دوشمه سین - علی صفر اغلو

سلام وئره نلرین سلامینی آل

گؤزونون اوستونه قاشی دوشمه سین

دوره ک دوسلارینا سؤز دئمک اولار

آدامین اؤزگه یه ایشی دوشمه سین
*

یاشیاسان محبتین نوروندا

دادا گله چؤره یین ده سویوندا

یولداش آختاردیغین عمور یولوندا

باری قیسمتیوه ناشی دوشمه سین
*

هامی یا ظفرلر چالینا بیلر

قدرلی قالالار آلینا بیلر

تخت ده اؤز تختیندن سالینا بیلر

کیشی لیک تختیندن کیشی دوشمه سین
*

«علی صفر اوغلو »چکمه انتظار

دونیا دا هئچ کس ده یوخدو اختیار

بنده آتان داشا دؤزمه یه نه وار

باشیوا آللاهین داشی دوشمه سین

چکیرلر - علی صفر اوغلو

بو دنیا ازل دن بئله دی قارداش
کسردن دوشه نی دارا چکیرلر
پاپاغین یان قویوب گزیر گناهکار
گناه سیزی برکه – بوشا چکیرلر
*
دوغرو دانیشانا قورورلار تورو
ال سیز آیاق سیزا قازمیرلار گورو
یاوان یئین لره قییمیرلار شورو
یاغلی یئین لری آشا چکیرلر
*
بئله زمانه دن نئینه سین کاسیب؟
خئییر فغان ائدیب، شر قولاق آسیب
باشی اولانلارین باشیندان باسیب
باشی اولمویانی باشا چکیبلر
*
علی صفر اوغلو داغا دؤندو درد
وفاسیز فلک له گل اویناما نرد
مردی قووا – قووا ایدیرلر نامرد
حاققی – عدالتی شیشه چکیرلر
*

ساخلارام - فاطمه عبدی« کؤنول »

دنیا مننن وئردیگینی ایسته سه
تکجه سنی اوره ییمده ساخلارام
عزیزله رم ایشیق کیمی گؤزومده
گؤزلریمین به به ییندن ساخلارام
*
اؤز عؤمرومو عؤمورونه جالارام
داملا اولوب بولودلارا دولارام
سنی یاغان بولودلاردان آرالارم
حیاتیمین سنه گینده ساخلارام
*
« کؤنول» سن سیز نه آی ایستر نه گونی
ایسته مرم سن سیز اولام بیر گونی
اوغورلارام خیالیندان سئوگینی
سون آرزوم دا دیله گیمده ساخلارام
*

آمان آللاه دنیا نئجه شیرین دیر - زلیم خان یعقوب

بو دنیادان دویماق اولمور ایلاهی
آمان آللاه دنیا نئجه شیرین دیر
فصیل گؤزل، هفته گؤزل، آی گؤزل
آمان آللاه دنیا نئجه شیرین دیر
*
کیم بختیندن، طالعیندن یاری دی
کیمین بختی آخیره جان ساری دی
دنیا چیچک، اینسان اوغلو آری دی
آمان آللاه دنیا نئجه شیرین دی
*
گؤیلره باخ، گؤیو گونلو یاغیش لی
یئرلره باخ یئریگوللو، ناخیش لی
گؤزل لری تولک ترلان باخیش لی
آمان آللاه دنیا نئجه شیرین دی
*
باخماق اوچون بره سی وار، بندی وار
گزمک اوچون شهری وار، کندی وار
شکری وار پتکی وار، قندی وار
آمان آللاه دنیا نئجه شیرین دی
*
سسلی گلن سس سیز اؤلمک ایسته میر
هئچ بیر جانلی اؤلوب ایتمک ایسته میر
هامی گلیر، گلن گئتمک ایسته میر
آمان آللاه دنیا نئجه شیرین دی

آجلیق - زلیم خان یعقوب

آج گلمیشم، آج گئدیرم دنیادان
قسمتیمه دوشن آزدان دویمادیم
آری کیمی قوندوم گوله دولاشدیم
نه پاییزدان، نه ده یازدان دویمادیم
*
جان یاندیردی کؤز باخیشلار، کؤز اللر
تورپاق اولدو، تئز تؤکولدو خزل لر
نه عشوه دن نه ده نازدان، دویمادیم
*
نغمه لرله اوره ییمی آلدیلار
شیرین – شیرین خیاللارا دالدیلار
مین بیر یئرده، مین بیر هاوا چالدیلار
نه عاشیق دان، نه ده سازدان، دویمادیم

کیم نه بیلیر کیم نه چکیر - حاتم احمدی

من گولن واختی دا ملت دئدی کی
نیه گولدون دئگینن بیزده گولک
غم یئیینده ولی هئچ کیم دئمه دئی
او غمیندن بیزه وئر بیزده بیلک
ییخدی منی غصه کدر، کیم نه بیلیر کیم نه چکیر
جاوانلیقیم اولدو هدر، کیم نه بیلیر کیم نه چکیر
شیرین باتیبدی زهرده، عؤمور دولاندی قهرده
کیم کیمه دیر بیر شهرده، کیم نه بیلیر کیم نه چکیر
قلبیمی غم تیری دلر، سانما بو ایشلر دوزه لر
آغلییرام من گئجه لر، کیم نه بیلیر کیم نه چکیر
عؤمور گلیب کئچیر ولی، وئرمیر امان عجل الی
آغیللی لار اولدو دلی، کیم نه بیلیر کیم نه چکیر
غملریم آتانمیرام ، آرزی لارا چاتانمیرام
من گئجه لریاتانمیرام، کیم نه بیلیر کیم نه چکیر
قدیمی غم ائتدی کامان، عؤمور یولون آلدی دومان
حیات منه اولدو گومان، کیم نه بیلیر کیم نه چکیر

*