گؤزلیم - بابا پونهان

نه ایشیم وار، نه ائویم وار، نه باغیم وار گؤزلیم
نه پولوم وار، نه اتیم وار، نه یاغیم وار گؤزلیم
دئمه کی یوخدو باغیم، من تره وزدن کاسیبام
کابینت لرده کودوک، بال قاباغیم وار گؤزلیم
نئینیرم من ماشینی گرچی منی درد آپاریر
اللی دؤرد آت گوجونه تن آیاغیم وار گؤزلیم
منه طعن ائیله مه کی، ائوده چیراغیم یوخدور
واجیب اولدورکی، دنیزده چیراغیم وار گؤزلیم
نه اولارکی باکی یا ارمنی تشریف بویوروب
ارمنیله آخی بوردا چالاغیم وار گؤزلیم
منی توی مجلسینه بیر حاجی دعوت ائیه دی
دئدی « شوللار» شوشه سینده عاراغیم وار گؤزلیم
بد گومان اولماکی، دریایا گئدرسم قورویار
چونکو دریا قدری آغلاماغیم وار گؤزلیم
یئدیلر قویمادیلار اورتادا بیر شئی قالسین
اینجیمه سؤیله سم آنجاق قیراغیم وار گؤزلیم
ساچیم آغ، ساققالیم آغ، نئینیرم لاؤلسم، کفنی
بختی – پونهانا سئوین، پولسوز آغیم وار گؤزلیم

بابا پونهان - من نه دئدیم کی

یوخدان گلنی وار ائله دیم، من نه دئدیم کی؟
حاق اهلین اومودوار ائله دیم، من نه دئدیم کی؟
مظلوم لارا قان اوددوران آلچاقلاری، بیر – بیر
سؤز اودماغا وادار ائله دیم، من نه دئدیم کی؟
خوفدان اییلیب بت پرست اولموشلار اؤنونده
قان سیز بوتو انکار ائله دیم، من نه دئدیم کی؟
آللاهی اونوتموشلارا خاطیرلادان اولدوم
غافیل لری هوشیار ائله دیم، من نه دئدیم کی؟
ترک ائیله دی شیطان بو کؤنول ملکونو گئتدی
حاققیملا یئرین دار ائله دیم، من نه دئدیم کی؟
جان وئردی خدا آمماکی، عشق تیسته دی مندن
یوخدور دئمه یه عار ائله دیم، من نه دئدیم کی؟
گؤردوم کی، پول اوستونده بو دونیانی توتوللار
دونیانی خبردار ائله دیم، من نه دئدیم کی؟
حاققین اؤزون آختاردیم، اونون قبرینی تاپدیم
آمما سؤزون آشکار ائله دیم، من نه دئدیم کی؟
پونهان من عمل دفترینی، شعره چئویردیم
یعنی اونو تکرار ائله دیم، من نه دئدیم کی؟

ایت گونونده - بابا پونهان

ایت گونونده
دوورا امید ائیله دیک، دووران دا ایت گونونده
عالیم ده ایت گونونده، نادان دا ایت گونونده
آق اللرده آق الجک، او گوندن داها ال چک
اینینده کهنه پئنجک، جانان دا ایت گونونده
آدم گیریر مین دونا، محال یوخدور شیطانا
اسیر دوشوب انسانا، شیطان دا ایت گونونده
عسگریمیز بیتله نیب، ناظیریمیز اتله نیب
قیزلاریمیز لوت له نیب، اوغلان دا ایت گونونده
فیکیر چاپیر هر یانا، گوج وئریرم قلیانا
قیچیم گیریر یورقانا، یورقان دا ایت گونونده
آتدیلار وطنداشی، ساتدیلار وطنداشی
قوی وطنه باش داشی، احسان دا ایت گونونده
« قراد» کیمی اود ساچیر، گؤیه خالقا یول آچیر
گئج توتولور، تئز قاچیر، زندان دا ایت گونونده
چاتدی خبر هر یانا، تئز ییغیشین مئیدانا
بالتالاندی« توپخانا»، مئیدان دا ایت گونونده
آی خوجالی خوجالی، اوشاقلی هم قوجالی
قاچماغا یوخ مجالی، فرمان دا ایت گونونده
جهان گئدیر سقوطا، قرآن یئتیر ثبوتا
کفن باها، سو خیلتا، انسان دا ایت گونونده
ایتیم گل دور اؤنومده، گل باشینا دؤنوم ده
سن پونهانین گونونده، پونهان دا ایت گونونده