دیلینده دیر

شاعر: زلیم خان یعقوب

قیزینجی اوجاغین باغریندان قوپار

اودون محبتی کؤز دیلینده دیر

اینجی ، کیپریک چالما ، اشاره ، ایهام

باخیش دیلینده دیر گؤز دیلینده دیر

کهلیکینن داش دانیشیر داش

غمین اثری دیر گؤزونده کی یاش

بیزیم دیلیمزده نه وار کی قارداش

نه وارسا تانری نین اؤز دیلینده دیر

گؤزل لر دانیشار ملک دیلینده

ملک لر دانیشار فلک دیلینده

یازین طراوتی چیچک دیلینده

قیشین سویوخلوغو بوز دیلینده دیر

یورولماز کؤهری بودره مز آتی

تورپاقدی ، اوجاقدی عؤمرو حیاتی

زلیم خان نه یازسا قوشما بایاتی

زلیم خان نه دئسه ساز دیلینده دی

*

بیر سن بیل بیرده من بیلیم

شاعر: زلیم خان یعقوب

سن آللاه کنارا چیخماسین بو سؤز 

بو سیرری بیر سن بیل بیرده من بیلیم

کیمسه نین ائوینی ییخماسین بو سؤز

بو سیرری بیر سن بیل بیرده من بیلیم

سئوگی بیر عؤمورلوقدو بیر جان دئییل

سن سیز بیر جان سیزام ، جانیم جان دئییل

آللاهین اؤزوده سیرر آچان دئییل

بو سیرری بیر سن بیل بیرده من بیلیم

سن یانار اولدوزسان من دوغار آیام

سن آخار چشمه سن من دلی چایام

کیملره سئوقه تم کیملره پایام

بو سیرری بیر سن بیل بیرده من بیلیم

سن شاهلیق ایسته دین فرمانین اولدوم

سن علاج ایسته دین درمانین اولدوم

زلیم خان نئچه یول قربانین اولدو

بو سیرری بیر سن بیل بیرده من بیلیم

*

یاغ ای یاغیش

شاعر: یتیم عئیواض

یاغ آی یاغیش، یاغگینان سن

سنه احسن، سنه آلقیش، یاغ آی یاغیش

یاغگینان سن، بو چؤللره چمنلره، یاغگینان سن

سوسوزلوقدان خزان اولان بو چؤللره، یاغگینان سن

یاغگینان سن، آرزولارا دیلک لره، یاغگینان سن

محبت دن آلاولانان اورکلره، یاغگینان سن

یاغگینان سن، یاغا – یاغا، ایسلاتگینان پالتاریمی

قایتار منه قدیمده کی اؤز عهدیمی ایلقاریمی

ائیله یاغ کی قوی ایسلانسین الیمده کی قلم واراق

یادیمدادی نئجه یاغدین، دوز اوتوز ایل بوندان قاباق

ائله گؤزل یاغمیشدین کی، ایسلانمیشدی اوز گؤزوموز

اوتورموشدوق قالا آلتیندا، بیرآغاجین آلتیندا بیز

سن یاغیردین دامجیلارین سپیلیردی اوزوموزه

ایکی میزده ایستمیردیک، دوروب گئدک ائویمیزه

قورخوردوخ کی دوروب گئتسه ک خلل گله سئوگیمیزه

سن بیر شعر سن کی ، سن بیر نغمه سن کی

آغزین یوخدو دیلین یوخدو ، نئجه دئییم بیله سن کی

سن یاغاندا یاماجلارا دوزه نلره جان وئریرسن

زمی لره سنبل لرین دامارینا قان وئریرسن

آغ آی یاغیش قوربان اولوم، سحره جان یاغگینان سن

دایانمادان قالا آلتیندان شهره جک یاغگینان سن

یاغگینان کی گؤی تپه ده، تپه لرده چیچک آچسین

بو اولکه دن، بو دیاردان، غصه کدر اوزاقلاشسین

یاغ آی یاغیش نه اولار کی، خبر آپار سئوگیلیمه

آمان گوندو بو حالیمی بو گونومو، اونا دئمه

دؤیه – دؤیه پنجره سین، دئگینن کی گلیبدی یار

قالا آلتیندا علی نن بئش بئش ویریر، گلیبدی یار

*

ببار ای باران

احسن بر تو ، آفرین بر تو

ببار ای باران

ببار بر این دشت و چمنزارش

ببار ای باران

ببار بر دشتهائی که از عطش خشک شده اند

ببار باران

ببار بر آرزوها و امیدهایمان

ببار باران

ببار بر دلهائی که از آتش عشق شعله کشیده اند

ببار باران

ببار و با بارش خود لباسهایم را خیس کن

عهد و پیمان گذشته ام را به من باز گردان

چنان ببار که قلم و کاغذ در دستم خیس شود

به خاطر دارم  سی سال پیش که باریدی

سر و صورتمان را خیس کرده بودی

من و دلدار زیر درختی ، پائین قلعه نشسته بودیم

می باریدی و قطره هایت را

به سر و صورتمان می پاشیدی

هر دو مان نمی خواستیم به خانه برگردیم

می ترسیدیم این رفتنمان خللی به عشقمان وارد کند

تو چنان شعر و نغمه بی زبانی که

چگونه بگویم بدانی

وقتی می باری ، بر دشت و دمن جان می بخشی

به جان سنبلهای دشت خون تازه می بخشی

فدای تو ببار باران ، ببار تا سپیده دم

بی وقفه از قلعه تا شهر ببار

ببار که بر تپه سبز گلهای تازه بروید

ببار شاید

از این ملک و دیار غم و رنج دور شود

ببار باران ، خبر ببر به دلدارم

زنهار که حال و روزم را به او نگوئی

پنجره اش را بزن و بگر که دلدارت آمده

* 

هئچ نه ایسته میرم آللاهدان داها

شاعر: یتیم عئیواض ( داغلی عئیواض )

بیر من اولوم بیر سن بیرده گؤیده آی

بیرده گوللو چمن ساکت آخان چای

حزین نغمه دئسین بلبل توراغای

هئچ نه ایسته میرم آللاهدان داها

یئرین اولسون منیم گؤزومون اوسته

شاعرم دورارام سؤزومون اوسته

نه اولار باشیمی قویوم دیزیوین اوسته

هئچ نه ایسته میرم آللاهدان داها

آتیب بیر کنارا فیکیری غمی

خیاللا سئیر ائدک گؤزل عالمی

دئییم گولوم سن له سحره کیمی 

هئچ نه ایسته میرم آللاهدان داها

داغلاری دومان سیز چن سیز اولماسین

زمی ده سنبل سوز دن سیز اولماسین

ائیوازین بیر گونو سن سیز اولماسین

هئچ نه ایسته میرم آللاهدان داها  

ای گؤزلیم گؤزله منی - وحید شکرزاده

ای گوزلیم گوزله منی

ای گوزلیم گوزله منی عشـق اودونا سالمییاسان

یا گئدسن بیر داحا بو عاشیقیوی سایمییاسان

هی قورخورام بی وفالیق رسمینی سن اورگشسن

گول اوزووه یئتیشممیش سنده منی تک قویاسان

اینانمیشام کی سن منی گورنده لیلا کیمی سن

گوزله کی سن مجنونوون قلبینی سیندیرمییاسان

قورخورام ای وای کی بوگون عاشیـق اولان کونلوموده
جییر کیمی شیشه چکیب عشقیده سن یاندیراسان

هامّی بیلیر کی من سنه عاشیق اولوب آلیشمیشام

بیـــر نه اولار سن ده منی اوز وصلیـوه چاتدیراسان

گور کی اگر ایمکانی وار اوز او شیرین دوداخلارون

طعمینیده بــو کونلومه من اولممیش دادّیراسان

*

ایسته میرم - وحید شکرزاده

ایسته میرم

گئت گولوم، گئت منه سن جان اولاسان، ایسته میرم

عشوه لی، سویگلی جانان اولاسان، ایسته میرم

بیرده گؤز یاشی تؤکوپ کویووا  گلمه م گؤزه لیم

گؤروب احوالیمی خندان اولاسان، ایسته میرم

بی وفالیقدا بوتون عالمه مشهور اولدون

سن اگر حوری قیلمان اولاسان، ایسته میرم

وورمیسان سینه مه مین یاره کفایتدی منه

بو سینیق قلبیمه درمان اولاسان، ایسته میرم

بی وفاسان دگیلم راضی اؤلندن سورادا

قبریمین اوسته نگهبان اولاسان، ایسته میرم

پیس گونومده منی سالدون نظریندن گئتدون

یاخشی گونده منه مهمان اولاسان، ایسته میرم

 *

نمی خواهم

برو گلم ، برو ، اگر بخواهی جان من بشوی ، نمی خواهم

با عشوه ، جانان سوگلی من باشی ، نمی خواهم

عزیز من دیگر با اشک چشم سر کویت نمی آیم

حالم را ببینی و خوشحال شوی ، نمی خواهم

در بی وفائی مشهور عالم شدی

اگر حوری و قلمان بشوی ، نمی خواهم

بر دلم هزار زخم زدی برایم کافیست

بر این قلب شکسته ام درمان بشوی ، نمی خواهم

بی وفائی راضی نیستم بعد از مرگم نیز

سر قبرم نگهبانی کنی ، نمی خواهم

در روزهای بدم مرا رها کردی و رفتی

در روزهای خوشم مهمانم شوی ، نمی خواهم

*

گول سنین نه یینه گرک دیر گولوم - زلیم خان یعقوب

گول سنین نه یینه گرک

گول سنین نه یینه گرک دیر گولوم

اؤپن دوداغی یوخ ، اوخشایان الی

گل گول ده چیچک ده اؤزوموز اولاق

سن بیرآز عاغیللی ، من بیر آز دلی

گول سنین نه یینه گرک دیر گولوم

سنین گولون ده من چیچکین ده من

گوللو ناغیللارا گئتمه سین عاغلین

سنین حقیقتین گئرچه یین ده من

گول سنین نه یینه گرک دیر گولوم

حسنون گؤزللیگین دونیادا تک دیر

اگر سن وارسان سا بو یئر اوزونده

دونیا باش دان باشا گول دور چیچک دیر

گول سنین نه یینه گرک دیر گولوم

قوخلا نفسیمی چیچه یه دؤنده ر

زلیم خان سؤزونه یالاندیر دئمه

بوتون یالانلاری گئرچه یه دؤنده ر

*

بئله سینه - زلیم خان یعقوب

بئله سینه

فره کهلیک کیمی سکیر

اووچو قییما بئله سینه

خائین گؤزه او میل چکیر

رحم ائیله گل بئله سینه

تئلی تؤکوب قاش اوسته

آغیز نازیک دوداق پسته

اود وورسادا سینم اوسته

اوف دئمه رم بئله سینه

قوی زلیم خان ساز گؤتورسون

سؤز اینجیسین تئله دوزسون

یا بیر یوللوق الین چکسین

داستان یازیم بئله سین

*

آللاه گؤزلره باخ نه گؤزل باخیر - زلیم خان یعقوب

آللاه گؤزلره باخ 

بئله آتش اولماز ، بئله کؤز اولماز

آللاه گؤلره باخ نه گؤزل باخیر

بئله آلاو اولماز ، بئله اود اولماز

آللاه گؤزلره باخ نه گؤزل باخیر

حاققین درگاهیندان ائنن ایشیق دی

عؤمره ناخیش ووران بیر یاراشیق دی

من گول آغاجییام او سارماشیق دی

آللاه گؤزلره باخ نه گؤزل باخیر

بیلمیرم نه زامان قارشیما چیخدی

قاریمی اریتدی ، داغیمی ییخدی

عاشقین جانی جهنم ، ملت یازیق دی

آللاه گؤزلره باخ نه گؤزل باخیر

سزایام داشلاریم تؤکولوب گئدیر

جیگریم جانیمدان سؤکولوب گئدیر

من آغلار قالمیشام او گولوب گئدیر

آللاه گؤزلره باخ نه گؤزل باخیر

اوره ک یوز پارچادیر ، کؤنول مین پارا

بیر گؤزل گؤزونده چکیلدیم دارا

زلیم خان اؤلمدی جانی قورتارا

آللاه گؤزلره باخ نه گؤزل باخیر

*

گؤزل سن - زلیم خان یعقوب

گؤزل سن

قوشا خلق ائیله ییب یارادان سیزی

دونیادا گؤزل دی سن ده گؤزل سن

ای دریا گؤزلی ، ای سو پری سی

دریادا گؤزل دی سن ده گؤزل سن

هر اینجه یئریشین بیر ناز هاواسی

هر اینجه گولوشون بیر ساز هاواسی

هر ایستی نفسین بیر یاز هاواسی 

هاوادا گؤزل دی سن ده گؤزل سن

ته زه جه آچیلمیش لالادی دونیا

آتادی ، آنادی ، بابادی دونیا

زلیم خان گؤزوند اعلادی دونیا

اعلادا گؤزل دی سن ده گؤزل سن

*

دینمیرم

شاعر: آیریلماز
دانیشیق عصرینده بیلمیرم ندن
اوره ییم دولوسو، سؤز دینمریم
بعضا عصیان ائدیر سؤز، یازیر قلم
نئیله مک قلمه دوز دینمیرم
*
آیریلدیم ائلیمدن دوشدوم یاد ائله
اوزولدوم سئوگیمدن من بیله – بیله
گودوکجو اولوبدور دوداغیم دیله
یازدیغیم سؤزوده دوز دینمیرم
*
اود توتوب غصه دن اوره ییم یانیر
داغ دئییب داغ اوستن سینم اودلانیر
او منیم ائلیمین گونشین دانیر
من اونون اودونا کؤز دینمیرم
*
آیریلماز باش قوشما آننامازلارا
شرف دن دانیشما اوتانمازلارا
بیلمیرم ندن سه او قانمازلارا
الیزی یاخامدان اوز دینمیرم
*

دئمک اولماز

شاعر: ایریلماز
دیلینی اؤرگتمه یالانا اوغلوم
دوز سؤزون قارشیندا سؤز دئمک اولماز
بلبوله قورباغا، سئرچه یه قارتال
ایشیغلی گونشه، کؤز دئمک اولماز
*
یالاندیر اینسانی بلایا سالان
شالاری تختیندن، سالیبدیر یالان
چالیش ائل آراسی، حیالی دولان
حیاسیز یاناغا، اوز دئمک اولماز
*
اینسان وار، دیندیرسن یاناغی سولار
بهتان سؤز ائشیتسه، بولود تک سولار
وقارلی اینسانی، اؤلدورمک اولار
آنجاق فکریندن، ال اوز دئمک اولماز
*
وار دولت بیر یانا، ویجدان بیر یانا
محبت ائیله ییر اینسان اینسانا
او گؤز کی گؤردویون کؤکوندن دانا
کور اولسون، او گؤزه، گؤز دئمک اولماز
*
وفاسیز دنیایه، ائتمه اعتبار
نه اکسن توپراغا، اکدیغین چیخار
آیریلماز چوخ سؤزو ائیلمه آشکار
یئر وار حاق سؤزوده، دوز دئمک اولماز
*

آی اوغلان - شاعر: آیریلماز

چوخ ییرغالانیب قاش گؤزونو آتما، آی اوغلان
تورکم منه چوخ فارسجا قیریلداتما، آی اوغلان
علم اولماسا مشکول دؤنوب آسان اولابیلمز
ائللر سؤزودور، تولکودن آسلان اولابیلمز
هرزه گولو ائل گوللرینه قاتما آی اوغلان
تورکم منه چوخ فارسجا قیریلداتما، آی اوغلان
*
آرتیق چالیشیب دوزلره اوخشاتما یالانی
تورکون آتیینا تیکمه ، یاراشدیرما، پالانی
آز بیلمه دوماوندیدن اوغلان، ساوالانی
ائل قارقیش ائدربوغدا وئریب ساققیز آلانی
میس دن اؤتری، آغ قیزیلی ساتما آی اوغلان
تورکم منه چوخ فارسجا قیریلداتما، آی اوغلان
*
باخ تاریخه گؤر کیم ده ده وه خ.ر باخیب اوغلان
اینسان آدینی دفتره کیم یازدیریب اوغلان
کیم بابکی ساتدی عربه، خانه سی ویران
کیم ائتدی خیانت، بؤلونوب آذربایجان
غفلت یوخوسوندا، بو قدر یاتما آی اوغلان
تورکم منه چوخ فارسجا قیریلداتما، آی اوغلان
*
مشروطه لیگی کیم گتیریب ایرانا اوغلان
ستار خانی کیملر چاغیریب تهرانا اوغلان
دالدان کیم آتیب گلوله نی ستارخانا اوغلان
کیم قاره باغی هدیه وئریب ایروانا اوغلان
بسدیر باشادوش، باغریمی چاتداتما آی اوغلان
تورکم منه چوخ فارسجا قیریلداتما، آی اوغلان
*
بیز یاندیران اودلاردا، بوگون یاندی اوشاقلار
پیس گونده، یامان گونده آیاقلاندی اوشاقلار
داندیق دیلی بیز، ریشه سینی داندی اوشاقلار
ایندی بیزه یوخ، یادلارا قرباندی اوشاقلار
بوش- بوش دانیشیب بئینیمی لاخلاتما آی اوغلان
تورکم منه چوخ فارسجا قیریلداتما، آی اوغلان
*
من سؤیله میرم دیللری اورگنمه دانیشما
یانسین اوره ییم باشی، دئسم فارسا قاریشما
آنجاخ دئییرم، یادلارا چوخ یانما آلیشما
هرکیم ائلینی دانسا، کوسوب اونلا باریشما
گولسن، خار اولوب، ائل گؤزینه باتما آی اوغلان
تورکم منه چوخ فارسجا قیریلداتما، آی اوغلان
*
دوشمان اوزووه گولسه، اینان تازه کلک دی
پروانه ده ییر شمع لره، اوغلان کپنک دی
آیریلمازا واجب سؤزون آشکارا دئمک دی
تورکون دیلینین استادی آللاه دی دئمک دی
شیطانی اهورا بئلینه چاتما آی اوغلان
تورکم منه چوخ فارسجا قیریلداتما، آی اوغلان

الوداع

شاعر: یتیم عئیواض
مگر گؤرومورسن منیم حالیمی
قربان اولوم بوراخگینان قوی گئدیم
نه وار کسدیرمیسن دوروب یولومو
قربان اولوم بوراخگینان قوی گئدیم
*
ظالیم لیک ائیلییب باتما گوناها
الوداع گئدیم گلمرم داها
سنی آند وئریرم گؤیده آللاها
قربان اولوم بوراخگینان قوی گئدیم
*
نئجه اوجاقلارا کؤز وئرمیشم من
گؤزو گؤرموینهئ گؤز وئرمیشم من
آخی سنن گؤزلینه سؤز وئرمیشم من
قربان اولوم بوراخگینان قوی گئدیم
*
شاه اولدومسا تختیم یوخدو آی گؤزل
عزل گوندن بختیم یوخدو آی گؤزل
عئیواض جانا واختیم یوخدو آی گؤزل
قربان اولوم بوراخگینان قوی گئدیم
*

من بیر قایا اولوم، من بیر داغ اولوم

شاعر: یتیم عئیواض
من بیر قایا اولوم، من بیر داغ اولوم
سن سینم اوستونده اؤتن دومان، چم
من مئشه قوینوندا بیر بولاق اولوم
سن منیم حزین، شیزین زیمزیمه م
بیلیرسن او دم ده نه ایسته رم من؟
بیر من اولوم بیر سن
بیزه باشقا کیم لازیم دی گؤره سن؟
*
من بیر یاماج اولوم، بیر دوزَن اولوم
سن دوزَن ایچینده آچان آق لاله م

سن سه اططرافیمدا سوزَن پروانه م
بیلیرسن او دم ده نه ایسته ییرم؟
بیر من اولوم بیر سن
بیزه باشقا کیم لازم دی گؤره سن؟
*
من بیر آغاج اولوم، بیر بوداق اولوم
بیل کی آیریلمارام هئچ واخ کؤکومدن
من بوداق اوستونده بیر یارپاق اولوم
قورخورام پاییزدی گلن خزل دن
بیلیرسن آی گؤزل نه ایسته ییرم؟
بیر من اولوم بیر سن
بیزه باشقا کیم لازم دی گؤره سن؟
*
من بیر دنیز اولوم بیر عمّان کیمی
سن دنیز ایچینده اوزن تک گمیم
من بیر اومید اولوم بیر گومان اولوم
قویمارام کی سولسون او اومیدلریم
گل منیم له نه اولار اولگونان همدم
بیلیرسن آی گؤزل نه ایسته ییرم؟
بیر من اولوم بیر سن
بیزه باشقا کیم لازم دی گؤره سن؟
*
بیر من اولوم بیر سن، بیرده گؤی ده آی
بیرده گوللو چمن، ساکت آخان چای
حزین نغمه دئسین بلبل توراقای
هئچینی ایسته میرم آللاه دان داها
*
یئرین اولسون منیم گؤزومون اوسته
شاعرم دورارام سؤزومون اوسته
نولار باشیمی قویوم دیزین اوسته
هئچینی ایسته میرم آللاهدان داها
*
آتیب بیر کنارا فیکیری غمی
خیاللا سئیر ائدک گؤزل عالمی
دئییم گولوم سن له سحره کیمی
هئچینی ایسته میرم آللاه دان داها
*
داغلاری دومان سیز، چم سیز اولماسن
زمی ده سنبل سوز، دن سیز اولماسین
عیواضین بیر گونو سن سیز اولماسین
*

بو قیز نیه هاوالانیب گؤره سن - زلیم خان یعقوب

بو قیز نییه هاوالانیب گؤره سن

گؤرونمه میش بیر صنعت می یارادیب
بو قیز نییه هاوالانیب گؤره سن
جهنّم ده بیر جنّت می یارادیب
بو قیز نییه هاوالانیب گرره سن؟
*
اودا دوشموش، اودو آلمیر بوینونا
اودمو دوشوب اوره یینه، بئینینه؟
یئر اوزونو آلیب گئدیر چینینه
بو قیز نییه هاوالانیب گؤره سن؟
*
گؤینن گئدیر یئره دیمییر آیاغی
آسماندا اوچور ملک سایاغی
ائله بیل کی بودور عرشین دایاغی
بو قیز نییه هاوالانیب گؤره سن
*

دوداق قاچیر، گؤز گولور، اوز اوخویور
سئیره چیخیب، بیر سوسور یوز اوخویور
ظالیم قیزی گئجه / گوندوئز اوخویور
بو قیز نییه هاوالانیب گؤره سن؟
*
گول کولودو بوداغینی ایمیرم
« دیمه » دئییر توخونمورام دیمیرم
هاوالی دیر هاواسیندان دویمورام
بو قیز ننیه هاوالانیب گؤره سن؟
*
هارداهاردا گؤروب دیه سینی بیلمه دیم
صاجیبینی ییه سینی بیلمه دیم
نئیله دیم دی نییه سینی بیلمه دیم
بو قیز نییه هاوالانیب گؤره سن؟
*
نه آمانا فیکیر وئریب نه آها
من قول اولدوم، او چئویریب بیر شاها
بلکی تازا قوهوم اولوب آللاها
بو قیز نییه هاوالانیب گؤره سن؟
*
منی گؤروب گاه گونده، گاه کؤلگه ده
اوچ باتین دن رسوای اولدوم اؤلکه ده
گوناهکاری زلیم خاندی بلکی ده
بو قیز نییه هاوالانیب گؤره سن؟
*

کؤنلوم - مروارید دلبازی

کؤنلوم
داغ لاله سی ام، جانلی داغ ایستر یئنه کؤنلوم
داغلاردا سویوق بیر بولاق ایستر یئنه کؤنلوم
گؤی گورلایا، سئل سسلنه، داغلار، اولو داغلار
اوردان تزه بیر سؤز، سوراغ ایستر یئنه کؤنلوم
گورشاد یاغا، گوللر یویونا یاز یاغیشیندا
گؤی قورشاق آتا، چیلچیراغ ایستر یئنه کؤنلوم
گزدیم بو وطن مولکونو من قول – قاناد آچدیم
گول فصلی بو گولشن ده، باغ ایستر یئنه کؤنلوم
سؤز چوخدو سینه مده، منه مهلت وئره ایللر
سون منزیلینی چوخ اوزاق ایستر یئنه کؤنلوم
مروارید، عزیزین بو حیات، ائل سنی گؤزلر
اؤز عؤمرونه ائلدن دایاق ایستر یئنه کؤنلوم
*

نئینه ییم اؤله بیلمیرم - مروارید دلبازی

شاعر: مروارید دلبازی
*

سن قهقهه، من گؤز یاشی
هارداسان، کؤنلومون سیرداشی؟
توفانلی دیر عؤمرون داشی
سن گول، من گوله بیلمیرم
*
شنلیک ایچینده ایکن عالم
ندیر کؤنلومده کی بو غم؟
نئیله ییم کی، من بختی کم
دردیمی بیله بیلمیرم
*
غم اییب مغرور باشیمی
ایتیرمیشم سیرداشیمی
سئله دؤنن گؤز یاشیمی
اوزومدن سیله بییلمیرم
*
صحرادا بیر بیتمیش گولم
فصلی قورواق کئچن ایلم
ایسته ییرم سن سیز اؤلم
نئیله ییم اؤله بیلمیرم
*

گلسن گلر باهار فصلی

گلسن، گلر باهار فصلی
شاعر: مروارید دلبازی
*
گولم، سن سیز خزان اولسام
شَنَم ، من باغری قان اولسام
مه ام، دؤنسم، توفان اولسام
حزین سسلیم، خوش نفس لیم
یئتیشمزمی خزان فصلیم؟
*
اودام،سؤنس، کوله دؤنسم
آلاوام، پارلاییب سؤنسم
آسان سوسسام، چتین دینسم
حزین سسلیم، خوش نفس لیم
یئتیشمزمی خزان فصلیم؟
*
واریدین، واریدیم من ده
چیچکلندین، ایشیق، سن ده
ایشیقیم، گونشیم، نوروم
سؤزو دوز، قلبی بلوروم
حزین سسلیم، خوش نفس لیم
یئتیشمزمی خزان فصلیم؟
*

ایسته ییرم

شاعر: مروارید دلبازی
*
ایسته ییرم سنی سندن آلاردیم
گؤزللری اؤزتختیندن سالاردیم
اوره ییمی اوره یینه چالاردیم
سن یاناردین،من باخاردیم توستونه
*
اولدوز اولوب اؤز زیرومدن انه ردیم
دؤرنده کی ملک لری یؤنردیم
آل لاله یه قرنفیله دؤنردیم
سه پیلردیم یوللارینین اوستونه
*
ایسته سه یدیم وصالینا یئتردیم
من گول اولوب اوره یینده بیتردیم
اوردا بلبل فریادیلا اؤتردیم
من یاناردیم سن باخاردین توستومه
*
اؤلسم بیر گون گل قبریمین اوستونه
بیرجه دنه بنؤوشه قوی بسیم دیر
باش اوستونده بیر قارانقوش اؤته جک
اودا سنه منت دارلیق سسیمدیر
*