واخت

واختی بادا وئردیم هاوایی گئتدی
سنه وئریله سی واختیم قالمادی
اولاندا خرجله دیم بئله دن – بئله
من واختین ائوینی ییخدیم، قالمادی
*
هر آیین هر گونون دوردوم قصدینه
توخوندوم کؤنلونه، دیدیم شصتینه
آجی گونلریمین توتوب اوستونه
واختیمی نار کیمی سیخدیم،  قالمادی
*
قالان بیر من اولدوم بیرده کی آدیم
اوچدو اللریم دن آرزوم – مرادیم
واختی توپلامادیم، واختی وورمادیم
بؤلدوم قالیغینی چیخدیم، قالمادی
*
واخت ائله ایتدی کی دوماندا - سیس ده
واخت ائله گئتدی گی هارای دا – سس ده
قویدوم اللریمی گؤزومون اوسته
بویلاندیم آردینجا باخدیم، قالمادی
سنه وئریله سی واختیم  قالمادی
*
شاعر : ائلشن عظیم

گئجه لر آغلایان قادین

منیم چون گئجه لر آغلایان قادین
سنین گؤز یاشینا سوسامیشام من
قلبینه قارالار باغلایان قادین
سن آللاه باغیشلا قانمامیشام من
آللاهدان هدیه بیلیب آلدیغیم
حیات دا مقدس اینسان ساندیغیم
ایلک گوندن پیغمبر آدلاندیردیغیم
سنین اوجاغینا گؤوه نمیشم من
الیندن ایاغیندا اؤپدویوم قادین
هئچ ایاغینین توزو اولمامیشام من
حیات دا سئودیگیم یگانه قادین
سنه لایق اولا بیلمه میشم من
حیات دا هر زامان اوجا توتموشام
یوزلرله دوشمنین یوزلرله یادین
یانیندا هئچ زامان بیلدیرمه میشم
کیم دیرکی قلبیمده سئودییم قادین
اوشاق دک یوللاردا قالیب گؤزلریم
گؤرمه دیک جه بیرآزدا دلی اولموشام
بیلیرم قلبینه ده ییب سؤزلریم
واللاه من ایت کیمی پئشمان اولموشام
سیندیردین سئوگینین قولون قانادین
سن سیز چابالایان قوشا دؤنموشم
قارشیندا دیز چؤکورم سئودییم قادین
باغیشلا سهویمی باشادوشموشم
شاعر: احمد شاهید اف

بیلمدین - شاعر: چوبان اوغلو

من کی سنی خان ائله دیم، بیلمدین
کؤنلومه سلطان ائله دیم، بیلمدین
درویش اولوب هو هو دئییب در به در
کویده جولان ائله دیم، بیلمدین
دوشمانیوا شمشیریمی توولادیم
بیر قانا مین قان ائله دیم، بیلمدین
چوخلو خطالار گؤروب هئچ دینمه دیم
گؤزلری یان ائیله دیم، هئچ بیلمدین
انسان آدی چوخلارا لایق دئئیل
آدیمی اینسان ائله دیم بیلمدین
سن خواب راحت ده یاتارکن، دوروب
خوروز کیمی بان ائله دیم بیلمدین
خانیه زنبور کیمی عشقیوه
قلبیمی شان – شان ائله دیم، بیلمدین
سن حکیم آدین چکیب خسته یه
من اونا درمان ائله دیم بیلمدین
سن نن اؤتور سعنان اولوب چؤللری
ترک دین ایمان ائله دیم بیلمدین
گئت چوبان اوغلو باهارا سؤیله سن
جان سنه قربان ائله دیم، بیلمدین