هچ کیم سنه اولماز ننه - یوسف محقق

شاعر: یوسف محقق، شاعر و ترانه سرای همدان

تا که مهلت وار آنانیی قدرینی تزدن بیلیی
اللرینن هی اوپوی گوزیاشیسین هردَن سیلیی
هرگجه قالدی اویاخ هچ یاتمادی تاسن یاتای
چوخ چکیب زحمت بو قَددو قامَتَه ایندی چاتای
گوزلرین سالما یولا تِز گِد یِتیش سَن یانینه
نجه کی عمروی وار اُول قوربان همیشه جانینه
آللاها آند اولسوکی هر اِودَه بَرکَتدیر ننه 
هَر نَه تکرار اِی لَسم آللاه بیلیر آزدیر گنه
تاکی وار دورون دُولان هچکیم سنه اولماز ننه
احترامین ساخلاسن وَاللاه که تاپولماز ننه

*

منبع شعر: وبلاک یوسف محقق 
*

لعنت اینترنته - عاصم اردبیلی

لعنت اینترنته 

لعنت اینترنتـه کی لال لاری گویا ائله‌دی
یوخی وار، قاره نی آغ، چیرکینی زیبا ائله‌ دی
اته نه قوش لارینا قدرت پرواز وئریب
سوت دیشین توکمیه‌نی، حکمته دارا ائله‌ دی
آچدی علمین قاپی سین، غرب ده انسان اوزونه
تکجه فکر اوغروسونو، شرق ده احیا ائله‌ دی
لوله‌یین گورمه‌یه‌نین، آفتافا وئردی الینه
خورخورا دوشدو، خبرآلمـا نه غوغا ائله دی
اوشاقین آلدی الین‌ده‌ن توته‌ کی، وئردی موبایل
او طفیل ده اونو دفترچه‌ ی انشا ائله‌دی
یئتمیش ایل سانجی چکیب نیما بئجرده‌ ن وطنی
آز زامان دا نئچه مین صاحب نیما ائله ‌دی
شاملووون قویدو ایاغ چینینه قوزاندی گویه
اخوان نقشی‌نی اشعارده امحا ائله ‌دی
فکر صاحب‌ لری‌نین گنجینی تاراجه قویوب
رنج سیز بیرگئجه‌ ده سارساقی سینا ائله‌ دی
وزن‌ایلن قافیه ‌نی شاققالایب آتدی ایته
حضرت حافظه بیر محکمه برپا ائله ‌دی
سعدی‌ نین قبری ‌نی قازدیردی گلستانین‌ ده
قتل فرمانی‌نی فردوسی ‌یه امضاء ائله ‌دی
مولوی‌نی ائله ‌دی نفی بلد قونیه‌ د‌ن
اولو خاقانی‌ نی شیروانیده رسوا ائله ‌دی
نظم‌دن سالدی نظامی کیمی شعرین آتاسین
صائبین سبکی ‌نی هند اوغلونا اهدا ائله ‌دی
بیدل‌این کسدی دیلین دهلی‌ده باسدیردی یئره
سعـد سلمانی ‌ده زندانیده ابقا ائله‌ دی
شهریارین گوتوروب شعر تاجین باشیندان
گونش‌این چشمه سینی شب پره حاشا ائله‌ دی
بوغدو حیدربابانی دوغدو مدرنیسمی بیزه
درده باخ اوندادا بی‌سرلری بی‌پا ائله ‌دی
سیمین‌این دیوانی‌نی زوللادی آشغال قابینا
پروینی کهنه بئین شاعره معنا ائله ‌دی
سایه‌نی حال حیاتی‌نده زمین‌گیر ائله‌ ین
فروغی رتبه‌ ده بیر شاعر نوپا ائله‌ دی
ادبیات دنیزینده اوزه‌ن اوزگونچولری
بوشلایب، گول ‌ده باتان قطره ‌نی، دریا ائله ‌دی
و بو اینترنت اگر وئردی تعالی بشره
بیزیم ایران دا بوتون اسفلی اعلا ائله‌ دی
قارقانی، قوزقونو، دولدوردی ادب باغچاسینا
بولبولی داردان آسیب پشه‌ نی عنقا ائله‌ دی
ادبیاتیده چالـدی ادبین داش باشینا
یئنی معجونیده‌ن اخلاقی مجزا ائله ‌دی
سرقته فرصتی بذل ائتدی شعر اوغروسونا
اودا اوز ذاتینی وبلاگ‌دا هویدا ائله ‌دی
زلف اوزاندی، قاش آلیندی، دیشی‌لندی کیشی‌میز
لعنت اول تکنیک ینه مجنونو لیلا ائله ‌دی
طاووسی ساتماق ایچون یوللادی مال میدانینا
دورری خرمهره ‌یه بازاریده همتا ائله ‌دی
اوز کؤکون ‌داندی اوشاق باغلادی بیگانه ‌یه بئل
نه اوتاندی نه اوساندی نه ده پروا ائله ‌دی
آتاسین دان بئخبر بیلدی اوز ائل ‌داشلاری ‌نی
نه بیلیم بلکه ده اوز سرّینی افشا ائله ‌دی
نه گیله فقردن ائتدی نه آخان قان یاشدان
نه تالانمیش‌لار ایچون صبر تمنا ائله ‌دی
نه قارانلیق گئجه ‌یه بیر جوما اولدوز چیله‌ دی
نه دومانلیق به‌یه‌نن آزمانا ایذا ائله ‌دی
نه بولاق اولدو آچیب یول آخا یار باغچاسینا
نه چراغ ایله‌ ایتن یولداشی پیدا ائله‌ دی
تکجه اوهام ‌ایله شعرین پری سین سالدی تورا
چالیشیب صبحه کیمی نفسینی اغنا ائله ‌دی
اعتراض نامه آدین قویدو هدر سوزلری‌ نین
تا کی اوز شاه اثرین ائل‌لره اهدا ائله ‌دی
تف سنین گردش دورانینا ای چرخ فلک
بو دولانماق کیمی گور کیم لره مولا ائله ‌دی
عاصما بسدی دایان شعرینه صون قوی بونو دء
لعنت اینترنته کی لال لاری گویا ائله ‌دی

*

نه ائتمه لی یم ؟ - عاصیم اردبیلی

نه ائتمه لی یم؟
من ایستیره م اؤزومو آغلایام نه ائتمه ‌لی‌ یم؟
اؤلن دیلک‌لره یاس ساخلایام نه ائتمه‌ لی‌ یم؟
من ایستیره‌ م کؤزه ریب اؤدکیمین کول اولسامدا
قارانلدیریق اوره‌گین داغلایام نه ائتمه ‌لی‌ یم
چوخ ایستیره‌ م قوناقیم اولسا شعریمین پری‌سی
قیزیل غزل قولونا باغلایام نه ائتمه ‌لی‌ یم
من ایستیره‌ م سویو چاتدیرماغا یارین باغینا
جوشوب شلاله کیمین چاغلایام نه ائتمه ‌لی‌ یم
منیم ده اوخشاماغا محتشم دیاریم وار
صفالی باغچالی‌ یام باغلی‌ یام نه ائتمه ‌لی‌یم
اوزوم‌ ده یاسلی گؤزوم‌ ده سؤزوم ‌ده شعریم ‌ده
آچیق دئیم ساوالان داغلی ‌یام نه ائتمه‌ لی‌ یم
و ایستیره‌ م نه عطا اولسا عاصمه ائل دن
سیزه‌ ده بیر نئچه پای ساخلایام نه ائتمه‌ لی‌ یم؟
*

بیر نئچه بایاتی

عزیزیم های منیم چون

وئره یدین پای منیم چون

من اؤلسم سنه قوربان

سن اؤلسن وای منیم چون

*

عزیزیم قاراسیندان

یاش آخار قاراسیندان

آدام دا ال چکرمی

اؤز جیگرپاراسیندان؟

*

باغیندا توت نوباری

یئمه یه توت نوباری

سئودین آلا بیلمه دین

آدینی توتما باری

*

قوچاقدی شیردی بالام

قیبله دی پیردی بالام

گل فلک قیما منه

یازیغام بیردی بالام

*

بولبول دولوبدور باغا

بیر گول سالیبدیر داغا

سایانین قولو اولسان

سایمییانا اول آقا

*

لال منی - آیریلماز

لال منی
سحر سحر یول اوستونده ناغافیل
بیر آلا گؤز مارال ائتدی آل منی
آتدی یانا یاناغیننان اؤرپه‌یین
سیر ائله‌دی آغ اوزونده خال منی
یاز گولو تک شافاقلاندی اوزوموز
قلبیمیزده عصیان ائتدی سؤزوموز
بیر بیریلن دانیشیردی گؤزوموز
باخیشیننان قاندیم دئییر: آل منی
دئدیم: دیل آچ گؤزونده‌کین دیلده ده
بم‌ده دئمه، هارای چکیب زیلده ده
 گل دولاناق ائل آراسین ائلده ده
مست ائله‌سین دوداغیندا بال منی
بیردن بیره اؤرپه‌یینی باغلادی
مکتوب یازیب وئردی منه آغلادی
آیریلمازین اوره‌یینی داغلادی
گؤردوم یازیب حق یارادیب لال منی
*

شاعر: یعقوب احمدوند ( آیریلماز )

گل ( فرقتیندن یاندی باغریم، یورگیم قان اولدی، گل )

شاعر: عماد الدین نسیمی 
فرقتیندن یاندی باغریم، یورگیم قان اولدی، گل
گل ای دیدارون بو سایرو جانه درمان اولدی، گل
دنیانین ناز و نعیمی، باغ - بستانی منه
سن سیز ای سلطان خوبان، بند و زندان اولدی، گل
ایستدی لعلون فراقی جانیم یاخماق ولی
عشقه یانمیش جانه وصلون آب حیوان اولدی، گل
او کؤنول کی دائما ایشی سنینله وصل دی
یاندی شوقوندان، اسیر درد هجران اولدی، گل
جانیمین جانی وصالیندور وصالیندان اونو
تاکیم آییردی فلک ، بیچاره بی جان اولدی، گل
عاشقین باغ و گلستانی اوزون گلزاری دور
هانسی گلزارین آدی گل سوزگلستان اولدی، گل
جنتین صحنین ده طوبی واله و حیران و مست
قامتون حسنونده ای سرو خرامان اولدی، گل
تا منی تقدیر یزدان ائیله دی سنن جدا
کؤنلومون حالی پریشان،دیده گریان اولدی، گل
معجزاتیندن یاناغون ، محکماتیندن ساچین
خارو خاشاکی جهانین ووردو ریحان اولدی، گل
بحر بی پایانه شوقون جانیمی غرق ائیله دی
گؤر نه بیداد ائیله دی هجرون، نه توفان اولدی، گل
چون نسیمی سندن آیری بیلدی کیم یوخدور وجود
درد و درمان، وصل و هجران جمله یکسان اولدی، گل
*

یا علی سندن مدد

شاعر: عمادالدین نسیمی
عشق الیندن یاندی باغریم یا علی سندن مدد
من غریب بی نوایم یا علی سندن مدد
سن منه لطف و کرمدن، دردیمه بیر چاره قیل
شاه سن سن من گدایم یا علی سندن مدد
حق تعالی اؤز نوروندان خوش یارالتمیش شاهیمی
قدرت سرّ خداسن، یا علی سندن مدد
کیم محّمدی علی دن آییرور لعنت اونا
لحمک لحمی دگیلمی یا علی سندن مدد
هم خدیجه فاطمه ام خیرالنسا بنت النبی
معدن درِّ حقیقت یا علی سندن مدد
بنده خلق حسن اولدوم ازل ده تا ابد
نور عین مصطفی سن یا علی سندن مدد
هر رجن آییندا گؤردوم نئچه معجز گؤستریر
شاه حسینون صندوقوندا یا علی سندن مدد
جمله اولاد دین سندن ظهور اولدو تمام
آدی زین العابدین دیر یا علی سندن مدد
باقر و صادق یولوندا اوینادیم من جانیمی
موسی کاظم عنایت یا علی سندن مدد
بیر طواف خانۀ شاه خراسان ائیله دیم
یئتمیش ایکی حجِّ اکبر یا علی سندن مدد
هم تقی و هم نقی و وارث دین نبی
دولت آل عباسین یا علی سندن مدد
او امام عسگری دیر یعنی که خلق حسن
کؤنلوم اوندا شاد اولدو یا علی سندن مدد
اول محّمد مهدی صاحب زمان ائیله ظهور
عالمی کفّار توتدو یا علی سندن مدد
ای نسیمی دلشکسته حق دن ایسترسن نجات
جرعۀ توحیدی ایچگیل یا علی سندن مدد
*

ایسته میرم یار آغلاسین - محمود قبه زرین

ایسته میره م یار آغلاسین، چال تاری قوی تار آغلاسین

گول اویناسین خارآغلاسین، بوغازگولسون دارآغلاسین!

قوی یئره غم پیاله سین، سیل گوزونون شلا له سین

آل گونشین حواله سین، شاخ قارا قوی قار آغلاسین

یارنه دن آغلاسین گرک؟، بویون بوکولسون آی فلک

دویونجا قویمادین گولک، سیخ ناری قوی نار آغلاسین

خزان یئلی اسن زما ن، شخته امان کسن زما ن

یار یاریلان کوسن زما ن، کیمسه کیمیم وار آغلاسین

توزدی دوماندی فیرتانا، اود یاغیلیب گولوستانا

دؤندهراوزون شبستانا، ساغره یالوار آغلاسین

صبحه تیکیلدی گؤزلریم، داغلاری آشدی سؤزلریم

گیزلین الوودی کؤزلریم، نی اؤلدی نیزار آغلاسین

ساقی گتیر قدح لرین، سرخوش اولاق درین درین

سئوگی توتا کینین یئرین، کین اؤزی زارزار آغلاسین

دریالارا اوزان آراز، جوم درینه قالما دیاز

مرکّب اول سؤزلری یاز، داغ دا بولاق لار آغلاسین

*

صبح نامازی - محمود قبه زرین

چال عاشیق
چال سازی سسلندیر آماندیر
یوخو آلدی گؤزومو
گون قارانلیق
سو بولاندیق
اولوب ائل یوردو دومانلیق
سؤندوروب یئل کؤزومو
قهرمان اوغلوون عاشیق داها یوخدور دؤزومو
سؤنموش او اودلاری مضرابیله اودلاندیر عاشیق
سویموش او قانلاری قاینات گویه داشلاندیر عاشیق
قوی نفس گلسین ائله
باغلایاق شالی بئله
دایاناق سئل قاباغیندا
بابالارمیز سایاغیندا
هایلا گلسین نبینی ال ده تفنگی هابئله
قوچ کوراوغلو دلیلرله گله، بابک دیریله
هامی وئرسین ال اله،
قوی سنین دوشمانیوین نسلی کؤکوندن قوروسون.
چال ظفر نغمه سینی سس بو دیاری بوروسون
عاشیق آوازی، سازی ائل بوغازی
گئجه دن چوخلو کئچیبدیر
قالیب البته آزی
یئتریب صبح نمازی!
داغلارین باشی مناره ن!
سازین آواسی اذان!
پرده لر حمدیله سوره
شور شهنازدا قرآن!
هایلا ستارخان ائلی،
اونون ال بیر فامئلی،
بو سحر وقتی قیام ائیله ی هلر،
قیلالارصبح نمازین
بحثی تمام ائیله ی هلر
*

پری

پری - ملاپناه واقف

بویون صراحی دیر بدنین بلور
گردنین چکیلمیش مینادن پری
سن ها بیر سوناسان جدا دوشموسن
بیر بؤلوک باش سونادان پری
*
ایختلاطین شیرین، سؤزون مزه لی
شکر گولوشوندن جانلار تزه لی
ائللر یاراشیغی، اؤلکه گؤزلی
نه گؤزل دوغوبسان، آنادن پری

*
اوز یانیندا تؤکولوبدور تئل نازیک
سینه مئیدان، تئل پریشان، بئل نازیک
آغیز نازیک، دوداق نازیک، دیل نازیک
آغ اللرین الوان حنادان پری
*
آوجی سی اولموشام سن تک مارالین
خیالیمدان چیخماز هرگیز خیالین
انلییی، کیرشانی نئینر جمالین
سن ائله گؤزل سن بنادان پری
*
گونش تکی هر چیخاندا سحردن
آلیرسان واقفین عاغلینی سردن
دعاجینام سالما منی نظردن
اکسیک اولمایاسن سنادان پری
*

من سنه حسرتم

آرزو مختاری – من سنه حسرتم

هانسی اوباداسان؟هانسی ائلده سن؟
کیمین اوره‌یینده،هانسی دیلده سن؟
هانسی ماهنی‌داسان؟ هانسی تئلده سن؟
من سنه حسرتم، من سنه آرزی
 یوخلوغون چئویریب ائدیب تامارزی
*
سنین اوره‌یینه سیغینمایان من
سئوگی ننی‌سینده اوونمایان من
سنین خاطیرینه توخونمایان من!
من سنه حسرتم،من سنه آرزی
یوخلوغون چئویریب ائدیب تامارزی
*
ایستیرم اؤزومو چایا تاپشیرام
گؤزلرین کئفله‌دی یاپیش آشیرام
سنه ساریلمیشام، سنده یاشیرام
من سنه حسرتم، من سنه آرزی
یوخلوغون چئویریب ائدیب تامارزی
*
عطرین اللریمدن، اوتاقدان گلیر
چیخیرام یولاغا، یولاغدان گلیر
ایپیمی قیردیغین پیچاغدان گلیر
من سنه حسرتم، من سنه آرزی
یوخلوغون چئویریب ائدیب تامارزی
*
آند اولسون سئوگیمیز پایا یالقیزام
سئوگی اوره‌یینده بیر اووج بوزام
داغلار اته‌یینده نانا - یارپیزام
من سنه حسرتم، من سنه آرزی
یوخلوغون چئویریب ائدیب تامارزی
*
دالغالار گؤزومده دالدالانیرلار
ساعاتلار گئت به گئت سنی دانیرلار
یامان داریخمامی یالان سانیرلار
من سنه حسرتم، من سنه آرزی
یوخلوغون چئویریب ائدیب تامارزی
*
آغلایا آغلایا قالمیشام یئنه
“سئوگی دب ‌دن دوشوب” دئییرلر منه
اؤزومو بیر قوجاق یئتیرسم سنه !!؟؟
من سنه حسرتم، من سنه آرزی
یوخلوغون چئویریب ائدیب تامارزی
*
اوره‌ییم دلینیب، داملاییر، دامیر
اؤزونده بیر داملا سئوگی ساخلامیر
قارییب یوخلوغون، کؤنلوم توختامیر
من سنه حسرتم، من سنه آرزی
یوخلوغون چئویریب ائدیب تامارزی
*

گتیر - عاشیق حسین فتحی ( آلوو )

گتیر
گئدیرسن آی قارتال منه بیر خبر
ناله لی داغلارین حالینان گتیر
یاسا باتدی تبریز باکی کلبجر
گنجه نین او قارا شالینان گتیر
*
ایشیقلی دونیادان کؤچدو قاطاری
یوللاندی سونومجو منزیله ساری
آندا ‌وئر تابتون آپارانلاری
قایتار زلیم خانی یولونان گتیر
*
بودور اعتباری هر عؤمرون سونو
یاندی ( آلوولونون ) ایمانی دینی
چاغیر مزاریندان دده بهمنی
یاپیش شجاعتین قولوندان گتیر
*

چوخالیر - یئتیم عئیواض

چوخالیر

باش آچمادیم بو دونیانین ایشیندن

خئیری آزالیب، شرّی چوخالیر
قیمت لیلر دوشورلر قیمتیندن
گؤن قیمته مینیر، دَری چوخالیر
* 
ائله بیل غم یاغیب قایایا - داغا
کؤنوللرحسرتدیر، ویصال تاپماغا
عالیم‏لر - عاقیللر گلمیر قاباغا
باشدان - خاراب آرتیب، دَلی چوخالیر
* 
انسانی یاشادار، دائیم آرزولار
آرزوسوز، حیاتین نه معناسی وار
گؤرموشوک خانیمین بیر اری اولار
بعضی خانیم‏لارین اری چوخالیر
* 
چوخلاری بو شعری چتین کی، قانا
قانان دا قورخورام چئویره، دانا
منیم یازیغیم گلیر آذربایجانا
قانینی سوووران زَلی چوخالیر 
هر شئی ین قیمتین اوستونه یازین
نه فرقی دمیرین، گوموشون، آلماسین
سندن سوروشسالار دئی کی، عئیواضین
قالا آلتیندا درد - سری چوخالیر
*

سئوگی – مهناز. ص ( آیتای )

سئوگی 
دامارلاریمدا دوروب بیر گلین‌جیغاز سئوگی
قانیملا آلدی سحر، جانلی دستماز سئوگی
باهار – باهار چیچگی باغلادی ‌باخیشلاریما
گوناهسیز آلنیما ووردو موهورلو یاز سئوگی
و باغلادی قارا گونده چیراق – چیراق سحری
بو‌ ارکؤیون کؤنوله ساخلادی تاراز ! سئوگی
گؤزللیک آختاریبان هر نه‌یی گؤزه‌ل گؤردوم
اوره‌کده بسله‌میشم تر- تمیز، بیاض سئوگی
اوشوتدو، سونرا آپاردی اؤزویله غم ائوینه
نه آغری‌لار ایچیمه کؤکله‌دی ناساز، سئوگی!
قیامت ائیله قوجاغیمدا دونیانی، هر گون
سال آرخایین‌لیق‌ایله قانلی جانماز، سئوگی!
اولوبدو باشیما افسر او «گوهر مقصود»
کی «آیتای»ین دیله‌یی اولماییب دایاز، سئوگی!
*

باغلاندی

شاعر: ملاپناه واقف

جمعی گؤزل لردن سنی باش بیلدیم
اوسببدن مئیلیم سنه باغلاندی
خیالیندان اوزه بیلمم خیالیم
دفعه لرله دونه - دونه باغلاندی
*
ازل کی تک مئیلین منه ندن یوخ؟
سان کی سونرادان بیر اویردن یوخ
خیلی واختی بیزه گلیب گئدن یوخ
آرالیغلار یامان یئنه باغلاندی
*
من واقیفم رخسارینی گورمورم
قان آغلارام دیدارینی گورمورم
بیزه دوغرو گوذارینی گورمورم
روزگاریم قارا گونه باغلاندی
*

ماکو - وفا آیرملو

شاعر: وفا آیرملو

منه هر گوشه ن اولوب خاطره لر دفتری ماکو
آنایوردوم وطنیم، آی دیلیمین ازبری ماکو
او کئچنلر کیمی ای کاش یئنه ه ممکن اولایدی
دولانایدیم یاریلان باغچاجوقی سنگری ماکو
اوجا داغلار کیمی باشون اوجادیر ائللر ایچینده
بسله قوینونودا بؤیوکطایفا آغیر ائللری ماکو
زنگیمارین ائله من سیز سنه شاققیلداسا خوش دور
ختن چوبان نئیلیه جکدیر ساراسیز سئللری ماکو
چمنین قیزلاری یثایدا ساری کؤینک بوروننده
آلاجاق داغی – داشی لاله لرین لشکری ماکو
*

گل شکلینی چکیم دنیا

شاعر: زلیم خان یعقوب
*

گل شکلینی چکیم دنیا:    
شکیل چکمک ایسته ییرم
گل شکلینی چکیم دنیا
رسام اولماق طبعیم گلیب
گل شکلینی چکیم دنیا
*
روحوم گزسین آهنگ ایله
الیم اویناسین رنگ ایله
چیرکین ایله قشنگ ایله
گل شکلینی چکیم دنیا
*
پنجره سن، باخان منم
سولاریندا آخان منم
رنگی رنگه یاخان منیم
گل شکلینی چکیم دنیا
*
گؤزونده کی نمی چکیم
قلبینده کی غمی چکیم
طوفان چکیم، گمی چکیم
گل شکلینی چکیم دنیا
*
جان ارییب تاختا قالیب
پاپاغا باخ، میخ دا قالیب
گؤنه باغ دابباخ دا قالیب
گل شکلینی چکیم دنیا
*
قوزقون کیمی لش آلانسان
یکی وئریب، شش آلانسان
بئش وئریب اون بئش الانسان
گل شکلینی چکیم دنیا
*
دهنه ن ایله، آرخین ایله
تئز – تئز دؤنن چرخین ایله
سئوگین ایله، قورخون ایله
گل شکلینی چکیم دنیا
*
وار اولانسان یوخ دئییلسن
آج اولانسان، توخ دئییلسن
دوزه له سی پوخ دئییلسن
گل شکلینی چکیم دنیا
*
ابلیس - ملک، حوری - قیلمان
یاری انسان، یاری حیوان
گاه کافیرسن، گاه مسلمان
گل شکلینی چکیم دنیا
*
بیرجه بنده سئویرمیسن
چوخ سرایلار دئویرمیسن
منی شکله چئویرمیسن
گل شکلینی چکیم دنیا
*
نامرد، یوخسا مرد گؤستریم؟
یومشاق، یوخسا سرت گؤستریم؟
اؤزون بویدا درد گؤستریم
گل شکلینی چکیم دنیا
*
سنین له اکه بیلمیرم
بیر کؤنول تیکه بیلمیرم
دردینی چکه بیلمیرم
گل شکلینی چکیم دنیا
*
ترجمه فارسی - بیا شکلت را بکشم دنیا
دلم نقاشی می خواهد
بیا شکلت را بکشم دنیا
طبع نقاشی ام گل کرد
بیا شکلت را بکشم دنیا
*
روحم بگردد با آهنگ
دستانم برقصد با رنگ
همراه با زشت و قشنگ
بیا شکلت را بکشم دنیا
*
پنجره ای و من تماشاگرت
جاری در آب هایت  
آمیخته رنگ هایت
بیا شکلت را بکشم دنیا
*
اشک چشمانت را بشکم
غم دلت را بکشم
طوفان و کشتی بکشم
بیا شکلت را بکشم دنیا
*
از جانم تخته استخوانی مانده
کلاه را ببین آویزان مانده
چرم را ببین خانه دباغ ماند
بیا شکلت را بکشم دنیا
*
همچون لاشخور، لاشه خورنده ای
یکی داده و شش گیرنده ای
پنج داده و پانزده گیرنده ای
بیا شکلت را بکشم دنیا
*
با چشمه و جویبارت
با چرخ گردنده ات
با عشق و هراس ات
بیا شکلت را بکشم دنیا
*
هستی و نیست نمی شوی
گرسنه ای و سیر نمی شوی
هرگز درست نمی شوی ( درست شدنی نیستی)
بیا شکلت را بکشم دنیا
*
ابلیس یا ملک، حوری یا قلمان
نیمی انسان، نیمی حیوان
گه کافر و گه مسلمان
بیا شکلت را بکشم دنیا
*
کسی را دوست نداری
چه کاخ ها که ویران نکردی
به هر شکلی در میاری
بیا شکلت را بکشم دنیا
*
نامرد، یا مرد نشانت دهم؟
نرم، یا سخت نشانت دهم؟
درد هم قدت نشان دهم
بیا شکلت را بکشم دنیا
*
با تو کاری نمی توانم بکنم
دل به تو نمی توانم ببندم
دردت را نمی توانم بکشم
بیا شکلت را بکشم دنیا
*

ظارافات گلمه سین سنه بو دنیا

شاعر: زلیم خان - یعقوب
ظارافات ائیله مه قربانین اولوم
بو دونیا ظارافات دنیاسی دئییل
قاریشقا یئریشی راحات یئریش دی
بو دنیا کؤهلن آت مئیدانی دئییل
*
اوینادیب چوخ شئیی اومار، اویناما
ائتسه ده روحونو خومار، اویناما
سن بو قماربازلا قمار اویناما
ظارافات گلمه سین سنه بو دنیا

*

چوخ یئرده قبرینی قازان اولاجاق
باشین قایناماقدان قازان اولاجاق
سانما یاشاماغین آسان اولاجاق
ظارافات گلمه سین سنه بو دنیا
*
غینتین قویوسو، حیله نین تورو
سنه دیری – دیری گؤسترر قورو
باشین وار، باشینی باش سیزدان قورو
ظارافات گلمه سین سنه بو دنیا
*

یوخسوللوق یوخسولون باغرینا اوخدو
معده سی توخلارین، مزه سی توخدو
فیل وار قاریشقاجا حرمتی یوخدو
ظارافات گلمه سین سنه بو دنیا
*
هله نئچه دفعه تویون اولاجاق
چوخ یئرده مکیرلی اویون اولاجاق
شیر، پلنگ چئوریلیب قویون اولاجاق
ظارافات گلمه سین سنه بو دنیا
*
عؤمرونو قار یئییب، قیش آپاراجاق
خیرمان دان دنینی قوش آپاراجاق
دنیادان الینی بوش آیاراجاق
ظارافات گلمه سین سنه بو دنیا
*
شئیطان دورا – دورا شئرلنر ده وه
قاطیر قویروغوندا هئرلنر ده وه
کین ایندن ییخیلار، تیرلنر ده وه
ظارافات گلمه سین سنه بو دنیا
*
موغامی آغلاماق، والی آغلاماق
والیندا قیریلمیش حالی آغلاماق
فیشدیریق چالماغین دالی آغلاماق
ظارافات گلمه سین سنه بو دنیا
*
یاسین یئددی سی وار، اوچو، قیرخی وار
قبیر یئرینین ده حاققی، نیرخی وار
اؤلومدن سونرا دا هله قورخو وار
ظارافات گلمه سین سنه بو دنیا
*
زلیم خان، حسرتین یئددی قات اولار
حیاتین قان دولو بیر حیات اولار
ظارافات ائیله سن شاهین مات اولار
ظارافات گلمه سین سنه بو دنیا
*

قرنفیل - خورشید بانو ناتوان

شاعر: خورشید بانو ناتوان

سنی کیمدیر سئون بیجا، قرنفیل؟
سنه من عاشقی – شیدا قرنفیل
سنی گلشن آرا آشفته گؤردوم
یقین بیلدیم توتوب سئودا قرنفیل
بئله پژمرده حالیله دوروبسان
دوشر گوللر آرا غوغا، قرنفیل
دریغا کیم وفاسیزدیر بو گلشن
گئدر بو طلعت زیبا قرنفیل
اوزوندن پرده ی نازین کنار ائت
اونوتما عاشیقی حاشا قرنفیل
*

نامرده دوو وئرمه - عاصم اردبیلی

شاعر: عاصم اردبیلی

الهی هر نه وئرسون مرده وئر نامرده دو وئرمه
وطنداش حقّینه بیگانه یه حق وتو وئرمه
جیلودار ائت بیزه دانانی دشمن اولسادا اولسون
آماندیر لطف قیل سؤز قانمیان دوستا جیلو وئرمه
کریم انسانه کرمان قالی سین وئر، فرش کاشان وئر
پخالت یورقانیندا یوخلایان شخصه پتو وئرمه
جناب قانمازا آت وئر، قاطیر وئر، مال داوار لطف ائت
پوزون آرتیرماقا وئر قرمیزی نیسان، پژو وئرمه
سیچان آرتماقدادیر آرتیر پیشیکلر نسلینی امّا
سیچاندان باشقا بو حیوان اوچون حقِّ میو وئرمه
قارینپا کیمسه نین شوربایه آرتیر رغبتین یارب
قوناقلیقدا عنایت قیل اونا میل چیلو وئرمه
دئینگن کیمسه نین شرّیندن ایمن قیل قولاخلاری
عمل سیز واعظین آلت انگینه بیر بئیله تو وئرمه
دئمم میز بازی میزدن آیری ساخلا دیغلاسین اؤلسون
دییم بو فرقه یه وئر سونده میز چسب اوهو وئرمه
او کس کی بورک سندن ایستیور باشلاره بورک قویسون
او شخصه باش وئریپسن عیبی یوخ امّا شاپو وئرمه
اوکی حیوان کیمین بیزلنمه سه مشکل یولا توشسون
بو حیوان خویلویا قیل مرحمت بیز وئر بیزو وئرمه
اوکی مال - حیوانی ایللر قویوپدور آرپایا حسرت
ائله مخلوقه یارب جو وئر امّا آبجو وئرمه
خدایا مین کتابلیق قافیه بذل ائت غزل بازه
قیزیل بازه قیزیل وئر قات - باقات پول وئر پیلو وئرمه
حکیما «عاصمین» اشعارینه بیر کسیه دوزگوندور
خطاسین بیر به بیر عفو ائیله ییب اغیاره لو وئرمه
*

دریا

شاعر: حمیده رئیس زاده

دریا باخیشلی گؤزلرینین ساحلینده‌یم
بیر کلمه‌یم اونوتما محبّت دیلینده‌یم
گئتسم ده قالمیشام، منی آختارسا گؤزلرین
باخما اوزاخ اورک یولونون محملینده‌یم
*

بایاتیلار - سربازلارین زبان حالی

عزیز داغلی آتا - آنالار آللاه ایگیت لریزه رحمت ائیله سین. باشی ساغ اولسون. آللاه سیزه صبر وئرسین.
*

پادگان دا نلر اولدو، سرباز
ارزون اوره یینده سولدو
لو خبری گتیردیلر، سرباز
آنان بیر گون ده سولدو
*
اوره ییمده یوخدو دؤزوم، سرباز
دیلیم ده قورودو سؤزوم
یوخلوغون ائویمی ییخدی، اوغول
اؤلونجه آغلییار گؤزوم
*
پادگان داغ اولئیدی، بالا
دؤوره سی داغ اولئیدی
سربازلار اؤلن چاغی ، بالا
آناسی باش اوسته اولئیدی
*
اوزاق یئرده سرباز اولدون
گل تکی آچیلمامیش سولدون
دئییردین آز قالیر گلم سرباز
دشمن لره نشان اولدون
*
منبع: اینستاگرام

قورخو - خلیل رضا

من شئعر یازماقدان قورخورام  بیر آز
قیزا ایلک عئشقینی آچانلار کیمی،
ائله بیل قیز ائوی جئهیز ایسته ییر
بوتون غئیرتیمی، جسارتیمی.
*
من یازی ماسامدان قورخورام بیر آز
جانیمدا، جیسمیمده او قووّه وارمی؟
بَبَک قیلینجینین تایی دئییلسه،
شئعرین بو دونیادا ایشه یارارمی؟
قلم داش سدلری پارچالایارمی؟
*
قلم گؤتورمکدن قورخورام بیر آز
جانیمدا، جیسمیمده او قووّه وارمی؟
*

الهی بئله ده گؤزل اولارمی – ممد ایلقار

شاعر:  ممد ایلقار

الهی بئله ده گؤزل اولارمی
کیمدی قلم چکن نه گؤزل چکیر
اوز- اوزه، گوز - گوزه سئحیرلنمیشیک
نه من گؤز چکیرم، نه گؤز ال چکیر
*
گون آی اوزلوم، گؤزل لیکده بیرجه سن
بو گول لوکده، بیر من اولوم بیر جه سن
گول اوستونده آری یا باخ بیرجه سن
گؤر گولون نازینی نه گؤزل چکیر
*
سالما محمّدی، گؤزوندن گؤزل
گؤزوم گؤزمو گؤروب، گؤزوندن گؤزل
من اؤلموش نئیییم گؤزوندن گؤزل
نه بیر کؤنول دویور، نه گؤز ال چکیر
*

یارادان یار اولسا اگر انسانا

شاعر: بهمن وطن اوغلو
یارادان یار اولسا اگر انسانا
ساغالار یارالار، یاد دان دا چیخار ( یاد دان دا چیخار: از خاطرهم فراموش می شود )
آتسالار آتشه ابراهیم کیمی
آلوودان دا چیخا، اود دان دا چیخار
*
عاقیل آتالاردان بیر مثل ده وار
قضا اوز وئرسه، قویماق دیش قیرار
اوز وئرمه سه گؤره رسن کی سنه یار
قوهومدان دا چیخار، یاد دان دا چیخار ( یاددان: از بیگانه هم)
*
دردی درد بیلمه زه دئمه آ بهمن
بئل باغلاما عاغلی کمه آ بهمن
مینت لی چؤره یی یئمه آ بهمن
لذّت ده چیخار، داد دان دا چیخار
*

یازیغیم گلیر - بهمن وطن اوغلو

شاعر: بهمن وطن اوغلو
عؤمور یوللاریندا آغاردی بیرچک
آی ائللر ، آتالار عالیم دی گئرچک 
جوت اولسا میلچك ده قالیب گله جک  
تک اولان آصلانا یازیغیم گلیر
*
خیلقتین سیررینی دویا بیلمیرم
هر سؤزو آشیكار دئیه بیلمیرم 
نییه سیزیلداییر، نییه بیلمیرم  
ناله لی كامانا یازیغیم گلیر
*
گؤزومدن یاش آخیر اوزومه دن - دن
آمان آی آیریلیق اولمویایدین سن
بیر اؤلوم یاخشیدی سئویلمه مكدن 
طالعسیز جاوانا یازیغیم گلیر
*
ایگید ار آدلانار غئیرت اولاندا
اوزده حیا اولار، عیصمت اولاندا  
دیل بیلمز نادانا قیسمت اولاندا  
اهلی - حال جانانا یازیغیم گلیر
* 
بیر آن چاتیلمازمی قاشی اووچونون 
آخمازمی گؤزوندن یاشی اووچونون  
ده ینده گوللسی ناشی اووچونون 
یارالی جئیرانا یازیغیم گلیر
*
دؤورون گردیشینه اویا بیلمه ییب  
قلبیندن غباری یویا بیلمه ییب 
عشقینی كیمسه یه دئیه بیلمه ییب 
گیزلیجه یانانا یازیغیم گلیر
* 
ظالیم زامان، كیمی ائتدی بختییار  
اوركلرده كدر، حسرت، اینتیظار  
آمان آللاه داغلار بویدا دردی وار 
بهمن تک اوزانا یازیغیم گلیر
*

جان اوغلوم

شاعر: محرّم آستارالی

جان جان جان اوغلوم
آنا سنه قربان اوغلوم
شیرین شکر یاراتمیش
سنی یارادان، اوغلوم
*
جان جان جان اوغلوم
آنا سنه قربان اوغلوم
نئجه گؤزل یاراتمیش
سنی یارادان، اوغلوم
*
دنیایا گلدیین گون
سئوینج گتیردین منه
نه یاخجی کی واریمسان
هدیّه اولدون منه
*
جان جان جان اوغلوم
آنا سنه قربان اوغلوم
شیرین شکر یاراتمیش
سنی یارادان، اوغلوم
*
جان جان جان اوغلوم
آنا سنه قربان اوغلوم
نئجه گؤزل یاراتمیش
سنی یارادان، اوغلوم
*
سن سیز اولماسین گونون
ان گؤزل دیله ییم سن
گؤزلریمین چیراغی
هر زامان گره ییم سن
*
جان جان جان اوغلوم
آنا سنه قربان اوغلوم
شیرین شکر یاراتمیش
سنی یارادان، اوغلوم
*
جان جان جان اوغلوم
آنا سنه قربان اوغلوم
نئجه گؤزل یاراتمیش
سنی یارادان، اوغلوم
*
آنا دئین دیلینه
قربان اولوم آی اوغلوم
من سنین هر دردینه
درمان اولوم آی اوغلوم
*
جان جان جان اوغلوم
آنا سنه قربان اوغلوم
شیرین شکر یاراتمیش
سنی یارادان، اوغلوم
*
جان جان جان اوغلوم
آنا سنه قربان اوغلوم
نئجه گؤزل یاراتمیش
سنی یارادان، اوغلوم
*

دره لر

شاعر: نبی ثابت اوغلو

چینارلار قطار – قطار
قالخیب زیروه یه قاچار
داغا قیسیلیب یاتار

میشیل – میشیل دره لر
یاشیل – یاشیل دره لر
*
سیزلره وورغونام من
بئزه نیرسیز شفق دن
گونش چیخار افق دن
اووج – اووج زر اَلَر
دره لر دره لر دره لر
اووج – اووج زر اَلَر
*
قوش کیمی اوستونوزده
قاناد چالیم دره لر
شام لیقدا بیر آخشاملیق
قوناق قالیم دره لر
*

خسته یم

شاعر: وصال ابراهیم اف

یاندی باغریم کؤمور کیمی
بیر وفاسیز عؤمور کیمی
سن ده بیر گون گئده جکسن
عشق ندیر وفا ندیر
سئوگی ده جفا ندیر
اول آخیر بیله جکسن
سن ده بیر گون گئده جکسن
آیریلاجاغینی بیله بیله
ساده جه سئویرم ائله بئله
سنه وورغون سنه خسته یم
منیم محبت دیر آدیم
عشقیمی دویونجا دادیم
غملی ماهنی لارا بسته یم
داغ چکسن ده کوره ییمه
امضانی آت اوره ییمه
سن نن منه امانت اولسون
عشق ندیر وفا ندیر
سئوگی ده جفا ندیر
اول آخیر بیله جکسن
سن ده بیر گون گئده جکسن
آیریلاجاغینی بیله بیله
ساده جه سئویرم ائله بئله
سنه وورغون سنه خسته یم
*

کیشی - نصیر پایه گذار

یا کیشی اول، یا ناکیشی  
لازیم دیر کی، یانا کیشی  
اؤزون چکمز، یانا کیشی  
اصیل کیشی،  دئمز منم  
اوکی منم دئمز،  منم  
*
 

نصیر پایگذار

من سنی اؤزومه گونو گؤرورم

گنوده من سنه گونو گؤرورم

سن سن منیم گونوم آییم اولدوزوم

عؤمرومده گون تک بو گونو گؤرورم

دیلده - شاعر: حمیده رئیس زاده

دیلده دوگونله‌نیب سؤزوم، دای دئمیرم غم آچدیرا
باغلی قالان سئویم یولون درد اولا همدم آچدیرا
ساتمادا قالمیشام هله، عالمی آرپا بوغدایا
بلکه بو آل - ‌وئرین یولون حضرت آدم آچدیرا
*

جانیم نه قدیر وار منه جانان سن اولارسان

خاقانی شروانی

جانیم نه قدیر وار منه جانان سن اولارسان
جان دان دا عزیز اولسا بیری جان سن اولارسان
سن ایندیه دک قلبیم اوچون قلبدین ای یار
بوندان دا سورا جانیم اوچون جان سن اولارسان
هر یارام اگر اولسا اونون درمانی سن سن
هر دردیم اولارسا اونا درمان سن اولارسان
کؤنلونده نئجه ایسترسه ائله وئر منه فرمان
عمروم نه قدر وار منه سلطان سن اولارسان
بوندان بئله آلداتما منی کفر ایله دیل ایله
خاقانی یه هم کفر هم ایمان سن اولارسان
خاقانی دئییر گلسن اگر ای گل شهلا
البته کی خاقانی یه خاقان سن اولارسان
*

بیر سلاما دیمه دی - بختیار وهابزاده

بیر سلاما دیمه دی( بختیار وهابزاده)
او گون من سنی گؤردوم
سلام وئرمک ایسته دیم
اوزونو یانا توتدون
اوزونو یانا توتدون
*
سؤیله ایللردن بری
قلبیمیزین بیر ووروب
بیر دویدوغو ایللری
آخی، نه تئز اونوتدون؟
*
قوپ ای توفان، اس ای یئل
خزل اولوم تؤکولوم
نئچه واخت دیر ایلده، بسله دییم محبت
بیر سلاما دیمه دی
*
شیرین گولوشلریمیز، آجی فغانلاریمیز
بیر سلاما دیمه دی
گئتدین دالینجا باخدیم
جان آیریلدی جانیمدان
سن نئجه اعتناسیز
اؤته بیلدین یانیمدان؟
*
قوپ ای توفان، اس ای یئل
خزل اولوم تؤکولوم
نئچه واخت دیر ایلده، بسله دییم محبت
بیر سلاما دیمه دی
*
سن منه ظلم ائیله دین
منه ظولوم یاراشیر
بیر سلاما دیمه ین
عشقه اؤلوم یاراشیر
*

سنی مبتلا اولان آختاریر - حمیده رئیس زاده

سنی مبتلا اولان آختاریر، نه دئییم دوا دئمه‌ييم سنه
سنی باغرینا دالان آختاریر، نه دن آشنا دئمه‌ییم سنه
نفس آختاریر سنی دم‌به‌دم، بو چالیشمادا باش اولور قدم
دئمه‌سن یولو نه سایاق گئده‌م، دئمه بی‌وفا دئمه‌ییم سنه
دئدیلر بلیٰ دئمیشم ازل، اونودارکن اولدی یازیم خزل
نه ائدیم هارایلا غزل-غزل، ینی دن بلیٰ دئمه‌ییم سنه
سنه یول تاپان چکیلیر دارا، یئتیشیر یولوم او بوروقلارا
قاریشیر جانیم دورولوقلارا، نه سایاق صفا دئمه‌ییم سنه
اؤزومو زمانلارا حاخلاديم. اورک اؤلکه سین سنه ساخلادیم
سحری، گونشله آداخلاديم، نیه مدّعیٰ دئمه‌ییم سنه

دولانسین - علی آقا واحد

زولفونده نه لازیم گؤزلیم شانه دولانسین

قویما او حرمخانه یه بیگانه دولانسین
عیب ائیله مه کویوندا دولانسام گئجه – گوندوز
شمعین گرک اطرافینه پروانه دولانسن
ساقی دولانیم باشینا می جامینی گزدیر
سرمست اولوم باشیما پروانه دولانسین
اول زولفه کؤنول وئرمه دئییرلر منه، ال چک
اونسوز نئجه بس بو دل دیوانه دولانسین؟
*

نوحه ای از شباهنگ

شاعر: عبدالرحیم شباهنگ تخلص هندی
( تولد سال 1250 در تبریز – درگذشت سال 1346 در تهران ) شاعر و مرثیه سرای ترکی و نماینده مجلس شورای ملی بود.

آخرین دیداری چوخ گؤزلر بو قولسوز باش حسین
گل جمالون گؤرمه سم جان وئرمرم قارداش حسین
رشده یتدیم آستانونده چوخ اولدی زحمتیم
سایه ی لطفونده مشهور اولدی نام و شهرتیم
قابل بذل توجّه اولسا بو گون خدمتیم
تاج عزّت قویدوقون بیر باشه گل چک باش حسین
*
پرورش وئردون ، منه تعلیم اخلاق ائیله دون
نقص خدمت گؤردون امّا عفو و ایرفاق ائیله دون
کربلا حقّینده مندن اخذ میثاق ائیله دون
شکر للَّه باشیم اولدی باشیوه شاباش حسین
*
حقّ تعلیمون بیوکدور من ثنادن عاجزم
شاکرم دیلدن، ولی ذکر ادادن عاجزم
باش سینوب قولّار دوشوبدور دست و پادن عاجزم
سن اوزون لطفیله گل بالینیمه قارداش حسین
*
مدّت عؤمرونده بی مهر اولمادون بیر آن منه
هر نفسده ائیله دون مین نوعیله احسان منه
ای کلام ا... ناطق گل اوخی قرآن منه
خجلت دیرینیمه نطقون اولا پاداش حسین
*
حسن طالعدن قازاندیم چون شهادت قرعه سین
شوقیله جنگ ائیله دیم آلدیم فراتین شرعه سین
لبلرون یادیله امّا ایچمه دیم بیر جرعه سین
سیریده همرنگ اولور چون یاریله یولداش حسین
*
وارد اولجاق نهره طرد ائتدیم گروه ناکسی
دولماسون مشکه کنار ائتدیم سودان خار و خسی
بیر اوزون طومار غم آچدی سویون دلکش سسی
وای اگر بیر گون او احساساتیم اولسا فاش حسین
*
مشکی حفظ ائتمک اومیدی وئردی قوّت هوشیمه
دولدوروب محکم ائدوب آهسته سالدیم دوشیمه
گه اؤپردیم گه چکردیم جان کیمی آغوشیمه
قهر اولا اوخ نقشینی ترسیم ایدن نقّاش حسین
*
هر ایکی قولّاریمی بو مشکه ائتمیشدیم سپر
اوه گؤزیمدن قولّاریمدان ائیله دیم صرف نظر
مشکی دلدی، سو تؤکولدی، سعییم اولدی بی ثمر
سو یئرینه مشکیمه قان دولدی باشا باش حسین
*
گرچی یارم چوخدی، سانما من او چوخدان آغلارام
اوخ دلن مشکیمده سو یوخدور او یوخدان آغلارام
جان یاخان قان - قان دین پرّآن بیر اوخدان آغلارام
سانجیلئیدی قلبیمه بو اوخ منیم ایکاش حسین
*
سن اؤزون یاخشی بولورسن ای شه گردون حشم
اولماسا قول پرچم آچماز اهتزاز ائتمز علم
سرنگون اولدی علم چون قولّاریم اولدی قلم
بیرقیم گؤز - گؤز اولوب گؤزدن ؤوکر قان یاش حسین
*
قولّاریم دوشدی بدندن شهپر عنقا کیمی
هر بیری بیر چشمه سار اولدی جوشان دریا کیمی
بسکه قان آخدی بو چؤلده مشهر مینا کیمی
گون قاباقیندا یانان داشلاردا اولدی یاش حسین
*
گل گلنده دقّتیله باخ سران لشکره
باشیم اطرافینده واردور گؤر نه خوش بیر منظره
یوز قویوب اون یئتدی خنجر بیر یارالی حنجره
من کی باشدان گئچمیشم لازیم دگل پرخاش حسین
*
گل یول آختارسان یول اوستونده دوشن قول گؤسترور
مشعل آهیم عزیز مهمانینا یول گؤسترور
عاقبت حسّ اخوّت یول امین اول گؤسترور
همره اهل کرمدور دست گوهرپاش حسین
*
ناتوانم سون نفسده ظلّ رافت ایسترم
ذرّه ی بی قدرم امّا قرب عزّت ایسترم
لطف صحبت گرمی بزم محبّت ایسترم
فیض آلور خورشید عالم تابیدن خشخاش حسین
*
من کی قوملار اوسته یالقوز دوشموشم چوخ بی کسم
بیمناک اولمام ولو امّیدیمی جاندان کسم
تک سنون انجام کاروندن اخا دل واپسم
قورخورام محشر قوپا، نابود اولا داغ داش حسین
*
من شباهنگم اگر ظاهرده گل تک سولموشام
باطناً حبّ حسین ایله لبالب دولموشام
افتخاریم وار سعادت یار اولوبدور اولموشام
پاسگاه عشقیده سرباز حاضرباش حسین
*

نوحه - خورشید بانو ناتوان

زبان حال حضرت مسلم ابن عقیل (علیه السلام)
شاعر: خورشید بانو ناتوان

سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
سؤیله گینن گتیرمه سین کوفه یه نازلی اکبری
ظلم ایله قانینا باتار طرۀ مشک عنبری
سویله گتیرمه قاسمی قاتیلی ائیلییر شتاب
گلسه اولوریقین اونون قانیله اللری خضاب
گؤزلویوری که شمردون دین ائوین ایلسین خراب
رحم ائلسین او زینب بخت قرایه گلمسون
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
گلمه یه یوخدی فرصتیم قانیله نامه یازمیشام
گلسن اگرتوکر قانین ظلمیله فرقه ظلام
قارداشوین اوزون قولو گؤرمه روا اولا قلم
باجیلارین باش آچماسین دشت بلایه گلمسین
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
یئتسه اگرخبرسنه اؤلدی بو مسلم عقیل
ابن زیاد نعشیمی گرچه ائدیبدی چوخ ذلیل
غسل و حنوط اولمادی اولدی قناره ده قتیل
ایستمورم عیالیمی قویما عزایه گلمسون
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
باد خزان اسرسنون غنچه صفت عیالیوه
رحم ائله ای آقا بوگون قاسم خوش مقالیوه
جانی تصدق ائیله دیم اکبریمه جمالیوه
صاق اولا رهبریم حسین عمری فنایه گلمسون
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
فاطمه اوغلونا صبا گئت بئله ائیله شرح حال
کوفیه گلمه کوففه نین شهرین آلیب غم و ملال
بیرده عم اوغلوما دئنه تا منی ائیلسین حلال
مسلیمی اؤلدوروله اول داد و فغانه گلمسین
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
حسرتم اول جماله من آه چکرم بو سینه دن
کوفه ده واردی قاتلین گلمه آقا مدینه دن
قویما بالام خدیجه نی آیرلا اول سکینه دن
باشینه ال چک آغلییب شورو نوایه گلمسین
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
دارالعماردن چیخیب عرشه فغان و شیونیم
بیلمدیم هیچ نه نحویله دوندی خزانه گلشنیم
باشینا نه گلیب قالیب هاردا ایکی بالام منیم
باشی اولارتک هیچ کیمون درد و بلایه گلمسین
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
سؤیله اونون آناسینا باشینا قاره باغلاسین
ایکی بالادن آیریلیب آهی جهانی داغلاسین
توتسا عزا خدیجه ده سؤیله که گزلین آغلاسین
غم توزی تا عذار اول ماه لقایه گلمسین
سؤیله حسینه ای صبا کربوبلایه گلمسین
گلسه دوشر بو شهرده درد و بلایه گلمسین
فاطمه نین کنیز بو قصه نی ائیله سن تمام
بیر بیره دگدی مرد و زن شوره گلیبدی خاص و عام
نوحه ائدیربو(ناتوان)روزو شب آغلیور مدام
تاپماسا بیردرِنجات داربقایه گلمسون
خورشید بانو متخلص به ناتوان قفقازی