داغیلیر - ائلشن عظیم

واخت اوچورکپنک کیمی
الیمه زری داغیلیر
ساری یارپاقلار اوستونده
زامانین تری داغیلیر
*
عکسی قالیر صدالارین
غمزه لرین – ادالارین
هرگون دلی سئودالارین
باشیمدان بیری داغیلیر
*
گولو سولو درمک اولمور
غنچه واختی گؤرمک اولمور
تا عؤمروده سورمک اولمور
گونده بیر یئری داغیلیر

واخت

واختی بادا وئردیم هاوایی گئتدی
سنه وئریله سی واختیم قالمادی
اولاندا خرجله دیم بئله دن – بئله
من واختین ائوینی ییخدیم، قالمادی
*
هر آیین هر گونون دوردوم قصدینه
توخوندوم کؤنلونه، دیدیم شصتینه
آجی گونلریمین توتوب اوستونه
واختیمی نار کیمی سیخدیم،  قالمادی
*
قالان بیر من اولدوم بیرده کی آدیم
اوچدو اللریم دن آرزوم – مرادیم
واختی توپلامادیم، واختی وورمادیم
بؤلدوم قالیغینی چیخدیم، قالمادی
*
واخت ائله ایتدی کی دوماندا - سیس ده
واخت ائله گئتدی گی هارای دا – سس ده
قویدوم اللریمی گؤزومون اوسته
بویلاندیم آردینجا باخدیم، قالمادی
سنه وئریله سی واختیم  قالمادی
*
شاعر : ائلشن عظیم