Mittwoch, Mai 15, 2013

علی دیر - ابوالقاسم نباتی

منیم عالمده سولطانیم علی دیر
منیم میر جهانبانیم علی دیر
نه دارا تانیرام من ، نه سکندر
منیم فغفور و خاقانیم علی دیر
بهشتی زاهیده وئردیم سراسر
منیم گلزار و رضوانیم علی دیر
اگر هر کیمسه نین بیر شاهی اولسا
منیم ده شاه شاهانیم علی دیر
توتوب هر مرغ بیر گلشنده مسکن
منیم ده باغ و بستانیم علی دیر
منی بو اسم اعظم ائتدی ناطق
منیم مجموع دیوانیم علی دیر
اگر خنجر چکه دوشمن غم ائتمه
منیم ده تیغ عریانیم علی دیر
منیم سرمایه عمرومدو مولا
منیم جیسمیمده بو جانیم علی دیر
منیم یوخ اوندان اؤزگه ذکر – فیکریم
منیم بو جاندا جانانیم علی دیر
منیم کشتی نوحوم مرتضی دیر
منیم موسی عمرانیم علی دیر
منه ظلمت یولون گؤرسه تمه ای خضر
منیم ینبوع حئیوانیم علی دیر
منیم روح الله هیم اولدو ید الله
منیم شاه سلیمانیم علی دیر
نه دیر باغ جنان و نخل طوبی
منیم سرو خرامانیم علی دیر
منی سئیر گولوستانا آپارما
منیم سئیر گولوستانیم علی دیر
منیم پیر مغانیم شاه مردان
منیم ساقی مستانیم علی دیر
منیم عمروم منیم روح و روانیم
منیم مرغ سنخدانیم علی دیر
منیم عرشیم منیم فرشیم اودور او
منیم مئر فروزانیم علی دیر
منیم روح و قلم ، کرسی سریریم
منیم اورنگ کیوانیم علی دیر
منیم عودوم منیم رود و سرودوم
منیم هم راح و ریحانیم علی دیر
منیم بزم نشاط و عیش و نوشوم
منیم شمع شبستانیم علی دیر
منیم جام مئی و نقل و کبابیم
منیم سالار ائیوانیم علی دیر
منیم مولکوم منیم مال و منالیم
منیم هم حکم و فرمانیم علی دیر
منیم تختیم منیم تاج و رواقیم
منیم بانی بنیانیم علی دیر
منیم ابریم منیم برق جهنده م
منیم رعد خروشانیم علی دیر
منیم لعلیم منیم در خوشابیم
منیم باران نئیسانیم علی دیر
او شاهبازین اسیری مرغ جانیم
منیم شاهین و ترلانیم علی دیر
دئیه ر دائم دیلینده خان چوبانی
منیم هر درده درمانیم علی دیر

Keine Kommentare: