حکیم قارداش - حسین خیری بایقرا

حکیم قارداش قوللوغونا گلمیشم

درد منی چؤکوردور حالیم یاماندی
چالیش منیم علاج ائیله دردیمه
قویما بو درد جانیم آلسین آماندی
*
طالعیم بد گلدی گونوم ده قارا
یارا اوستن منه دیدی چوخ یارا
گلمیشم قاپینا سن ائیله چارا
قویما بو درد جانیم آلسیم آماندی
*
هئچ بیلمدیم نه لر گلدی باشیما
هانسی اللر زهر قاتدی آشیما
هرکس باخیر حئیف لنیر یاشیما
قویما بو درد جانیم آلا آماندی
*
حکیم قارداش وئر جانیمین شفاسین
حسرت چکیر بو دونیانین جفاسین
گؤره نمه دیم او دلبرین وفاسین
قویما بو درد جانیم آلسین آماندی

دنیا - حسین خیری بایقرا

انسان اوغلو نه دوتوبسان دنیانی
واللاهی آخیری یالاندی دنیا
نئچه سلیمانلار چکیب کامینا
افعی ایلان کیمی چالاندی دنیا
*
هانی بس آتامیز هانی بس آنا
باخ دوزولوب یولا گئدن کروانا
رحم ائتمز گدایا سلطانا خانا
فرعونی تختینن سالاندی دنیا
*
دئمه مالیم دولتیم وار پولوم وار
کنیزیم وار نوکریم وار قولوم وار
بیر تیریلی جواهریم لعلیم وار
هامیسیین الینن آلاندی دنیا
*
میلیاردی ماشینی مینیب سورورسن
پیادا قالانا باخیب گولورسن
« حسرته» پوز وئریب گونده سیلیرسن
بیرگون ساققالیوی یولاندی دنیا

ائل آراسیندا - حسین خیری بایقرا

بئش گون بو دونیادا مرد کیمی یاشا
قوی سنی ائل اوبا باسماسین داشا
گزه نده ائلینن گز قوشا قوشا
قوی حرمتین اولسون ائل آراسیندا
*
یئتیم اوشاقلارین گؤز یاشینی سیل
آغلییاندا آغلا گولنده سن گول
هامینی اؤزووه آنا باجی بیل
ائل سنی ساخلاسین قول آراسیندا
*
وفالی دوسلاری گؤزونن آتما
شرفی اوخلاییب ویجدانی ساتما
چوخوللوق ائیلییب دونیانی قاتما
قارا تیکان اولما گول آراسیندا
*
بزک وئر ائللره سن اول یاراشیق
قویما باغ باغاتا قونا ساراشیق
ایستییرسن اولمویاسان خاآشیق
سینیق داراق اولما تئل آراسیندا
*
اوتوروب دوراندا یئریوی تانی
بیر گون اوبمویاندا دئسینلر هانی
سن بیل بو « حسرتین » شرفلی جانی
چالی تیکان اولما یول آراسیندا

نئجه آغلامییم - حسین بایقرا ( حسرت)

نئجه آغلامامییم نئجه یاشاییم
باخچادا گوللری سار آلدی گئتدی
بولبول قان آغلایر دمیر قفسده
گوللرین یئرینی خار آلدی گئتدی
*
زامان نییه بئله اولدی یارادان
یاشیل قیرمیزیدا قورخور قارادان
چوبان نئجه حالال لاشدی سارادان
چوبانین جانینی یار آلدی گئتدی
*
ویجدانیم آغرییر حقق آلیشاندا
تیکان آراسیندا گول چالیشاندا
دیلیم پارچالانیر دوز دانیشاندا
ایشیق لی گونومی تار آلدی گئتدی
*
«حسرت» یاز اوخوسون سوزو قانانلار
نئینیرم اوخودو حققی دانانلار
اینسانی ساتدیلار آلچاق آداملار
اینسانین یئرینی وار آلدی گئتدی
*
حسین خیری بایقرا- ( حسرت )