Freitag, Juli 05, 2013

یوردوم - ده ده کاتب

ایسترم قیساجا تعریف ائیله یم
شهرتین یاییلیب هر یانا یوردوم
من سنین اوغلونام سن منیم آنام
آنانی دگیشمم جهانا یوردوم

شهرتین اوجالیب توتوب هر یانی
سولارین یئتیریر در مرجانی
داغلارین داشلارین زبرجد کانی
دوز گن لرین بنزر رضوانا یوردوم

شیرین سولارین وار کیمیا توپراغین
یئر آلتی قیناقلار دالدا بوجاغین
ایستی دیر سویوماز قیزغین اوجاغین
اود وورار خایینا، دوشمانا یوردوم

خلقلر ایچینده اوجادیر باشین
پارلاق اولدوزلارین باتماز گونشین
کول آلتدا کوکره ییر سؤنمز آتشین
شعله چکیب قالخار آسمانا یوردوم

تاریخدن سیلینمز، گئتمز آدیم وار
هئچ اسگیکین یوخدور هر بیر زادین وار
چوخ کامل بیر دیلین،آغیز دادین وار
دیل عاجیزدیر چکسین بیانا یوردوم

قوینوندا بسلنیب چوخ قهرمانلار
طوفان سارسیتمایان قورخماز اوغلانلار
گوجلو قوللار ایله ارکک اسلانلار
هایقیریب گیرنده میدانا یوردوم

تاریخ لر ثبت ائدیب افتیخارلارین
باغیر خان ، ستارخان ، شهریارلارین
دونیا بویو قالان یادیگارلارین
نه حسابا گلیر نه سانا یوردوم

اوستون شاعیرلرین سؤزلری آشکار
وزن-قافیه ده ، معنادا پربار
ایتمز اثرلری قالار پایدار
اومودوم وار حقه قورآنا یوردوم

آدلیم اوزانلارین خوش آوازلاری
گؤزل بارماقلاری چالیر سازلاری
گؤللرده یایخانیر قوبا قازلاری
قایالار سئوینیر ترلانا یوردوم

دده قورقوت آدی دیللرده ازبر
واحد،فضولی لر،آشیق علعسگر
سؤزه دؤزوم وئرن دوللو آباذر
صؤحبتی روح وئریر اینسانا یوردوم

خسته قاسم نباتی دن یاد اولسون
قول هارتون دا اؤز دینینده شاد اولسون
بالوولو مسکیندن خوشجا آد اولسون
دوغرو یول آچیبلار عورفانا یوردوم

دوللو مصطفی نین چکک آدینی
عورفان مکتبینین قول قانادینی
بالدان شیرین سؤزلرینین دادینی
ابسم الله او شهد شانا یوردوم

چاغداش شاعیرلرین همت ائتسین لر
آتا-بابالارین یولون گئت سین لر
سؤز خنجرین ووروب دشمن دیدسین لر
گورولتو سالسینلار دؤرد یانا یوردوم

دوشمنه آلدانماز تورکلرین سویو
بوکولسون خاینین قامتی، بویو
چوخلارینین آخیر آزینین سویو
گؤز قویوبلار آذربایجانا یوردوم

آذربایجان دوغرولوغو بگنر
یوردون سئور اولوسونا گووه نر
بیری ساغا بیری سولار سئوینر
من ده فخر ائیلرم عورفانا یوردوم

یوزلر درده درمان دوزلو گؤللرین
درین دره لرین گئنیش چؤللرین
دوغرولوق سمتینه آچیق یوللارین
شانلی آذربایجان، ای آنا یوردوم

سنین اسگی آدین آتیرپاتان دیر
سونرا آذربایگان،آذربایجان دیر
هر اوچو معنادا اود قورویان دیر
آتشی یاندیردیم جهانا یوردوم

مئیوه لی باغچالار، گؤزل باغلارین
یاشیل یایلاقلارین، اوجا داغلارین
جانسیزی دیریلدیر باهار چاغلارین
دردلری چاتدیریر درمانا یوردوم

بابک تک ار ییخان بایندیرخانلار
اوردولار داغیدان ، آلای پوزانلار
نبی ایله کرم تک قوچاق اوغلانلار
قالیق آد قویوبلار جهانا یوردوم

قورخماز ایگیدلریم مرد مردانا
اون ایگیده برابردیر بیر دانا
هایقیریب گیرنده هردن میدانا
بنزه ییر بیر قیزمیش قاپلانا یوردوم

قناری لر اوچا قونار چمنه
قومرولار ذوق ائدر سونبول سمنه
بولبول گوله عاشیق من ده وطنه
شور-غوغا سالارم گولشانا یوردوم

دده کاتیب حقی دئیه ر دایانماز
یوردو سئور اؤلنه تک اوسانماز
 ابراهیم عاشیقی آتشه یانماز
بیر قوچام گلمیشم قوربانا یوردوم . 
*
ده ده کاتب وبلاکیندان 
*

Keine Kommentare: