دیز چؤکمه رم - حسن زنکیمارلی

توتاق کی من اوتوزموشام
آمما کیمسه منه توخونا بیلمز
يا اويون صحیفه‌‌سیندن چیخارتسین
ضارافات دئيیل من شاهماتین شاهیيام
يیخارام، اورگیم بَينمیين تیکدیغیمی
آرزو طلب ائلمیرم من
خياللار قورارام اؤزوم
گره‌کی يوخدور سن دوشونن اولام
من سنین آغلینا گلمیينم
بیر تبسسؤمو
اويون قازانجی حساب ائدیرسن ؟
سن هئچ زامان بیلمه‌دین
کیمسه ایله رقابت ائتمه‌دیم
دیز چؤکمه‌رم قارشیندا
باشین سمايا چاتسادا
دیز چؤکمه‌رم
هامی دیز اوسته سورونسه‌ده
دیز چؤکمه‌رم من سنه
منه مشغول اولما
سنه همدم اولان دئيیلم
من، سؤزومون داورانیشیمین اؤچون
مسئوليتيم وار
سنی، منیم يئریمه
نه جزالاندیراجاقلار، نه مؤکافات
سؤزلریمدن نه گؤتوردوغونه
مسئول دئيیلم سنين
لاکین اونلارین
گئریيه تاپشیریلماسینا دؤشؤنمه
هئچ زامان دؤشؤنمه.

گل گئدک - حسن زنگیمارلی

گل گئدك ، بورالار يامان سويوقدو
هارا باخيرسان حاصاردي
دام دوواردي ، قوروقدو
خزل اولوب فيكرلريم سپه لنيب كؤچه باجايا
نه قاپيمي دؤين وار، نه اود آتان اوجاغا
دؤر دئيين اولماياجاق، انتظاري قوي كنارا
يول اوراقدي يئري دورما
چاتاق بلكه اوچاغا
گؤونديغين داغ ، دومانلا آلداتدي سني
باغبان دا گؤل يئرينه
سامانا ساتدي سني
اتگيندن ياپيشديغين قارا گؤز خياللارين
آستا - آستا ، زامانلا آلداتدي سني
گل گئدك بورادان
پاييري وار بو يئرلرين
اؤشؤدجك سويوغو، آيازي وار بو يئرلرين
دورناسي اوچوب گئديب
ككليگيده كؤچوب گئديب
زنگيمارلي ، سيل گؤزونون ياشيني
گل گئدك بورادان
باختيميزدا چيخيب گئديب.

یولچو - حسن زنگیمارلی

سون نفسيمي آلمادان اؤنجه
سون گؤل لريم سولمادان اؤنجه
قرار وئرميشم ، سئوگينله ياشييام
هرآن سنينله اولام
نيفرتله دولو بو قارانليق دؤتيادا
يارديم ايسته ينلره يارديمجي اولام
آلقيشلامالي اولانلاري آختارام تاپام
كيمليگيمه دؤنوب حيران ائدم هاميني
من كيمم ، كيم اولمالييام
وارليقيمي بيلديرم ، دانانلارا
ساعاتلاريم ، گؤنلريم هدر اولمادان
قات - قات دييرلي اولسون دئيديم
آغلاياندا ، گؤلنده ، دانيشماييب ديننده
يولچولوفدايام ... من سني آختاريرام
اؤزلؤگؤمه ساري ، تانرييا ساري گئديرم
تانيمادان بير تيكانلي يولدان
گئتديغيم يولون، گئري دؤنمه سي يوخدور
بونو بيليرم من
گئديرم، قؤنچالارين چيچكلنمسيني گؤرمه دن
چايلارين جوشوب چاغلاريني گؤرمه دن
حياتين گؤزليكلريني گؤرمه دن
يولا دؤشمه لييم ، گئتمه لييم من
اؤلؤمله اؤزلشسك اگر
نئجه دئييم كي ، ياشاديم من.

هم رای لیک - حسن زنگیمارلی

اولموشام اسيري صياد
نه آلير جانيمي
نه ائيله يير آزاد
يارب بو نه ايشدير، ائوين آباد
دؤشدوم بو بلايه، آه و فرياد
اي داد و بيداد.
باخيشي جانيم آلير
كيپريگي ميضراب
سيزلايير سازينا احواليم
روحوم اولور آزاد
آخي هم غملي چالير
همده كي شاد
قورتارين مني اي اهل خرابات
اي داد و بيداد.
دئديم، ائليمين شنليگيدير
ائت مني آزاد
وئرمه هر نه يي بر باد
دئدي، وطن عشقينده يانيرسان
باخيرام ، گؤزلريندن آنيرام
زنگيمارلي ، سن عاشيق
منده شيدا ، بو گئجه
گل اولاق سنله هم راي
من اولوم صيد، سنده صياد بو گئجه.

Hasan Zangimarlı 31 Dekabr 2012