هراس - حمیده رئیس زاده

آی بولودسوز قالان گؤیلر
دومانسیز داغدان نه خبر؟
اولدوزلاری یالان گؤیلر
آمانسیز داغدان نه خبر؟
*

نه گلدی ترلان باشینا
یئل قانادین سالان داغدا؟
نه لر گلدی جان باشینا
توفان کؤچدن قالان داغدا
*

قارانلیق دیر اویغولاریم
اولما بالام دغدا قالیب؟
دیلک بویلو دویغولاریم
قورقوشوملو چاغدا قالیب؟
*

آغلاماق هاواسی گلیر - حمیده رئیس زاده

یارین یاری گلیر دئیه
داغدا شلاله لر گولور
یار دوداغی گولور دئیه
باغداکی لاله لر گولور
یار یاریلان گولور دئیه
الده پیاله لر گولور
یار گولورکن
اوزلر گولور
گؤزلر گولور
دوداقلاردا سؤزلر گولور
هانسی لاله آیاقلانیب ؟
آغلاماق هاواسی گلیر

*

بیگانه بیگانه - حمیده رئیس زاده

گلیبسن اوز اوزه باخما منه بیگانه - بیگانه
اؤتورمه ایریلیق یوردون گزیم دیوانه - دیوانه
دولاندیر بیر باخیش رطلین منیم احوالیمه گاهدان
گؤزوندن قوی ایچیم گیزلین چاخیر پیمانه - پیمانه
نظر سال قات - قات آیریلسین جانیمدان غربت آثاری
آچیلسین شعریمین یارپاقلاری میخانه - میخانه
سینیخ سالخاخ اوره کلردن ایزین گؤرسه تدیلر خلقه
قالیب کؤنلوم جلالیندانایراق ویرانه - ویرانه
منیم شوقومدور عالمده ، جنون رنگینده پایلاندی
گؤرور هر یئرده بیر شعله ، یانیر پروانه - پروانه
منم مجنون ، منم لیلا ، منم وامق ، منم عذرا
منیم دردیم دوشوبدور دللره ، افسانه - افسانه
سحر ال چک یاخامدان ، حایل اولما منظر وصله
چکیل گئت بیر گؤروشه جان وئریم جانانه - جانانه

بیر نئچه شعر حمیده رئیس زاده دن

یاشلی باخیشلار

کؤرپه اللرین بارماقلاریندا

قان قورویاندا

یاشلی باخیشلار

دوستاق یولوندا باغلی قالاندا

قورخو اللری

قالخان قامته تور توخویاندا

گینه ده

سنین قارا بالیغین یادیما دوشور 

*

کؤلگه کیمی 

اؤتوروب عقلی گیریشدیم دلی لر قایداسینا
آلیشیب عشقه یئتیشدیم زیانین فایداسینا
آیریلیق باعثی ام الده علاجیم بونادیر
هئچ اولام کؤلگه کیمی ، دالدالانام دالداسینا 

*

دیوار
ایشیم جان وئرگی سین تورپاق دیوارلاردان آشیرماقدیر
توتوب عشقین الین قانداللی دملردن آییرماقدیر
گؤرونمز بیر دیوار ، سئودا غمیندن توختاماز بیر یاش
علاجیم اولسا الده ، باش بو داش دیواره ویرماقدیر 

*

آه سایاغی
یاشاییش ذیروه لرین توتدو قالین چن ، نییه گئتدین
سالیبان آه سایاغی ساچلاریما دن نییه گئتدین
اوره گیم سیندی ، سنی اؤزگه لی دملرده گؤره نده
توتالیم من دئدیم ال چک ، باش الیب سن نییه گئتدین 

*

قورتاریش 

گلیرم قاندا قالان قلبیمی غمدن آلاسان
گلیرم من قوتارام سن ده ، فقط سن قالاسان
ساز کیمی تئللریمین ماهنی سی مضراب دیله ییر
نولا گیزلین آلاسان قوینونا گیزلین چالاسان

*  

بوغولان آخشام
وارلیغیم داغلاردا چنه بنزه ییر
گؤزللر تئلینده دنه بنزه ییر
غربت پنجه سینده بوغولان آشخام
حسرته ، نیسگیله ، منه بنزه ییر

*

یاشلی باخیش 

من بؤیله ده مجنون کیمی دیوانه دگیلدیم

توفان قوپاراق دویغولارا لانه دگیلدیم

بیر هاستا محبت سسی یئلدن سپه لندی

بیر گیزلین عطش ماهنی سی یاغموردان اله ندی

بیر یاشلی باخیش لذت دیداره بله ندی

یوخسا بو قدر ده دلی دیوانه دگیلدیم

*

الینی وئر منه - حمیده رئیس زاده

ائلیمین گوللری سولمایان کیمی
دریالار اوسگویه دولمایان کیمی
توتولوب اوره گیم اولمایان کیمی
اوچماقدیر دیله گیم قاناد وئر منه
*
غم توزون آپارمیر گؤزومون سئلی
سوسدوروب دیلیمی نه نه لیک فئلی
دردیمی سیزیلدیر سازینین تئلی
دیلیمدن توکه نمه ز حیات وئر منه
*
چال سازی سسینده سؤزومو دئییم
قان رنگین گؤرسه تمه ز دونومو گئییم
واردیر چارپیشماغا هله لیک هئییم
گئدیرم چنلی یول قیرآت وئر منه
*
جانیملا وارلیغیم ، واریم دیدیشیر
اوخ قالیب سوموکده یارا بیتیشیر
حیاتیم بوش – بوشا باشا یئتیشیر
بو سون گونلریمده ثبات وئر منه
*
قولوما قارداشدان ئدایاق ایستیرم
دیلیمه ائلیمده ن سایاق ایستیرم
دنیزلر توتوملو چاناق ایستیرم
دردیمی یازماغا داوات وئر منه

*

دئنیزدن دئنیزه - حمیده رئیس زاده

ایستیرم سئودانی قانیما قاتام
ایستیرم واریمی یوخوما قاتام
دار پالتاردیر ایینیم ، جانیم سیخیر
ایستیرم اینیمی چیخاردام آتام
آی سئوگی یاییندان یاییلان اوخلار
آییقلیق سئویرم قویمایین یاتام
سیغماییر باغریما یاغیرتیلاریم
هاچاناجاق گره ک باغیرتی اوتام
ساحیلی ساخلایین عاغیللی لارا
من گئدیم دنیزدن دنیزه باتام

*

یاشیل احسا س لی - حمیده رئیس زاده

گئنه نیسگیل لئچگین سالدی خزان
اچمامیش غنچه لری چالدی خزان
منی ده جایناغینا آلدی خزان
یاشیل احساسلی چمن ساخلا منه
*
یالانا دوزلوک اوخو ائتسه اثر
گول بیتیب ، غنچه گولوب ، آچسا سحر
بیرده گؤرکملی اوره ک گؤرسن اگر
او اوره کلرده وطن ساخلا منه
*
سؤزلرین سینه لره کؤز قالادار
دویغونون توشگولو کؤزدن جالادار
اونداکی سؤز گونشی چالخالادار
سؤزده اولدوز کیمی دن ساخلا منه
*
دایاغ عونوانلی داغ آواره سی یم
قارا گونلرده آغ آواره سی یم
بیر گولوشلوک دوداغ آواره سی یم
غملره قارشی گولن ساخلا منه
*
دئمیرم خوشلوغا یاد ائت یادا سال
غم اؤنونده آدیمی فریادا سال
منی ده غم بؤلوشنده آدا سال
بیر اوره ک پایلی محن ساخلا منه
*
بیر دایان ، ذیروه یه ایز قوی گلیرم
سانماکی خسته یم ، ایز قوی گلیرم
بیر چاناق سؤزده دئنیز قوی گلیرم
بیر دؤیوش مئیدانی چن ساخلا منه
*
اوجالیقلاردا ایزین وار دئیه رک
چیخارام داغلارا یار – یار دئیه ره ک
گله رم غربت ائوین دار دئیه ره ک
وطن عونوانلی کفن ساخلا منه

*

ماراقلار - حمیده رئیس زاده

سندن سؤز آچیر سوسان دوداقلار دانیشیر
سؤز دیلده پیچیلداشیر ، قولاقلار دانیشیر
یازلاردا یاشیل نیشانه سندن دولانیر
شندن دؤشو جوشلانان بولاقلار دانیشیر
گؤیلرده بولود ساچاقلارین سندن آلیر
یئل کؤوره له نیر یاشیل دوداقلار دانیشیر
سندن دیله ییر نوازش اولماق ساچلار
تئللرده ماراقلانان داراقلار دانیشیر
گؤز یولدا قالان زامان نیشان بولماق اوچون
گؤزلرده بوداقلانان ماراقلار دانیشیر
گلدیم آرادیم اوزاق نیشان سؤیله دیلر
شوقوندا یاخینلاشان اوزاقلار دانیشیر

یئریدی - عاشق علی عسگر

بیر گؤزل کئچدی قارشیمدان

ساللاندی یانا یئریدی

کیپریک چاخدی اوغرون باخدی

اود سالدی جانا یئریدی

*

اووچو تک بره ده دوردو

قاشلاریندان کمان قوردو

موژگانین سینه مه ووردو

غمزه سی قانا یئریدی

*

هانی بئله حوری قیلمان ؟

ائیله میر دردیمه درمان

چشمیم یاشی اولوب عوممان

یاشیل باش سونا یئریدی

*

جمالین بنزه تدیم آیا

احسن قدرت وئرن پایا

اندیریب سالمادی سایا

دوست ، مهریبانا یئریدی 

*

دئدیم قیز گئتمه آماندی

علی عسگر اودونا یاندی

دئدی : قوجادی پیراندی

مرد و مردانا یئریدی

*

قالدی - عاشق علی گرایلی لار

جانیم جدا دوشدو گئدیر وطندن

مکانیم مسکنیم وئرانا قالدی

سانکی آیریلیبدی گول دن چمن دن             

بلبلون علاجی فغانا قالدی

*

یئنی گول اکمیشدیم من باختی قارا

بولونمز دردیمه کیم ائیلر چارا؟

خوریات الی دیدی هیئوایا نارا

سینه مده داغلاریم نیشانا قالدی

*

علی عاشق اولموش بیر اهل دیله

طبیبیم مولادی دردیمی بیله

بیر ترحم ائیله سر ده عاغیلا

چونکو سردن گئتدی دیوانا قالدی

*

سنده دی - مهدی همت زاده ( ائلدار ) ماکو

ای منیم اودلار دیاریم شانلی آذربایجانیم

شهرتیم دنیاده سن سن اعتباریم سنده دی

شبهه سیزسنلن اوجالمیش باکریم ستارخانیم

گوجلو قووتلی ائلیم، شاُنیم وقاریم  سنده دی

*

دامنینده مرد ایگیت لر قهرمانلار بسله دین

چوخ وطن پرور دلاور پهلوانلار بسله دین

اقتدارلی آدلی سانلی حکمران لار بسله دین

کونلومون سلطانی سن سن اقتداریم سنده دی

*

آیریلار سا بند بندیم دن یاریمدان دونمه رم

آذرستان توپراقین دان اوز واریمدان دونمه رم

تورکه خدمت دیر وظیفم ایلقاریمدان دونمه رم

ای آنام تک دوغما یوردوم افتخاریم سنده دی

*

دنیادان ارزشلی دی یوردوم یووام اوز توپراقیم

قوی دمادم دالغالانسین توپراقیم دا بایراقیم

فیکر ذکریم دن بیرآن اولماز منیم سن سیز چاغیم

وارلیقیم سان عزتیم سن هر نه واریم سن ده دی

* 

شعرده خاقانی تک وار معتبر بیر شاعرین

هم نظامیله فضولین ، معجزایله صابرین

واحدین ، خورشید بانو ناتوانین ، ساحرین

شهرتی دنیانی توتموش شهریاریم سن ده دی

*

کیمیادیرتوپراقین زنگین اثرلر کانی سان  

موسیقی دن ذوق آلان انسان لارین جانانی سان

(ائلدارین) دا شاه بیت شعری نین عنوانی سان

دلبرسیمین عذاریم نازلی یاریم سن ده دی 

*

آخشاملار - مهدی همت زاده ( ائلدار ) ماکو

ائله کی آی بولودا دالدالانیر آخشاملار

عشق پیمانه سی الدن،جالانیر آخشاملار

هرقارانلیق گئجه نین یاددا قالان لحظه لری

بیر اوموتلو سحره ،آرخالانیر آخشاملار

خیالین چرچیوه سینده یارانیر خاطیره لر

نه سبب دیر گؤره سن تاپدالانیر آخشاملار

آچیرام گوشه ی خلوتده کؤنول دفترینی

داغ کیمی سینه مه غملر قالانیر آخشاملار

دوزورم صبح آچیلاندان گونشین باتماسینا

خیالیم یار هاواسیندا دولانیر، آخشاملار

سنی اغیارایله بیرلیکده دوشوندو کجه منیم

اوره گیم قانه دونور پارچالانیر آخشاملار

قارا تئللرده کی یارین اوزونه کؤلگه سالیر

(ائلدارین) وار یوخو بیردن تالانیرآخشاملار

*                                                                          

بیرلیکده - مهدی همت زاده ( ائلدار ) ماکو

میخانه دن آیریلدیق اول یاریله بیرلیکده

پیمانه نی سیندیردیق دیلداریله بیرلیکده

پوچ بیرهوس اوستونده بیروارلیقی یوخ سایدیق

اسراره قلم چکدیک ایلقاریله بیرلیکده

سوز صحبت اولوب ایندی گئچمیشده قالان گونلر

آنجاق یاشیرام منده اسراریله بیرلیکده

بیل کی بئله سوداده عشق اولسا زیانیمدی

هر یئرده کی یار اولسا اغیاریله بیرلیکده

قالدیم بو معمّاده یارب بو نئجه سئردی

بیر عومره گره ک دوزسون گل خاریله بیرلیکده

تافایده سیزگوردوم اول نسخه دن ال چکدیم

بیلدیم کی طبیب ئولدو بیماریله بیرلیکده

عشقین حرمین گزدیک بیر یئرده خطا ائتدیک

دفن ایله دیک( ائلداری) اشعاریله بیرلیکده

                          مهدی همت زاده (ائلدار) - ماکو

ای یار - مهدی همت زاده ( ائلدار ) ماکو

ياز گلدي گؤزل يوردوما داغلاردا ارير قار

بايرام نفسي ائتدي ياتان غنچه‏ ني بيدار

 بولبوللر اوخور تازه‏ لنير وعده‏ ي ديدار

باخ گؤر نه گؤزل پرده چكيب كؤوشنه گولزار

 گؤيلرده گزركن اولورام يئرده گرفتار

بير گوللو باهاردا سني من سئوميشم اي يار

*

 بیر عمر سنين حسرت هجرانيوه دؤزدوم

سينديرديغين اوْل عهد ايله پيمانيوه دؤزدوم

 بيهوده يئره بير قورو عنوانيوه دؤزدوم

حوسنون ساياراق عيبيوه نقصانيوه دؤزدوم

 اولدوم گئنه هر جؤوريوه شوق ايله خريدار

بير گوللو باهاردا سني من سئوميشم اي يار

 *

 عاشق اولانين بلكه حياتي هدر ايميش

سئودا چكنين هر گونو محنت كدر ايميش

 مجنون او سببدن بير عؤمور دربه‏ در ايميش

شايد بو دا تقدير قضا و قدر ايميش

 گولشنده آچان گوللره همدم يارانيب خار

بير گوللو باهاردا سني من سئوميشم اي يار

 *

 كوسمك گؤزليم سن كيمي جانانه ياراشماز

غم شانه‏ سي، گيسوي پريشانه ياراشماز

 تدبير خطا، يوسف كنعانه ياراشماز

باور ائله، هر كنج لبه، دانه ياراشماز

 ايسترسن اينانما سؤزومه، ائتگيلن انكار

بير گوللو باهاردا سني من سئوميشم اي يار

 *

 كون ايله مكاني يارادان خاليق عالم

كامل ياراديب سنده كمالاتي مسلّم

 تدبير سنيندير هله ده اؤل دئسن اؤللم

انصاف ائله باري بو قدر ائيله ‏مه چم-خم

 ال چك بو ادادن گؤزليم، اولما دل‏ آزار

بير گوللو باهاردا سني من سئوميشم اي يار

*

 گر اولمايا عشقين آدينا دهرده بير زاد

نه مجنون اولاردي نده شيرين‏ ايله فرهاد

 گل ائيله‏ گيلن محبس غمدن مني آزاد

عارفسن اگر ايسته‏ مه اغياردن امداد

 اغيار اولا بيلمز بئله بير عشقه سزاوار

بير گوللو باهاردا سني من سئوميشم اي يار

*

 بيچاره كؤنول صبر ائله چوخ اولما گئيلئي لي

عشق اولماسا بولبوللرين اولماز گوله مئيلي

 افسانه ده اولسا هله ده ليلي‏ دي، ليلي

سالدي هوس عشقه بيزيم (ائلداري) خيلي

 بو سنده اولان ناز، ادا ايله بو رفتار

بير گوللو باهاردا سني من سئوميشم اي يار

*

قالدیم - مهدی همت زاده (ائلدار) ماکو

گئنه ویرانه کٌنجین دا ، سه تاریم قالدی من قالدیم

کتابیم ، دفتریم ، شعریم، شعاریم قالدی من قالدیم

نه یار قالدی ،  نه بیر یولداش ، نه گوز یاشیم سیلن بیرکس

تحسّرله گئچن لیل و نهاریم قالدی من قالدیم

جوانلیق دا اوشاقلیق تک ، اَسَن بیر یئل کیمی گئچدی

آغارمیش ساچلاریم سولموش ، عذاریم قالدی من قالدیم

خزان قهریله سولموش بیرگولم ، کیم قالمییب چاره م

سارالمیش گولشنیم ، باغیم ، باهاریم  قالدی من قالدیم

منیم یاتمیش قارا بختیم ، منه یار اولمادی بیر گون

گئجه تا صبح اولونجا آه و زاریم قالدی ، من قالدیم

بیر عشق اوغروندا من گئچدیم غروروم اعتباریم دان

سینیق کؤنلوم پوزولموش اعتباریم قالدی ، من قالدیم

بلاکش (ائلدارام ) آنجاق، بلاچکدیم بو عالمده    

اوره ک قانیله دولموش روزگاریم قالدی من قالدیم 

* 

اؤلدور ه ر شاعیری - زلیم خان یعقوب

باشدان - باشا آق گئیینن گؤزلیم
بئله گئیمه ، آق اؤلدوره ر شاعیری
سینم اوسته چالین چالپاز چکدیین
بیر ساغالماز داغ اؤلدوره ر شاعیری
گؤزللردی جانیمیزا قصد ائدن
بیزی واخ سیز آیری سالار دسته دن
قصاص آلار منیم کیمی خسته دن
سنین کیمی ساغ اؤلدوره ر شاعیری
آغ یاناقلار شئحه باتمیش لئچک دی
گؤر سئونلر سئودییندن نه چکدی
وار اندامین گوله باتمیش چیچکدی
ال دیمه میش تاغ اؤلدور ه ر شاعیری
دونیا هئچ دی نور دونیاسی اولماسا
گؤزللرین خاصی صافی اولماسا
زلیم خانین حق سئوداسی اولماسا
وعده کئچر چاغ اؤلدوره ر شاعیری

*

گؤزلدی - زلیم خان یعقوب

بیر گؤزلده مین گؤزللیک جمع لنیب
باخیشی دا دوروشودا گؤزلدی
سولاریندا اوزوب گئدن غواصام
دالغاسی دا هاواسی دا گؤزل دی
اوزو نوردان سؤزو حاقدان گلیبدی
شاهیمیزدی ائنیب تاخدان گلیبدی
قولاقلارا سسی چوخدان گلیبدی
بیزه چاتان صداسی دا گؤزلدی
گؤی اوزونده دورنالاری ساخلاییب
یئر اوزونده قایالاری لاخلادیب
زلیم خانین آناسینی آغلادیب
منه چاتان قاداسی دا گؤزل دی

خوش گلدین - عاشق علی عسگر

قدم قویوب آستا – آستا

سن بو دیاره خوش گلدین

سوزدوروب آلا گؤزلرین

قاشلاری قارا خوش گلدین

اوغرون دوروب قییا باخدین

مژگانین سینه مه چاخدین

جیسمی می یاندیریب یاخدین

آلیشدیم نارا ، خوش گلدین

قایناییب پیمانیم دولوب

سارالیب گول رنگیم سولوب

حسرتین چکمکدن اولوب

سینم صد یارا ، خوش گلدین

دوستون وفاسینی گؤردوم

سئچیب سئویب کؤنول وئردیم

تازه لندی کؤهنه دردیم

دردیمه چارا ، خوش گلدین

سینمدی عشقین دفتری

سن سن دیلیمین ازبری

یازیق عاشق علی عسگری

چکمه یه دارا ، خوش گلدین 

*