Sonntag, August 04, 2013

گئجه دیر - صالح سجادی

قابارلی گؤزلریمی قورخولار چالان گئجه دیر
گئجه دووز ، گئجه بایقوش ، گئجه ایلان گئجه دیر
زامان اؤزون ایتیریب ، بورخولوبلار عقربه لر
سحر گونش چیچکی چیخمامیش سولان گئجه دیر
آچیقدی پنجره لر سان کی گرنه شیر اودالار
بو بوش قوجاقلارا زیل خولیالار دولان گئجه دیر
ائشیتمه دن بیر آجیخمیش پیشیک قاچیر کوچه ده
دایان آجیبلا پیشیکلرده دالدالان گئجه دیر
غزل دوغولور دلی بئینیم یئنه بو کیپلریکلر
یومولماماقلا یومولماقدا قرق اولان گئجه دیر
یئنه ایچیمده اویاقدیر حوزونلو خاطره لر
اؤتن کدرلریمی فیکریمه سالان گئجه دیر
اؤنومده بیر قادینین بیر سحر چاغی کوچه ده
گرزونده دالغالانیب کؤنلومو الان گئجه دیر
ائله او گؤزلره تک ، آه ائله سئوگی یه تای
یالانچی دیر بو قارانلیق گئجه ، یالان گئجه دیر
ساچیم آغارمادادیر ، گئت به گئت ساچیم سان کی
سحر چاغیندا ایشیقلاردا محو اولان گئجه دیر
آنام بو گؤیلره یاس پالتارین یووب سرمیش؟
یادا آتام یاسینا ساچلارین یولان گئجه دیر
آنا سحردی؟ یا آغ بیرچه گین اسیر کوچه ده
یا اود توتوب نفسیندن ایشیقلانان گئجه دیر
سحر آچیر کوچه آغزیندا بیر سیچان دیلییب
یئنه بو آج گوچه نین معده سی دولان گئجه دیر
گونش اسیر گلیر آردیجا قاپ قارا کؤلگه م
بو کؤلگه دون گئجه دن قورتولوب قالان گئجه دیر
منبع : ماهنامه آفتاب آذربایجان

Keine Kommentare: