اینانانمیرام

 سحر خیاوی
*
هله ده، یئنه ده اینانانمیرام
ایلدیریم پوسگوروب آلوو یاغیردین
الینه آلمیشدین قَهَر بایداسین
قارا اژداهادان زَهَر ساغیردین

هله ده، یئنه ده اینانانمیرام
سن ایدین قلبیمه مَرمی‌لر سیخان
کولونگ اَله آلیب بیر آن ایچینده
آرادا مین ایللیک کؤرپونو ییخان

هله اینانمیرام گول- چیچک باغیم
الین‌له بیر آن‌دا خزانا چؤندو
فلسفی یاراما ملهم‌لی دیلین
نه اولدو کی افعی ایلانا دؤندو

بلکه آزدیرمیشدی شیطانلار سنی
بلکه آلدانمیشدین کوپ قاریسینا
اؤیله کی قیرمیشدین آجیق زینجیرین
بنده‌لیک ائتمیردین گؤی تانریسینا

هله ده اینانمیر بو ساده اوره‌ک
او یابانجی آدام سَن اولدوغونا
ایشیقلی گونومون قارشیسین توتان
زهریمار تولوغو چَن اولدوغونا

ایلگی یولوموزو باسیب تیر-تیکان
چکیب‌دیر آرادا سونگولَر قاتار
قوووشماق یولونو ائله قاپاتدین
قاییتما، تیکانلار آیغینا باتار

هله ده شوک‌دایام، هله سرسَم‌‌اَم
سندن گؤزله‌میردیم اؤیله شیددتی
اونسوز دا آز قالیر سون نفسده‌یَم،
اوتانما، گَل ائندیر آخیر ضربتی

یوخسا گَل دئنن کی: «یوخویدو بوتون
آجی کابوس ایدی کئچیب گئدن‌دیر
اینانما اویدوران بو کابوسلارا
هله ده اوره‌ییم سنه وطن‌دیر»

سئرچه اوره‌یی‌دیر شاعر اوره‌یی
نئجه تئز قیریلار، تئز یولا گَلَر
اَفیل- اَفیل اَسَن بو سئرچه اوره‌ک
سیجاق اللرینده یاتار، دینجه‌لَر
*

پاییزلا من

پاییزلا من – سحر خیاوی
منیم ده ساچلاریم بویالی سن تک
منیم ده شاخامدان قارانقوش کؤچوب
من ده سنین کیمی خَزَل‌لنمیشم
منیم ده قوشلاریم باشیمدان اوچوب
*
توتولور هاوام دا یامان دال‌بادال
بورویور چَن، دومان اوره‌ییم گؤیون
پیرتلاشیق کَلَف تک هئی قیوریلیرام
مین بارماق آچانمیر حالیمدان دویون
*
ایندی من قالمیشام، سویوق پنجره‌
تؤکولور خزل‌لر، سولور چیچک‌لر
داها بوش سوفره‌لی کیچیک باغچاما
قوناق گلمه‌ییرلر ناز کَپه‌نک‌لر
*
قدم قوی بو گئجه یالقیز اوداما
صوبحه‌دک دردلشک، چوخلو چایلاشاق
دئییرلر: بؤلوشسن دردی یونگولر
اوندا گل سنین‌له دردی پایلاشاق
*
قویوم قاباغینا آلما، قوز، اوزوم
بویاقلی ساچینا اینجی‌لر دوزوم
دئییم خوش گلمیسن آی منیم اؤزوم
گل گولوم سنین‌له ائکیزتایلاشا!
*
اوز- گؤزون غملی‌دیر، اللرین یالین
سازاقدان گئیمیسن اَینینی قالین
نه یاخشی بیلیرسن دوستلوغون یولون
قوینونا آل منی بیر قوجاقلاشاق
*
صاباح دا گئده‌ریک خیاوچایینا
باخاریق طبیعت قیزی بویونا
قوشوللوق ائلیمین شنلیک، تویونا
ال-اله، قول- قولا گَل سیجاقلاشاق
*
یئریییب خزلده سئودالی، مَلَنگ
باغلاریق چؤللرین گولوندن چَلَنگ
ییغیشسین دونیادان هر نه توپ، توفنگ
غریبسن؟ عئیبی یوخ، یالقوزاقلاشاق
*
منبع: سایت ایشیق