Freitag, August 09, 2013

قوجالیقدان شیکایت - علی اکبر صابر


افسوس قوجالدیم ، آغاجیم دوشدو الیمدن
صد حیف جوانلیق
ضعف ائیله دی عاجز منی قالدیم عملیمدن
چکدیم نه زیانلیق
سالدیقجا جوانلیقدا گئچن گونلری یاده
دردیم اولور اون قات
یارب یئترم بیرده می دونیاده مراده ؟
هیهات و هیهات
ساققال آغاریب بئل بوکولوب دینمه فلانی
اوقاتیم اولوب تلخ
عورتده یاخور ساققالیما گونده حنانی
ریشی که به رنگ الخ
یاد اولسون او گونلر کی مرادیمله گزیردیم
سازنده اوروغنان
بیر عاجز بیچاره لرین باشین ازردیم
سیللی یوموروغنان
بو سایه ده هر لحظه ائدیب سعی و تلاشی
ثروت قازانیردیم
تحصیل ائله ییب قول گوجونه ن امر معاشی
دولت قازانیردیم
اعضالریسه سست اولوب ایندی قوجالیقدان
بیر دادرسیم یوخ
گؤزمز می سن احوالیمی دوشدیم اوجالیقدان
فریاد رسیم یوخ
هئچ یئرده سسیم یوخ ، کسگین نفسیم یوخ
فیکریمدی جوانلیق ، باشقا هوسیم یوخ
شاعر : میرزا علی اکبر صابر طاهرزاده

Keine Kommentare: