آی عؤمروم گونوم - جیغاتئل عیسی قیزی

آی اوغرون – اوغرون باخان
منی یاندیریب یاخان
سن کی بختیمه چیخان
گول سن آی عؤمروم گونوم

*
گؤردوم وورولدوم سنه
گؤزل گؤروندوم سنه
بو قدر دوغما منه
کیمسن آی عؤمروم گونوم
*
چیچه ییم سن گؤزومده
نور سپن سن اوزومده
کؤره ننده گؤزومده
نم سن آی عؤمروم گونوم
*
گولوستانیمدا گول سن
یازدان آچان بنؤوشم
بیر – بیر ساچیما دوشن
دن سن آی عؤمروم گونوم
*
جیغا تئلم سن دئییم
سنه من یار سئودییم
دنیادا تک سئودیغیم
سن سن آی عؤمروم گونوم
*

سئوگیلیم آللاهین سئوگیم منیم دیر - جیغاتئل عیسی قیزی

سئوگیلیم آللاهین، سئوگیم منیم دیر
آغلاییب، ساچیمی یولسام حاقلی یام
گناها یازیلماز، سئوگی غنیم دیر
سئوگی عذابیندان اؤلسم حاققیمدیر
*
سئوگی مزارلیغی گؤسترین منه
هاردا دفن ائله ییم، هاردا سئوگیمی؟
هارا بویلانیرام، هارا باخیرام
دویورام، گؤرورم اوردا سئوگیمی
*
قلبیمده باسدیردیم، چیخدی گؤزومدن
سوزولدو – سوزولدو کؤنلومه آخدی
توپراقنان بولودون اویونون اوینادی
یئنه بخارلاندی شیمشک تک چاخدی
*
گؤیدن آیری گلیب منیم کتابیم
ایمانیم سئوگیمین، دینیم سئوگیمین
لکه سئوگیلیمین قلبینده کی داش
ائله منظره دیر منیم سئوگیمین
*
سئوگیمین مزاری اینجیر مندن
من بو زیارته گئدیم نه بیچیم؟
چیچک می آپاریم، گول مو آپاریم
گئدرسم، قاپیدان بس نئجه کئچیم؟
*
دچار ائدیلدییمبلایا بیر باخ
سئوگیمین مزاری چپرلی، قانلی
عشقین درگاهیندا اویویور عشقیم
گؤزومون اؤنونده سئوگیلیم جانی
*
اؤلوب سئوگیلیمین الینده، سئوگیم
ایلهامیم سئوگیمین یاسینا گلیب
سس سیز هارایلاریم، عرشی ترپدیب
ملک لر قلبیمین سسینه گلیب

اینساندان کؤچور دنیا - جیغاتئل عیسی قیزی

داها اینسان الیندن
فیرلانمیر، قاچیر دنیا
اینسان دنیادان کؤچمور
اینساندان کؤچور دنیا
*
یئییلیب فیرلانقاجی
بلکه توکنیب پری؟
چیخیبدیر اؤز اوخوندان
دنیا اولوب سر – سری
*
گاه ترسینه فیرلانیر
دایاندیریر زامانی
اینسانلارین الینده
قالیب دنیانین جانی
*
گؤتورولوب آرادان
یئرین – گؤیون پرده سی
اوتانیر فیرلانماغا
قالماییب لار هوسی
*
گاه دا قاچیر سرعت له
ساعات زامانی قووور
قیسسالیر اینسان عؤمرو
زامان ساعاتی قووور
*
دنیانین الی گؤیده
عرشه چیخیر ناله سی
اینسان مسکنی اولماق
ایسته میر یئر کوره سی
*

عاغلینا گلمه ین کسی سئوه سن - جیغاتئل عیسی قیزی

عاغلینا گلمه ین کسی سئوه سن
اگر غرورونو. سیندیرا سنی
گؤزلری گؤزونون اوخشاری اولا
گیره اوره یینه قاندیرا سنی
*
کئچه بیلمیه سن، اؤزو مرد اولا
سئوگین سئوگیم کیمی، سنه درد اولا
ایسته یاتاغینا سویوق قور اولا
اوشودعه آتشین، دوندورا سنی
*
چاشیب اونوداسان قوهومو، یادی
قالا داماغیندا وصالین دادی
گؤزه گؤرونمه یه سینه نین اودو
آغزیندان چیخان آه یاندیرا سنی
*
اسه چیغاتئل تک دوداغین، دیلین
الینین ایچینده یئتمه یه الین
ملک سیماسیندا گله سئوگیلین
عزرائیل حکمونده دیندیره سنی
*

منی یوخولاردا قویوب گئتمیسن - جیغاتئل عیسی قیزی

اوّل جه من سنی یوخودا گؤردوم
یونرا یوخوکیمی چیخدین قارشیما
باشیما گلمه ین نه قالمیشدی کی؟
سن ده بیر قریبه گلدیمن باشیما
*
باشیما گلن لر اؤتوب کئچردی
سن ائله گلمیشدین، گئتمک بیلمه دین
دئییرلر زمانلا کئچر هر بلا
زمان کئچدی، گئتدی، گئتمک بیلمدین
*
هایانا اوز توتدوم، هایانا دؤندوم
گؤروندون گؤزومه، بیر خیال کیمی
خیالیم مورگولو، گؤزوم یوخولو
من سنه سؤیله دیم یوخو دردیمی
*
دئدیم کی، سن دانیش، یوخونو یوزوم
یوخوم یوزولردی سنی گؤرنده
یادیمدان چیخاردی گؤردویوم یوخو
یوخوم پوزولاردی سنی گؤرنده
*
گل ایندی هارداسان یوخو یوزمانیم
منی بیر یوخودا قویوب گئتمیسن
داشیب گؤزلریمدن، گؤز یاشلاریمدا
بوتون یوخولاری یویوب گئتمیسن
*

آللاها مکتوب - جیغاتئل عیسی قیزی

گؤزل آللاهیم
قیامته ساخلاما، ایلاهی،جهنمی
فانی دنیادا گؤستر، آگاه ائیله بنده نی
ای فقیرین صاحبی،مظلوملارین همدمی
هئچ سندن گؤزله مزدیم، سن نئجه گؤز یومورسان؟
وئردیین روحو، جانی، اینساندان آلیر اینسان
*
قویما لکه گتیریر، اینسان – اینسان آدینا
کیمسه یئتیشه بیلمیر، بیرکیمسه نین دادینا
خبرین وارمی، یانمیر، یاش قورونون اودونا
الله اکبر دئییب، قان آخدیریر مسلمان
وئردیین روحو، جانی، اینساندان آلیر اینسان
*
سورونور توپراق اوسته، گؤیه اوجاتدیقلارین
گؤی ده آللاه لیق ائدیر، یئرده یاراتدیقلارین
آهی یتمیرمی سنه، گناه سیز اینسانلارین
یاتمیسان می، ایلاهی، هارا باخیرسان، اویان
وئردیین روحو، جانی، اینساندان آلیر اینسان
*
ایلانا آغی وئریر، زهرسیز کرتنکله
دشمن ائدیر قارداشی، کافرلر بیله – بیله
هر یئرده مسلمانا، قورورلار فتنه، تله
دینج اوتوروب یئرینده،سیر ائدیر کریستیان
وئردیین روحو، جانی، اینساندان آلیر اینسان
*
بلکه هئچ ملک لرین، خبر گتیرمیر سنه؟
ووران – وورانا قالیب، باش کسن – باش کسنه
او گؤزل وارلیغینی، کورلارا گؤسترنه
توکنیب بیتمک بیلمیر، بو وحشت، بو قتل عام
وئردیین روحو، جانی، اینساندان آلیر اینسان
*
جیغاتئلم، یازدیغیم نامه، سانما، شعردی
قلمیم گوجله یازدی، بو بلانی، بو دردی
ندن سه سوسور بشر، سؤزون بیتدیی یئرده
یا اؤزون گل ایلاهی، یا بیزی آپار بوردان
وئردیین روحو، جانی، اینساندان آلیر اینسان
*

فاداسی - جیغاتئل عیسی قیزی

بیر آتشم، بیر آلاوام، سؤننده
آلیشماغیم چتین اولور قاداسی
بیر کوسکونم ، کوسدورمه یین، کوسنده
باریشماغیم چتین اولور قاداسی
*
دنیا کوسور من دونیادان کوسنده
چوخ چتینم قاریشمیرام آساندا
دانیشقانام طوطی دیلیم سوساندا
دانشماغیم چتین اولور قاداسی
*
باخانمیرام هر طرفه هر یانا
جان وئریرم جان دئدییم هر جانا
پیس آدامام هر آداما اینسانا
یووشماغیم چتین اولور قاداسی
*
جیغاتئلم دوشه نمیرم اوزومه
ها باخیرام گؤرونمورم گؤزومه
اؤزومنن گئده نده بیرده اؤزومه
قوووشماغیم چتین اولور قاداسی
*

منیم سئوگیم اوچون داریخاجاخسان - جیغاتئل عیسی قیزی

اؤلدوردویون بو سئوگی نین یاسیندا
سؤزوم بودور یا اوّل ده یا سوندا
منیم اژطوم اوچون داریخماساندا
منیم سئوگیم اوچون داریخاجاخسان
*
منیم سئوگیم بیر گول اویدو تر – اینجه
سریله میشدیم سولدورارسان درینجه
سن سئوگیسیز سئوگی لری گؤرونجه
منیم سئوگیم اوچون داریخاجاخسان
*
اینله یه جک گاه کامانین گاه نی ین
سئومیرسن سه سنه نئجه سئو دئییم
چوخ اولاجاخ سئونلرین سئودیین
منیم سئوگیم اوچون داریخاجاخسان
*
چوخ دئییرم اود عشقیمی سویوتما
اویومایان سئوگیمیزی اویوتما
اونودارسان اونود منی، اونودما
منیم سئوگیم اوچون داریخاجاخسان

یار دئسم - جیغاتئل عیسی قیزی

سنین له من بو دونیایا
دار دئسم، دیلیم قوروسون
سن سیز منه ، حیات دئسم
وار دئسم ، دیلیم قوروسون
سن له گؤزل دیر داغ، دره
سنین له وارام محشره
گؤزونله اؤزگه گؤهره
درّ دئسم، دیلیم قوروسون
قییما جیغاتئلی ایه
سئوگیسینه گل چیخ یییه
سن دن سورا بیر کیمسه یه
یار دئسم، دیلیم قوروسون

بخته ور - جیغاتئل عیسی قیزی

درد و بلا گؤرمویه سن هئچ زامان
منی درده سالیب گئدن بخته ور
آختاریرام تاپانمیرام اؤزومو
منی مندن آلیب گئدن بخته ور
قالی اولماز بیر قیرمیزی ناخیش لا
نئجه گئدیم سن گئتدیین یوخوشلا
کؤنول ربابیمی بیرجه باخیشلا
گیزلی – گیزلی چالیب گئدن بخته ور
جیغاتئلین گؤزلرینه چن دولوب
بو دوشدویو بیر فعیللی بند اولوب
هر نه گؤروب گؤردویونه بند اولوب
اوره ییمده قالیب گئدن بخته ور

آلدی گئتدی - جیغاتئل عیسی قیزی

اولان عاغلیمی دا ساز آلدی گئتدی
گلنده اوزومه بیر گولومسه دی
گئده نده بیر باتمان سؤز آلدی گئتدی
آلیشدی کرمین اودلو یاسیندان
بویلاندی اصلی نین بخت آیناسیندان
قاصدی کؤنلومون شاه قاپیسیندان
کیمسه نی سئومیین قیز آلدی گئتدی
دولاندی جانیمدان بیر جان قوپاردی
حاکیمین الیندن فرمان قوپاردی
هر نه ییم واریدی آلدی آپاردی
دئمه جیغاتئل دن آز آلدی گئتدی
سحر سحر اولان عاغلیمی دا ساز آلدی گئتدی
*

سئوه بیلمه رم - جیغاتئل عیسی قیزی

منه منی سئو دئییرسن

من سنی سئوه بیلمه رم

مندن سئوگی ایستییرسن

من سنی سئوه بیلمه رم

سن خالی سن بو سئوگی دن

سئوگی سالیب ساچیما دن

واللاه قورخورام سئومکدن

من سنی سئوه بیلمه رم

چمن دئییل چیچک ده رم

خالی دئییل یئره سه رم

آلما دئییل آلیب وئرم

من سنی سئوه بیلمه رم

جیغاتئلین یوخ اداسی

گؤیلردن گلیر صداسی

اینجیمه مندن قاداسی

من سنی سئوه بیلمه رم 

اوینویورام - جیغاتئل عیسی قیزی

اوینویورام گؤرمورسن ، ائله اوینا دئییرسن

دوشونمه هامی کیمی بیلک نن اوینویورام

اینجیمه دردین آلیم ، منیم هاوام آیری دی

بنده ایله ایشیم یوخ ، ملک نن اوینویورام

بوتون گونو تویدایام ، یوخدور بیر دردیم غمیم

ذره جه مئی دادمارام ف باشیمدا مودام دمیم

یازدا گول ، پاییزدا بار ، یای دا گونش همدمیم

قیش دا قارا ساورولوب ، کولک نن اوینویورام

بئزه دیک ده بئزه ردیم قدیم نقاشلار کیمی 

توکنیب بیتمزیدید سیلدیریم داشلار کیمی

اوچوب گئتدی آرزولار ، کؤچری قوشلار کیمی 

قاییتمیر مکانینا دیلک نن اوینویورام

عصیرلر قرینه لر ، بیر عؤموردن اؤتوشور

گونلرین رنگی قارا ، آغ کؤموردن اؤتوشور

قاریان کدر یمین ساچلارینا دن دوشور

سئوینجیم بئشیکده دیر بلک نن اوینویور

یئری دهشت بورویوب ، نه قالیب گؤر نه قالیب

یئرده گؤی ده حکمونو آلاندا گؤی دن آلیب

حاق گؤنده رن کندیره ، ناحاقلار دویون سالیب

کلفی آشماق اوچون کلف نن اوینویورام

بوینومدا میرواری لر دوزولوبدولر صفه

میلیون زیانیم اولور یئتیرینجه بیر نفعه

اؤلورم دیریلیرم گون عرضینده مین دفعه

عزرائیله جان دئییب ، ملک نن اوینویورام

منیم هاوام آیری دیر ، قولاغیم هئی سس ده دی

شاعیر زیل نن اویناماز ، اوینادیغیم حرف ده دی

جیغاتئلم اوره ییم سول الیمین اوسته دی

ساغ الیم ورق اوسته له لک نن اوینویورام 

اینجیمه آغرین آلیم ، منیم هاوام آیری دی

بنده ایله ایشیم یوخ ، ملک نن اوینویورام

*

بو قیز - جیغاتئل عیسی قیزی

سئوه نده سئوگیمی گیزله ده نمیرم

دئییرلر سئوگی دن خالی دیر بوقیز

صحرادا دولانیر مجنون خیالیم

دئییرلر بلکه ده لیلی دیر بو قیز

*

قیشیما یاز ، یازیما سرت قیش گلیر

دوغولور آرزولار آیاق باش گلیر

گولنده ده گؤزلریمدن یاش گلیر

دئییرلر گؤزلری سولودور بو قیز

*

سئوگیمین آستاری اوزوندن باها

چوخ باشلار ایدیریب نؤکره شاها

جیغاتئلم بیرده سئومه رم داها

چونکو سئوه نده دئییرلر دلی دیر بو قیز

*

باخماییر - جیغاتئل عیسی قیزی

چوخ دیمشیم اوره یینین خه طرینه

کوسوبدو اوره ییم ، سؤزومه باخمیر

الداتمیشام صاف مقدس ، یالانلا

یالانیم بیریانا ، دوزومه باخمیر

*

کوسوب دادمادیغی نوغولدان کوسوب

بیرده سئوگی آدلی ناغیلدان کوسوب

داواسی باشنان دی ، عاغیل دان کوسوب

ها سیغال چکیرم ، نازیما باخمیر

*

قانلی دریالاردا گمی سی باتیب

گمی نین ایچینده آرزوسو یاتیب

کؤکسومون آلتیندا بیر اوجاق چاتیب

داغلییر یانیرام کؤزومه باخمیر 

*

قویمایین جیغاتئل سولا گتیرین

چیخیب ساغا گئدیر سولا گتیرین

یالوارین یاخارین یولا گتیرین

دوشوب آیاغیما اوزومه باخمیر

*

قحط دی می ؟ - جیغاتئل عیسی قیزی

دره تپه گزن اوغلان

دوز باشینا قحط دی می؟ 

ائله مندن دانیشیرسان

قیز باشینا قحط دی می؟

یاتدیم اویاندیم دئییرسن

دنیانی داندیم دئییرسن

آلیشدیم یاندیم دئییرسن

بوز باشینا قحط دی می؟

جیغاتئلی سالما منده

گئت گولونو در چمن ده

نه ایستیرسن آخی منده؟

قیز باشینا قحط دی می؟

*

مگر قحطی است؟

ای پسری که دره و تپه می گردی

مگر قحطی زمین هموار است؟

همه اش از من حرف می زنی 

مگر قحطی سخن است؟

خوابیده و بیدار شدم ، می گوئی

دنیا را انکار کردم ، می گوئی

سوختم و آتش گرفتم ، می گوئی

مگر قحطی یخ است؟

جیغا تئل را به دام نیانداز

برو گلت را از چمن بپچین

آخر چه حسنی در من دیدی؟

مگر قحطی دختر است؟ 

*

 شاعر : جیغاتئل عیسی قیزی 

*

*