سققل - میرزاحسن کریمی مراغه ای

گور نه اسیر ایتدی بو سقل منی
جانمه سیر ایتدی بو سقل منی
خلق گورور شرعه یاخین حالیمی
تسبحیمی بورکمی سقالیمی
غارت ایدوللر منیم اموالیمی
یاخشی فقیر ایتدی بو سقل منی
گور نه اسیر ایتدی بو سقل منی
سقلین اوغلان چوخوموش دوشمنی
فرض ائدوری خلق منی ارمنی
دوره لیوب اوغری پیشیکلر منی
یاغلی پنیر ایتدی بو سقل منی
گور نه اسیر ایتدی بو سقل منی
حقیمی تعقیب ایلین وقته من
هو لیوری فوری منی مرد و زن
دینمه ساواشما کیشی سقللیسن
بیر قوجا شیر ایتدی بو سقل منی
گور نه اسیر ایتدی بو سقل منی
آخ نجه سیندیرمک اولار بو غمی
یئپ یکه قیزلار منه سویلور عمی
جانمی آلدی بولارین چم خمی
عاجز و پیر ایتدی بو سقل منی
گور نه اسیر ایتدی بو سقل منی
گورسه گوزیم غفلتی بیر شوخ مه مه
دور بریمدن اوجالور هم همه
باخما اوتان آی کیشی نامحرمه
شیخ کبیر ایتدی بو سقل منی
گور نه اسیر ایتدی بو سقل منی
قویمور آدام هر جوره رفتار ایده
کئف چکه هر مجلسه سوودی گیده
میخانادان چخدی گیره مسجده
تزدی خمیر ایتدی بو سقل منی
گور نه اسیر ایتدی بو سقل منی
بیر یول اوزولدی سینمادان الیم
تازه گلوب گورمه لی رنگین فیلم
شام و سحر مسجد اولوب منزلیم
کهنه حصیر ایتدی بو سقل منی
گور نه اسیر ایتدی بو سقل منی
سالدی بو سقل بابا دیلدن منی
خار و خفیف ایتدی ازلدن منی
قئیتروب اما چوخ عملدن منی
بانی خئیر ایتدی بو سقل منی
گور نه اسیر ایتدی بو سقل منی
بعضی مجالیسده بویوک قدری وار
آرتیرور انسانه عجب افتخار
اگلشورم صدریده چوخ با وقار
خلقه امیر ایتدی بو سقل منی
گور نه اسیر ایتدی بو سقل منی
بیرده بو یرده منه وار احترام
هر کس عیالیله ساواشسا مدام

من گیدرم صلح ایدرم والسلام
مفته اجیر ایتدی بو سقل منی
گور نه اسیر ایتدی بو سقل منی
ایندی اوپوش وار جوتی اون بش تومن
بیر نفر آلمور ویریرم مفته من
گورومساغ اولماز اوزی سققلی دن
گوزلره تیر ایتدی بو سقل منی
گور نه اسیر ایتدی بو سقل منی
قویمادی سقل منی بیر کف سورم
قئیدی قویام بیریانا هر ایش گورم
عیبی ده یوخدور هم آلام هم ویرم
سیخدی قصیر ایتدی بو سقل منی
گور نه اسیر ایتدی بو سقل منی
لاپ قوجالوب مش کاظم اوغلی عزیز
سقلی دیبدن گوتوروب گوتوروب تر تمیز
هر خانمیلان اوتورور دیز به دیز
یاخشی حقیر ایتدی بو سقل منی
گور نه اسیر ایتدی بو سقل منی
اولماسا سقل آچیلار ال قولوم
ایندی ولی چو خیره یوخدور یولوم
قخدیریم آسوده اولوم قورتولوم
کبله نصیر ایتدی بو سقل منی
گور نه اسیر ایتدی بو سقل منی
اولماسا سقل گیده رم هر یانا
جنگی خوروز تک دوشرم میدانا
جهد ایدرم قویمارام حقیم یانا
طفل صغیر ایتدی بو سقل منی
گور نه اسیر ایتدی بو سقل منی
نذر ایدیرم قسمت اولا کربلا
اوردا قزیل نوادنین آلتندا تا
قیرخدیرام اوندان ئقیدم برملا
بسکی کیفیر ایتدی بو سقل منی
گور نه اسیر ایتدی بو سقل منی
صحنۀ تاریخه ائدنده نظر
عالم و جاهل حکما سر به سر
توکسوزی یوخدور بولارین بیر نفر
بوردا دلیر ایتدی بو سقل منی
گور نه اسیر ایتدی بو سقل منی
گولمه کریمی ایلمه مسخره
وورسام اگر تیغه بو سقللره
قوی اولوم آرواد کیمی با منظره
حضرت پیر ایتدی بو سقل منی
گور نه اسیر ایتدی بو سقل منی

عیدالفاسقین - میرزاحسن کریمی مراغه ای

عید الفاسقین
دوشدی گوگل گنه رخ جانان سراقنه
ساقی یوبانما گیت هر الوان سراقنه
فصل بهاریدور گل آچوب فرش اولوب چمن
چیخ بیر صفای سیر گلستان سراقنه
یاتما دام اوسته حسرتیلن باخما اولدوزا
دور منله بیر گیداخ مه تابان سراقنه
وقت نشاط جمعه گونی عید فاسقین
گل بیر کنار بلوارا یاران سراقنه
قزلار چخوبلا دسته بدسته سیاحته
آتش مثال خانه ایمان سراقنه
آغ سینه لر ده شوخ مه مه لر پرتقال کیمی
آغزون سولانسا گیتمه خیابان سراقنه
بودلار ایشیکده جلوه لنور خام گوموش کیمی
یوم گوزلرون گیت آیه قرآن سراقنه
باخما بو قاره قاشلارا گلگون یاناقلارا
سن گیت بهشته حوری و غلمان سراقنه
بسدور عم اوغلی مرثیه باز اولما بیربله
دوشمه بوقدری دیده گریان سراقنه
دکانی باغلا هفته ده بیر گون چیخ چوله
گل بیر چمنده سرو خرامان سراقنه
هی دسته دسته قز گلین اوغلان اگلشوب
یکسر چخوبلا باغیله بوستان سراقنه
اوغلان دوشردی قز دالسیجا گچن زمان
شکر ایله ایمدی قز دوشوب اوغلان سراقنه
بیر عده اگلشوبله سماور قباقدا چاق
چایدان دویوب دوشوبدیله قلیان سراقنه
رادیو قباقدا هر یانی ایستور آچور خانم
هی موجی قوتدالیر گیده طهران سراقنه
گه دلکشین سه گاهنی تعریف ایدیر بیری
گاهی گیدولّه مصطفا پایان سراقنه
بیر عده رادیو اوزلریدور چالماق اویناماق
یوخ احتیاجی تاریله قارمان سراقینه
بعضی سه گاهی باشلوری بعضی ابو عطا
بعضی قاچور بیات صفاهان سراقنه
بعضیسی مست اولوب یخیلوب هی ایچور قوسور
یولداشلاری قاچور قاتق ایران سراقنه
بعضی قروبدی نوخداسینی طویلدن قاچوب
قیشقون دوشوب قیتمری پالان سراقنه
بعضی ایچوب چکوب پچاقی یولداشین ووروب
خلق هی قاچولا پست و نگهبان سراقنه
باخسان گوررسن اکثری مفلسدی فعله دی
اهل و عیالی ایوده دوشوب نان سراقنه
بیچاره بیر قرانه اوتوز بیل وروب یره
جانی چخور دوشوب هله جانان سراقنه
ایشلور یانور گوتی جریلور یایدا کیفلنور
گیتمور خیالی بیرجه زمستان سراقنه
قیشدور دوشور دیلّنماقا یا نسیه کسماقا
گه خاکه گه کومور گهی یورقان سراقنه
بیر عده شکاره چخوب اوزگه فکریله
گویا دوشوبله بیر بالا جیران سراقنه
بیر جمع اگلشوبله ولی خلقدن کنار
مشغول اولوبلا منقل سوزان سراقنه
خلوتده اگلشوبله مبادا بازرس
بیردن گله او جمع پریشان سراقنه
بعضی الینده چوبه وافوردی اوینادور
گویا دوشوبدی کوئله چوگان سراقنه
بعضی چکوبدی شیره نی چلتیک چالور اوخور
سرگرم اولوبدی هرزه و هذیان سراقنه
چورت عالمینده بعضی گیدیر چرخ اطلسه
ایلور خرام روضه رضوان سراقنه
هر دم آچور گوزین ویرور آمریکادان خبر
گه روسدن گهی گیدیر آلمان سراقنه
بعضی دیور اگر قویالار موشکه منی
قیلام عروج مهر درخشان سراقنه
بعضی آچوب قباقه طهران مزخرفی
بعضی گیدیر مطالب کیهان سراقنه
بیر عده باشلیوبلار امیر ارسلاندن
بعضی دوشوبدی رستم دستان سراقنه
ازبرلیوب یوز اللی ورق شاهنامه دن
فکر ایشلدوبدی سام و نریمان سراقنه
بدبخت آلتی مسئله بیلمور رساله دن
وجدانی یوخدی بیر گیده ایمان سراقنه
نهج البلاغه نین یوخودا گورمیوب یوزین
آنجاق دوشوب فسانه و رومان سراقنه
اسلام اگر بیزوخ گورسن کیمدی خارجی
گر کافروخ گیداخ او مسلمان سراقنه
انسان اگر بیزوخ بابا حیوان نه رنگ اولی
حیوان بیزوخ اگر گیداخ انسان سراقنه
ایتدون تلف کریمی جهالتده عمریوی
گل بش دقیقه مجمع عرفان سراقنه