هئچ - ابوالقاسم نباتی

ای کؤنول ائتمه شور و غوغا هئچ
چکمه بیهوده رنج سئودا هئچ
بی وفا عمره اعتبار ائتمه
اولما آلوده فکره اصلا هئچ
خاک اولور عاقبت فقیر و غنی
حاصل مال و ملک دونیا هئچ
عارف اول عارف اولما زاهید خشک
اختیار ائتمه زهد و تقوا هئچ
مبتلا اولما نشئه بنگه
مئل گول فام و جام مینا هئچ
همت ائت اولگینان یقین اهلی
کوفر و دین بحثین ائتمه قطعا هئچ
ای نباتی سنینله حقدیر یار
غم یئمه عالم اولسا اعدا هئچ