یارادان یار اولسا اگر انسانا

شاعر: بهمن وطن اوغلو
یارادان یار اولسا اگر انسانا
ساغالار یارالار، یاد دان دا چیخار ( یاد دان دا چیخار: از خاطرهم فراموش می شود )
آتسالار آتشه ابراهیم کیمی
آلوودان دا چیخا، اود دان دا چیخار
*
عاقیل آتالاردان بیر مثل ده وار
قضا اوز وئرسه، قویماق دیش قیرار
اوز وئرمه سه گؤره رسن کی سنه یار
قوهومدان دا چیخار، یاد دان دا چیخار ( یاددان: از بیگانه هم)
*
دردی درد بیلمه زه دئمه آ بهمن
بئل باغلاما عاغلی کمه آ بهمن
مینت لی چؤره یی یئمه آ بهمن
لذّت ده چیخار، داد دان دا چیخار
*

یازیغیم گلیر - بهمن وطن اوغلو

شاعر: بهمن وطن اوغلو
عؤمور یوللاریندا آغاردی بیرچک
آی ائللر ، آتالار عالیم دی گئرچک 
جوت اولسا میلچك ده قالیب گله جک  
تک اولان آصلانا یازیغیم گلیر
*
خیلقتین سیررینی دویا بیلمیرم
هر سؤزو آشیكار دئیه بیلمیرم 
نییه سیزیلداییر، نییه بیلمیرم  
ناله لی كامانا یازیغیم گلیر
*
گؤزومدن یاش آخیر اوزومه دن - دن
آمان آی آیریلیق اولمویایدین سن
بیر اؤلوم یاخشیدی سئویلمه مكدن 
طالعسیز جاوانا یازیغیم گلیر
*
ایگید ار آدلانار غئیرت اولاندا
اوزده حیا اولار، عیصمت اولاندا  
دیل بیلمز نادانا قیسمت اولاندا  
اهلی - حال جانانا یازیغیم گلیر
* 
بیر آن چاتیلمازمی قاشی اووچونون 
آخمازمی گؤزوندن یاشی اووچونون  
ده ینده گوللسی ناشی اووچونون 
یارالی جئیرانا یازیغیم گلیر
*
دؤورون گردیشینه اویا بیلمه ییب  
قلبیندن غباری یویا بیلمه ییب 
عشقینی كیمسه یه دئیه بیلمه ییب 
گیزلیجه یانانا یازیغیم گلیر
* 
ظالیم زامان، كیمی ائتدی بختییار  
اوركلرده كدر، حسرت، اینتیظار  
آمان آللاه داغلار بویدا دردی وار 
بهمن تک اوزانا یازیغیم گلیر
*

گئتدی - بهمن وطن اوغلو

هر عاشیق بیر ساز گؤتوردی
بیر هاوانی چالدی گئتدی
سؤیله گؤروم دنیا سنن
کیمی راضی قالدی گئتدی؟
*
کیمی گلدی آرا قتدی
کیمی کؤلگه لرده یاتدی
کیمکی خلق اوچون یاراتدی
اوره کلرده قالدی گئتدی
*
جئیران کیمین قاچانمادی
کهلیک کیمین اوچانمادی
چیچک کیمین آچانمادی
خزان ویردی سولدو گئتدی
*
وطن اوغلو بیر زامانلار
اوچولدو چوخ خانمانلار
قیلینجیننان قان دامانلار
اؤز پایینی آلدی گئتدی

قوجاغیندا - بهمن وطن اوغلو

من جنتی پوچ ساناردیم  
گولوم سنین قوجاغیندا
بیهوش اولوم قوی لال اولسون  
دیلیم سنین قوجاغیندا
*
مهربانیم دین ایمانیم   
سنه قربان اولدو اولدو
منیم شیرین جانیم
گولوم سنین قوجاغیندا
*
ییخسا منی قضاوقدر
جوان عؤمروم گئتسه هدر
خوشدور منه  چکسم اگر
ظولوم سنین قوجاغیندا
*
نییه گئتدین قانا – قانا
منی قویدون یانا – یانا
*
یا وعده وی بو یازا وئر
یا بهمنی گودازا وئر
بیرجه دفعه اجازه وئر
اؤلوم سنین قوجاغیندا
*
مه له مه جئیران مه له مه
کهنه دردیم تزه له مه
قاش گؤزووی سرمه له مه
گل یاخاوی دویمه له مه
*
بهمن وطن اوغلو