قار - ائلدار ماکو

نه یاغیرسان حزین - حزین آغارمیان ساچلاریما

شیغاییرسان دال با دالا کیپریگیمه قاشلاریما

گونوم چیخار توشلویارسان منیم ده قارغیشلاریما

یاغیرسان یاغ ،اسیرسن اس ،هله دوران سنین کی دی

آسیرسان آس ،کسیرسن کس ،هله دوران سنین کی دی

*

نه بیلیرسن بو حایات دا تاپدالانیب ازیلن وار

سوروم - سوروم سورونن وار آرالیقدا بوزولن وار

اؤولن کیمدی قالان کیمدی الی یاردان اوزولن وار

سپه لیرسن ساغا - سولا ایتیریرسن ایزی میزی

بو سویوقدا سیلله وروب قیزاردیرسان اوزوموزو

*

او گوندن کی آغ دونویون گئیدیریب سن بیزیم یوردا

اوندان بری فرصت دوشوب چولده گزن قوجا قوردا

قاچان قاچیر قالان قالیر دالدالانیر اوردا بوردا

صبیر، طاقت ، قالمییب دی منده اوزه دایانمیشام

بیر عوموردو مین بیر درده دؤزه - دؤزه دایانمیشام

*

داغ دؤشونده ده لی جئیران آیاقلانیب قاچا بیلمیر

کؤرپه قوزو قوجا قویون قیریشیغین آچا بیلمیر

سیلدیریملی قایالاردان قوجا قارتال اوچا بیلمیر

ائله سی واردی خسته دی ائله سی وار یارالی دی

بو سویوقا دؤزه بیلمیر یوواسیندان آرالی دی

*

نفس سالیب دونداریرسان بولاغلارین گؤزه سینی

گیزله دیرسن ایچه ریده قیز گلینین کوزه سینی

قوجالارا گؤستریرسن سویوقویون مزه سینی

قاپی لارا قیفیل ووروب ایچه ریدن باغلییرسان

یوخسوللارا داغ چکیرسن اوره کلری داغلییرسان

*

یاخامیزی تانیالی بیزی دارا قیصدیریب سان

او هئیبتلی های کوی سالان آخار چایی سوسدوروب سان

قیزیل تئللی گونشی ده هله بیزدن کوسدوروب سن

یورقون - یورقون باخان آی دا آچا بیلمیر هاله سینی

یئل اسدیکجه ائشیدیرم طبیعتین ناله سینی

*

اتکلرده چن دومانین اوزانیب دی هاردان - هارا

کولک قالخیرکوپباسینی سالیر گئنه دام - دووارا

من ده باش آلمیش گئدیرم هله قاری یارا - یارا

هی دئییره م اؤز - اؤزومه قارا گونون عؤمرو آزدی

نه قده ر یاغاجاق یاغسین قیشین سونو گئنه یازدی

*

قاباقدادی یاز گلنده اوندا قاتاجاق باشیین

آخیداجاق تپه لردن دره لره گؤز یاشیین

گونش اوندا تؤکه جکدی هر طرفه ایچ داشیین

یادیوا سال اوندادی کی ائل دوداقی گوله جکدی

اوجا داغلار اته گینده گول دوداقی گوله جکدی

*

 دنیا بئله قالان دئییل یاز گله جک یای گله جک

طبیعته گلین کیمی گول چیچکدن پای گله جک

اینانمیرسان بئش اون گونو تر- تله سیک سای ، گله جک

حسرتیله گؤزله ییرم گؤز یول دادی قولاق سس ده

قسمت اولسا گؤرمه لی ییک دورنالاری دسته - دسته

*

قار اؤلکه ده  برکتدی اومود  وئریر  یازا - یایا

اوجا داغلار یاتاغیندان آخیر گئدیر قوروچایا

بئله لیکله  اکینچی نین زحمت پایی گئتمیر زایا

(ائلدارین دا) اوزو  گولور بئله ثروت وار الیندن

طبیعته  حیات وئرن  بو شاختالی  قار  الیندن

* 

مهدی همت زاده - ائلدار ماکو

*

درنالار - مهدی همت زاده

دوزولون دال – دالا سیز قاتار قاتار

گویلرده ایز سالین ، ایز ، قاتار قاتار

قوشولاق  سیزلره  بیز   قاتار قاتار

سس سالاق بیرلیکده چؤله دورنالار

آماندی   قاییدین   ائله    دورنالار

*

غفلت  یوخوسوندا یاتانلار واردی

یوردونو  گوزوندن آتانلار واردی

غیرتینی اوجوز  ساتانلار واردی

گرک کی اولمویا بئله  دورنالار

آماندی  قاییدین  ائله   دورنالار

*

کیمی شاهلار کیمی تاج آلدی گئتدی

کیمی باج وئرمه دی باج آلدی گئتدی

حییف خان چوبانا  قوجالدی  گئتدی

سارانی تاپشیردی  سئله  دورنالار

آماندی  قاییدین   ائله    دورنالار

*

اولکه ده آز دئییل کؤچری قوشلار

قاناد چالیب اوچان یووانی بوشلار

کوک سالار یوردوندا قانلی بایقوشلار

بولبول حسرت قالار گوله دورنالار

آماندی   قاییدین   ائله    دورنالار

*

کروان کروان اوچون ائل سیزینکی دی

چمن سیزینکی دی  چؤل سیزینکی دی

ائلی بیرلَشدیرَن  یول   سیزینکی دی

یاد ایستیر بو ایزی  سیله   دورنالار

آماندی   قاییدین   ائله    دورنالار

*

اووچولار  یوللاردا کمین  وورسادا

جوللر  قوروسادا  سولار  دورسادا

گویده  قارا  بولوت  چادر  قورسادا

غم  توزو  قوندورما  تئله  دورنالار

آماندی   قاییدین    ائله    دورنالار

*

ظفر سیزینکی دی یوللاری یورون

چالیشین تیکانلی کوللاری  یورون

سیزی  داشا توتان قوللاری یورون

دوشمه یین نفسدن  هله  دورنالار

آماندی  قاییدین   ائله   دورنالار

*

اژدها   اولوپدو  دونَنکی   ایلان

اینانما  سوزلری  یالاندی  یالان

محو اولسون آرایا  آیریلیق سالان

او ایستیر سیزلری بؤله  دورنالار

آماندی   قاییدین   ائله   دورنالار

*

بو کروان دال ـ دالا  دؤزؤلمه لیدی

ایپ  اینجه لن  یئردن اؤزؤلمه لیدی

ایاق   آلتدا    قالیب    ازیلمه لیدی

سالخیمدان آیریلان  گیله  دورنالار

آماندی   قاییدین    ائله   دورنالار

*

بیر یئره ییغیشین بیرلیک یارادین

بیرلیکدن  یارانان  لذّتی   دادین

قایالار آغنادین  داغی  اوینادین

بم سسلری قاتین زیله  دورنالار

آماندی  قاییدین   ائله   دورنالار

*

سنده کی گؤزللیک سنده  کی  وقار

یاشی چن دومانلی  داغلاردا  اولار

آتالار  سوزودور   ائتمه   اعتبار

اؤروشون  بیلمه ین  یئله  دورنالار

آماندی   قاییدین    ائله   دورنالار

*

یارین بولوتلاری   آشین   داغلاری

سیزی  قورخوتماسین داغلارین قاری

اونوتموش اولسازدا بیزیم  ائلداری

قورمایین   یولونا    تله   دورنالار

آماندی   قاییدین   ائله    دورنالار

*

شاعر : مهدی همت زاده - ائلدار ماکو

*

سنده دی - مهدی همت زاده ( ائلدار ) ماکو

ای منیم اودلار دیاریم شانلی آذربایجانیم

شهرتیم دنیاده سن سن اعتباریم سنده دی

شبهه سیزسنلن اوجالمیش باکریم ستارخانیم

گوجلو قووتلی ائلیم، شاُنیم وقاریم  سنده دی

*

دامنینده مرد ایگیت لر قهرمانلار بسله دین

چوخ وطن پرور دلاور پهلوانلار بسله دین

اقتدارلی آدلی سانلی حکمران لار بسله دین

کونلومون سلطانی سن سن اقتداریم سنده دی

*

آیریلار سا بند بندیم دن یاریمدان دونمه رم

آذرستان توپراقین دان اوز واریمدان دونمه رم

تورکه خدمت دیر وظیفم ایلقاریمدان دونمه رم

ای آنام تک دوغما یوردوم افتخاریم سنده دی

*

دنیادان ارزشلی دی یوردوم یووام اوز توپراقیم

قوی دمادم دالغالانسین توپراقیم دا بایراقیم

فیکر ذکریم دن بیرآن اولماز منیم سن سیز چاغیم

وارلیقیم سان عزتیم سن هر نه واریم سن ده دی

* 

شعرده خاقانی تک وار معتبر بیر شاعرین

هم نظامیله فضولین ، معجزایله صابرین

واحدین ، خورشید بانو ناتوانین ، ساحرین

شهرتی دنیانی توتموش شهریاریم سن ده دی

*

کیمیادیرتوپراقین زنگین اثرلر کانی سان  

موسیقی دن ذوق آلان انسان لارین جانانی سان

(ائلدارین) دا شاه بیت شعری نین عنوانی سان

دلبرسیمین عذاریم نازلی یاریم سن ده دی 

*

آخشاملار - مهدی همت زاده ( ائلدار ) ماکو

ائله کی آی بولودا دالدالانیر آخشاملار

عشق پیمانه سی الدن،جالانیر آخشاملار

هرقارانلیق گئجه نین یاددا قالان لحظه لری

بیر اوموتلو سحره ،آرخالانیر آخشاملار

خیالین چرچیوه سینده یارانیر خاطیره لر

نه سبب دیر گؤره سن تاپدالانیر آخشاملار

آچیرام گوشه ی خلوتده کؤنول دفترینی

داغ کیمی سینه مه غملر قالانیر آخشاملار

دوزورم صبح آچیلاندان گونشین باتماسینا

خیالیم یار هاواسیندا دولانیر، آخشاملار

سنی اغیارایله بیرلیکده دوشوندو کجه منیم

اوره گیم قانه دونور پارچالانیر آخشاملار

قارا تئللرده کی یارین اوزونه کؤلگه سالیر

(ائلدارین) وار یوخو بیردن تالانیرآخشاملار

*                                                                          

بیرلیکده - مهدی همت زاده ( ائلدار ) ماکو

میخانه دن آیریلدیق اول یاریله بیرلیکده

پیمانه نی سیندیردیق دیلداریله بیرلیکده

پوچ بیرهوس اوستونده بیروارلیقی یوخ سایدیق

اسراره قلم چکدیک ایلقاریله بیرلیکده

سوز صحبت اولوب ایندی گئچمیشده قالان گونلر

آنجاق یاشیرام منده اسراریله بیرلیکده

بیل کی بئله سوداده عشق اولسا زیانیمدی

هر یئرده کی یار اولسا اغیاریله بیرلیکده

قالدیم بو معمّاده یارب بو نئجه سئردی

بیر عومره گره ک دوزسون گل خاریله بیرلیکده

تافایده سیزگوردوم اول نسخه دن ال چکدیم

بیلدیم کی طبیب ئولدو بیماریله بیرلیکده

عشقین حرمین گزدیک بیر یئرده خطا ائتدیک

دفن ایله دیک( ائلداری) اشعاریله بیرلیکده

                          مهدی همت زاده (ائلدار) - ماکو

ای یار - مهدی همت زاده ( ائلدار ) ماکو

ياز گلدي گؤزل يوردوما داغلاردا ارير قار

بايرام نفسي ائتدي ياتان غنچه‏ ني بيدار

 بولبوللر اوخور تازه‏ لنير وعده‏ ي ديدار

باخ گؤر نه گؤزل پرده چكيب كؤوشنه گولزار

 گؤيلرده گزركن اولورام يئرده گرفتار

بير گوللو باهاردا سني من سئوميشم اي يار

*

 بیر عمر سنين حسرت هجرانيوه دؤزدوم

سينديرديغين اوْل عهد ايله پيمانيوه دؤزدوم

 بيهوده يئره بير قورو عنوانيوه دؤزدوم

حوسنون ساياراق عيبيوه نقصانيوه دؤزدوم

 اولدوم گئنه هر جؤوريوه شوق ايله خريدار

بير گوللو باهاردا سني من سئوميشم اي يار

 *

 عاشق اولانين بلكه حياتي هدر ايميش

سئودا چكنين هر گونو محنت كدر ايميش

 مجنون او سببدن بير عؤمور دربه‏ در ايميش

شايد بو دا تقدير قضا و قدر ايميش

 گولشنده آچان گوللره همدم يارانيب خار

بير گوللو باهاردا سني من سئوميشم اي يار

 *

 كوسمك گؤزليم سن كيمي جانانه ياراشماز

غم شانه‏ سي، گيسوي پريشانه ياراشماز

 تدبير خطا، يوسف كنعانه ياراشماز

باور ائله، هر كنج لبه، دانه ياراشماز

 ايسترسن اينانما سؤزومه، ائتگيلن انكار

بير گوللو باهاردا سني من سئوميشم اي يار

 *

 كون ايله مكاني يارادان خاليق عالم

كامل ياراديب سنده كمالاتي مسلّم

 تدبير سنيندير هله ده اؤل دئسن اؤللم

انصاف ائله باري بو قدر ائيله ‏مه چم-خم

 ال چك بو ادادن گؤزليم، اولما دل‏ آزار

بير گوللو باهاردا سني من سئوميشم اي يار

*

 گر اولمايا عشقين آدينا دهرده بير زاد

نه مجنون اولاردي نده شيرين‏ ايله فرهاد

 گل ائيله‏ گيلن محبس غمدن مني آزاد

عارفسن اگر ايسته‏ مه اغياردن امداد

 اغيار اولا بيلمز بئله بير عشقه سزاوار

بير گوللو باهاردا سني من سئوميشم اي يار

*

 بيچاره كؤنول صبر ائله چوخ اولما گئيلئي لي

عشق اولماسا بولبوللرين اولماز گوله مئيلي

 افسانه ده اولسا هله ده ليلي‏ دي، ليلي

سالدي هوس عشقه بيزيم (ائلداري) خيلي

 بو سنده اولان ناز، ادا ايله بو رفتار

بير گوللو باهاردا سني من سئوميشم اي يار

*

قالدیم - مهدی همت زاده (ائلدار) ماکو

گئنه ویرانه کٌنجین دا ، سه تاریم قالدی من قالدیم

کتابیم ، دفتریم ، شعریم، شعاریم قالدی من قالدیم

نه یار قالدی ،  نه بیر یولداش ، نه گوز یاشیم سیلن بیرکس

تحسّرله گئچن لیل و نهاریم قالدی من قالدیم

جوانلیق دا اوشاقلیق تک ، اَسَن بیر یئل کیمی گئچدی

آغارمیش ساچلاریم سولموش ، عذاریم قالدی من قالدیم

خزان قهریله سولموش بیرگولم ، کیم قالمییب چاره م

سارالمیش گولشنیم ، باغیم ، باهاریم  قالدی من قالدیم

منیم یاتمیش قارا بختیم ، منه یار اولمادی بیر گون

گئجه تا صبح اولونجا آه و زاریم قالدی ، من قالدیم

بیر عشق اوغروندا من گئچدیم غروروم اعتباریم دان

سینیق کؤنلوم پوزولموش اعتباریم قالدی ، من قالدیم

بلاکش (ائلدارام ) آنجاق، بلاچکدیم بو عالمده    

اوره ک قانیله دولموش روزگاریم قالدی من قالدیم 

* 

ائدیب سن کونلومو ویران

منیم ای نازنین یاریم ، ائدیب سن کونلومو ویران
چخیب سان ابر ظلمت دن اولوبسان آی کیمی تابان
سنین زولف سیاهین تک ، پریشان اولمویان بیلمز
بو عالم ده ندیر محنت ، ندیر حسرت ، ندیر هیجران
ملک سن ، حوری سن ، بیلمم ، سراسر راز خلقت سن
بشر شیکلینده خلق ائتمیش سنی اول قادری سبحان
او رعنا قامتین عیشوه ن قیامت دیر دئسَم آزدیر
جلالین شوکتین گورجَک اولور عالم سنه حیران
سنه مجنون اولان گوندن اسیری دردی هیجرانم
انیسیم خاطراتین دیر نصیبیم دیده یی گریان
منه طعن ائتمه سین کیمسه بو قانونی طبیعت دیر
نه عاشق لر بو سوداده گئچیب جاندان وئریب دیر جان
عمل لر ، وعده لر ، سوزلر ، دوز اولسایدی یقین بیل کی
سنین عشقین دن (ائلدار) دا ، تاپاردی دردینه درمان

*
مهدی همت زاده (ائلدار ) – ماکو

بیزی - مهدی همت زاده

ای فلک ائیله دین آخیردا گرفتار بیزی
گورمه دین بلکه ده بو عشقه سزاوار بیزی
جان دئییب باغریمیزا باسدیقیمیز انسانلار
یاری یولدا بوراخیب ایله دیلر خوار بیزی
ایسته دیک عشقیمیزی عالمه اظهار ائلییَک
یار یمیز یولداشیمیز ،ساندیلار اغیار بیزی
هانی گئچمیشده قالان خاطیره لی گونلریمیز
مست ائدیردی گئجه نی صبحه قده ر تار بیزی
دوغمالار یاد کیمی باخدی بیزیم احوالیمیزه
ائت دیلر، محنت هیجرانیله بیمار بیزی
گئجه اولدوزلاریلان راز و نیاز ائتمه گیمیز
بیلمه دیک کیم ائده جک درده گرفتار بیزی
(ائلداری ) اولمادی بیر کیمسه اویاتسین یوخودان
دئمیرَم بلکه اجل ائیلییه بیدار بیزی
*
مهدی همت زاده ( ائلدار ) – ماکو

گورموشم - مهدی همت زاده (ائلدار ) ماکو

من کونول آیینه سینده، مه لقالر گورموشم
عالمی حیران ائدن لر ، دلربالر گورموشم
عشق زنجیرینده بند اولموش ده لی دیوانه لر
محنت هیجره، اوره کدن مبتلالر گورموشم
عالم عشق ایچره سیز مجنونی یالقوز سانمایین
من بو مکتب ساحه سینده جان فدالر گورموشم
ذرّه خوشلوق گورمویَن بو گردش ایّام دن
آتش عشقیله یانمیش ، بینوالر گورموشم
عاشیقه جور ایله مک عادت اولوپدور دهرده
اول سبب دن، مه لقالردن جفالر گورموشم
(ائلدارام) غملر دیاریندا غریب بیر شاعرم
چون محبت اومدوغوم یئردن بلالر گورموشم
*
مهدی همت زاده (ائلدار ) ماکو