Mittwoch, Oktober 03, 2012

زلزله 1 - نادر الهی

یئر تیتره دی، داغلار داشلار     لاخلادی
سن ده  تیتره، سن ده  لاخلا،  آقارداش
بیز یوباندوخ....... اؤلوم  سنی  یوخلادی
چیی کرپیچ له، چیی سوواقلا، آقارداش

طالع     طالع    ییخیلان     دامداشیندی
اورموگولو،  قوروچای   گؤز      یاشیندی
گؤرورسن کی    اؤز الین   اؤز باشیندی
اؤز یارانی      اؤزون باغلا،       آقارداش

گؤز آچاندان    اونا بونا    آغلادین
یاغا  یاغا،      یانا یانا      آغلادین
آتا آتا،            آنا آنا        آغلادین
اؤزونه ده  بیرگون آغلا، آقارداش

بو قونشونون     اویما  یالان     فیتینه
بویانماسین    قوی کورکوموز   بیتینه
او توی   توتسون   پیشیگینه     ایتینه
سن یاسینی  اؤزون ساخلا،  آقارداش

یاسا     چاغیر    اردبیلی     موغانی
ناله نی،    شووه نی،   آهی   فغانی
غریب   اؤله ن    هریسی     ورزقانی
اؤزون اوخشا،   اؤزون آغلا،   آقارداش
*
از وبلاک نادر الهی
*

Keine Kommentare: