اولماز - حسین غفّاری اردبیلی

حضرت عبّاس
اشراره قرض اولدو مقابل شرف الناس
سعد اوغلونا اوز توتدو خطاب ائیله دی عباس
بو غائله دن سیزلره کسب ثمر اولماز
انسان بو قدر سیز کیمی کوته نظر اولماز
سرمایه ااسلامیزی تاراجه وئریبسیز
بوندان بشره بیلسؤز آغیر بیر ضرر اولماز
رهبر ائله دیز امته سگ باز شروری
مست ائیله مه سه اگر سحر اولماز
اسلامی سالیب پیچ و خمه فقر و فلاکت
رهبر بوقدر امته نادادگر اولماز
آیا بونو درک ائیله مییرسیز کی زناکار
اسلامه خیانت ائلین راهبر اولماز
بیر سر نهان حج ده وار رای جبرده
حجاج اونو بیلمسه حج معتبر اولماز
معناسی بودو دشمن دینی داشا باغلا
یوخسا ائله داشدان -  داشا جنگ جمل اولماز
آی نامه یازانلار هانی بس قول و قراریز
سیزلرده وفا یوخدی سؤزوزده اثر اولماز
ائو صاحیبینین ذره اگر غیرتی اولسا
مهمانلاری چؤللرده سوسوز دربدر اولماز
گهواره ده الان چابالیر تشنه دیر اصغر
بیر جرعه سو اولسا ننه سی خون جگر اولماز
من عترت زهرایه کمر بسته غلامم
سینم کیمی قارداشیما محکم سپر اولماز
هر قیمته اولسا آلارام نهر فراتی
مانع منه بو ایش ده اوتوز مین نفر اولماز
گلسین قاباغا کیمدی اگر واردی شجاعت
گؤرسون کی علی اوغلو بدون هنر اولماز
هر گردنه سر پنجه پر زوریم ایلیشسه
مین رهگذر اولسا اونا راه گذر اولماز
میدانده بیر نیزه اگر لشگره آتسام
مین سینه نی دللم، تیریم ده هدر اولماز

اویان ای یار وفاداریم اویان - غفاری اردبیلی

اویان ای یار وفاداریم اویان
منی تک قویما علمداریم اویان
یولووی خیمه ده گؤزلور بالالار
سنه قربان اولا قیزلاریم اویان
شرف الناسیم اویان                   
گؤزل عباسیم اویان
*
سنه من قانه باتان آی دیرم
سینه وی لاله لره تای دیرم
داش آتانلاردان اگر اولسا امان
تؤکرم گؤز یاشی لای لای دیرم
قره معجرلریمین وای گونونه
سود امر اصغریمین وای گونونه
شرف الناسیم اویان                   
گؤزل عباسیم اویان
*
سرویمین لطمه دگوب قوللارینا
تؤکولوب قانی شرف یوللارینا
سنی اکبر جانی کیمدن سوروشوم
نه گلوب قارداشیمون قوللارینا
من اؤپن قاره گوزوندن اوخ اؤپوب
داش گؤزل سینه وی مندن چوخ اؤپوب
شرف الناسیم اویان                   
گؤزل عباسیم اویان
*
دئمیرم قارداشیوام گؤیلومی آل
دئمیرم دور گئدک اخیامیده قال
دئیورم دشمنی گولدورمه منه
کسیلن قوللاریوی بوینوما سال
ساق گؤزوندن تؤکولن قانه قسم
ایاقیم خیمیه گلمیر قئیدم
شرف الناسیم اویان                   
گؤزل عباسیم اویان
*
یارالی باشیوا قربان اولانیم
گؤزووی آچ باشیوا من دولانیم
نئجه سن سیز گئده رم خیمه لره
اؤزون انصاف ائله ای قهرمانیم
گؤزووه پرده چکیب قان یارالی
نیه بو حاله قالوبسان یارالی
شرف الناسیم اویان              
گوزل عباسیم اویان
*
بویاما گل اوزووی گؤز یاشیوا
دیله گل ائیله بیان قارداشیوا
سنی زهرا ننه مین جانی دانیش
نه آغیر یاره ووروبلار باشیووا
اورگین اودلادیلار قارداشیوین
بئلیمی اگدی یاراسی باشیوین
شرف الناسیم اویان              
گوزل عباسیم اویان
*
آسمان باشیما غم گردی الیر
سینه می ماتمیوین تیری دلیر
نقدر آختاریرام یوخدی ننم
باشین اوستن ننه مین عطری گلیر
بو مبارک اؤلومین وار نه غمی
خوش سنین حالیوا گؤردون ننه می
شرف الناسیم اویان              
گوزل عباسیم اویان

آنا - حسین غفاری اردبیلی

گؤزلریم قربانین اولسون ، کوسمه مندن آی آنا
آند اولا اؤز جانینا سس وئر ، داریخدیم آی آنا
چوخ گئجه سن صبحه جگ ، قالدین اویاق لایلای دئدین
ایندی سن دینجل بیرآز، قوی من دئییم لای لای آنا
سن منه آلدین گئیدیردین حسینون قاره سین
من سنه آمما گئیدیردیم کفن ای وای آنا
گئت آنا اوغلو اؤلن زهرایه تاپشیردیم سنی
سن ده زهرا تک منی ، نوکرلریندن سای آنا
من دئدیم گول سن  اولوب پرپر داغیلدین گول کیمی
تاپمادیم چونکو سنه گول دن گؤزل بیر تای آنا
کاش دییئیدیم آی سنه ، گوندوز قالاردین پرده ده
هر گئجه یارسی چیخاردین سئیره مثل آی آنا
وئردیین سوت دن گرگ ، آرتیق تؤکم گؤز یاشیمی
گؤز یاشیم تک آخمییب صحرایه ، آخماز چای آنا
من دئیینده آی آنا ، سن جان دئییردین هر زامان
ایندی من جان سسلیرم ، سن وئیرمییرسن های آنا

یا حسین - حسین غفاری اردبیلی

یا حسین دردیمیزین سنده دی درمانی اقا

نا امید ائیله مه سن بیل ننه وین جانی آقا

آند وئرریک سنی گؤزلردن آخان اشک لره

اصغرین لب لری مثلی قورویان مشک لره

نیزه اوسته شهدانین یارالی باشلارینا

محمل اوسته باجیوین قانه باتان ساچلارینا

آند وئرریک سنی اللرده اؤله ن زهرایه

محرمی گؤز قاباغیندا دؤیولن مولایه

ای کرم صاحبی سائل لره احسان ائیله

قره کؤینک لریوین دردینه درمان ائیله

گؤرسن سین - حسین غفاری اردبیلی

کیم عاشق اولسا گرک قلبى یاره گورسه نسین
نه یاره بلکه گرک پاره - پاره گورسنسین
طریق عشقیده اؤلمک مقام اعظم دى
گرک صداقت عاشق نگاره گورسه نسین
و گرنه مدعى چو خدور بو هرزه دونیاده
هزار رنگه دوشر ، خوش قواره گورسه نسین
کئچن گئجه یوخودا وصل یاره چاتمشیدم
اومنظره گؤزومه ، کاش دوباره گورسنسین
دئدیم جمالیوه زلفون دوشوبدى پرده کیمین
الین فداسى اولوم ، چک کناره گورسه نسین
بویوردى کمالون اولسا جمالى بوشلارسان
دوز عاشق اول قره داش ماهپاره گورسه نسین
ستون شمع وصاله یازوبدیلار کى گرک
دوزعاشقین قانادیندا شراره گورسه نسین
دئدیم دوزعاشقووام امرائله یانیم کول الوم
ثبوت عرضیمه تا بلکه چاره گورسه نسین
بویوردى کیم یانان اولسا، اؤزى یانوب آلیشار
گؤزه تله مز اونا رمز و اشاره گورسه نسین
خلاصه بو ایکى مصرع ایکى قولاقینا 
گرک مثال ایکى گوشواره گورسه نسین
ستاره اولماقا گؤ رسون لیاقتون یوخدى
بولوت دا اولما ، چکیل قوى ستاره گورسنسین  

نوحه - غفاری اردبیلی

اگر اینسان حکیم اولسا ، اسیر روزگار اولماز
بو بئش گون عمره خاطیر ، نفس شومه دستیار اولماز
سلیمانلار گئدیبلر دست خالی قبره دونیادان
نقدیر اولسا اینسانین جلالی ، پایدار اولماز
شکوه و فر جاویدان ، فقط مخصوص سبحان دیر
اجل حکمی گلنده ، هئچ کسه راه فرار اولماز
بو سؤزلر منتسب دیر مکتب شاه ولایتدن
بویوردو ثروت و مکنت دلیل افتخار اولماز
بشرده اولسا حریت ، اؤزون دونیایه سیندیرماز
شرافتمند اولان اینسان ، قالار آج روشوه خوار اولماز
اگر اینسان بیر آز فیکر ائیله سئیدی متن قرآنه
بیلردی هئچ حقیقت پیشه اینسان ظلم کار اولماز
بلای فقر و نکبت دن قاچیرلار قیزلار ائولردن
مساوات اولسا، عدل اولسا ، بو قدری انتحار اولماز
بو بیر امر مسلم دیر ، درآمدلر حلال اولسا
بو قدری کوچه و بازارده بی بند و بار اولماز
گلین آی باشرافتلر ، چکیب تخت دن سالاخ فقری
برابر اولسا اینسانلار ، شرافت داغدار اولماز
گئدیرسن مکه یه هر ایل ، دئییرسن عاشقم حجه ؟
ولی مین حجه گئتسن ، هئچ بیرینده اعتبار اولماز
تبرا ائیله شیطاندان ، سورا گئت حجه ای حاجی
وگرنه مکه ده شیطانه ، شیطان سنگسار اولماز
اگر مین ایل اوروج توتسان ، همان قرآنه آند اولسون
اگر آج یاتسا بیر اینسان ، رضا پروردگار اولماز
..
اگر انسان عاقل باشد ، اسیر روزگار نمی شود
به خاطر این عمر پنج روزه دستیار نفش شومش نمی شود
سلیمانها با دست خالی به قبر رفته اند
جاه و جلال انسان همیشگی نیست
شکوه و جلال همیشه مخصوص ذات پروردگار است
وقتی حکم اجل می رسد راه فراری نیست
این سخنها منسوب به شاه ولایت است
فرمود ثروت دلیل افتخار نیست
اگر انسان آزاده باشد ، خود را در مقابل دنیا نمی شکند
انسان شرافتمند گرسنه می ماند ، اما رشوه خوار نمی شود
اگر انسان کمی به متن قرآن فکر می کرد
می دانست که انسان حقیقی نگر ظالم نمی شود
از بلای فقر و نکبت دخترها از خانه می گریزند
اگر مساوات و عدل برقرار باشد ، این همه خودکشی اتفاق نمی افتد
بیائید ای مردم با شرف ، فقر را از تخت به زیر افکنیم
اگر حقوق انسانها مساوی شود ، شرافت داغدار نمی شود
هر سال به مکه می روی و می گوئی عاشق حج هستم ؟
هزار بار هم به سفر حج بروی هیچ کدام معتبر نیست
اول از شیطان تبرا کن ، سپس به سفرحج برو ای حاجی
وگرنه در مکه ، شیطان که شیطان را سنگسار نمی کند!!
اگر هزار سال روزه بگیری ، قسم به همان قرآن

اگر انسانی گرسنه بخوابد ، خدا از تو راضی نمی شود