تبریز - اسماعیل جمیلی

مين ايللر بويوندا دايانيب دوران
باشيني ديک توتان زمانه تبريز
قيز اوغلان قهرمان ايگيردلر دوغان
اولو کئچميشيمدن نشانه تبريز

ائليم سن داياغيم سان
سؤنمه ين اوجاغيم سان
آزادليق بايراغيمسان
سنله فخر ائديرم جهانه تبريز
*

سئوداليم ، سئوگيليم شيرين ديل آنام
قيما حسرتينده آليشام يانام
توکنمز سئوگيمه اؤزوم حيرانام
گؤزه لليک مسکني بيردانه تبريز
*

گولوم سن گولشنيم سن
آنام سان وطنيم سن
من سنين سن منيم سن
سئوگيميز يايئليب هر يانه تبريز

*
بابک تک آينالين ياخيب قان اوزه
ايگيردليک داستانين سيغيلماز سؤزه
قهرمان ائولادين گلمه سين گؤزه
باهارين دؤنمه سين خزانه تبريز
*

کوراوغلو نگاريمسان
صائبيم ، ستاريمسان
شمسيم ، شهرياريمسان
آذربايجانيما جانانه تبريز