Samstag, August 17, 2013

بس نئیله سین - حمید آرش آزاد

ائتمه‌سين چوْخ عشوه يار، بس نئيله‌سين؟
آلماسين ال‌دن قرار، بس نئيله‌سين؟
نه توْيوق وار ائوده، نه ات، ياغ- دويو
وئرمه‌سين سو شام- ناهار، بس نئيله‌سين؟
هر زاد اوْلموش «داريوش»، بيرده «كوروش»
ائتمه‌سين چوْخ افتخار، بس نئيله‌سين؟
سؤز باجارماز، ايش‌ده بيلمه‌ز بير وكيل
وئرمه‌سين دايم شعار، بس نئيله‌سين؟
بير مجوّزسيز ائوين وار، ايرمي مئتر
ييخماسين تئز شهردار، بس نئيله‌سين؟
«فقر خطّي»، بير «دامو كلئسن» شمشيري
قيرماسين بيزدن دامار، بس نئيله‌سين؟
كارمندين آيليغي اوچ يوز تومن
اوْلماسين چوْخ شرمسار، بس نئيله‌سين؟
اوْنجادا بايرام‌ليغي تعيين اوْلوب
ائتمه‌سين چوْخ آه و زار، بس نئيله‌سين؟
وارليغيندا، ائو اوْلوب «مستأجري»
اوْلماسين «رهني» مزار، بس نئيله‌سين؟
دونيادا، دايم فشار آلتدا اوْلوب
چكمه‌سين اوْردا فشار، بس نئيله‌سين؟
نسيه اون، نسيه شكردن‌دير «تره‌ك»
اوْلماسين لاپ زهرِ مار، بس نئيله‌سين؟
بير عؤمور، تكجه يئميشدير شوْر پنير
قبري اوْلماز شوره‌زار؟ بس نئيله‌سين؟
وارثين‌ده پول تاپيلمير موْز آلا
وئرمه‌سين خلقه خيار، بس نئيله‌سين؟
بوْرجلو دور چون‌كي، جهنّم‌دير يئري
تاپماسين اوْردا قرار، بس نئيله‌سين؟
تاپدالانميش آلتميش ايل «آرش» يازيق
چكمه‌سين: «آي داد... هاوار!»، بس نئيله‌سين؟
*
منبع : وبلاک نخود هر آش
*

Keine Kommentare: