Donnerstag, Juni 07, 2018

کیم اگر توبه ائدرسه - ائلشن خزر

کیم اگر توبه ائدرسه
اوزو آللاها گئدرسه
اونا جنت اولاجاق دائما قیسمت
بودور اصلینده سعادت ابدیت
ییغدیغین مال قیسسا مدتچاتاجاق کاریوا قارداش
بونو درک دئیلیه سن کاش ، قوجالیرسان دای ، اؤتور یاش
گله جک واخت ، قویاجاخلار سینه وین اوستونه بیر داش
قالاجاقسان ائله چاش -  باش
او زامان درک ائده جکسن، نه اوغول وار نه ده یولداش
نه ده کی گلمه یه جک دادیوا اوگون ائوده کی داش – قاش
گله جک خیلی وطن داش وطنیندن
توتاجاقلار کفنیندن
دیده جکلر بدنیندن اتیوی هیسسه به هیسسه
بودور غصه ، بودور وحشت،  بودور دهشت
و جهنم ده اولان ایستی حرارت، سنی آلاجاق دائما آغوشینه
سن دؤزه جکسن می بونا؟ یوخ
سببی واردی چیلیزسان و ضعیف سن، اؤزووی ساتما حیف سن
چوخو آزنان ده ییشیرسن نه حیف سن
آرادا باشیوی قالدیر گؤیه بیر ائیله نظر
یاتما بشر، گؤرنه قدر کوره سماده دوزولوب دور اله ییر
کیم بولارا امر ائله ییر، گؤر بو بش فیکر ائله ییرکی
بیری توققوشسا بیرینن داغیلار کولو و عالم ، یاشاماز بیر نفر آدم
دئملی بوردا نظام وار یارادان وار
آچ اوخو ائوده قرآن وار و نیشان وار
گؤره جکسن کی ، یاغیشی کیمدی سپن یئر اوزونه
هم بولودو پرده کیمی کیمدی چکن یئر اوزونه
بو قدر بیتکی لری کیمدی اکن یئر اوزونه
اطرافیوا باخ نه قدر نوع دا چیچک وار
هره سینده اؤزونه مخصوص اولان رنگ و بزک وار
او چیچکدن اؤزونه روزو تاپان قورد و بؤجک وار
کپنک وار، بیری ایستهسال ائلیر بال، او بیری قورددا ایپک وار
هامیسین گؤز گؤرور آشکار، بولاری خلق ائلین وار
نه ائدیبدور سنی وادار، ائده سن آللاهی انکار
سببی واردی جهالتدی، یعنی غفلت
نیه سن آلمادین عبرت، او گئدنلر نه آپاردی؟
بو حیات سانکی قطاردی
سنی ده میندیره جکلر، ائلییب سورقو و سوال دیندیره جکلر
دئیه جکلر جوابین، بو قدر مال کی ییغیبسان
حسابین وئر، کیتابین وئر
قالاجاقسان او زامان لال
ووراجاقلار او یئکه بوینووا قاندال
قوراجاقلار یئکه تونقال یاناجاخسان
نه قدر مال کی ییغیبسان داناجاخسان
نه قدر حقه گیریبسن هامیینی آختاراجاخسان
ییخیلیب یالواراجاخسان، اؤپه جکسن اولارین ال آیاغیندان
توتاجاخسان بالاغیندان دئیه جکسن کی ایلاهی

بو گوناهی ائله ین من، بونو اینسان ائله مزدی
نه ده حیوان ائله مزدی، نیه کی من ائله دیم ملته شیطان ائله مزدی
چکرک اه، دئیه جکسن منی قایتار گئری آللاه
ائله ییم نفسیمی اصلاح، دئیه جکلر: داها گئجدی بو عؤمور مدتی کئچدی
بونو دونیادا ائده یددین، ابدی نورا گئده یدین
توتاجاخلار او یالانچی که کولوندن ائله محکم
سورویوب آتشه دوغرو آتاجاخلار، چکسن غم
دئیه جکلر: سنه دور دائمی مسکن ، بو جهنم بنی آدم
بونو یازدیم « شعرا» سوره سینین حقین ادا ائتمه ک اوچون منی
دوشونن، درک ائده سن سن، جمعیت له برابر اولاسان تن
رسول الله دا قیامت ده ، بویورسون حاجی ائلشن سنه احسن
بورادیر حقی دئین بنده لره دائمی مسکن
بویورون جنت اعلایه بو بو اوزدن




Mittwoch, Dezember 06, 2017

ایکی سؤیود


حاج صادق – ایکی سؤیود
قوجامان جوت قاریان کؤلگه لی گؤرکملی سؤیودلر
اولو سلطان ساوالان تک اوجا پرچملی سؤیودلر
بیری مجنون بیری لیلی کیمی چم خملی سؤیودلر
گؤزل عالملی سؤیودلر
آی سویودلر او یاشیللیق آزالیب قول بوداغیزدا
گینه خوش نغمه لی قوشلار کونوشوللار قوجاغیزدا؟
اوخویلار سیزه خوش سسلرینن غملی چاغیزدا
هله سس وار بوداغیزدا
خیریزاولسون گئنه سیز جوت یاشییرسیز بو وطنده
جان دئییب جان ائشیدیرسیز بو گؤزل گوللو چمن ده
یاریشیرسیزساریشیرسیز باریشیرسیز یئل اسه نده
بیرزامان یاریله من ده اوزون ایللر گلیب کرلگه زده
او گؤزل سئوگیلیمین آتش عشقینده یاناردیم
آیریلیق صحبتین عالمده بیر افسانه ساناردیم
من فقط وصلی قاناردیم
بوگون عؤمرومدن ایتن گونلری آختارماغا گلدیم
نازلی یاریملا کؤچن کاروانی قایتارماغا گلدیم
غم الینن هله لیک کؤنلومو قورتارماغا گلدیم
یارا یالوارماغا گلدیم
گلمیشم بیرده یاتام سیز سالاسیز باشیما سایه
او کچن خاطره لردن سؤز آچام آیه به آیه
قاییدام بیرده جاوانلیقلارا او حال و هوایه
اونداکی لطفه صفایه
گلمیشم بیرده گئدم خاطره لر کویونا مهمان
قوجالیق دردینی یاددان چیخادام اولسادا بیر آن
بلکه بو نحویله تسکین تاپا درد اولماسا درمان
نئجه محتاج اولور اینسان
بیردا معنالی گؤزل خاطره لر خیمه ویریبلار
ائله بیر بیردا کئچن گونلریمیز صف ده دوروبلار
گؤز اؤنونده ایکی عاشق گؤرورم بزم قوروبلار
باده سیز مست اوتوروبلار
بیری ناز ائتمه ده دیر غمزه یاغیر مست گؤزوندن  
بیرسی آیری بیر عالمده دی آیریلمیش اؤزوندن
درس آلیر سانکی غزل یازماغی دیلدارین اوزوندن
دانیشیر سئوگی سؤزوندن
سوگیلیم دیر منه ناز ائیلین او گؤزلری جئیران
اؤزو بیر گول ساچی سنبل سؤزو شیرین لبی خندان
او منیم جانیما جانان او منیم دردیمه درمان
من اونون حسنونه حئیران
آی سویودلر دانیشین منله ندن فیکره دالیبسیز
منی هجران چورودوب سیز نه سبب له سارالیبسیز؟
او گؤزل گؤزدن ایراق یوخسا منیم تک قوجالیبسیز
نییه بو حاله قالیبسیز
بیر زامان سیزده منیم تک گونو گوندن اوجالاردیز
گون ساچان وقت ده سیز چترله نیب کؤلگه سالاردیز
گئجه لر زهره دن الهام آلاراق چنگ چالاردیز
چنگ لردن باج آلاردیز
سیزده من کیم البت  قاجیدیب جور زمانه
قوجالیق چوخ اوجا قامتلری دوندردی کمانه
گله لعنت گل پژمردۀ غمباده باد خزانه
بلبلو گتدی فغانه
قوجا دونیانین ازلدن بئله دی نظمی نظامی
اهل معنا سؤزون ایلکینن آلار متن پیامی
گئجه گوندوز ویریر اینسانه دولاندیقجا پیامی
خوش گونون یوخدو دوامی
تانیمازسیز منی دوران بئله بیر حاله سالیبدیر
او زامان بیردا جاوان گؤردویوز عاشق قوجالیبدیر
هر نه وئرمیشدی طبیعت قوجالیق مندن آلیبدیر
داها مندن نه قالیبدیر
من او گونلر بیرا بیر لاله عذاریله گلردیم
بیرخمار گؤزلو شیرین سؤزلو نیگاریله گلردیم
بو یاشیل لیقلارا بیر تازه بهاریله گلردیم
اوندا یاریله گلردیم
گؤرمه میشدیز منی بیر یول بئله یالقیز بو مکاندا
ایندی من بیردا تک اولدوم نه بیلیم یاریم هایاندا
نئجه گؤر بی خبریک بیربیریمیزدن بو زماندا
بو قارانلیقدا دوماندا
روزگار آیری سالیبدیر  اونو مندن منی اوندان
من دییردیم اؤله رم گؤرمه سم او دیلبری بیرآن
تاب ائده رمیش دئمههر مشکوله هر محنته اینسان
اؤیره در دؤزمه یی دوران
بورا بوندان سورا چوخ تازه جاوانلار گله جکلر
بو یاشیللیقلارا چوخ سرو روانلار گله جکلر
درس عشق آلماغا عشاق زمانلار گله جکلر
باغری قانلار گله جکلر
سؤز آچیم سیزلره عاشقلره رندانه لیگیمدن
عشق دن باشقا بوتون یوللارا بیگانه لیقیمدن
دانیشین سؤوگیلیمین شمعینه پروانه لیگیمدن
مرد و مردانه لیگیمدن
بیله لر بیردا اولاردان قاباق عاشق ده واریدی
سئوگی سوداسی بو بازارده صادق ده واریدی
بیردا بیر گول بیر اورک داغلی شقایق ده واریدی
بیردا صادق ده واریدی

Donnerstag, Oktober 05, 2017

عزرائیل و مریض - کریمی مراغه ای

عزرائیل :
منی مامور ایلیوب خالق سبحان حــاج آقا
قبض روح ایتماقا گلدیم سنی الان حـاج آقا
ویردی مستنطق رحلت منه فرمان حـاج آقا
وقت قورتاردی نفس چکماقا قادر دگیرسن
آلورام جانیوی سس چکماقا قادر دگیرسن
مریض: 
آی علی ، آی ولی ، آی وای ، دورن اوغلان آیاقا
کیمدی بو بی ادبانه بیله گیردی اطاقا
بو صفتده بشر اولماز باشی بنزیر بالاقا
نه سلام ایتدی ، نه تعظیم ، عجب هیوره دی
چاتدادی باغریم اماندی بونه بد منظره دی
عزرائیل:
 
کیشی قشقیرما ، علی یا ولی گؤرمزله منی
منه مردم ملک الموت دیللر علنی
گلمیشم من آپارام محضر معبوده سنی
داخی بوندان بویانا بیر کسه آمر دگوسن
وقت قورتاردی نفس چکماقا قادر دگوسن
مریض:
منی عفو ائیله داداش بیلمدیم عزرائیل سن
شکر لله سن اؤزون بیر ملک کامل سن
خدمتون فرضیدی پیک ملک عادل سن
اوتی بیر چای گتورسونلر ، هله تعجیل ایلمه
صبر هر ایشده گؤزلدور ، بیله تعجیل ایلمه
عزرائیل:
کیشی اوخشاتما منی قونشووز عبدالکریمه
من بو دنیا سولارین ایچمرم افسانه دیمه
من طلبکار دگولم چوخ دیله توتما سریمه
چوخ قالورسان هله بو دیللره ماهر دگوسن
وقت قورتاردی نفس چکماقا قادر دگوسن
مریض:
سنه بنزر بیری گلمیشدی بیر آز بوندان ازل
چوخ خوش اخلاق صداقتلی نظافتلی گؤزل
کیم ایمیش او ؟ سنه قربان اولوم ای پیک اجل
نه دئیوم عینا اونون باشی سنون باشیودی
بولمرم اوغـلوویدی یا بالا قارداشیویدی
عزرائیل:
عمو دکتوردی او ، اوغلوم دگی ، یولداشدی منه
قبض روح ائتماقا یولداش ندی ، قارداشدی منه
خیلی ماهردی بو ایشده آتادان باشدی منه
گؤردوم اما سن اونا، قوشمالی خاسر دگوسن
وقت قورتاردی نفس چکماقا قادر دگوسن
مریض:
دوزدی مامور ائیلیوبدور سنی خلاق کریم
بلکه سن سهو ائیلیوبسن او دئیه ن من دگیلم
هله مندن قوجلار وار نه روادور من اؤلم
گرچه زحمتدی قئیت بیر سوروش اوندان سورا گل
آدیمی شغلیمی گئت بیر سوروش اوندان سورا گل
عزرائیل:
کـیشی آغـریتدی منیم باشیمی بو طول کلام
اللی میـن ایل جان آلان سهو ایلمز اولما عوام
عمـووی ، عمــه وی ،  اجدادیوی ، بیر بیر تانیرام
سن مگر مصطفی خان اوغلی مظاهر دگیسن؟
وقـت قورتـاردی نفس چکماقا قادر دگیسن
مریض:
من دیدیم اوغلومی داماد ایدرم ائتمه میشم
مشهـده کرب وبـلایه گیدرم گیـتمه میشم
تومنی بیر قیـرانا ویئر مـاقی ترگیتمه میشم
هـــله آغـزیم منیم ایستور تازاجا آشه یئته
دگول انصاف بو تئز لیقدا باشیم داشه یئته
هله اگلش من اؤلوم هر نه سویورسن ، گتیسین
منقل حاضیردی اگر نشئه چکیر سن ، گتیسین
آبجو، پیپسی کولا،  کنیاک ، ایچیرسن گتیسین
مندن اوچ یوز تومن آل ، وئر منه مهلت ایکی ایل
باشا باش ائیـلیوم آســوده عبـادت ایکی ایل
عزرائیل:

کیشی سارساخلاما ، نشئه ندی ، تریاک ندی؟
آبجو نمندی ائششک کیشی کنیاک ندی؟
قانمیوبسان هله مردار ندور پاک ندی
قانماسان چون ائله بیر فاسق فاجر دگوسن
وقت قورتاردی نفس چکماقا قادر دگوسن
من او مــامور اداره دگــولم روشـوه ییم
بئش تومن پولدان اؤتور بیر کسی بدبخت ایلیم
بله آســوده اوزانما عـمو مــن گئتمه لیم
ناقصون واردی مگر گئتماقا حاضیر دگوسن
وقت قورتاردی نفس چکماقا قادیر دگوسن
مریض:

ناقصیم چوخدی عزیزیم اولا مــشگلدی تمام
سن گئدوب بنده دن عرض ایله خداونده سلام
اؤزی انصاف ائیلسون وار ایکی اوچ خیردا بالام
هـــله من تازه جوانم ائله گون گؤرمه مشم
دنیادان دویمامشام بیر ائله کئف سورمه میشم
عزرائیل:
کیمدی ائششک کیشی ،غلمان وئره یا حور سنه
حـوری معروفه دگول کی، بـاش اگه هر گلنه
سوخاجاق مالـک دوزخ گـتووه اودلی شنه
غـرق سن معصیته ، طیب و طاهر دگوسن
وقت قورتاردی نفس چکماقا قادر دگوسن
مریض:
دیمه لی ماک دوزخده تیکـوب گؤز یولـوما
گؤر بو الله نئچه مامور دوزوب سـاق - سولوما
بیر نـفر اینجینده بولـمز منی مینـت پولوما
پولونان مالک نیرانیده آرام ائدرم
گئدرم جنته حوریلریده رام ائدرم
عزرائیل:
داخی بوندان سورا مالک دگیسن اؤز پولووا
گـورسن اهـل عیالون دوزلوب ساق - سولوا
ییه جاقلار ، ایچه جاقلار، سچاجاقلار یالووا
بو ائوین دخلینه یاخرجینه ناظر دگوسن
وقت قورتاردی نفس چکماقا قادر دگوسن
*
ایش اورا یئتدی ائو اهلی هاموسی آغلادیـلار
حاجینین دستمالینان گؤزلرینی باغلادیــلار
بعضی قاچدی کفنه بعضیسی سو داغلادیــلار
دست قدرت حاجینون تختینی ، تابوت ائیلدی
ناز پـرور بدنین ، جانـوره قـوت ائیـلدی
دعوا باشلاندی مال اوسته حاجینون وای حالنا
باجی قـارداشه دیـورکی: ده ده ویــن سقالنا
کــوره کن گه یالـنا سـچار گـهی یوپالینا
نچه گوندن سورا ، آرواد گئدوب اؤزگه اره
بیر نفر گـلدی تصاحـب ایلدی سیم وزره
خوش اوشخصه اؤزی اعمالینی اصلاح ایلیه
ارجعی لفظین ایشید جک اؤزی لبیک دیه
خــلعت آخرتی اگـنینه عــزتله گـیه
روبرو اولدی همان لحظه که عزرائیلیلن
گوله عزرائیلی گؤرجک آلا جانین گول ایلن
*
شاعر : کریمی مراغه ای
*

Samstag, September 30, 2017

اولام - جمشید منوری

ایستیرم بیر گون اولا شاهد بستانون اولام
دووار اوسته اوتوروب بلبل دستانون اولام
گتوروبلر خبری رخش سواریم گلوسن
کاش گلم کویوه جاروکش میدانون اولام
ای نگاریم نه اولار بیر ده اولا مصر قدیم
سن زلیخا اولاسان من ده کی زندانون اولام
بیر نولایدی بو گیله م گول یاناقوندا خال اولا
کنج لبده اوتوروب ذوقیله حیرانون اولام
گوله سن گول یاناقوندا ن دوشم اول چالیه من
بوغولام هی ال اتک زلف پریشانون اولام
یاز منور غزلی منده سه گاهین اوخویوم
سئوه ره م بیر کی آغیز موصطفی پایانون اولام

واریدی - جمشید منوری


ای کونول گیتدی او گون, شوکت و شانیم واریدی
ایندی جان یوخدی , قدیم غملره جانیم واریدی
کرم اصلی ناغیلیدی, من ایدیم ,کرسی باشی
سؤیلیه ردیم کئفیلن , ایستی مکانیم واریدی
اوخویاردیم غزلی گرچه یاناردی اوره گیم
بیر بئله غم لریلن شور جوانیم واریدی
واعظین طعنه سینه یاندیم و یاندیقجا , دیدیم
بو عجبشیرده منیم نام و نشانیم واریدی
ایندی باخما قوجایام جانیمی درد وغم آلیب
ظالمین دورماقا قارشیندا توانیم واریدی
سازیلا صحبت اولاندا توکولردی غزلیم
نیلییم شاعیریدیم سوزلی دهانیم واریدی
منوری 26/6/94