز ایلقاری صفالی دیر
تبریزدن دان دان دانیشاق
*

آچیل سحر

شاعر: فرهاد ابراهیمی   
رجب ابراهیمی کورعباسلو ( فرهاد )

آچیل سحر، آچیل سحر، دوغ گونش
تنگه گلدیم، گئجه، ظلمت الیندن
قارانلیق، کؤنلومو سیخدی، توتولدو
قولاغیم، بایقوشون، شوم نغمه سیندن
آچیل سحر ائللریمیز اویانسین
گونش دوغسون، قیزیل نورا بویانسین
*
دومان توتوب هرطرفی، گؤرونمور
نه بیر اولدوز، نه ده بیر آی پاراسی
تئز یئتیر اؤزونو باغریم قان اولدو
ایشیقلانسین کؤنلوم، گئتسین قاراسی
آچیل سحر ائللریمیز اویانسین
گونش دوغسون، قیزیل نورا بویانسین
*
گئجه اوزون، من ده یالقیز، یوخوم یوخ
گئجه قوشو منه همدم اولوبدور
اوره ییم تله سیر سنی گؤرمه یه
فراغیندا، گول تک رنگیم سولوبدور
آچیل سحر ائللریمیز اویانسین
گونش دوغسون، قیزیل نورا بویانسین

داغیل ای دنیا داغیل

شاعر: وصال ابراهیم اف

داغیل ای دنیا داغیل، گؤر کیمه عاشق اولموشام

حیاتیم اولدو ناغیل، گؤر کیمه عاشق اولموشام

دوشونوردوم اونونلا ساده جه خوشبختلیغیمی

الیمدن آلدی فلک بیر گئجه خوشبختلیغیمی

دئیدی من دن آمان آللاه نئجه خوشبختلیغیمی

من ده یوخدو نیشانی گؤر کیمه عاشق اؤلموشام

داغیل ای دنیا داغیل ، گؤر کیمه عاشق اولموشام

حیاتیم اولدو ناغیل، گؤر کیمه عاشق اولموشام

منی سئون بیرینی سئومه دی منیم اوره ییم

منی سئومیین بیرینه آخی نیه عاشق اولموشام

داغیل ای دنیا داغیل ، گؤر کیمه عاشق اولموشام

حیاتیم اولدو ناغیل، گؤر کیمه عاشق اولموشام

او ملک دئییلدی گیردی آما بیر باشقا دونا

منی حئیران ائله دی حیاتیمی چاتدیردی سونا

اوره ییم یاتدی گؤزوم باخدی خمارلاندی اونا

اوره ییم یاتما آییل گؤر کیمه عاشق اولموشام

داغیل ای دنیا داغیل ، گؤر کیمه عاشق اولموشام

حیاتیم اولدو ناغیل، گؤر کیمه عاشق اولموشام

منی سئون بیرینی سئومه دی منیم اوره ییم

منی سئومیین بیرینه آخی نیه عاشق اولموشام

داغیل ای دنیا داغیل

حیاتیم اولدو ناغیل

من ائله آغلییرام یاره بو چوخ گولمه لی دیر

دئییرکی مندن اؤترو بیر نئچه اوغلان دلی دیر

بئله عؤمور ائیله مکدن سه اؤلوم صرفه لی دیر

جانیمی آلسین عزرائیل گؤر کیمه عاشق اولموشام

داغیل ای دنیا داغیل ، گؤر کیمه عاشق اولموشام

حیاتیم اولدو ناغیل، گؤر کیمه عاشق اولموشام

منی سئون بیرینی سئومه دی منیم اوره ییم

منی سئومیین بیرینه آخی نیه عاشق اولموشام

داغیل ای دنیا داغیل

حیاتیم اولدو ناغیل

*

سنی سئومک

شاعر: خیام

سن ملکسن، سنی تانریم منه گؤندردی
بیر یول آچدی گؤی اوزوندن، یئره ائندیردی
من ده سئودیم، ساکین ائتدیم سنی قلبیمده
نه یاخشی کی، وارسان عؤمروم منیم عؤمرومده
حیاتیمین ان بخته ور آنیندایام
نه قدیر جانیمدا جان وار، یانیندایام
سنی سئومک، اؤزون کیمی شاهانه دیر
دلی کؤنلوم عشقین ایله دیوانه دیر
بیر سؤزوم وار اوره ییمده سنه عایددی
سئویرم من بونا آللاه، اؤزو شاهیددیر
اونو بیل کی من حیاتا ئنه گلسئیدیم
سنی آنجاق سئوه جکدیم یئنه سئوسئیدیم
دئنیز کیمی گؤزلرین وار، درین – درین
شکر کیمی سؤزلرین وار، شیرین – شیرین
دنیا – عالم منیم اولسا، سن سیز اولماز
جانیم سندن، روحوم سندن آیری قالماز
سنی سئومک، اؤزون کیمی شاهانه دیر
دلی کؤنلوم عشقین ایله دیوانه دیر
*

او قیزین تویودور

شاعر: نصرت کسمنلی
گؤیده اولدوز دنه – دنه
سایدیم اونو دؤنه – دؤنه
خاطره لر دیندی یئنه
آچیلما ساباحیم آچیلما
آچیلما ساباحیم
*
کیم دئییر، غم اویودور
هجران بیر درین قویودور
ساباح او قیزین تویودور
آچیلما ساباحیم آچیلما
آچیلما ساباحیم  
*
گؤی دن یئره  ائندی گونش
توی شامینا دؤندو گونش
منیم اوچون سؤندو گونش
آچیلما ساباحیم آچیلما
آچیلما ساباحیم  
*
چوخدا گؤی ده چوخ دو اولدوز
داها منده یوخدو اولدوز
هر شئیی اونودوب او قیز
آچیلما ساباحیم آچیلما
آچیلما ساباحیم  
*

حیدربابا منظومه سیندن - شهریار

بیر اوچایدیم بو چیرپینان یئل ایله
باغلاشایدیم داغدان آشان سئل ایله
اغلاشایدیم اوزاق دوشن ائل ایله
بیر گؤرئیدیم آیریلیغی کیم سالدی
اؤلکه میزده کیم قیریلدی کیم قالدی

سئویج ایلن دردی - غمی قاتمیشام

شاعر: دهقان
سئویج ایلن دردی - غمی قاتمیشام
عقل – هوشو بوگون باشدان آتمیشام
بختیم یاتیب من ده بوگون یاتمیشام
آرییان یوخ، آختاران یوخ، تاپان یوخ
*
کیمسم یوخدور گلین حالیم سوروشسون
کوسموش اولسا بوگون  من له باریشسین
قول بوینوما سارماشیق تک ساریشسین
شاید دویا محبتین گؤزلریم
بولاق کیمی آخیب گله سؤزلریم
*
من « دهقانام» محبته عاشقم
گؤزل لرده سؤز – صحبته عاشقم
ائل قیزیندا من عصمته عاشقم
سارا اؤزون تاپشیریبدی سئل لره
تاریخ بویو ایز قویوبدور ائللره
*

امان ائللر منی واخت سیز قوجالتدی

شاعر: مظاهر داشقین
امان ائللر منی واخت سیز قوجالتدی
ناموس دردی، غیرت دردی، ائل دردی
سیز ائله بیلمه یین چکیرم بوگون
دولت دردی، شهرت دردی، وار دردی
*
کئچیرتدیم هجران لا جاوان واختیمی
چاغردیم گلمدی قارا باختیمی
بیر باغبانام چئویریبدی تاختیمی
چمن دیدی، چیچک دردی، خار دردی
*
ایتیرمیشم وطنیمی، ائلیمی
سینه مین اودلاری، یاخیر دیلیمی
کسیب طاقتیمی، بوکوب بئلیمی
باهار دردی، امک دیدی، بار دردی
*
بیر زامان جان دئین دوسلاریم هانی
مردیله نامردیله گرزلریم تابی
نئجه قوجالتماسین، تولک طوفانی
قارقا دردی، قوزغون دردی، سار دردی
*
سونسوز سرگذشتین سؤیله ییب داشقین
داغلار – داشلارا هئی دئییب داشقین
دردلی مظاهیری ائیله ییب داشقین
آنا دردی، وطن دردی، یار دردی
*

منزل اوزاق، من پیاده، عؤمور از

شاعر: شجاعت
منزل اوزاق، من پیاده، عؤمور از
یورولوب یوللاردا قالانام داها
منیم کی دردیمه چاره دتاپیلماز
دردی غم الیندن تالانام داها
*
گئن گونده طایفالی، دار گونده تکم
بیر ماهنی یا بندم، بیر نازیک توکم
گرک کی وطن ده، غریب لیق چکم
چکینه – چکینه دولانام داها
*
اودومو سؤندوروب، ایلین سویوغو
سینه مه درد سالیب، دردلر وورغونو
دئسه لر اینانما، شجاعت بونو
من بیر افسانه یم، یالانام داها
*

هر عاشقه اؤز ایسته دیگی یار گؤزل دیر

شاعر: علی آقا واحد
هر عاشقه اؤز ایسته دیگی یار گؤزل دیر
هر بلبله اؤز سئودیگی گلزار گؤزل دیر
ایلقاری گؤزل اولمویانی ایسته مز عاشق
جان وئر ائله جانانه کی ایلقاری گؤزل دیر
من بیر اوجا بویلو گؤزلین زلفونه بندم
رخساری گؤزلشیوه سی رفتاری گؤزل دیر
یوزلرله گؤزلباشقا ولایت ده چوخدور
آمما بیزیم اؤلکهبوتون ائلجاری گؤزل دیر
یار اولسا منیم له، منه بیگانه نه ائیلر
اوچماز ائله بیر خانه کی معماری گؤزل دیر
من ایسته دییم چون او گولو عئیرده سوئدی
قیمتلی او شئی دیر کی خریداری گؤزل دیر
واحد منه انصاف ائله تحقیر ایله باخما
احسن بئله بیر شاعره، اشعاری گؤزل دیر
*

اونودا بیلمزسن آرتیق

شاعر: خانیم – اسماعیل قیزی
اونودا بیلمزسن آرتیق
حسرتیمنن اوره یینه کؤز دوشر
یا دنیا سنه دئدیم سؤز دوشر
یئنه ده یولونا همین ایز دوشر
سن منی اونودا بیلمزسن آرتیق
*
خاطرین سنین یادیمدا قالاجاق
او سئوگی هرآن منیم له اولاجاق
بیلیرم کی گؤزلریم ده دولاجاق
سن منی اونودا بیلمزسن آرتیق
*
بو شهردن چیخیب گئده بیلرسن
ایللری ایللره قاتا بیلرسن
بیر وخت سئودیینی دانا بیلرسن
سن منی اونودا بیلمزسن آرتیق
*
سنین طالعینده ایزیم قالیبدیر
سنین خیالیندا سؤزوم قالیبدیر
بیلیرم کی منده گؤزون قالیبدیر
سن منی اونودا بیلمزسن آرتیق
*
بو سوئگی سنین کؤلگه نه دؤنه جک
یئرده اولسان او گؤیلردن لئنه جک
یوخودا آدین دیلمه تئز- تئز گله جک
سن منی اونودا بیلمزسن آرتیق
*