Donnerstag, August 08, 2013

دورغون سولار چاغلایارسا - مدینه گلگون


آنام منیم آز آغلاسین
دورغون سولار چاغلایارسا
نه پاییز نه یاز آغلاسین
دورغون سولار چاغلایارسا
*
آغلاماقلا درد ساغالماز
یاز گلمه سه باغ ، باغ اولماز
یقین دونیا بئله قالماز
دورغون سولار چاغلایارسا
*
گوللر طالئع اولکریمیز
دورولار غم شهریمیز
دوغار قیزیل سحریمیز
دورغون سولار چاغلایارسا
*
گؤیلر یقین تمیز اولار
سئوینجیمیز دنیز اولار
تبریز همان تبریز اولار
دورغون سولار چاغلایارسا
*
نئچه دردلی آنا گولر
سئوگی گولر ، سئودا گولر
باشدان - باشا دونیا گولر
دورغون سولار چاغلایارسا
*
عؤمور بیرده شیرین له شر
تسلیم اولار خئیره ، شر
قاپیلارا شفق دوشر
دورغون سولار چاغلایارسا
*
بنؤوشه لر تئلده گولر
آی دا گولر ، ائل ده گولر
تورپاق گولسه ، ائل ده گولر
دورغون سولار چاغلایارسا
*
قاتارلانار دورنالاردا
دورنالار وار هر دیاردا
اینسان عؤمرو قالماز داردا
دورغون سولار چاغلایارسا
*
کام آلار دویونجا دونیا
یارالانماز بونجا دونیا
جاوانلاشار قوشا دونیا
دورغون سولار چاغلایارسا

Keine Kommentare: