بئزه ک

بنزه‌ک/ سوسن نواده‌رضی- حمیدی علیار

علی‌آقا واحد
سئوگیلیم، عشق اولماسا، وارلیق بوتون افسانه‌دیر
عشقدن محروم اولان، انسانلیغا بیگانه‌دیر
*
سوسن رضی
سئوگی انسان روحونون کامیل‌لییه امکانی‌دیر
سئوگی‌سیز آباد اولان کون و مکان ویرانه‌دیر
انسانین اولقونلوغا سئیری کئچیرمیش شبهه‌دن
شبهه عشقه یول آچار، عشقین یولو ایمانه‌دیر
*
علی‌آقا واحد
سئوگی‌دیر، یالنیز محبت‌دیر حیاتین جوهری
بیر کؤنول کی عشق ذوقین دویماسا، غمخانه‌دیر
*
سوسن
جؤوهر-ی-نادیر ندیر، جؤوهر بیلن‌دن سورمالی
آنین عشقی جان ائوینده جؤوهر و دردانه‌دیر
کائناتین سئیری نظم آلمیش مدار ِ عشقده
عشقین اعجازیمی‌دیر، یوخسا کی بو سئودا نه‌دیر؟
*
علی‌آقا واحد
من اسیر عشقی‌یم، اؤز خالقیمین، اؤز یوردومون
سئومه‌ین اؤز خالقینی، اؤز یوردونو دیوانه‌دیر
*
سوسن
ذؤوق ِ عشقین لذتین عشقین شهیدیندن سوروش
عشق ایله ایستر یاشام، ایستر اؤلوم شاهانه‌دیر
یوردونا عاشیق اولان هر محنته تاب ائیله‌یر
قیبله‌گاهی حق یؤنونده، سجده‌سی عرفانه‌دیر
*
علی‌آقا واحد
قوی وطن داییم ایشیقلانسین، گؤزل بیر شمع تک
کؤنلوم اول شمعین ضیاسین سئیر ائدن پروانه‌دیر
*
رضی- علیار
وارلیغی قور-قور یانان پروانه‌لیکدن آنلایار
شعله‌ی شمعین ده مئیلی جذبه‌ی طوفانه‌دیر
وطن اوغروندا سویولسا دریسی آسلان‌لارین
هئچ وئجه آلماز گئدن قان، یوخسا جان‌دیر یا نه‌دیر؟
*
علی‌آقا واحد
نازنین رعنا گؤزل‌لردیر، باخیرسان هر یانا
بس بو تورپاق ایندی بیر جنت دگیل، آیا نه‌دیر؟!
*
علیار
یوردوموز باشدان باشا باخسان گؤزل‌لیک یوردودور
دویغولو عاشیق‌لره هر آددیمی میخانه‌دیر
بو جهاندا بنزری یوخدور، یقین تایسیزدیر او
اول جهاندا اوخشاری تام روضه‌ی- رضوانه دیر
*
علی‌آقا واحد
اؤلکه‌میزده گؤر نه‌لر وار، باشقا بیر عالمده‌ییک
هر چیچک بیر نازنین، هر غؤنچه بیر جانانه‌دیر
*
علیار- رضی
بولبولون جهجه سسی، شن اؤتمه‌یی عشق اوزره‌دیر
اله، نرگیز، سوسنین ناز ائتمه‌یی مستانه‌دیر
عالم اهلین بیز شاشیردیب حیرته دالدیرمیشیق
سر به سر عالمده آذربایجان بیر دانه‌دیر|
*
علی‌آقا واحد
“واحید”م من، سئوگیلیم، مندن خیانت گؤرمه‌سن
شاعیرم، عشقیم ده اؤز قلبیم کیمی مردانه‌دیر!
*
علیار
توشلاسین قوی هر طرفدن بوللو تهمت‌لر بیزی
یار آگه‌دیر کی بیزده داورانیش رندانه‌دیر
عشقده ثابت اولان، علیار، اوسانماز، سیزلاماز
عشقه تسلیم اولموسانسا، سوس داها، غوغا نه‌دیر؟
*

بیر گؤزل ملمع - سوسن نواده رضی دن

سهل و آسان نیست جانا قانلا ایلقار باغلاماق!

خون دل خوردن بسی، گوندوز- گئجه قان آغلاماق

یار پرستار ایسته سه تیمار کن، نازش بکش

کار هر گلکار نبوَد باغدا سوسن ساخلاماق

*

این که در رگهای تو جاریست، سنسن یا منم؟

آنچه اندر جان تو خالیست، سنسن یا منم؟

سن منم یا من سنم ائی وااااااای بیدارم کنید

این که مخمور می فانیست، سنسن یا منم؟

*

گر منم فرمان وئرن، فرمان دهم گویم بمیر!

یا بو فرمانا بویون قوی، یا بیا جانم بگیر

سن کی فرمانبر دئییلسن، از چه رو لافش زنی؟

دوزگون عاشقلر اولار یا جاندِه یا جانپذیر

*

چشم می بندی به غیر عشق هر بیر وارلیغا

کورکورانه من و جان را سالیرسان دارلیغا

نیتین سایدام، یولون قوتسال، ولیکن از چه رو

این دلِ سودایی ام را تاپشیریرسان کورلوغا؟ 

*

ائله بئله

*