بیگانه بیگانه - حمیده رئیس زاده

گلیبسن اوز اوزه باخما منه بیگانه - بیگانه
اؤتورمه ایریلیق یوردون گزیم دیوانه - دیوانه
دولاندیر بیر باخیش رطلین منیم احوالیمه گاهدان
گؤزوندن قوی ایچیم گیزلین چاخیر پیمانه - پیمانه
نظر سال قات - قات آیریلسین جانیمدان غربت آثاری
آچیلسین شعریمین یارپاقلاری میخانه - میخانه
سینیخ سالخاخ اوره کلردن ایزین گؤرسه تدیلر خلقه
قالیب کؤنلوم جلالیندانایراق ویرانه - ویرانه
منیم شوقومدور عالمده ، جنون رنگینده پایلاندی
گؤرور هر یئرده بیر شعله ، یانیر پروانه - پروانه
منم مجنون ، منم لیلا ، منم وامق ، منم عذرا
منیم دردیم دوشوبدور دللره ، افسانه - افسانه
سحر ال چک یاخامدان ، حایل اولما منظر وصله
چکیل گئت بیر گؤروشه جان وئریم جانانه - جانانه