سن گئدلی بوردان اوزاق ائللره - شیدا نونهال

سن گئدلي بوردان اوزاق ائللره
سوزلريمي من دئيه رم داغلارا
سئوگي غمين هر كيم دئسه آز دئيير
من قالارام داغلاريمي داغلارا
*
دوداغيملا پيچيلداشان آدين دير
چيلغينليغا سبب،شيرين داديندير
خاياليمدا تكجه سنين يادين دير
آپارمني سنلي ياشيل باغلارا
*
من دنيزلر ايتگيني، سن ماياق سان
عومور يولون گئتمه يه سن آياق سان
دوست ـ دوشمانلارايچره منه داياق سان
قالدير مني؛ سالما بو آلچاقلارا !
*
دويانماديم باخيشيني دويونجا
دايانمادين قنيم گوزون اويونجا
كيپريكيمي كيپريك اوسته قويونجا
قاييت گولوم قاييت بو يايلاقلارا
*
سسله نه رم داغلار داغلار آداغلار
قوچاقلاردان سوز آچارام ائل آغلار
كوكسوم يانار ،داغلار يارامي باغلار
قوربان اولوم عيصمتلي تورپاقلارا

خزر - شیدا نونهال

گؤزلریم تیکیلیب، سنسیز یوللارا
گلمه سن نه فایدا؟ گلسن نه فایدا؟
سئوگییله یاناشی، آچیق کؤنلومه
دولماسان نه فایدا؟ دولسان نه فایدا؟
*
دویغولوآنیمدیر دوی فریادیمی
غزل مصراسیندا،سئوگی دادیمی
اورکدن یادیمی ،دیلدن آدیمی
سیلمه سن نه فایدا؟ سیلسن نه فایدا؟

*
ان ظریف تئلم سه ، سازدا پاسلانیم
آغ بولودنغمه ن ده چیمیب ایسلانیم
بوینونا هؤرولوب،داردان آسلانیم
چالماسان نه فایدا؟چالسان نه فایدا؟

*
اؤلومدن سؤز آچیب دیندیرمه منی
اودلو ناله لریم بورویر سنی
فلک ده بویوما توتسا کفنی
سالماسان نه فایدا؟ سالسان نه فایدا؟

*

آیریلیق خزری سی سولدورور منی
(خزر)ین سولماسین گوللو چمنی
قارتالین قایادیر یوردو،مسکنی
بیلمه سن نه فایدا؟ بیلسن نه فایدا؟

*

منبع : شعره اوچان قانلی دیلیم