دینمیرم

شاعر: آیریلماز
دانیشیق عصرینده بیلمیرم ندن
اوره ییم دولوسو، سؤز دینمریم
بعضا عصیان ائدیر سؤز، یازیر قلم
نئیله مک قلمه دوز دینمیرم
*
آیریلدیم ائلیمدن دوشدوم یاد ائله
اوزولدوم سئوگیمدن من بیله – بیله
گودوکجو اولوبدور دوداغیم دیله
یازدیغیم سؤزوده دوز دینمیرم
*
اود توتوب غصه دن اوره ییم یانیر
داغ دئییب داغ اوستن سینم اودلانیر
او منیم ائلیمین گونشین دانیر
من اونون اودونا کؤز دینمیرم
*
آیریلماز باش قوشما آننامازلارا
شرف دن دانیشما اوتانمازلارا
بیلمیرم ندن سه او قانمازلارا
الیزی یاخامدان اوز دینمیرم
*

دئمک اولماز

شاعر: ایریلماز
دیلینی اؤرگتمه یالانا اوغلوم
دوز سؤزون قارشیندا سؤز دئمک اولماز
بلبوله قورباغا، سئرچه یه قارتال
ایشیغلی گونشه، کؤز دئمک اولماز
*
یالاندیر اینسانی بلایا سالان
شالاری تختیندن، سالیبدیر یالان
چالیش ائل آراسی، حیالی دولان
حیاسیز یاناغا، اوز دئمک اولماز
*
اینسان وار، دیندیرسن یاناغی سولار
بهتان سؤز ائشیتسه، بولود تک سولار
وقارلی اینسانی، اؤلدورمک اولار
آنجاق فکریندن، ال اوز دئمک اولماز
*
وار دولت بیر یانا، ویجدان بیر یانا
محبت ائیله ییر اینسان اینسانا
او گؤز کی گؤردویون کؤکوندن دانا
کور اولسون، او گؤزه، گؤز دئمک اولماز
*
وفاسیز دنیایه، ائتمه اعتبار
نه اکسن توپراغا، اکدیغین چیخار
آیریلماز چوخ سؤزو ائیلمه آشکار
یئر وار حاق سؤزوده، دوز دئمک اولماز
*

آی اوغلان - شاعر: آیریلماز

چوخ ییرغالانیب قاش گؤزونو آتما، آی اوغلان
تورکم منه چوخ فارسجا قیریلداتما، آی اوغلان
علم اولماسا مشکول دؤنوب آسان اولابیلمز
ائللر سؤزودور، تولکودن آسلان اولابیلمز
هرزه گولو ائل گوللرینه قاتما آی اوغلان
تورکم منه چوخ فارسجا قیریلداتما، آی اوغلان
*
آرتیق چالیشیب دوزلره اوخشاتما یالانی
تورکون آتیینا تیکمه ، یاراشدیرما، پالانی
آز بیلمه دوماوندیدن اوغلان، ساوالانی
ائل قارقیش ائدربوغدا وئریب ساققیز آلانی
میس دن اؤتری، آغ قیزیلی ساتما آی اوغلان
تورکم منه چوخ فارسجا قیریلداتما، آی اوغلان
*
باخ تاریخه گؤر کیم ده ده وه خ.ر باخیب اوغلان
اینسان آدینی دفتره کیم یازدیریب اوغلان
کیم بابکی ساتدی عربه، خانه سی ویران
کیم ائتدی خیانت، بؤلونوب آذربایجان
غفلت یوخوسوندا، بو قدر یاتما آی اوغلان
تورکم منه چوخ فارسجا قیریلداتما، آی اوغلان
*
مشروطه لیگی کیم گتیریب ایرانا اوغلان
ستار خانی کیملر چاغیریب تهرانا اوغلان
دالدان کیم آتیب گلوله نی ستارخانا اوغلان
کیم قاره باغی هدیه وئریب ایروانا اوغلان
بسدیر باشادوش، باغریمی چاتداتما آی اوغلان
تورکم منه چوخ فارسجا قیریلداتما، آی اوغلان
*
بیز یاندیران اودلاردا، بوگون یاندی اوشاقلار
پیس گونده، یامان گونده آیاقلاندی اوشاقلار
داندیق دیلی بیز، ریشه سینی داندی اوشاقلار
ایندی بیزه یوخ، یادلارا قرباندی اوشاقلار
بوش- بوش دانیشیب بئینیمی لاخلاتما آی اوغلان
تورکم منه چوخ فارسجا قیریلداتما، آی اوغلان
*
من سؤیله میرم دیللری اورگنمه دانیشما
یانسین اوره ییم باشی، دئسم فارسا قاریشما
آنجاخ دئییرم، یادلارا چوخ یانما آلیشما
هرکیم ائلینی دانسا، کوسوب اونلا باریشما
گولسن، خار اولوب، ائل گؤزینه باتما آی اوغلان
تورکم منه چوخ فارسجا قیریلداتما، آی اوغلان
*
دوشمان اوزووه گولسه، اینان تازه کلک دی
پروانه ده ییر شمع لره، اوغلان کپنک دی
آیریلمازا واجب سؤزون آشکارا دئمک دی
تورکون دیلینین استادی آللاه دی دئمک دی
شیطانی اهورا بئلینه چاتما آی اوغلان
تورکم منه چوخ فارسجا قیریلداتما، آی اوغلان

آغلاییر - آیریلماز

آغلاییر
عجایب زماندی بیزیم زمانه
اینسانین حالینا حیوان آغلاییر
اینسان درد الیندن گلیب فغانه
تاپیلمیر دردینه درمان آغلاییر
*
باخیشلار اولوبدور قیش کیمی سویوخ
اینسانلار ائیلییر ثروته قوللوخ
بعضا بیر ایش گؤرور اشرف مخلوق
گلایه ائیلییب شیطان آغلاییر
*
زمانه ده ییشیب، زمانه دؤنور
اوغلانلار قیز کیمی باشلارین هؤرور
حکیم جلاد اولوب آدام اؤلدورور
قبیرده بیچاره لقمان آغلاییر
*
کیشی دول آختاریر آروادی اویناش
قضاوت ائیلییر اوغرویا اوباش
خیانت ائیلییر، قارداشا قارداش
غیرت ماتم توتوب، وجدان آغلاییر
*
سالیبلار زندانا، سؤز بیلن لری
شاللاقلار آلتیندا، سویولور دری
حقیقت تاپدانیب، اولندن بری
دوران گولومسویور، زامان آغلاییر
*
حاکم لر اونودوب ملتین غمین
یاغی لر آشکاراویریبلار کمین
هر کس تابیبدیر، ایشینین کمین
چاققال توتک چالیر، آسلان آغلاییر
*
آیریلماز دعاینان آچیلماز دویون
دویونلر پیتداشار، قالسا گون به گون
شاعر نظمه چکر باخیب گؤردویون
قلم سیزلاییر، یاران آغلاییر
*

بیه نمیر - آیریلماز

یارب نه دن اینسان گؤزل اینسانی بیه نمیر
میمون بزنیب داغداکی جئیرانی بیه نمیر 
عشقین آدینی چوخلاری میندارلیقا چکمیش
کامین آلیبان سئوگیلی جانانی بیه نمیر
بایقوش سسینه ذوقه گلیر چوخلاری آنجاق
بولبول کیمی گولشنده غزل خوانی بیه نمیر
عیلت نه اولوب مصنوعی گولزاری گزنلر
بیر گون دولانا گوللو گولوستانی بیه نمیر
باخ گؤر نئجه دوراندی گئدا اوغلو دیلنچی
شاهلار تاجینی قصر سلیمانی بیه نمیر
آیریلمازی آگاه ائله عیلت نه دی یا رب
تورکون بالاسی آذربایجانی بیه نمیر
*

یاتیبدی - آیریلماز

نام شاعر : آیریلماز

بیر گون یولوم دوشدو مزارستانا

ائله حس ائیله دیم دوران یاتیبدی

گؤردوم انسان لاری سس سیز سمیرسیز

بیلدیم درد قورتاریب درمان یاتیبدی

سؤیکه دیم بیر داشا ناتوان دیزی

زیارت ائیله دیم آخیر اؤومیزی

گؤردوم دار قبیرده ظالیم چنگیزی 

ائیلییب دونیانی ویران یاتیبدی

ایسته دیم قاییدام ایاق دایاندی

باخدیم بیر قبیره اوره ییم یاندی

دونیانی ترک ائدیب بیر آز زماندی

یار وصلین گؤرمه میش جاوان یاتیبدی

هیرس دن دیشلریم بیر بیرین یئدی

گؤزوم گاه آغلادی گاه گولومسه دی

داشین اوستونده کی یازیلار دئدی

شاعر آستا یئری انسان یاتیبدی

ال قانا بویادی دیشیم دوداغی

هر نه دن چتین دی اولاد فراغی

گؤردوم بیر قبیرده خیردا اوشاغی

آناسیننان اوزاق گریان یاتیبدی

اویما بو دونیانین پیس مرامینا

دونیا سلیمانلار دچکمیش کامینا

یولچو طعنه وورور شاه مقامینا

آقادان یوخاری چوبان یاتیبدی

اوردا هیتلر دوروب جنایت ائتمز

یولداش یولداشینا خیانت ائتمز

یوخسوللوق بیر کسی خجالت ائتمز

توپراق ایچره هامی یکسان یاتیبدی

توپراق لار آلتیندا ارییب بدن

گلمه ییم ندن دیر گئتمه ییم ندن

بیریسی تاپمییب اوش قاریش کفن

قارانلیق مکاندا عریان یاتیبدی

اوردا نه جلاد وار نه دار آغاجی

قارداشین تانیماز اوردا خان باجی

دؤنوب یار یارینا باخماز قئیقاجی

اداسیز عشوه سیز جئیران یاتیبدی

اوردا درک ائتمه دیم پاییزی یازی

بیر یئرده قویلانیب اوغروینان قاضی

توپراغ آلتدا گؤردوم من آیریلمازی

گلیب گئتمه یینه حئیران یاتیب دی

آمیرزا - آیریلماز

ظولمون کاساسی باش دان آشیب داشدی آمیرزا

بوندان بویانا ایش لریمیز یاشدی آمیرزا

سن قیل نامازی اوت اوروجو ائیله ثوابی

قوی کافر آپارسین آجی ویسکی ایله شرابی

ارباب لارا آللاه یارادیب جوجه کبابی

یوخسوللارین آرتیق یئدیگی آش دی آمیرزا

بوندان بویانا ایش لریمیز یاشدی آمیرزا

حق سؤز دئمه کی دولتیمیز شاکی دی یولداش

شکر اللاها شورالاریمیز خاکی دی یولداش

بیر عده سی ده بنگی دی تریاکی دی یولداش

تریاکی لرین ناز گولو خاشخاشدی آمیرزا

بوندان بویانا ایش لریمیز یاش دی آمیرزا

کال قال گؤزلیم اؤلکه ده قانماق قاداغاندی

یات یورقانین آلتیندا اویانماق قاداغاندی

چوخ گرمه نیگاریله دولانماق قاداغاندی

اؤز آروادینا ، اؤز اری اویناشدی آمیرزا

بوندا بویانا ایش لریمیز یاشدی آمیرزا

یوخدور اگر ایران دا عدالت نه ایشیم وار

بیر عده ائلیر قتل و جنایت نه ایشیم وار

دولت ائلییر خالقا خیانت نه ایشیم وار

زیندان دا  اتین مجرمی ماققاش دی آمیراز

بوندان بویانا ایش لریمیز یاشدی آمیرزا

حق سؤز بیزیم ایرانیده افسانه اولوبدور

انسان  گئنه انسانلیغا بیگانه اولوبدور

ایریلماز اودور کی بئله دیوانه اولوبدور

عفو ائیله منی گر قلمیم چاشدی آمیرزا

موندان بویانا ایش لریمیز یاشدی آمیرزا

*

شاعرین آدی : آیریلماز

*