Mittwoch, Mai 15, 2013

دوبیتی لر - چارپارالار ابوالقاسم نباتی

دور گل ای عشق! کؤنول ملکونو بر باد قیلاق
عقلی یغمایا وئرک ، شهر نو آباد قیلاق
گلگیلن سؤزبیر ائدک ، غئیری آرادان گؤتورک
جانی جانانه وئرک ، دهرده بیر آد قیلاق
*

ساقیا ! گردشه سال باده حمرانی گؤرک
دردمندیک بیزه وئر بیر تیکه درمانی گؤرک
ایستیرم منده هوا اوزره گزم دونیانی
دور گتیر خاتم یاقوت سلیمانی گؤرک
*

یاخشی سالدین بو نباتینی نظردن یا علی
اینجیدین ، بیلدیم یقین بو چشم تردن یا علی
عهد و پیمان ائیله دیم گؤرجک سنی خندان اولام
گل دولانیم باشینا بیر یول بو وردن یا علی
*
سالمیسان سن بو نباتینی نظردن یا علی
کیم یئتیر دائیم غذا خون جگردن یا علی
فیکر و ذیکریم یوخ سنین اسم اعظمیندن سووای
دوشسه بیر یول گر خبر باد صبادان یا علی
*
تحویل حمل چو ائتدی سلطان باهار
گول جوشا گلیب شاهید مئی آچدی عذار
ساقی گؤتوروب پیاله ، مطرب چنگی
بیر جامیله الدن آلدیلار صبر و قرار
*
صد شوکر کی قلبیمیز صفا تاپدی یئنه
ساقی الی ، جام بی ریا تاپدی یئنه
بیر خسته کی مرگ دیر اونون درمانی
بیر جامیله گؤر نئجه شفا تاپدی یئنه
*
صبح اولدو گتیر شراب ناب ای ساقی
ائتدی منی غم ، یاخشی کباب ای ساقی
مستانه گؤتور جام جمی ، وئر باده
ساز اولموش عجب چنگ و رباب ای ساقی
*
حالیم یئنه ده اولدو یامان ای ساقی
قوربانین اولوم بسدی دایان ای ساقی
کؤنلوم ائوینی لشکر غم ائتدی خراب
وئر باده کی باغریم اولدو قان ای ساقی
*
عید اولدو ، جهان خرم و خندان اولاجاق
هر قطره مئی شیشه ده بیر جان اولاجاق
وه ! وه ! گئنه درد نوشلار بزمینده
ساقی یخیلیب ، پیاله غلطان اولاجاق
*

Keine Kommentare: