یار هوسینده

یار هوسینده - علی آقا واحد

من عالمه منت چکیرم یار هوسینده

یاریمسا گزیر شوقیله اغیار هوسینده

بیلمه م بو نئجه سیردیر، حکمت دیر، ازلدن

بولبول گوله مایل، گول اولور خار هوسینده

مئی اوخشاماسا لب لرینه، قرمیزی لیقدا

بیر کیمسه تاپیلماز مئی گولنار هوسینده

هر گون اوزونو گؤرمه یه حسرت چکیر عالم

گول فصلی اولار، ائل هامی گولزار هوسینده

بیلمه م نه گؤروب زولف ده مجنون کیمی کؤنلوم

سرگشته دیر اول طره طرار هوسینده

عاشق سئویر اول شوخی، تعجب لی بودورکی

یوزلرجه گؤزللرده اونون وار هوسینده

واحد یئنه قیمت چوخالیب، یوسف شعره

گوهر ساتیلار، اولسا خریدار هوسینده

*

یئتیشدی غیر عاشیقلر وصال یاره بیز قالدیق

علی آقا واحد

یئتیشدی غیر عاشیقلر وصال یاره بیز قالدیق

خلایق چاره تاپدی دردینه ، بیچاره بیز قالدیق

هامی اؤز سئودیگی معشوقه سیله شادکام اولدو

یانان پروانه لر تک روز و شب اودلاره بیز قالدیق

رقیب بی مروت لر فرحناک اولدو عالمده

سئویب جانانی حسرت طره طراره بیز قالدیق

کئچیرتدیک تیر نازین سینه دن هر ماه رخسارین

گئنه بی مهر چیخدی طعنه اغیاره بیز قالدیق

محبت گولشنینده بیر گول اکدیک زحمتین چکدیمک

صفاسین اؤزگه لر گؤردو ، جفای خاره بیز قالدیق

بوتون دیوانه لر واحد کمندیندن خلاص اولدو

گئنه او زولفه باغلی متصل آواره بیز قالدیق 

یار اگر مهر و وفانی دوشونن یار اولسا

شاعر: علی آقا واحد

یار اگر مهر و وفانی دوشونن یار اولسا

غم دئییل کی بوتون عالم بیزه اغیار اولسا

اهل دل ذوق و صفانی لب جاناندان آلیر

ظلم دور عاشیقه ، جانانی دل آزار اولسا

وار نه غم گؤزلرینین خسته سینه یوخذدور علاج

لب لرین چاره سین ائیلر ، نئجه بیمار اولسا

زولف و خالین او مهین گؤزیاشیم ائیلر روشن

گئجه آیدینلیق اولار ، ثابت و سیار اولسا

یار اگر عاشیقه غمخوارلیق ائتمزسه نه غم

 غم اودور اؤزگه یه معشوقه سی غمخوار اولسا

گؤزلرین شوق ایله قان تؤکمه گه چوخ راغیبدیر

مست دیر ، بونجا خطا ائیله مز هوشیار اولسا

وار اومیدیم منه واحد داها ظلم ائتمه یه جک

حال زاریمدان او مهپاره خبردار اولسا 

یارب ایتیرمیشم نئچه گوندور نگاریمی

شاعر: علی آقا واحد
یارب ایتیرمیشم نئچه گوندور نگاریمی
دئییرم سن یئتیر منیم او نازلی یاریمی
یوخدور گولوم نه اوزنه گئدیم سئیر گلشنه
بختیم بو ایل خزان ائلییبدیر باهاریمی
او لاله اوزدن منه هر کیم خبر وئره|
بالله سئویندیررمنیم بو دل زاریمی
نامرد رقیبین حیله سینه اویدو دلبریم
یاندیردی نار حسرتیله منیم قلب زاریمی
آی باشیم بلالی دیراؤلورم کیمسه بیلمیر
بیر قاره گؤزلو الدن آلیب اختیاریمی
واحد بو شعری یاز جانانه عؤمردن گئدیب
بیر واخت اولور کی خلق اوخویار بادگاریمی
*

بیر دیلبریم اولسا - علی آقا واحد

بیر دلبریم اولسا

اؤلمزدیم اگر سن کیمی بیر دلبریم اولسا

بیر آفت جان ، شوخ ملک منظریم اولسا

هر گون دولانیب باشینا ، قوربانین اولاردیم

پروانه صفت ، اوچماغا ، بال و پریم اولسا

منده سئویلردیم ، بوتون عاشقلر ایچینده

آهولرین مجنون ائلیه ن گؤزلریم اولسا

شوقیله نثار ائیله رم ، هر بیر قدمینده

دریا قدری الده ، دور و گوهریم اولسا 

کویوندا منه قوی نه بیلیر ائیله سین اغیار

البته جزاسین چکر ، آللاه کریم اولسا

بیگانیه من بیر بئله منت می ائده ردیم؟

کؤنلوم کیمی بیر یار وفا پروریم اولسا

واحد دئمه رم دردیمی من باشقا نیگارا

یاریم بیلیر عشقینده نه دردی سریم اولسا

* 

یانیندا دلبریمین اعتباریم اولماسادا - علی آقا واحد

شاعر: علی آقا واحد

یانیندا دلبریمین اعتباریم اولماسادا

یئنه غمین چکرم غمگساریم اولماسادا

بدنده یاری جانیم قالماییب گئدیب یاریم

گرک دؤزوم غم هیجرانه یاریم اولماسادا

گؤنوم کی تار اولوب او زولف الیندن ای تانری

ترنم ائیله سنی تانری تاریم اولماسادا

اوزون خیالی بسیمدیر بهشت کویوندا

یوز ایل خیالیمه گلمز بهاریم اولماسادا

لبینله مست گؤزون هر دوشنده خاطیریمه

شرابه رغبتیم آرتیر خوماریم اولماسادا

منیم بیر آهیم ایله شمعلر یانیر گئجه لر

توخونما شعله عشقم شراریم اولماسادا

کمند زولف ایله واحد اؤزوم شکار اولدوم

منیم او آهو باخیشلی شکاریم اولماسادا

* 

بوراخما ای کؤنول او نازلی یاری اؤز باشینا - علی آقا واحد

بوراخما ای کؤنول او نازلی یاری اؤز باشینا

روا دئییل قالا ائللر نیگاری اؤز باشینا

گؤزیله کیپریگی بیرلیکده قان تؤکور گئجه لر

عجب قالیب گئنه دریا کناری اؤز باشینا

قراره گلدی رقیب ال گؤتورسون اول گولدن

نه اعتبار اونا ، دئسین قراری اؤز باشینا

او قاره گؤزلونو گؤزدن کناره قویما کؤنول

بوراخماز اووچی گؤزل بیر شیکاری اؤز باشینا

گول اوزلولر نه قدر وارسا باغبانی منم

نئجه قویوم بئله بیر گول عذاری اؤز باشینا

رقیبی یاره طرف قویمایین یاخین گلسین

کی گول سولار گؤره بیر بوته خاری اؤز باشینا

عمومه خدمت ائله واحد ، آرتیب اینسانلار

کی ، سانما ائل قازانیب اعتباری اؤز باشینا

* 

بیر گون گؤزلیم قبریمین اوستن اؤتوشرسن- علی آقا واحد

بیر گون گؤزلیم قبریمین اوستن اؤتوشرسن

دردیندن اؤلن عاشیقینی باشه دوشرسن

ائتمز ملک اولسا بو قدر ناز و کیریشمه

اینصافه یاخینلاش گؤزلیم سن ده بشر سن

نازیله گلرکن قدمین قوی گؤزوم اوسته

قویما قورو یئر اوستونه بیرده سوروشرسن

بیگانه ایله گزمه دئدیم قلبینه دیدی

جانان نه بیلیم سن بو قدر دیمه دوشرسن

بیر سالمادین اؤز عاشیقینی یادینا ظالیم

اغیاریله اما گئدیب هر گون اؤپوشرسن

ال چک منه ای دل دئمه زولفوندن او ماهین

بیر گون بو کمنده سن اؤزونده ایلیشرسن

رحم ائیله مه دین واحده ظالیم دیریلیکده

اؤلدوکده مزاریمله گئدرسن گؤروشرسن

* 

وورما اوقاره تئللرینه شانه سئوگیلیم

شاعر: علی آقا واحد
وورما اوقاره تئللرینه شانه سئوگیلیم
ائتمه منی بلاکش دیوانه سئوگیلیم
یاندیردی حسرتین منی، گؤستر جمالینی
کؤنلوم اولوب اول آتشه- پروانه سئوگیلیم
بیر دفعه ائیله دیمسه، تمنای وصلینی
یوز دفعه یاندیم- آتش هجرانه، سئوگیلیم
گزمه رقیبله منی غیرت هلاک ائدیر
سالما بلالی عاشقینی قانه سئوگیلیم
گؤسترمه قاره خالینی، کؤنلوم فغان ائدیر
قوش، ده ن، گؤرنده تئز گلیر افغانه سئوگیلیم
یوز لیلی گؤرسه حسنونی مجنون اولار سنین
عشقینده اوز قویاردی بیابانه سئوگیلیم
انصافی اولسا چرخ، بو بیچاره «واحدی»
حسرت قویارمی، سن کیمی جانانه سئوگیلیم؟
*

فکرینده می، بیر گون گؤزه لیم، بیز سیزه گلدیک؟

شاعر: علی آقا واحد
فکرینده می، بیر گون گؤزه لیم، بیز سیزه گلدیک؟
سیزدن قاییدیب، سونرا برابر بیزه گلدیک؟
گُولدوک و دانشدیق گئجه نی، صبح آچیلینجا
بیر غنچه گول اوستونده، سیزینله سؤزه گلدیک
کئف چکدیگیمیز خاطره لر، وارمی یادیندا؟
گولشنده بیر آیدین گئجه ده، اوز اوزه گلدیک
خیلی دولانوب سئیرائیله دیک گول لر ایچینده
بیر- بیریمیزه چوخ عشوه لی، چوخ بامزه گلدیک
بیزکی، گؤزه لیم، جان دئیه رک، جان ائشیدیردیک
بس ایندی نه اولدو بیزه، یوخسا گؤزه گلدیک!!
نه سنده وار اول مهر و محبت، نه ده منده
سوندوک ایشیق اولدوز کیمی، سون منزله گلدیک
واحد، او گئچه ن گونلری، بیر مرّه اوُنوتدوق
لیکن یئنی دنیایه، بیز ایندی تزه گلدیک
*

ای گؤزللیک کعبه سی - علی آقا واحد

 ای گؤزللیک کعبه سی

ای گؤزللیک کعبه سی ، سن قبله گاهیم سان منیم

من گدای عشقینم ، سن پادشاهیم سان منیم

اؤزگه بیر جانانا جؤروندان شکایت ائتمه رم

هر جفا ائتسن ، یئنه ، اؤز دادخواهیم سان منیم

جان وئریب یا جانیم آلسان ، اختیاریم سنده دیر

عاجزم قارشیندا گویا کی ، ایلاهیم سن منیم

زولف و رخسارین اسیری ماها سالماز مهرینی

سن بولودلاردان چیخان ، بیر مهر و ماهیم سان منیم

صید قیلمیش کؤنلومو ، نازیله محزون گؤزلرین

مشک عنبر تیره لی آهو نیگاهیم سان منیم

من بو فقریمله سنین عشقینده فخر ائتسم نه اولار

 دولتیم ، فخریم ، پناهیم ، عز و جاهیم سان منیم

واحدم ، جانا ، فرحدن یوکسله ردیم گؤیلره

لطف ائدیب بیردم دئسن کیم ، خاک راهیمسان منیم

* 

دئسین - علی آقا واحد

صفایِ مجلیسِ جانانی، کیم گؤروب، او دئسین
بلایِ محنتِ هیجرانی، کیم گؤروب، او دئسین
اینانمرام، منه هر کیم دئییر کی جنّت وار
گؤزیله روضه ی رضوانی کیم گؤروب، او دئسین
منیم گولوم، چیچه گیم، جنّتیم، گؤزه ل لردیر
بهشتی، حوری و قیلمانی، کیم گؤروب، او دئسین
کمندِ عشقده، مجنونی گؤرمه یه ن، نه بیلیر؟
اسیرِ زولف پریشانی، کیم گؤروب، او دئسین
من آغلادیقجا نیگاریم، گولردی گؤز یاشیما
گولرکن، اول گولِ خندانی، کیم گؤروب، او دئسین
چمنده هر سحر عشق اهلینین ترانه سی وار
فغان بولبول نالانی کیم گؤروب، او دئسین
منیمده، واحد، اؤز ایستکلیمین، گؤزه ل لیگیدیر
باهار زمانی، گولوستانی، کیم گؤروب، او دئسین

آسوده منم که خر ندارم - علی آقا واحد

آسوده منم که خر ندارم
از آب و علف خبر ندارم
دونیا ده یه بیر – بیره سراپا
مین حشر اولا شورش ایله برپا
سرتاسر اگر داغیلا دونیا
تأثیر ائله مز منه هئچ اصلا
آسوده منم که خر ندارم
از آب و علف خبر ندارم
*
ملّت باتا یوز غم و ملاله
نئی تک ائده‌لر فغان و ناله
هر گون یئته گر وطن زواله
بیر ذرّه جه دوشمه ره م خیاله
آسوده منم که خر ندارم
از آب و علف خبر ندارم
*
یوخسول اولا گر بوتون جماعت
گر اؤلسه ده قیلمارام حمایت
ملّت غمی بی غمه نه حاجت؟
بیر کس منه ائیله مز ملامت
آسوده منم که خر ندارم
از آب و علف خبر ندارم
*
نه اهلی دیلم کی، آنلایام دیل
نه عاریفم، علم ائده م تحصیل
نه ائیله جه ناقیصم، نه تکمیل
نه خواهش ائده رسم، اولار حاصیل
آسوده منم که خر ندارم
از آب و علف خبر ندارم
*

گولسون - علی آقا واحد

گؤسترای گول اوزونی بلبل شیدا گولسون
گؤزلرین شوقی ایله نرگس شهلا گولسون
چیخ چمن سئیرینه بو حسنیله بو قامت ایله
گل سئوینسین گؤزلیم سرودل آرا گولسون
آچ داغیت ، نازیله لیلا کیمی زولفون اوزونه
دردلی عاشق لرینین عشقینه صحرا گولسون
گزمه بوندان بئله بیگانه ایله قورخوم اودور
بی وفا سویله ییب عالم ، سنه دنیا گولسون
سئوگیلیم ایندی جسارت گونی ، مردلیک گونی دور
قویما اؤز عاشقینه ، هریئتن ادنا گولسون
آغلاماق عشقده عاشقلراوچون نقصان دیر
کی گرگ یوسفین عشقینده ، زلیخا گولسون
واحد عاشق ایسه ، مجنونه دئیین آغلاماسین
گلسین ائتسین بو گؤزه ل شوخه تماشا گولسون 
*

دولانسین - علی آقا واحد

قویما گؤزه‌لیم، کویینه اغیار دولانسین

انصاف‌ می، گولزاری گلیب، خار دولانسین؟

راضی ده‌ گیلم اؤزگه اولا محرم وصلین

گولزار بهشتی نیه کوفّار دولانسین؟

کؤنلوم قوشو دائم دولانیر، شؤقِ روخونله

البته گرک، کعبه‌ نی زوّار دولانسین

اکراه ائله‌ مه قامتینه زولف دولاشسا

سرو اوستونه، بو رسم دی، شاه مار دولانسین

رحم ائت، گونیمی ائیله‌ مه زولفون کیمی قاره

قویما اوزونه طرّه‌ی طرار دولانسین

سالدی منی پیوسته قاشین فکرینه، ظالم!

دائم بئله قوی چرخ جفاکار دولانسین

مخمور گؤزون فیکری ائدیب عالمی بیهوش

واحد نئجه بو شؤق‌ایله هوشیار دولانسین؟

*

رعناسی سان - علی آقا واحد

سوئیله ای گول، هانسی باغین، سن گولِ رعناسی‌سان؟

هانسی گلزارِ بهشتین، سروی سن، طوُباسی‌سان؟

آچما زولفون عطریله بیهوش ائدرسن عالمی

چونکی سن دشتِ خطانین، عنبرِ ساراسی‌سان

نازنین جانان گؤزه‌للر، قارشی دُورماز روُیینه

جمله سیندن سن گؤزه‌ل‌سن، هامی‌نین اعلاسی‌سان

باغبانین کیملر اولموش؟ گؤزلرین حئیرانی‌یام

سن مگر گلزارِ حُسنون نرگس شهلاسی‌سان؟

گؤرمه‌یینجه گول اوزون، جسمیمده قالماز طاقتیم

روحی‌سان گویا، بو مسکین عاشیقین، اعضاسی‌سان

من کیمی مینلرجه مجنونلار، اسیروندیر سنین

سؤیله یاریم، دوغرو سؤیله، سن کیمین لیلاسی‌سان

اینجیمه‌ز، «واحد»، او گول آه و فغانیندان سنین

سن گؤزه‌للر باغی‌نین بیر بولبولِ شیداسی‌سان

*

بیلمه یه جکسن - علی آقا واحد

عشقین ائله‌سه عالمی قان، بیلمه‌یه جکسن!

یوز دفعه دئسه‌م، مطلبی قان، بیلمه‌یه جکسن!

باخ سینه مه، مین یاره ووروب تیرِ نگاهین

افسوس کی، ای قاشی کمان، بیلمه‌یه جکسن

آخر کی قوجالتدی منی، درِد و غم عشقین

پیر اولماسان، ای تازه جوان، بیلمه‌یه جکسن

بی‌مهرسن، عالمده، رُخِ آلینا حسرت

وئرسه‌م‌ده اگر هیجرده جان، بیلمه‌یه جکسن

مجنون کیمی، زنجیرِ سرِ زولفینه باغلی

اولسام داخی، رسوای جهان، بیلمه‌یه جکسن

توتسام، گؤزه‌لیم، دامنینی، اینجیمه منده‌ن

نیلیم کی، دئسم گئتمه، دایان، بیلمه‌یه جکسن

کویوندا گؤزوم یاشینی، یوز یول ستمیندن

ائتسه‌م یوزه، ای سرو روان، بیلمه‌یه جکسن

سرّ لبینی دیلده نهان ساخلادیم ائلدن

فاش اولمایا، بو رازِ نهان، بیلمه‌یه جکسن

شؤق دهنین «واحدی» محو ائیله‌سه هر گاه

اوندان یئنه بیر نام نشان، بیلمه‌یه جکسن

شاعیر: علی آقا واحد

*

اشعار ترکی آذری و فارسی - مئی ساتانلار کوچه سی 

*