من اوگون باشلادیم انسان اولماغا - حاتم احمدی

سلام تانری
من اوگون باشلادیم آدام اولماغا
تانرینین گؤز یاشین بیری سیلمیردی
قاپی دا قالمیشدی پولسوز بیر کیشی
اوتانیب ائوینه گئده بیلمیردی
*
من او گون باشلادیم انسان اولماغا
گئرچکلر اوره یین بندین قیریردی
بئش اوغول بؤیودن قهرمان آنا
قوجالار ائوینده جان تاپشیریردی
*
بیر او گون باشلادیم انسان اولماغا
قارداش ییخیلمیشدی قارداش یانیندا
بویا چاتمیش اوغول اؤز آتاسینین
اوزونه قاییتدی یولداش یانیندا
*
من اوگون باشلادیم انسان اولماغا
آنلادیم بو دنیا پاسلی دمیردی
غملی سویقونوندا بیر کؤرپه اوشاق
اؤلن آناسینین دؤشون امیردی
*
من او گون باشلادیم انسان اولماغا
اولمایان مئشه یه آغاج اکدیلر
دیبیندن کسدیلر یاشیل آغاجی
کاغاذلار اوستونه شکیل چکدیلر
*
من اوگون باشلادیم آدام اولماغا
ملت ظلم ائده نه قارشی دوروردو
همان اعتراض دا غملی بیر پلیس
آغلایا – آغلایا اوغلون ووروردو
*
من اوگون باشلادیم آدام اولماغا
قیشدا یوخسوللارا دنیا دار اولدو
تانری باخدی – باخدی بیردن آغلادی
شاخدادان گؤز یاشی آخدی قار اولدو
*
من اوگون باشلادیم انسان اولماغا
بیرجه کؤک قویونو بیریان یئدیلر
بیر وئدره آیران دا ایچدیلر آمما
ائوین صاحبینه چوبان دئدیلر
*

هارا گئدیرسن

هارا گئدیرسن - حاتم احمدی
دوشوبسن یوللارا هارا گئدیرسن
آرخانجا سورونور بیر یانان اورک
غم – کدر داغیلیر آددیملاریندان
ندن دیر گئدیرسن من بیلیم گرک
منه سؤز وئرمیشدین گؤروشن زامان
آیریلیق آدیندان نفرتین گله
نه من آیریلانام نه سن آیریلان
سنی بو امیدنن گتیردیم اله
هر نه یین حدّی وار انصافین اولسون
سنه محبتیم آرالماییبدیر
سئوگیله دوروبدور اوره ییم منیم
آیریلیق دردینه یئر قالماییبدیر
نه اولدوبدور سنه اؤز اوره ییندن
گؤزوندن گؤرونمور سئوگیدن اثر
هئچ نه غم دن باشقا قالماییر منه
*

فضوللوق

فضوللوق - حاتم احمدی
بیر عدّه اینسانین قالدیم ایشینده
کولک هارا اسیر، اورا اسیرلر
قاش آلان دئییرلر، گؤز چیخاردیللار
یول آچان دئییرلر، یولو کسیرلر
*
قییغی گؤرموللر اؤز گؤزلرینده
ملّتین گؤزونده، توکو گؤروللر
چالپاشیق تئللرین داراخلامیرلار
خیالدا ملّتین ساچین گؤروللر
*
گلین قایدالاری هئچ واخت پوزمویاق
ملتین ایشلرینه باش قوشمویاق
یئرینده یارادیب تانری هرنه یی
باش بدن ده اولار اوردا - بوردا یوخ
*
دنیادا فضوللوق یاخجی ایش دئیل
یالنیز اوره یینده چوخالدار دردی
اینان فضوللوقدا بیر شئی اولسایدی
تانری بو عملی ثواب ائده ردی
*
خالقین حیاتیندان چک آیاغینی
سنی یئریتمک دی، آیاغین ایشی
اگر اوردا قالسا، اؤزون قالارسان
گئت کی قالماغیوین یوخدو ارزشی
*

بایرامدی او گون - حاتم احمدی

شاعر: حاتم احمدی
هانسی گون غم دن اورک دولمادی، بایرامدی اوگون
هئچ اوشاق دنیادا آج قالمادی، بایرامدی اوگون
هانسی گون کلِّ بشر، پول – پارایا بنده دییر
هئچ کسین دانیادا حاققی، من ایله سن ده دییر
بالاسیندان گئجه لر، بیر آتا شرمنده دییر
بیر آنا ساچلارینی یولمادی، بایرام دی اوگون
کئچه جک لر گئدیلیبدیر، گئنه بلکه گئدیلر
چوخلای غصه یئییب، چوخلاری دا غم یئدیلر
یوخسولو وارلی دان، آیریان گونه بایرام دئدیلر
نه ایچون بیلمه دیلر، تک آدی بایرام دی اوگون
*

آتا - حاتم احمدی

آتا
ائولادین اومودو، ائولادین گوجو
درمان سیز دردلره، درماندی آتا
اللرینده قابار، گؤزلرینده نم
رحمتین مولکونه سلطان دیر آتا
آتا بیر نعمت دیر تاپیلماز تایی
دانیشاندا سسی اؤنم لی سس دیر
اگر قوجالیبسا، قیناما اونو
گوجو اولماسادا باخیشی بس دیر
هر ائوه اوخشاییر یاشلی بیر بابا
چوخ گؤزل اولار اگر سولماسا
باغبانی آتادیر، آغاجی ائولاد
آغاج سولمالی دیر، باغبان اولماسا
نه قدر یورولسا نه قدر سولسا
ائولادین اوزونه باخیب دینجلیر
هر آدی سسله سن ییخیلان زامان
هامی دان اول ده آتادیر گلیر
بیرگون بویویه جکسن اوشاقلیغیندان
آتانین دیلینده آواز اولوبسان
عؤمرونو سولدوروب سنین یولوندا
اؤزو پاییز اولوب سن یاز اولوبسان
*
شاعر: حاتم احمدی مشکین شهری
*

من اوگون دنیانین داشین آتدیم کی - حاتم احمدی

من اوگون دنیانین داشین آتدیم کی
آسلانلار کافتارین آرتیغین یئدی
سئرچه لر قارتالدان زیروه ده اوچدو
پارس لار، تولکویه نؤکرم دئدی
*
من اوگون دنیانین داشین آتدیم کی
ایت لر هاریلداشیب قوردو قاپدیلار
هامینین دیری قارا پول اولدو
دیر گؤرمه ین لر دیر تاپدیلار
*
من اوگون دنیانین داشین آتدیم کی
جانلی دنیاسینا سانال قاریشدی
ائشیک ده یاتدیلار ایش اوشاقلاری
آما تختین اوسته ایت لر یاتیشدی
*
من اوگون دنیانین داشین آتدیم کی
سئونلر نفرت له آچدی سؤزلرین
بیر کیشی بوراخدی اؤز ناموسونو
خالقین ناموسونا تیکدی گؤزلرین
*
من اوگون دنیانین داشین آتدیم کی
چالیشماق سهمینی اینسانلار بؤلدو
بیری ایشله مه دی کئفلندی
بیری ایشلیه – ایشلیه آجیندان اؤلدو

کیم نه بیلیر کیم نه چکیر - حاتم احمدی

من گولن واختی دا ملت دئدی کی
نیه گولدون دئگینن بیزده گولک
غم یئیینده ولی هئچ کیم دئمه دئی
او غمیندن بیزه وئر بیزده بیلک
ییخدی منی غصه کدر، کیم نه بیلیر کیم نه چکیر
جاوانلیقیم اولدو هدر، کیم نه بیلیر کیم نه چکیر
شیرین باتیبدی زهرده، عؤمور دولاندی قهرده
کیم کیمه دیر بیر شهرده، کیم نه بیلیر کیم نه چکیر
قلبیمی غم تیری دلر، سانما بو ایشلر دوزه لر
آغلییرام من گئجه لر، کیم نه بیلیر کیم نه چکیر
عؤمور گلیب کئچیر ولی، وئرمیر امان عجل الی
آغیللی لار اولدو دلی، کیم نه بیلیر کیم نه چکیر
غملریم آتانمیرام ، آرزی لارا چاتانمیرام
من گئجه لریاتانمیرام، کیم نه بیلیر کیم نه چکیر
قدیمی غم ائتدی کامان، عؤمور یولون آلدی دومان
حیات منه اولدو گومان، کیم نه بیلیر کیم نه چکیر

*