گؤزگو - نسیم جعفری

گوزگویه باخیرام
گوزگوده سورمه لی گوزلریم داریخیر
گوزگویه باخیرام
گوزگوده دوداقلاریمداکی ماتیک داریخیر
گوزگویه باخیرام
گوزگوده یاناغلاریمداکی شئح مینجیق لار داریخیر
گوزگویه باخیرام
گوزگوده ساچلاریمداکی گونه باخان لار داریخیر
گوزگویه باخیرام
گوزگوده ائینیمده کی آغ حریر کوینه ییمین قیرمیزی گول لری داریخیر
گوزگویه باخیرام
گوزگوده کیرشانلی گئجه مین اولدوزلاری داریخیر
گوزگویه باخیرام
گوزگوده 14 گئجه لیک آی داریخیر
گوزگویه باخیرام
گوزگوده ایلیق دونیام داریخیر
گوزگویه باخیرام
گوزگوده گوزگوم داریخیر

گوزگونو سیندیریرام
سن توکولورسن یئره ...
ائییلیرم یئردن ییغیشدیرام سنی
باتیرسان اللریمه
بارماقلاریم قاناییر
کپنک لر اوچور کوینه ییمده کی قیزیل گوللرین اوستوندن ...

اویناییر - نسیم جعفری

بیر گئجه تکلیک اونونده گلدی سس دان اویناییر

گوزگوده هر بیر باخیشدا مین گوز عیرفان اویناییر

ال اوزاتدیم گوزلریندن بیر قیسیم پای آلماغا

گوردوم ایلهام اورتاسیندا جان دئییر جان اویناییر

من سیخیلدیم اولدوزون شکلینده جان تاپماقلیغا

آی جالاندی ، گوز قاماشدی ، گوردوم هریان اویناییر

گوزلریمدن یاش آخار کن کیپریگیمدن چاخدی اود !

چیپجالاندیم دالغا دالغا منده طوفان اویناییر

منده یا هوهو دییرکن یا اناالحق سویله دیم

گوردوم آلله اولموشام روحومدا اینسان اویناییر

نسیم جعفری - هوشنگ جعفری زنگانلی نین شاعیر قیزی

*