Dienstag, Februar 04, 2014

آغ بولاق - هوشنگ جعفری



آغ بولاق ، اغلا بولاق
قوي سويون آخسين گؤله ساري
كؤچ ائديب گئتدي جاوانلار
سوواران يوخ مومالاري
چكيله قددي يوخاري
قالانين يوخدو چيخاري
قوجاليبلار، گيجاليبلار
اودو داي كتده قاليبلار
*
آغ بولاق آغلا بولاق
بلكه آغاجلار جانا گلسين
قارا چككيرته ني ديندير ، سازي چالسين
سويون اوستونده زؤلوك اويناغا گلسين
گؤزلر قايناغا گلسين
بلكه قان يانقاغا گلسين
قارا چككيرته ده مدت دي كي داي غم تاري چالمير
اودا داي حال خبر آلمير
*
آغ بولاق آغلا بولاق
سوتلوگنلرده بيزيم تك سوته حسرت قالاجاقدير
آغ يئل اسديكجه
آغاجلار ساراليب – گادمالارين
داي قورويوب يارپاقيلان تار چالاجاقدير
اوندا داي كيم قالاجاقدير ؟
كيم آغيزليق آچاجاقدير
باغا كيم سو سالاجاقدير
گؤرورم يونجالار اطرافي بوتون مور و ملخدي
آغ بولاق قايناماغين وختي نه وخدي ؟
*
آغ بولاق آغلا بولاق
باغچادا گوللر ساراليبدير
باغبان بسكي سو فيكرينده قاليبدير قوجاليبدير
خزل اطرافي آليبدير
بيزي پيس درده ساليبدير
شيشه ي عومروموزي داشه چاليبدير
اودو داي عمر آزاليبدير
گؤرورم يونجالاري لي لك اولاغ لار اوتاريب دير
يونجادان گول قوتاريبدير
*
آغ بولاق آغلا بولاق
قوي خشه لر باشين اوجالتسين
هرزه اوتلار يئره باتسين
ممل ايستير آتي ساتسين
يئرينه بير اولاغ آلسين
آخي بوردا نييه قالسين ؟
نه اوميديله دايانسين
اؤزونو كول – كوسا سالسين
نه ممريله دولانسين ؟
نييه قالسين ؟
كدخداني گؤروسن كتده اؤزون باغلادي گئتدي
كندلي نين وار – يوخون آلدي سيبيلين ياغلادي گئتدي
*
آغ بولاق ، آغلا بولاق
غم يئنه اوضاني قاتيب دير
مشه سولطان دا بيزيم باغچايا بير جمدك آتيب دير
گوشه ده آج قالان ايت لر بوتون اطراف دا ياتيب دير
ديشلري قانه باتيب دير
اله فرصت دي چاتيب دير
*
آغ بولاق آغلا بولاق
سن اگر قايناياسان بيزده سازالليق
ييغيشيب يكسره اطرافيني آلليق
قورويان دشته سو سالليق
سن اگر قايناماسان
بيزده سوزالليق
بيزده داي اوندا گيجالليق
سو خياليله قوجالليق
آغ بولاق بس بو نه حالتدي قاليب سان ؟
آغ بولاق بس بو نه وحشتدي ساليب سان ؟
*
آغ بولاق ، آغلا بولاق
سنده گؤزل خاطيره لر وار
سنده بير خان بالاسيندان سوراغيم وار
سنده بير غصه لي غملي قوناغيم وار
سنده بير چال پاپاغيم وار
سنده سينماز داياغيم وار
سنده بير « جعفري » تك شعريده شاعير ساياغيم وار
اونا حرمت ائدنين گؤگلو شاد اولسون
اودا غربت ده دي اوندان دا ياد اولسون

آغ بولاق ، آغلا بولاق

Keine Kommentare: