Donnerstag, Mai 02, 2013

اولمادی - علی آقا واحد

گلديم وصال ياره يئتم فرصت اولمادی
بيردم دويونجا صحبت ائدم قسمت اولمادی
جورون چكيب هميشه بو زلفی قارالارين
ديوانه كؤنلومه يئنه بير عبرت اولمادی
جنت دی مجلسيم ائله كي گلدی دون رقيب
مجلس جهنم اولدو منه ، جنت اولمادی
آز اولسا باده نين چوخ اولور روحه لذتی
حدديندن آرتيق اولسا بو بير لذت اولمادی
سرويم ديينده سانما قيامتدی قامتين
محشركی قوپمادی سنه بير تهمت اولمادی
فرهادی فضل صنعتی سئوديردی شيرينه
شيرينی عشقه جذب ائلييه ن سرعت اولمادی
عشقينده اؤلمك حسرتی اؤلدوردو واحدی
چوخ ياخشی اولدو ايسته گينه حسرت اولمادی

Keine Kommentare: