Dienstag, August 06, 2013

اؤلن من اولدوم - داشقین

سن ده بیر گون پای اولارسان بیرینه
یاران منیم کیمی دوشر درینه
اونوتما ، او گونکو گوروش یئرینه
گلمه ین سن اولدون ،گلن من اولدوم
*
من سنی تاپاندا ایتیردم اگر
ایتیریم گولوشون کونلومه یئتر
اورتاق دردیمیزی هم ده برابر
بولمه ین سن اولدون ،بولن من اولدوم
*
من یورغون بیر اصلان ،داغلار یوواسی
سن کیچیک بیر مارال جئیران بالاسی
اوره ییم آغریدان قابارچالاسی
بیلمه ین سن اولدون ،بیلن من اولدوم
*
داغانیق گورورسن منده هر زادی
گولورسن اوزون گول گولدورمه یادی
یاش گوزلریمیزدن بیر شیریلدادی
سیمه ین سن اولدون سیلن من اولدوم
*
سئوگی ساواشینا بیرجه گیریشدیک
اولوم گوزیمیزه باخیردی دیک-دیک
ای ، بوشونا قالخیشما ائتمه گیلئیلیک
اولمه ین سن اولدون،اولن من اولدیم

Keine Kommentare: