دوشدو - خسته قاسم

آی آغالار ، آی جماعات
داغا قار دوشدو ، قار دوشدو
اؤزوم قالدیم غربت ائلده
یادا یار دوشدو ، یار دوشدو
...

آختارماز تانیشیم یادیم
گؤیلره قالخدی فریادیم
مجنون کیمی منیم آدیم
ائله جار دوشدو جار دوشدو
...

چرخ فلک یولون آزدی
اقبالیمی قارا یازدی
قبریمی اؤزگه لر قازدی
یئریم دار دوشدو دار دوشدو
...

گئدین دئیین آناسینا
صیغال وئرسین سوناسینا
یار سینه نین آراسینا
بیر جوت نار دوشدو نار دوشدو
...

خسته قاسیمی غم باسدی
یار بیزی زولفوندن آسدی
شیدا بولبول گولدن کوسدو
گوله خار دوشدو ، خار دوشدو

نا

یوکوم - خسته قاسم

حق باغیندان میوه دردیم ، سایماکی کالدیر یوکوم
لذتیندن دویماق اولماز آبی زولالدیر یوکوم
مشتری ام ساتان اولسا ماتاحینی آلارام
چونکو اؤزوم دور ساتارام لعل میثالدیر یوکوم
..
بئش بوداقدا ، اون یئددی گول گئجه گوندوز دررم
جان ایسته سن من یولوندا بو جانیمی وئرره م
سیندیرمارام بیر کؤنولو باجاردیقجا هؤره رم
ایشله ییب چوخ قازانمیشام پاکدیر حلالدیر یوکوم
..
نامحرمین مجلیسینده بیر آن قاچماز دوداغیم
ایلاهی دن گوج آلمیشام یانار دائم چیراغیم
تیکمه داشلی خسته قاسم ، گئتمه لیدیر ایاغیم

گئجه گوندوز آه چکرم دردی خیالدیر یوکوم

کهکلیک لر - خسته قاسم

من گئدیرم سیزی کیمه تاپشیریم
دام اوستونده دوران سونا کهلیک لر
آل - یاشیل گئیینیب ، تیرمه باغلارسیز
نه گیریرسیز دوندان - دونا کهلیک لر
*

فره کهلیک داغ باشیندا سس ائیلر
قاققیلداشیب بیر - بیریله بحث ائیلر
بیلمیرم توی ائیلر ، یوخسا یاس ائیلر
قایناغین باتیرمیش قانا کهلیک لر
*

کهلیکین اویلاغی ، قایالار باشی
قاققیلداشیب تاپار یولداش - یولداشی
بره سی برک اولسا اووچوسو ناشی
اوچوب گئدر آسمانا کهلیک لر
*

گؤزل کهلیک داش اوستونده دوروبدور
گردن چکیب ، نئجه بوینون بوروبدور
هئچ بیلمیرم اووچوسونو گؤروبدور
اوز توتدولار بیابانا کهلیک لر
*

نه دردینیز وارسا منه سؤیله یین
من گلینجه یوللار اوسته ایله نین
کهلیک لر سیز منی حلال ائیله یین
من گئدیرم اوزاق یولا کهلیک لر
*

هر ایکینیز یاشیل باشلی سوناسیز
منیم گیزلی دردیم پنهان قاناسیز
آیریلیریق ساغلیقینان قالاسیز
قاسم گئدیر داغیستانا کهلیک لر

منی - خسته قاسم

غریبلیکده غمخواریمسان عزیزیم

یئتیریبسن بیره دوستا نامه نی

ایکی دیللی یاردان حذر ائیلره

سالیر دیلدن - دیله داستانا منی

*

آغزینی اوخشاتدیم زنبورا شانا

ناشی بولبول اوچوب قونار گولشانا

آت اوخلارین سینه م قویدون نیشانا

سن نییه وورمورسان قصدن آ منی

*

من قاسیمام اوزاق آتدیم داشیمی

دیده مدن آتیم قانلی گؤز یاشیمی

دوست یولوندا من قویارام باشیمی

دوغرو قبول ائتسه آستانا منی

باشینا دولاندیغیم - خسته قاسم

یاخشی اولار قوهوم قارداش
ائل ، باشینا دولاندیغیم
هاردا گؤرسن یارا یالوار
دیل باشینا دولاندیغیم
*
یارا یالوار اولما ناشی
عاشیق لر گزه ر یاناشی
یار گؤزوندن آخان یاشی
سیل باشینا دولاندیغیم
*
بودور گلدی باهار واختی
سینه م اولوب یارین تاختی
سویولدو بولبولون رختی
گول باشینا دولاندیغیم
*
قاشلارین قورار دیوانی
تخدن سالار سلیمانی
خسته قاسیمین جانانی
گل باشینا دولاندیغیم

یامان اولار - خسته قاسم

دلی کؤنلوم هاوالانما سنده چوخ
یاندیرار داغ - داشی دیل یامان اولار
اینجیتمه قونشونو آجی دیل ایله
یئندیره ر آشاغی ائل یامان اولار
*

دئمه میش سؤزلری دئده گی اولما
چاغریلمامیش یئره گئده گی اولما
اسریمیش چایلارا گیرگی اولما
دالی قاییداندا سئل یامان اولار
*

حسته قاسم دئییر سؤزونو کسمه
دوشمان ال آلتیندا باشینی کسمه
یئل هر یانا اسه اونونلا اسمه
دوز تانی آللاهی یول یامان اولار

دونیا - خسته قاسم

حیله گردی هر گله نی
اول عزیز توتار دونیا
سونرا قویار کمانینا
غربت ائله آتار دونیا
*

هر گئده نه ال ائیله یر
یاندیریبان کول ائیله یر
بیر دامغالی قول ائیله یر
بازارلاردا ساتار دونیا
*

قاسم ساخلا ایمانینی
ایمان سیز گئندن تانینی
بیر گونده آلار جانینی
تورپاقلارا قاتار دونیا

قالدی - خسته قاسم

کؤچ - کؤچ اولدو دلی کؤنلوم بولاندی
ائللرین مسکنی داغلارا قالدی
یازیق مجنون لیلی دئدی دولاندی
او یازیغین گونو آغلارا قالدی
*

بولوت اوینار شیمشک چاخار هاوادا
دلی کؤنلوم نفسیم ایله داوادا
عندلیب قان آغلار قالار یووادا
بولبولون نغمه سی باغلارا قالدی
*

خسته قاسم گونون کئچدی نه چارا
گولشانیندان بولبول دوشدو نه چارا
غربت ائله یولون دوشدو نه چارا
عئینیمین گولمه سی چاغلارا قالدی

نه دانام ایندی - خسته قاسم

یادی صرصر ائله اسدی زمیمه
نه سونبولوم قالدی نه دانه م ایندی
درد آنلاماز ، بی وفا یار یولوندا
آدیم رسوای اولدو نه دانام ایندی
*
پروانه تک منده یاندیم آ ، یاغدا
یار گلدی اوزومه ، اولدو آی عاقدا
درده دوشدوم کؤمگه بو ایاقدا
نه نادانیم گلر نه دانام ایندی
*
خسته قاسم یار قاپیسی بو دردی
اورگیمین آچان گولون بو دردی
غمخوار اولوب چکمک اوچون بو دردی
نه آتام وار منیم نه آنام ایندی

بللی دیر - خسته قاسم

ای آغالار سیزه تعریف ائیله ییم

گلن آیین گلیشندن بللی دیر

کیمی تونار کیمی کؤچر یوردوندان

فلکینده گردیشیندن بللی دیر

*

نامرده اوز سالما اوزون گؤتورمز

نامرد قوناغینا چؤرک گتیرمز

اوت کؤک اوسته بیتر اصلین ایتیرمز

بد اصیل ده یئریشیندن بللی دیر

*

هر کیم قاپیسیندا بئش گئچی ملر

تکبر ائیله ییب مجلیسه گلر

گؤزو کله سینده هرجایی گولر

هرجایی ده گولوشوندن بللی دیر

*

صاباح محشر گونو قورارلار سانی

کیمسه سالابیلمزقصری ائیوانی

هر آنلاماز دئییر منیم کئیوانی

کئیوانی دا تیکیشیندن بللی دیر

*

خسته قاسم سؤزون سالما درینه

عاشیق معشوق ایلن گرک سورونه

مرد آند ایچر ایستکلینین سرینه

ایستکلی ده باخیشیندان بللی دیر

گیزله نیر - خسته قاسم

بیر بولبول ، بیر یارپاق ، بیرده خار

بو اوچو بیر اولسا ، گولده گیزله نیر

بیر آتش ، بیر آلاو ، بیرده کؤز

بو اوچو بیر اولسا ، کولده گیزله نیر

*

او نئجه قوشدورکی ، یاز گلر باغا

سینه می چکیبلر دویونه داغا

بیر شانا ، بیر بافتا ، بیرده بیر جیغا

بو اوچو بیر اولسا ، تئلده گیزله نیر

*

او نئجه قوشدور کی قایادا سکر

جایناغی نئشتردیر ، قانیمی تؤکر

بیر نوغول ، بیر نابات بیرده بیر شکر

بو اوچو بیر اولسا ، دیلده گیزله نیر

*

او نئجه قوشدور کی ، آناسین امر

هاوادا دؤور ائدر شمس ایله قمر

بیر قیلینج ، بیر خنجز ، بیرده بیر کمر

بو اوچو بیر اولسا ، بئلده گیزله نیر

*

آلادیر گؤزلری شهلای نرگیز

سنین تک بیر گؤزل بولانماز هرگیز

بیر یولاق ، بیر حووض ، بیرده کی کهریز

بو اوچو بیر اولسا ، گرلده گیزله نیر

*

بافتا : ساچی و یا هرزادی باغلاماق اوچون ایپکدن توخونموش قایتان

جیغا : تئل

نئشتر : جراح پیچاغی

بولونماز : اله گلمز

کهریز : یئرآلتی سویو

سکر : آتیلیب دوشر ، اویناخلار

قیلینج : شمشیر

خنجر : دشنه

آلاو : زبانه آتش

کؤز :آتش سرخ شده ، اوتون شعله سینین سؤنوب قیپ قیرمیزی قیزاران چاغی

جایناق : پنجه ، چنگال

من دوشدوم آستاناسینا - خسته قاسم

آی آغالار ، مسلمانلار

من دوشدوم آستاناسینا

دولاندیم سر کویونا

من دوشدوم استاناسینا

*

آهولار اوتلار چمنده

کؤنلومدور عرش زمینده

درویشین قیرخ لار زمینده

من دوشدوم آستاناسینا

*

خسته قاسم ائتمه فغان

اورگین اولماسین آل قان

منیم مولام شاه مردان

من دوشدوم آستاناسینا

گؤزلر - خسته قاسم

ظالیم اووچو گزیر اوو بره سینده
اوخ کامانی الده مارالی گؤزلر
سنده بو گؤزللیک عالمی یاخار
اووسونسوز گمیندن مار ، آلی گؤزلر
*
سینه ن مسکن نه یاراشیر بو داغا
کامیل باغبان نئجه گلدی بو باغا
مجنون دئدی لیلی گلر بولاغا
انتظار چکمکدن وارالی گؤزلر
*
من قاسیمام تیکمه داش دیر مکانیم
یارادانا گلیر تکجه گومانیم
نازلی یارا قوربان منیم بو جانیم
یولونا باخماقدان سارالی گؤزلر

گؤزل سن - خسته قاسم

گؤزل دولان ، گؤزل اوتور ، گؤزل دور
گؤزل دانیش ، گؤزل یئرده ، گؤزل سن
گؤزل اینان ، گؤزل دیشین ، گؤزل دور
گؤزل ایچره ، گؤزل یئرده ، گؤزل سن
*
گؤزل شانه ، گؤزل گیسو ، گؤزل تئل
گؤزل قامت ، گؤزل اینجه ، گؤزل تئل
گؤزل جلاد ، گؤزل سالدین ، گؤزل بیل
گؤزل منی ، گؤزل درده ، گؤزل سن
*
گؤزل ناموس ، گؤزل غیرت ، گؤزل عار
گؤزل ایلقار ، گؤزل وفا ، گؤزل یار
گؤزل قاسیم ، گؤزل عجب ، گؤزل وار
گؤزل وورول ، گؤزل مرده ، گؤزل سن

اولا - خسته قاسم

بیر گؤزل سئوه سن بویو تاماشا

گؤرن کیمی کؤنول اونا بند اولا

گؤزللیکی گول جمالی بیر یانا

دیل دوداغی شکر اولا قند اولا

بیر گؤزل سئوه سن قامتی بسته

گؤرنده عاشیقی ائیلیه خسته

چوخدان آختاریرام بیر بئله کس ده

اشاره آنلایا ، دردمند اولا

من قاسیمام ال گؤتورمم جاناندان

جانان قارشی گلسه کئچرم جاندان

رنگی آرتیق اولا گولدن - ریحاندان

زولفلری بوینوما بیر کمند اولا
*
اولا
اوستا منی گؤزلرینه فدا قیل
سندن ساز ایستیرم ، آمما ساز اولا
دیندیرنده عمران دیلده دانیشا
شیدا بلبل لر تک خوش آواز اولا
*
یامانی - یامانا ، یاخشی نی مرده
تعریفینی ائدیم هر دوشن یئرده
دولاشمایا سیملر ، وورمایا پرده
گؤزللر تک اوندا عشوه ناز اولا
*
خسته قاسم سؤزوم سؤیلرم عیان
ائله جار ائیلرم بیان به بیان
قیمتین سوروشسان تمان اون تومان
نه اوندان چوخ اولا نه ده آز اولا
*

آ هولار منی - خسته قاسم

گئجه گوندوز آغلارام من درینده

قوجالتدی ناله لر ، آهی لر منی

یاریم بو آه ایله ناله م ائشیدیب

گلیبدی قاپیمدا آ هولار منی

*

حکاک ایستر ، حک ائتمه یه قایم دی

حقیقتین قاپیسیندا قائم دی

چوخ یاخشی دی اؤز دینینده قاییم دی

جاهل مسلمانلار آ هوولار منی

*

خرقه ندیر ؟ پوست ندیر ؟ دری نه ؟

حقدن دؤنمک سالار سنی درینه

بلکه گوذاریمی سالا درینه

هر زامان دئدیگیم آ « هولار « منی

*

خسته قاسیم اولا بیلمز عاق یارا

بایقونو گؤر ، مسکن سالیب آغ یارا

بیلمیرم کی نئینه میشم اغیارا

یاتار دورار هر دم آهولار منی

واراغی چین چین - خسته قاسم

صیاد اولدوم بیر ترلانین یولوندا

گؤتوردوم الیمه واراغی چین - چین

گؤزله دیم یاریمی چیخا قارشیما

لباسی ابریشم وار آغی چین - چین

*

اینسان اولان چکر آغری یارادان

گیزلین سیرری یادا دئمه یار ، آ ، دان

سن بیلیرسن یئری گؤیو یارادان

اوخودوم کتابی واراغی چین - چین

*

خسته قاسیم یئتدی سؤزون تر سینه

عاغیل معرفت سؤز گؤتورمز ترسینه

بدن بولور قاشلار قارا تر سینه

توتوبدور دستینده وار آغی چین - چین

الحمدالله - خسته قاسم

آیلار - ایللر حسرتینی چکدیگیم

گؤردوم جمالینی الحمدالله

او خط خالینا ، مه جمالینا

گولو رخسارینا ، تبارک الله

*

من گلمیشم دریالارین تکیندن

اوخوموشام الیفیندن بئییندن

قاراقوش تک قییناق چالینما مندن

هیئچ ائتمرم استغفرالله

*

قاسیم دئیر شعریم اولمادی اویغون

جمالین گونش دیر لبلرین گولگون

گؤتور نیقابینی باغریم اولدو خون

الین وئر الیمه سنی الا الله

الیمده - خسته قاسیم

اوچ گوندور چیخمیشام او تیکمه داشدان

قاپینا گلمیشم جانیم الیمده

آیاغین تورپاغی قووما قاپیندان

سیزیلدارام گریبانیم الیمده

*

شیدا بولبول کیمی یامان آغلارام

سینه م باشین دویونلرم داغلارام

لزگی کیمی یوز عاشیغی باغلارام

اگر اولسا سخندانیم الیمده

*

خسته قاسم کسیلیبدی خطابیم

قیزیل گول تک چکیلیبدی گولابیم

بولور قاشلی قیزیل اوزلو کیتابیم

یوخدور زرلی قلمدانیم الیمده