Mittwoch, Mai 15, 2013

گؤیچک - گؤیچک - ابوالقاسم نباتی

گلدی بیر شوخ گئنه یانیما گؤیچک - گؤیچک
ووردو بیر تیغ جفا جانیما گؤیچک - گؤیچک
لاله روخسارین ائدیب خون دیلیمدن گولگون
بویادی اللرینی قانیما گؤیچک - گؤیچک
پاره - پاره جگریم شیشه چکیب ائتدی کباب
تیکدی گؤز دیده ی گیریانیما گؤیچک - گؤیچک
حیف کیم اولمادی بو عاشیقه بیر جانی یانان
دئیه بیر دردیمی جانانیما گؤیچک - گؤیچک
پناه آللاها دئییب ، قهر و غضب دن یوما گؤز
ائده بیر عرضیمی سولطانیما گؤیچک - گؤیچک
تا کی پروانه کیمی شؤوقیله بو جانی فدا
ائدم اول شمع شبستانیما گؤیچک - گؤیچک
اولو یارب ! گؤره سن بیر گئجه اول .الی مصر
گله بو کلبه ی احزانیما گؤیچک - گؤیچک ؟
غم یئمز داهی نباتی اگر اول شاه جهان
باسا بیر موهرنو فرمانیما گؤیچک - گؤیچک

Keine Kommentare: