Sonntag, August 11, 2013

نئینییم من - معجز شبستری

زمستان گلدی یارب نئلییم من
پریشانم پریشان نئیلییم من
اوتوز آی بستر راحتده یاتدیم
آجی درمانی دولدوردوم بوشاتدیم
نقدری پالتاریم وار یای دا ساتدیم
خدایا قیشدا عریان نئیلییم من
فلک آلدی اله تیر و کمانی
نشانه ائیله دی من بینوانی
یئتیشدی شیعه لر کرسی زمانی
نه یاسدیق وار نه یورقان نئیلییم من
عزا چوخ ساخلادیز آل عبایه
بیرآز دا آغلیون من بینوایه
چؤرک وای ناله سی چیخدی سمایه
اوشاقلار آجدی یارب نئیلییم من
ناهار واختی گئچر قارنوم قیریلدیر
اوشاقلار سس سسه وئرمیش زیریلدیر
گؤزوم یاشی گئجه گوندوز شیریلدیر
توکندی صبروسامان نئینییم من
قحط لوق وارلی نین گلمیر غمینه
خداوندا یاغیش گؤنده ر زمینه
ترحم ائیله بو عبد کمینه
ذخیرم یوخ ، زمستان نئیلییم من
نشسته در سر پیش بخاری
غنی میل ائیلییر شام و ناهاری
کسیلدی یوخسولون صبر و قراری
بو قدری غصه ، بیر جان نئیلییم من
فقیرم نه ناهاریم وار نه شامیم
داها غم چکمه یه یوخدور دوامیم
بودور درگاهیوه آخیر کلامیم
پریشانم پریشان نئیلییم من
ساتیلدی فرش و ظرفیم جمله مالیم
ائوی قیزدیرماغا یوخدور ذغالیم
سویوخدان تیتریری اهل و عیالیم
قیشا یا حی سبحان نئیلییم من
غنیلر گوسفند آلمیش قیشینا
قوغورما ائیله سین چکسین دیشینه
یانیر جانیم فقیرین آتشینه
سو سه پمیر بیر مسلمان نئینییم من
رضا اولدوم یاوان بیر پارچا نانه
اونودا چوخ گؤرور ظالم زمانه
وئریر بوغدانی اهل صوفیانه
بش اون بی دین و ایمان نئینییم من
اسیر محنتم حالیم یاماندیر
گئجه گوندوز ایشیم آه و فغاندیر
سویوخدان تیتریرم قاردی بوراندیر
نه چاییم وار نه قلیان نئینییم من
..

Keine Kommentare: