دیل دیل اؤتدوم - مدینه گلگون

دردیمی ناغیل ائیله دیم
سئللر دؤزمه دی - دؤزمه دی
یاندی سینه م ، دویمه له دیم
گوللر دؤزمه دی - دؤزمه دی
*
من یاندیقجا دؤندوم نئیه
یاندیم وطن دئیه - دئیه
بو حسرت ، بو عربتلییه
ایللر دؤزمه دی - دؤزمه دی
*
منم کوچ ییغیب آچاندا
ایللرین قاری ساچیمدا
قالدیم یوللار آیریجیندا
یوللار دؤزمه دی - دؤزمه دی
*
باشیم اوسته چاخدی شیمشک
حالدان - حالا دوشدو اوره ک
دیل - دیل اؤتدوم کؤرپه قوش تک
چؤللر دؤزمه دی - دؤزمه دی
*
سئوگیم غریب قالدی ، قالدی
عؤمروم خزان اولدو ، اولدو
گؤزوم یاشلا دولدو ، دولدو
گؤللر دؤزمه دی ، دؤزمه دی
*
آچدیم دردیمی من سازا
ساری سیمده اؤتن سازا
ساز گلدیکجه اهتزازا
تئللر دؤزمه دی ، دؤزمه دی
*
منیم نیگاران عؤمرومه
ایللر دؤزمه دی ، دؤزمه دی