نصیر پایه گذار

نصیر پایه گذار دان بیر گؤزل جناس

یاریمین بوینوندا، اینجه بیر اینجی
اینجه لر ایچینده اودور، بیرینجی
اونون گؤزلرینین کیمیاسی وار
بیر باخیشدا قیزیل ائیلر بیرینجی

*
اینجی: مروارید، دُرّ
بیرینجی: اول، اولین 
بیرینجی: فلز برنز را، یعنی با یک نگاه فلز برنز را به طلا تبریل می کند.

گئده جک

شاعر: رامیز روشن

چتینی بیز اؤلونجه دی
گئده جک ، هامی گئده جک
بیز دونیادان گئدن تکی
دونیانین قانی گئده جک
*
سولاجاق باغچاسی – باغی
قورویاجاق سون بوداغی
دئنیزین سویو بالیغی
ساحیلین قومو گئده جک
*
بیر تَهَر، پیس می ، یاخشی می
یولا سالیب سون آخشامی
سؤندوروب سونونجو شامی
ان سون آدامی گئده جک
*

ائله داریخمیشام

شاعر: دومان بختیاری
ائله داریخمیشام، ائله دورموشام
بو گئجه باشیمدا دار هاواسی وار
اوتاغیم اوشویور، شعریم اوشویور
قارا ساچلاریمدا قار هاواسی وار
*
سکوتا بورونن ثانیه لرده
یاشیل آرزولاریم چورومک ده دیر
قالانیب گؤزومه حسرتین داغی
دووارلار اوستومه یورومک ده دیر
*
داریخان کوچه نین قاش قاباغیندا
قارقیشام، قابارام، یارایام ایندی
بو چیلپاق گئجه ده، بو قار گئجه ده
گئدیرم اؤزومو آرایام ایندی
*
یئنه ده سن سیزلیک، یئنه ده آغری
یئنه ده باغچالار آغلاییرمنی
آجی لحظه لرده، یاغیشین سسی
یاشیل یارپاقلارا باغلاییر منی
*
 

بیر آرزوم وار سئوگیلیم

بیر آرزوم وار سئوگیلیم
سئوگین اولایدیم سنین
یانلیز منه باخایدی
سنین قارا گؤزلرین
*
محبتین قورایدی
اوره ییمده آشیان
قلبیمی یارپاق کیمی
سولدورمایایدی هیجران
*
سئویدین بو دنیادا
سنی سئودییم قدر
مندن باشقا هئچ کسه
باخمایایدی او گؤزلر
*
آه بو گیزلی دردیمی
سؤیله دیم بولاقلارا
سؤیله دیم چمن لر
سؤیله دیم یاماج لارا
*
شاعر: حکیمه بلوری

بیر یئرده - علی آقا واحد

بیر یئرده
بساطِ مئی ده سوز یوخ کی، دئییرلر، حال اولور آمما
اولا گر باده بیر یئرده، نگارِ ساده بیر یئرده»
ینه، زاهید، اقلاً بیر صفا وار، سُفره ی مئی ده
نه گوسترمیش کدورت دن سوای سجاده، بیر یئرده؟
آلیبدیر کؤنلومی، حیرتده یه م کی، گؤزلرین فکری
نئجه بیر صید اولوب قسمت، ایکی صیّاده بیر یئرده
اسیری من کیمی مینلرجه وار، اول سروِ رعنانین
نه بیر دم اؤلدورور، نه ائیله ییر آزاده، بیر یئرده
منیم بو داغلار کی، سینه مه، اول لاله رخ چکمیش
که هرگز ائتمه میش شیرین، اونی فرهاده بیر یئرده
مقام و شأنین ایسترسه ن، اوجالسین «واحد» عالمده
چالیش تا خدمت ائت، تکمیل اولان اوُستاده بیر یئرده
*

هارداسان

شاعر: سعید اقبالی 

هایاندا قالدی گلمدی
گونوم قارالدی گلمدی
بو آیریلیق دا گؤزلریم
سولوب سارالدی گلمدی
*
هارداسان کی بو شهر
اینجیدیر منی بتر
بوش یئرین گولوم سیخیر منی
یولدا قالدی گؤزلریم
هر گئجه گونوزلریم
یاندیریر منی یاخیر منی
*
بو سئوگی دن نه سویله مک
گؤزوم قالیبدی اوندا تک
ندن دی بس بو ایسته مک
اورک ده قالدی گلمدی
گلمدی گلمدی
*
گؤزوم گودوربو یوللاری
سوزور هله اونا ساری
هله گودور گؤزوم یاری
به هاردا قالدی گلمدی
گلمدی، گلمدی
*
هارداسان کی بو شهر
اینجیدیر منی بتر
بوش یئرین گولوم سیخیر منی
یولدا قالدی گؤزلریم
هر گئجه گونوزلریم
یاندیریر منی یاخیر منی
*

گئتمه یار

شعر: سعید اقبالی

گئتمه یار، گئتمه یار
سن منی ترک ائتمه یار
گئتمه یار گئتمه یار
اوره ییمی اینجیتمه یار
*
سنه محتاجم اینان
آی منی درده سالان
سندن اوتری اؤلورم
گئتمه بیر لحظه دایان
*
سنی مندن آیریسی
بو قدر چوخ ایسته مز
بئله کی من دئییرم
سنه عاشقم دئمز
*
اوره یی داش گؤزلیم
هامی دان باش گؤزلیم
سنین الیندن اولوب
گؤزلریم یاش گؤزلیم
*
گئتمه یار گئتمه یار
سن منی ترک ائتمه یار
گئتمه یار گئتمه یار
اوره ییمی اینجیتمه یار
*
هامی بیلسین بونو کی
سنی حدسیز سئویرم
سنه عاشقم دئمز
بئله کی من دئییرم
*
گؤزلریندن اوخورام
نه دئییرسن گؤزلیم
قوی بونو بیلسین هامی
سن منیم سن گؤزلیم
*
سنه محتاجم اینان
آی منی درده سالان
سندن اوتری اؤلورم
گئتمه بیر لحظه دایان
*
سنی مندن آیریسی
بو قدر چوخ ایسته مز
بئله کی من دئییرم
سنه عاشقم دئمز
*

دنیا

شاعر: رامیز روشن
منیم بالام بو دنیایلا اویناما
سن جاوان سان، دنیا قوجا دنیادیر
دشمن ندیر؟ دوست ائوینی، دوست ییخار
بیلن بیلیر دنیا نئجه دنیادیر
*
عؤمره – گونه اعتبار یوخ ازل دن
بیرده دؤنوب یاپراق اولماز خزل دن
بئشینیدن بیزه تابوت دوزلدن
بئله ییندن کفن تیکن دنیادیر
*
کیم نه آنلار بو زمانین ایشیندن
چوخلارینی گئچیردیبدیر دیشیندن
محکم یاپیش پاپاغینین باشیندان
باشدان پاپاق آلیب قاچان دنیادیر
*

وار گولوشونده

شاعر: بهرام نصیب اف
آل الوان گئییب چمن
گول آچیب تر یاسمن
سن دانیش قوی سسینی دینله ییم دویونجا من
*
یازین باهرین نفسی وار گولوشونده
سئویب سئویلمک هوسی وار گولوشونده
باخیشین جانلار آلیر، جانلار آلیر یار
عاشیقی درده سالیر، درده سالیر یار
گولوشون نغمه کیمی ، نغمه کیمی
گاه ائنیر، گاه اوجالیر، گاه اوجالیر یار
*
خلقیمین گؤزلی سن
عشقیمین ازلی سن
دویمارام سؤزلریندن
هر سؤزو مزه لی سن
*

تکجه منیم اولایدین

شاعر: جئیلان خانیم
سن بیر دنیز اولایدین،من ساحیل ده بیر قایا
کوکره یه یدین قالایدین، سینه مه چیرپینایدین
*
نه اولایدی سئوگیلیم، باخ بئله جه قالایدین
اوزورمنی تنهالیق،تکجه منیم اولایدین
*
سن بیر چمن اولایدین، من بیر شئحلی بنووشه
سن گونشه باخایدین، من ده سنه همیشه
*

آذربایجاندان دانیشاق

شاعر: علی رضا خیابانی

گل اوتوراق دیز -  دیزه بیز
آذربایجان دان دانیشاق
اوجامان ارک سهندیدن
بیز ساوالاندان دانیشاق
*
هجر ایله قوچ نبی دن
سولوب سارالمیش زمی دن
بورغانا دوشموش گمی دن
ظلولم کارخان دان دانیشاق
*
میصری قیلینج کوراوغلودان
ائل قالایانلار اوغرودان
ایری اوتورساق دوغرودان
داغدا دوماندان دانیشاق
*
گل سارانین میثاقیندان
اؤرپه ییندن یاشماغیندان
باشینداکی دوواغیندان
دردلی چوباندان دانیشاق
*
ستار خان دی قاراداغلی
ایگیت اوغلان ائله باغلی
ظلم الیندن اوره ک داغلی
چیرپینان جان دان دانیشاق
*
سولدوزودا یاد ائده لیم
محنتی برباد ائده لیم 
قوناق گئدیب شاد ائده لیم
اپپاق جاواندان دانیشاق
*
خیاوانلی وفالی دیر
عشقه دوشوب سئودالی دیر
دوز ایلقاری صفالی دیر
تبریزدن دان دان دانیشاق
*

آچیل سحر

شاعر: فرهاد ابراهیمی   
رجب ابراهیمی کورعباسلو ( فرهاد )

آچیل سحر، آچیل سحر، دوغ گونش
تنگه گلدیم، گئجه، ظلمت الیندن
قارانلیق، کؤنلومو سیخدی، توتولدو
قولاغیم، بایقوشون، شوم نغمه سیندن
آچیل سحر ائللریمیز اویانسین
گونش دوغسون، قیزیل نورا بویانسین
*
دومان توتوب هرطرفی، گؤرونمور
نه بیر اولدوز، نه ده بیر آی پاراسی
تئز یئتیر اؤزونو باغریم قان اولدو
ایشیقلانسین کؤنلوم، گئتسین قاراسی
آچیل سحر ائللریمیز اویانسین
گونش دوغسون، قیزیل نورا بویانسین
*
گئجه اوزون، من ده یالقیز، یوخوم یوخ
گئجه قوشو منه همدم اولوبدور
اوره ییم تله سیر سنی گؤرمه یه
فراغیندا، گول تک رنگیم سولوبدور
آچیل سحر ائللریمیز اویانسین
گونش دوغسون، قیزیل نورا بویانسین

داغیل ای دنیا داغیل

شاعر: وصال ابراهیم اف

داغیل ای دنیا داغیل، گؤر کیمه عاشق اولموشام

حیاتیم اولدو ناغیل، گؤر کیمه عاشق اولموشام

دوشونوردوم اونونلا ساده جه خوشبختلیغیمی

الیمدن آلدی فلک بیر گئجه خوشبختلیغیمی

دئیدی من دن آمان آللاه نئجه خوشبختلیغیمی

من ده یوخدو نیشانی گؤر کیمه عاشق اؤلموشام

داغیل ای دنیا داغیل ، گؤر کیمه عاشق اولموشام

حیاتیم اولدو ناغیل، گؤر کیمه عاشق اولموشام

منی سئون بیرینی سئومه دی منیم اوره ییم

منی سئومیین بیرینه آخی نیه عاشق اولموشام

داغیل ای دنیا داغیل ، گؤر کیمه عاشق اولموشام

حیاتیم اولدو ناغیل، گؤر کیمه عاشق اولموشام

او ملک دئییلدی گیردی آما بیر باشقا دونا

منی حئیران ائله دی حیاتیمی چاتدیردی سونا

اوره ییم یاتدی گؤزوم باخدی خمارلاندی اونا

اوره ییم یاتما آییل گؤر کیمه عاشق اولموشام

داغیل ای دنیا داغیل ، گؤر کیمه عاشق اولموشام

حیاتیم اولدو ناغیل، گؤر کیمه عاشق اولموشام

منی سئون بیرینی سئومه دی منیم اوره ییم

منی سئومیین بیرینه آخی نیه عاشق اولموشام

داغیل ای دنیا داغیل

حیاتیم اولدو ناغیل

من ائله آغلییرام یاره بو چوخ گولمه لی دیر

دئییرکی مندن اؤترو بیر نئچه اوغلان دلی دیر

بئله عؤمور ائیله مکدن سه اؤلوم صرفه لی دیر

جانیمی آلسین عزرائیل گؤر کیمه عاشق اولموشام

داغیل ای دنیا داغیل ، گؤر کیمه عاشق اولموشام

حیاتیم اولدو ناغیل، گؤر کیمه عاشق اولموشام

منی سئون بیرینی سئومه دی منیم اوره ییم

منی سئومیین بیرینه آخی نیه عاشق اولموشام

داغیل ای دنیا داغیل

حیاتیم اولدو ناغیل

*

سنی سئومک

شاعر: خیام

سن ملکسن، سنی تانریم منه گؤندردی
بیر یول آچدی گؤی اوزوندن، یئره ائندیردی
من ده سئودیم، ساکین ائتدیم سنی قلبیمده
نه یاخشی کی، وارسان عؤمروم منیم عؤمرومده
حیاتیمین ان بخته ور آنیندایام
نه قدیر جانیمدا جان وار، یانیندایام
سنی سئومک، اؤزون کیمی شاهانه دیر
دلی کؤنلوم عشقین ایله دیوانه دیر
بیر سؤزوم وار اوره ییمده سنه عایددی
سئویرم من بونا آللاه، اؤزو شاهیددیر
اونو بیل کی من حیاتا ئنه گلسئیدیم
سنی آنجاق سئوه جکدیم یئنه سئوسئیدیم
دئنیز کیمی گؤزلرین وار، درین – درین
شکر کیمی سؤزلرین وار، شیرین – شیرین
دنیا – عالم منیم اولسا، سن سیز اولماز
جانیم سندن، روحوم سندن آیری قالماز
سنی سئومک، اؤزون کیمی شاهانه دیر
دلی کؤنلوم عشقین ایله دیوانه دیر
*

او قیزین تویودور

شاعر: نصرت کسمنلی
گؤیده اولدوز دنه – دنه
سایدیم اونو دؤنه – دؤنه
خاطره لر دیندی یئنه
آچیلما ساباحیم آچیلما
آچیلما ساباحیم
*
کیم دئییر، غم اویودور
هجران بیر درین قویودور
ساباح او قیزین تویودور
آچیلما ساباحیم آچیلما
آچیلما ساباحیم  
*
گؤی دن یئره  ائندی گونش
توی شامینا دؤندو گونش
منیم اوچون سؤندو گونش
آچیلما ساباحیم آچیلما
آچیلما ساباحیم  
*
چوخدا گؤی ده چوخ دو اولدوز
داها منده یوخدو اولدوز
هر شئیی اونودوب او قیز
آچیلما ساباحیم آچیلما
آچیلما ساباحیم  
*

حیدربابا منظومه سیندن - شهریار

بیر اوچایدیم بو چیرپینان یئل ایله
باغلاشایدیم داغدان آشان سئل ایله
اغلاشایدیم اوزاق دوشن ائل ایله
بیر گؤرئیدیم آیریلیغی کیم سالدی
اؤلکه میزده کیم قیریلدی کیم قالدی

سئویج ایلن دردی - غمی قاتمیشام

شاعر: دهقان
سئویج ایلن دردی - غمی قاتمیشام
عقل – هوشو بوگون باشدان آتمیشام
بختیم یاتیب من ده بوگون یاتمیشام
آرییان یوخ، آختاران یوخ، تاپان یوخ
*
کیمسم یوخدور گلین حالیم سوروشسون
کوسموش اولسا بوگون  من له باریشسین
قول بوینوما سارماشیق تک ساریشسین
شاید دویا محبتین گؤزلریم
بولاق کیمی آخیب گله سؤزلریم
*
من « دهقانام» محبته عاشقم
گؤزل لرده سؤز – صحبته عاشقم
ائل قیزیندا من عصمته عاشقم
سارا اؤزون تاپشیریبدی سئل لره
تاریخ بویو ایز قویوبدور ائللره
*

امان ائللر منی واخت سیز قوجالتدی

شاعر: مظاهر داشقین
امان ائللر منی واخت سیز قوجالتدی
ناموس دردی، غیرت دردی، ائل دردی
سیز ائله بیلمه یین چکیرم بوگون
دولت دردی، شهرت دردی، وار دردی
*
کئچیرتدیم هجران لا جاوان واختیمی
چاغردیم گلمدی قارا باختیمی
بیر باغبانام چئویریبدی تاختیمی
چمن دیدی، چیچک دردی، خار دردی
*
ایتیرمیشم وطنیمی، ائلیمی
سینه مین اودلاری، یاخیر دیلیمی
کسیب طاقتیمی، بوکوب بئلیمی
باهار دردی، امک دیدی، بار دردی
*
بیر زامان جان دئین دوسلاریم هانی
مردیله نامردیله گرزلریم تابی
نئجه قوجالتماسین، تولک طوفانی
قارقا دردی، قوزغون دردی، سار دردی
*
سونسوز سرگذشتین سؤیله ییب داشقین
داغلار – داشلارا هئی دئییب داشقین
دردلی مظاهیری ائیله ییب داشقین
آنا دردی، وطن دردی، یار دردی
*

منزل اوزاق، من پیاده، عؤمور از

شاعر: شجاعت
منزل اوزاق، من پیاده، عؤمور از
یورولوب یوللاردا قالانام داها
منیم کی دردیمه چاره دتاپیلماز
دردی غم الیندن تالانام داها
*
گئن گونده طایفالی، دار گونده تکم
بیر ماهنی یا بندم، بیر نازیک توکم
گرک کی وطن ده، غریب لیق چکم
چکینه – چکینه دولانام داها
*
اودومو سؤندوروب، ایلین سویوغو
سینه مه درد سالیب، دردلر وورغونو
دئسه لر اینانما، شجاعت بونو
من بیر افسانه یم، یالانام داها
*

هر عاشقه اؤز ایسته دیگی یار گؤزل دیر

شاعر: علی آقا واحد
هر عاشقه اؤز ایسته دیگی یار گؤزل دیر
هر بلبله اؤز سئودیگی گلزار گؤزل دیر
ایلقاری گؤزل اولمویانی ایسته مز عاشق
جان وئر ائله جانانه کی ایلقاری گؤزل دیر
من بیر اوجا بویلو گؤزلین زلفونه بندم
رخساری گؤزلشیوه سی رفتاری گؤزل دیر
یوزلرله گؤزلباشقا ولایت ده چوخدور
آمما بیزیم اؤلکهبوتون ائلجاری گؤزل دیر
یار اولسا منیم له، منه بیگانه نه ائیلر
اوچماز ائله بیر خانه کی معماری گؤزل دیر
من ایسته دییم چون او گولو عئیرده سوئدی
قیمتلی او شئی دیر کی خریداری گؤزل دیر
واحد منه انصاف ائله تحقیر ایله باخما
احسن بئله بیر شاعره، اشعاری گؤزل دیر
*

اونودا بیلمزسن آرتیق

شاعر: خانیم – اسماعیل قیزی
اونودا بیلمزسن آرتیق
حسرتیمنن اوره یینه کؤز دوشر
یا دنیا سنه دئدیم سؤز دوشر
یئنه ده یولونا همین ایز دوشر
سن منی اونودا بیلمزسن آرتیق
*
خاطرین سنین یادیمدا قالاجاق
او سئوگی هرآن منیم له اولاجاق
بیلیرم کی گؤزلریم ده دولاجاق
سن منی اونودا بیلمزسن آرتیق
*
بو شهردن چیخیب گئده بیلرسن
ایللری ایللره قاتا بیلرسن
بیر وخت سئودیینی دانا بیلرسن
سن منی اونودا بیلمزسن آرتیق
*
سنین طالعینده ایزیم قالیبدیر
سنین خیالیندا سؤزوم قالیبدیر
بیلیرم کی منده گؤزون قالیبدیر
سن منی اونودا بیلمزسن آرتیق
*
بو سوئگی سنین کؤلگه نه دؤنه جک
یئرده اولسان او گؤیلردن لئنه جک
یوخودا آدین دیلمه تئز- تئز گله جک
سن منی اونودا بیلمزسن آرتیق
*

اوغول و آتا - نصیر پایه گذار

اوغول و آتا
شاعر: نصیر پایه گذار

بیر اوغول آروادی نین بوش سؤزونه
آتاسین قیش دا اؤتوردو ائشییه
او سویوخ دا آتاسی چوخ دولانیب
اوغولو گؤرمه یه دوردو کئشییه
*
آز قالیردی گئجه چاتسین یاری یا
شاختالی قار، قووردو نفسی
قاپی نین زنگینی ویردی آتاسی
قاپینی آشدی اؤز اوغلان نوه سی
*
اوغلوما دئنن کی گلسین قاپی یا
یا منه بیر پتو وئرسین  بو گئجه
بیلمیرم دؤزمه لیین صبحه کیمی
بو کولک ده بو قارانلیقدا نئجه
*
کیشی نین اوغلو ائشیتجک بو سؤزو
دئدی بیر جوت پتو خرپشته ده وار
گل آپار وئر ایکیسین ده آتاما
دئنه های سالما دییرلر به نه وار
*
نوه سی تا باباسین سالدی یولا
قاییدیب ائوده دئدی، وای منه
باباما بیر پتو وئردیم آی آتا
بیر پتو ساخلامیشام من ده سنه
*

تئز گل - زینال جبار زاده

شاعر: زینال جبارزاده
گئنه گؤی اوزونو بولود آلدی یار
آه نیه گلمدی، هاردا قالدی
گؤزومو یولدا قویوب بیر یوبانان یار، نه ائدیم
گؤزومو یولدا قویوب بیر یوبانان یار
*
آه، باخیرام یاغیشا، گئدیرم اوباشا، گلیرم بو باشا
آه، باخیرسان یاغیشا، بلکه ده باشینی، آتیرسان بالیشا
گولوم هاردا قالدی، قاش قارالدی
گؤزومو یولدا قویوب بیر یوبانان یار، نه ائدیم
گؤزومو یولدا قویوب بیر یوبانان یار
*
یار گلیر گؤروشه، گؤزوم آیدین یار
سوروشه – سوروشه، گؤزوم آیدین
ایسلانیب اوستو – باشی یاز یاغیشندان یاریمین
تؤکولور بیر جان آلان ناز باخیشیندان
*
آه قربانام نازینا، یوردومون قیزینا 
قیشینا یازینا  ، بال کیمی سؤزونه
قاپ – قارا گؤزونه، آی کیمی اوزونه
*
گولوم خوش گلمیسن، منیمکی سن
آی اؤتور، ایل دولانیر، اؤز گؤزلیمسن گؤزلیم
*

شاه گؤلو - نصیر پایه گذار

شاه گولو

شاه گؤلونده چیخیب گول - چیچک دیزه
مینا گولو قاش - گؤز آتیر نرگیزه
یئل اله ر باشیزا گول ریزه – ریزه
یوزلر قوزو – قربان کسه ریک سیزه
عزیز دوسلار دورون گلین تبریزه
*
تبریزین قیش دادا یاز هاواسی وار
دانیشیقلاریندا ساز هاواسی وار
بیلمیرسیز نه گؤزل ناز هاواسی وار
گؤزل لیک ده تبریز ائیلر معجزه
سیز گؤزل لر گلین گؤزل تبریزه
*
تبریز آچیب گؤزل لره قوجاغین
گول ایله بزه ییب دؤرد بیر بوجاغین
شفق یاندیراندا آخشام اوجاغین
گتیررلر یوزلر گلین تبریزه
سیز عزیزلر گلین گؤزل تبریزه
*

بایاتیلار - نصیر پایه گذار

نصیر پایگذار سلطان جناس
*
فلک بیزی یامان اودا سالیبدیر
اولمایا الینه او، داس آلیبدیر
آسیر، کسیر، سئچیر، بیچیر، تله سیر
بیزلری نظردن، اودا سالیبدیر
*
نازلی یاریم، ناز گتیریب بیر سَلَه
دورما گولوم، تاپ منه ده وئر سَلَه
یازدا، یارین نازینا وار چوخ نیاز
آل نازی جان قیمتینه وئرسله!
*
دریادا اوزوم اولماز
هر قورا اوزوم اولماز
یار مندن جان ایسته سه
یوخ دئییم، اوزوم اولماز
*
قویلانیب قارا اوزوم
آغ اوزوم، قارا اوزوم
یاریم گیلئیلی گئتدی
اولاسان قارا، اوزوم
*

قالاجاق - نصیر پایه گذار

قالاجاق
شاعر: نصیر پایه گذار ( استاد جناس )
*
آددیملاری دره – دره ( در حال رفتن قدم به قدم)
داغی گزدیم دره – دره ( درّه به درّه )
دره دن گول دره – دره ( در حال چیدن )
اوره ییمیز شاد قالاجاق
*
داغی گزدیم قالا – قالا ( قلعه به قلعه )
قویمادیم بیر قالا، قالا ( یک قلعه باقی بماند)
هر قالادا قالا – قالا
آغیزدا بیر داد قالاجاق
*
اگر داملا، داما داما ( بر بام چکه کند)
ییخار دامی داما – داما
قالمییاجاق دام آداما
آدامدان بیر آد قالاجاق
* 

تنها گئجه لرین قادینی یام من

شاعر: نازیله صفرلی

تنها گئجه لرین قادینی یام من

روحومو اوخشاماق آیا دوشوبدور
تانری سئودالاری پایلییان زامان
منیم سئوگی پاییم چایا دوشوبدور
سولغون یاناغیمی کولک لر اوخشار
دوداغیم اؤپوشو سولاردان آلیر
سن هاردان بیله سن سئومک نه دئمک
سئونلر صبحه جن یوخوسوز قالیر
اولدوزلار رفیقیم تورپاق سیرداشیم
ال آچیب گؤیلره ذکر ائیلییرم
ائله عاشق لری گؤرورم بعضن
تنها قالدیغیما شکر ائیلییرم
دئیین وفاسیزا نیگران اولما
یوخونو قاتماق دان کئچیب منیم کی
یئنی بیر یولدایام یئنی دونیادا
یالانلار ساتماق دان کئچیب منیم کی
سئوینج دن فرح دن سوزن اولموشام
ساچیما اینجی لر دوزن اولموشام
دریالار قوینوندا اوزن اولموشام
چایلاردا باتماق دان کئچیب منیم کی
منیم چون جانلاردان کئچیلیر آرتیق
شان شهرت اینیمه بیچیلیر آرتیق
دقیقه م صانیه م اؤلچولور آرتیق
آسوده یاتماق دان کئچیب منیم کی
باش ایر اچیلان سحر اولکه یه
داها اییلمه رم اییل مین کره
ائله قاتیلمیشام دلی دردلره
باشیمی قاتماق دان کئچیب منیم کی
فرحیم چوخالیر سئوسه لر منی
نازیله بخته ور دئسه لر منی
اویادیر هر سحر بوسه لر منی
کدر اویاتماقدان کئچیب منیم کی

*

بئزه ک

بنزه‌ک/ سوسن نواده‌رضی- حمیدی علیار

علی‌آقا واحد
سئوگیلیم، عشق اولماسا، وارلیق بوتون افسانه‌دیر
عشقدن محروم اولان، انسانلیغا بیگانه‌دیر
*
سوسن رضی
سئوگی انسان روحونون کامیل‌لییه امکانی‌دیر
سئوگی‌سیز آباد اولان کون و مکان ویرانه‌دیر
انسانین اولقونلوغا سئیری کئچیرمیش شبهه‌دن
شبهه عشقه یول آچار، عشقین یولو ایمانه‌دیر
*
علی‌آقا واحد
سئوگی‌دیر، یالنیز محبت‌دیر حیاتین جوهری
بیر کؤنول کی عشق ذوقین دویماسا، غمخانه‌دیر
*
سوسن
جؤوهر-ی-نادیر ندیر، جؤوهر بیلن‌دن سورمالی
آنین عشقی جان ائوینده جؤوهر و دردانه‌دیر
کائناتین سئیری نظم آلمیش مدار ِ عشقده
عشقین اعجازیمی‌دیر، یوخسا کی بو سئودا نه‌دیر؟
*
علی‌آقا واحد
من اسیر عشقی‌یم، اؤز خالقیمین، اؤز یوردومون
سئومه‌ین اؤز خالقینی، اؤز یوردونو دیوانه‌دیر
*
سوسن
ذؤوق ِ عشقین لذتین عشقین شهیدیندن سوروش
عشق ایله ایستر یاشام، ایستر اؤلوم شاهانه‌دیر
یوردونا عاشیق اولان هر محنته تاب ائیله‌یر
قیبله‌گاهی حق یؤنونده، سجده‌سی عرفانه‌دیر
*
علی‌آقا واحد
قوی وطن داییم ایشیقلانسین، گؤزل بیر شمع تک
کؤنلوم اول شمعین ضیاسین سئیر ائدن پروانه‌دیر
*
رضی- علیار
وارلیغی قور-قور یانان پروانه‌لیکدن آنلایار
شعله‌ی شمعین ده مئیلی جذبه‌ی طوفانه‌دیر
وطن اوغروندا سویولسا دریسی آسلان‌لارین
هئچ وئجه آلماز گئدن قان، یوخسا جان‌دیر یا نه‌دیر؟
*
علی‌آقا واحد
نازنین رعنا گؤزل‌لردیر، باخیرسان هر یانا
بس بو تورپاق ایندی بیر جنت دگیل، آیا نه‌دیر؟!
*
علیار
یوردوموز باشدان باشا باخسان گؤزل‌لیک یوردودور
دویغولو عاشیق‌لره هر آددیمی میخانه‌دیر
بو جهاندا بنزری یوخدور، یقین تایسیزدیر او
اول جهاندا اوخشاری تام روضه‌ی- رضوانه دیر
*
علی‌آقا واحد
اؤلکه‌میزده گؤر نه‌لر وار، باشقا بیر عالمده‌ییک
هر چیچک بیر نازنین، هر غؤنچه بیر جانانه‌دیر
*
علیار- رضی
بولبولون جهجه سسی، شن اؤتمه‌یی عشق اوزره‌دیر
اله، نرگیز، سوسنین ناز ائتمه‌یی مستانه‌دیر
عالم اهلین بیز شاشیردیب حیرته دالدیرمیشیق
سر به سر عالمده آذربایجان بیر دانه‌دیر|
*
علی‌آقا واحد
“واحید”م من، سئوگیلیم، مندن خیانت گؤرمه‌سن
شاعیرم، عشقیم ده اؤز قلبیم کیمی مردانه‌دیر!
*
علیار
توشلاسین قوی هر طرفدن بوللو تهمت‌لر بیزی
یار آگه‌دیر کی بیزده داورانیش رندانه‌دیر
عشقده ثابت اولان، علیار، اوسانماز، سیزلاماز
عشقه تسلیم اولموسانسا، سوس داها، غوغا نه‌دیر؟
*

بیر نئچه بایاتی

بایاتیلار
من عاشق کئچمه مندن
چای مندن، چشمه مندن
اینانما هر سؤزه سن
یازیغام کئچمه مندن
*
بو درد منی تنگ ائیلر 
وورار باشا دنگ ائیلر 
عشق عاشیقی اؤلدورمز
سارالدار بد رنگ ائیلر
*
باغا گیرسن بار مندن
هئیوا منده نار مندن
بیلمیرم نه دئمیشم
اینجییبدیر یار مندن
*
من عاشقم اوزونه
بونا سنین سؤزون نه
سن مندن ال اوزمه دین
باخدین اؤزگه سؤزونه

آنالار – مهناز. ص ( آیتای)

آنالار – مهناز. ص ( آیتای)
آنالار شعرینی یازماق ایسته‌دیم
قلم، ایمک‌له‌دی کؤرپه قیز کیمی.
اوره‌ییمی امدی، یازدی عشق‌دن
یوللارا قالارقی دوشن ایز کیمی.

لایلاسین اوخودو اوزون گئجه‌لر
ییرغالانیب، یوموب گؤزون گئجه‌لر
شعریمه قول چکیب سؤزون، گئجه‌لر
دالغا-دالغا، درین بیر دنیز کیمی.

سئوگی سؤیکه‌نیبدیر آنا قوینونا
یاواش – یاواش قولون سالیب بوینونا
قاتیشیب بالانین هر نه اویونونا
کؤکله‌نیب چاغلانان بیر قوپوز کیمی.

ساریلیب اوشاغین آیاق آلتینا
اوره‌یی، دیله‌یی قویما آلدانا
«آیتای»ین لایلاسی قاریشدی قانا
خزل نغمه‌سینی چال پاییز کیمی.

بایاتی

بیر گؤزل بایاتی

آدام وار کی ، آداملارین ناخیشی دیر
آدام وارکی حیوان اوندان یاخشی دیر
ادام وارکی دیندیریرسن جان دئیر
آدام وار کی دیندیرمه سن یاخجی دیر

 Adam var ki, adamların naxşıdır
 Adam var ki, heyvan ondan yaxşıdır
 Adam var ki, dindirərsən can deyər
 Adam var ki, dindirməsən yaxşıdır 

آغلارام - سلیمان رستم

شاعر: سلیمان رستم

اؤزومدن تئز الهامیم قوجالسا، آغلارام من
كؤنلوم خوش آرزولاردان بوشالسا، آغلارام من
*
دوز یول سئچدی گئنج لیگیم
اوددان كئچدی گئنج لیگیم
شعـــــره كؤچدو گئنج لیگیم
شعرلریمین ساچی آغارسا، آغلارام من
باهارینا یاغیش - قار یاغسا، آغلارام من
*
دار گونده آغلامادیم
سینه لر داغلامادیم
قارالار باغلامادیم
الیمده بیر گون قلم آغلارسا، آغلارام من
كؤنوللره یولومو باغلارسا، آغلارام من
*
پوچ دور وقارسیز حیات
زحمت سیز، بارسیز حیات
هئ چدیر  بهارسیز حیات
نغمه لر باهاریمی  ایتیرسم، آغلارام من
ایلهام آدلی واریمی ایتیرسم، آغلارام من
*

سؤیله - زلیم خان یعقوب

سؤیله

درد ایچینی یاندیراندا

آپار داغا داشا سؤیله

بیر عؤمورده نه لر چکدین

نه لر گلدی باشا سؤیله

*

قالدیر زیله، اندیر بمه

سس وئر سنی دویان کسه

دردینی حاق ائشیتمه سه

گؤزونده کی یاشا سؤیله

*

اییلر کئچسه سرد، نئجه دیر؟

واخت اولسا نامرد، نئجه دیر؟

دئسه لر کی درد نئجه دیر؟

چک الیندن حاشا سؤیله

*

آذربایجاندان دانیشاق

شاعر: علی رضا خیابانی
گل اوتوراق دیز -  دیزه بیز
آذربایجان دان دانیشاق
اوجامان ارک سهندیدن
بیز ساوالاندان دانیشاق
*
هجر ایله قوچ نبی دن
سولوب سارالمیش زمی دن
بورغانا دوشموش گمی دن
ظلولم کارخان دان دانیشاق
*
میصری قیلینج کوراوغلودان
ائل قالایانلار اوغرودان
ایری اوتورساق دوغرودان
داغدا دوماندان دانیشاق
*
گل سارانین میثاقیندان
اؤرپه ییندن یاشماغیندان
باشینداکی دوواغیندان
دردلی چوباندان دانیشاق
*
ستار خان دی قاراداغلی
ایگیت اوغلان ائله باغلی
ظلم الیندن اوره ک داغلی
چیرپینان جان دان دانیشاق
*
سولدوزودا یاد ائده لیم
محنتی برباد ائده لیم 
قوناق گئدیب شاد ائده لیم
اپپاق جاواندان دانیشاق
*
خیاوانلی وفالی دیر
عشقه دوشوب سئودالی دیر
دوز ایلقاری صفالی دیر
تبریزدن دان دان دانیشاق
*

دیمه یین - شاعر: زلیم خان یعقوب

دیمه یین
گؤردویوندن گؤزو – کؤنلو بولانار
ننه لرین اوره یینه دیمه یین
یارالاری گؤز- گؤز اولار سولانار
ننه لرین اوره یینه دیمه یین
*
ساپا دؤنر، یوماق اولار، بوکولر
خالی کیمی ایلمه – ایلمه سؤکولر
شوشه قلبی پارچالانار تؤکولر
ننه لرین اوره یینه دیمه یین
*
دئمه یین کی بیر آیاقی گوردادیر
عؤمرو – گونو اجل آدلی توردادیر
نوه لرین ناغیل پایی اوردادیر
ننه لرین اوره یینه دیمه یین
*
بیر بولاقدی ایچیلمه سه کور قالار
بیر اوجاقدی، کؤزو سؤنر، قور قالار
ایلدن – ایله ساچلاریندا قار قالار
ننه لرین اوره یینه دیمه یین
*
داغ اولسادا آجی سؤزدن اینجه لر
بوجاق سئچر، اؤز یئرینی کونج ائلر
شیرین کلمه قوجالانی گئنج ائلر
ننه لرین اوره یینه دیمه یین
*
یاخشیباخین آرخایا سیز، اؤنه سیز
اوجالیق وار ندن اؤتری ائنه سیز
فیکیرله شین ساباح سیزده ننه سیز
ننه لرین اوره یینه دیمه یین
*
گردن سینار، کمر دوشر، بئل اینر
توخونارسان، اوره یینده تئل اینر
انصاف ائدین آی نا انصاف گلین لر
ننه لرین اوره یینه دیمه یین
*

دنیانین نه گؤزل واختی گؤروشدوک

شاعر: زلیم خان یعقوب
اریدی حسرتیم آچیلدی بوزوم
جنّت عطری وئردی، چؤره ییم دوزوم
گئتدی قار – بورانیم، قالدی نوروزوم
آللاه اوزوموزه باخدی گؤروشدوک
اوز – اوزه دایاندیق، گؤز – گؤزه دوردوق
دنیانین نه گؤزل واختی گؤروشدوک
*
قارین قار عطری وار، بارین بار عطری
بیر چیچک عطری وار، بیرده یار عطری
آرزولار دالغاسی، دویغولار عطری
اورک دن - اوره یه آخدی گؤروشدوک
دنیانین نه گؤزل واختی گؤروشدوک
*
قربان کسیلیرم من بو آخشاما
دانیشدین دیلیندن بال داما – داما
سنین تک ایشیغا منیم تک شاما
طالع اؤز اودونو یاخدی گؤروشدوک
دنیانین نه گؤزل واختی گؤروشدوک
*
آبادلیق گتیردی بیر ویرانلیغا
گلیشین سون قویدو لال قرانلیغا
زلیم خان گئنه ده چاتدی خانلیغا
گولدو گؤزللیین تاختی گؤروشدوک
آی سلام گؤندردی گون احسن دئدی
دنیامین نه گؤزل واختی گؤروشدوک
*

ماکو داغلاری - حامد ماکوئی

ماکو داغلاری
باش چکیب زیروه سی، بولوددان کئچن
باشینا اولدوزلار، اینجی لر توکن
کهکشانین سینه سینده، یوخلویان
بولودلار دؤشوندن، سرین سو ایچن
چیسکینلی دومانلی، ماکو داغلاری
ایگیت قهرمانلی، ماکو داغلاری
*
عؤمورلر کئچیردیب، بوکولوب بئلی
قار قونوب باشینا، آغاریب تئلی
ائیلیب کؤلگه سین، آچیب ائل لره
قورویور قارشیندا، یاشییان ائلی
آنا مهربانلی، ماکو داغلاری
ایگیت قهرمانلی، ماکو داغلاری
*
بیلمک اولماز، عؤموروندن، یاشیندان
دورنا قالخیب، کئچه بیلمز، باشیندان
عظمت لی، حادیثه لر اوخونور
قایاسیندان، دره سیندن، داشیندان
سینه سی داستان لی، ماکو داغلاری
ایگیت قهرمانلی، ماکو داغلاری
*
ایل بویو بورونر، دومانا، چمه
باش ایمز دونیادا، کدره، غمه
بیر رشید قوجامان پهلوان کیمی
شهرتی یاییلان بوتون، عالمه
ایفتیخارلی شانلی، ماکو داغلاری
ایگیت قهرمانلی، ماکو داغلاری
*
گؤیده اولدوزلارلان، باش - باشا چاتان
دؤشونده آصلان لار، باش قویوب یاتان
قارتال لار یوواسی، پلنگ اویناغی
اوجا قایالارا تفاخر ساتان
ببرلی، اصلان لی، ماکو داغلاری
ایگیت قهرمانلی، ماکو داغلاری
*
آغ بورونر قیشدا، یاشیل گئیر یاز
دؤشلرینده گول - چیچک دن، یئر اولماز
جوشغون بولاغلاری، قایناییب جوشار
قار یئره دوشونجه، چیچه گی سولماز
گوللو - گولوستانلی، ماکو داغلاری
ایگیت قهرمانلی، ماکو داغلاری
*
تاریخین سیرّی، آنینا یازیلان
سینه سینده کتیبه لر، قازیلان
بو گؤرکملی، قوجا قهرمان داغا
هم سهند باش ایر، همده سبلان
قدرتلی توانلی، ماکو داغلاری
ایگیت قهرمانلی، ماکو داغلاری
*
ایکی مین بئش یوز ایل مرزده دوران
یاغی دوشمنلریله معرکه قوران
جان کیمی وطنی باسیب باغرینا
ذیروه سینده ظفر بایراغی وئران
قانلی چالدرانلی ماکو داغلاری
ایگیت قهرمانلی ماکو داغلاری
*
قیزارمیش داشلارین قلبیندن چیخان
ایگیت لری بوی بوخونلو قهرمان
وطن قاوقاسیندا جانیندان کئچن
دوشمان قاباغیندا داغ کیمی دوران
قوچاق پهلوانلی ماکو داغلاری
ایگیت قهرمانلی ماکو داغلاری
*

حامد ماکوئی شاعر دیارم روحت شاد

سنی گؤره رم

داغلار غروب سوکوتونا جوماندا
سنی آختارارام، سنی گؤره رم
چیسکینده، یاغیشدا، چم ده، دوماندا
سنی آختارارام، سنی گؤره رم
*
اوجا قایالارین، زیروه لرینده
جوشغون دئنیزلرین،شپه لرینده
سئودالی بلبلون، نغمه لرینده
سنی آختارارام، سنی گؤره رم
*
الوان بولودلارین، ناخیشلاریندا
بولور چشمه لرین، آخیشلاریندا
حیالی قیزلارین، باخیشلاریندا
سنی آختارارام، سنی گؤره رم

*
افق لر قیزاریب،شفق ساچاندا
گؤیرچینلر، قیزیلپرده ۀآچاندا
قویوز جئیران، داغ دؤشونده قاچاندا
سنی آختارارام، سنی گؤره رم
*

ملمع - مولانا

بیر نمونه جلال الدین مولوی رومی نین ملمع شعری

ماه است نمی دانم خورشید رخت یا نه
بو آیریلیق اودونا نئجه جیگریم یانه ؟
مردم ز فراق تو ، مردم که همه دانند
عشق اودو نهان اولماز یانا دوشیجک جانه
سودای رخ لیلی شد حاصل ما خیلی
مجنون کیمی واویلی اولدوم یئنه دیوانه
صد تیر زند اولدوز ، آن تیر کمان ابرو
فیتنه لی آلا گؤزلر چون اویخودان اویانه
ای شاه شجاع الدین شمس الحق تبریزی
رحمتدن اگر نولا ، بیر قطره بیزه دانه

سن سیز بو آخشام

شاعر: میرزه آقا آتش
گئنه سن سیز بو آخشام
یوخو قاچیب گؤزومدن
سنی دئییب دورموشام
خبریم یوخ اؤزومدن
*
گل کؤنلومو، چال منیم
گل یانیمدا قال منیم
گل جانیمی آل منیم
سنین اولوم من، من
*
سمادان قوپوب دوشن
بیر یانار اولدوزام من
تئز اول یئتیر اؤزونو
تنهایام، یالقیزام من
*
سویویوبدور اتاغیم
آه سن گئنه گلمدین
بوزا دؤنوب یاتاغیم
آخی نییه گلمدین؟
*
سمادان قوپوب دوشن
بیر یانار اولدوزام من
تئز اول یئتیر اؤزونو
تنهایام، یالقیزام من
*
تای به تای دیر قاپیم
گل، گل، گل، گل
گؤزله ییرم یولونو
اوزولوبدور تابیم
گل، گل، گل، گل
سال بوینوما قولونو
سال بوینوما قولونو
*

کؤنلوم

شاعر: زلیم خان یعقوب
*
باخ گؤزلرین شعله سینه
حیات وئرسین شعله سنه
کیم وورولماز بئله سینه
وورولماغا، دیر کؤنلوم
*
یازا دؤنر قیشین اولسا
بئله ترلان قوشون اولسا
یولوندا بیر قوشون اولسا
قیریلماغا ، دیر کؤنلوم
*
قربان ائیله باش دا، جان دا
بو سئوگینی یاشات قاندا
بوز – بولاغین سئل اولسادا
دورولماغا دیر، کؤنلوم
*
گؤزو بسدی، بولاغ گزمه
کؤنول بسدی، اجاق گزمه
بو گؤزل دن اوزاق گزمه
یار اولماغا دیر کؤنلوم
*

بیر خومار باخیشلا - فیکرت قوجا

شاعر: فیکرت قوجا
چیچکلر آچماسا، گلرسن یاز گلر
افق لر توتولسا، گلرسن گؤی گلر
غضب له قیشقیرسان، اولدوزلار تؤکولر
بیر خمار باخیشلا، سعادت باغیشلا
*
گئنه گلدین سن 
باخیب گوادون سن
باهار گلدی گوللر آچدی
چایلار داشدی، نغمه قوشدو سنه
چایلار داشدی، نغمه قوشدو سنه
*
کنارا باخیرسان، گؤزومده اود یانیر
اوزومه باخیرسان، اوره ییم تالانیر
بو عالم باشیما، دولانیر، دولانیر
بیر خمار باخیشلا، بیر عالم باغیشلا
*
گئنه گلدین سن 
باخیب گوادون سن
باهار گلدی گوللر آچدی
چایلار داشدی، نغمه قوشدو سنه
چایلار داشدی، نغمه قوشدو سنه
*

داریخیرام

شاعر: مرجان مناف زاده
کؤرپه بنؤوشه کیمی
توز باسمیش شوشه کیمی
سنی همشه کیمی
اؤزله‌ییب داریخیرام
*

دؤیون، اوره‌ییم دؤیون
او قایغیسیز، ارکؤیون
یولونو دویون – دویون
گؤزله‌ییب داریخیرام
*

حیات منی قانیتمیر
معنا وئریب یانیتمیر
سولومداکی اونوتمور
کؤزله‌ییب داریخیرام
*

قینایین بو عیللتی
بو سارساق محببتی
قاپیسینداکی ایتی
ایزله‌ییب داریخیرام
*

سینا یار

شاعر: رسول رضا
آی ایشیقلی گؤی اولدوزلو اولایدی
کؤنلوم ائوی چیراغان دیر بو گئجه
نه بیر چیچک نه بیر یارپاق سولایدی
نه اینجییب یاردان کوسن اولایدی
*
هر محنته دؤزه رم دؤزه رم
سینا منی سینا یار سینا یار
عهده چیخسام، وفاسیز، وفاسیز
اوندا منی قینا یار، قینا یار
*
یار یولوندا دومان ندیر، چن ندیر؟
اللرینین حرارتی منده دیر
دنیا – عالم بوتون گؤزه له دؤنسه
منیم کؤنلوم، منیم گؤزوم سنده دیر
*
بیزی بیر گون آیری گؤرسه یاغی لار
کؤنلوم سنین حسرتیندن داغیلار
گونده یوز یول سنه قربان اولایدیم
قورخورام کی دئیه لر چوخ آز اولار
*

یول وئرین - حمیده رئیس زاده

یول وئرین
یول وئرین یار یوردونا، هیجران گؤلوندن گلمیشم
بیر دنیز مجنونویام، نیسگیل گؤلوندن گلمیشم
قلبیم ایستیر گؤزلریمدن، یول سالا یار یوردونا
باش جنون فئیضیله، ایستیر اوز قویا یار یوردونا
عشقه یورد اولموش جانیمدا، دؤزمه گه یئر قالمییب
بویلانیر جان جیسم ایچیندن یئتسین ایلقار یوردونا
قورتاریب تورپاق بویاقلی قایدالاردان قامتیم
یول توتوب روحوم بدندن چاتسین اسرار یوردونا
یول وئرین یار یوردونا هیجران چؤلوندن گلمیشم
بیر دنیز مجنونویام، نیسگیل گؤلوندن گلمیشم
اولموشام جان خسته سی جانانین آخدارماقدایام
درده چولقانمیش غمین درمانین آختارماقدایام
چاتمیشام گیزلین دیلک جان چیگنینه یوللا نمیشام
بیر جانیم وار مسلخ قربانین آختارماقدایام
من دلی، منطق اوشاق، سایسیز دیلک لر داش کیمی
قصد جولان ائتمیشیک، مئیدانین آختارماقدایام
یوردونا وارماقدایام، هیجران چؤلوندن گلمیشم
بیر دنیز مجنونویام، نیسگیل گؤلوندن گلمیشم
*

باشین ساغ اولسون

غزل - جانای رضوان

غزل – جانای رضوان
یئنه بیر بیت غزل گؤزلرینه پای وئردیم
بو داریسقال هاوادا باااخ هایینا های وئردیم
آل یاشیل سؤزلرینه ماوی دنیز قاتدیقجا
اولدوزون تویلوغونا اینجی دوزوب آی وئردیم
پلمه‌لی کؤوشه‌نیمیز گول چیچک آچسین بلکه
قار بوران فصلینه آخشام چاغیلیق یای وئردیم
خونجالانمیش یارا واردیر غزلین قوینوندا
مین چیچک شعریمی گؤی گؤزلرینه تای وئردیم
بئله یالقیز بوراخیب کؤنلومو سنسیزلیک‌لر
داملا داملا «جانای»ا آاااخ داشیدیم وای وئردیم
*

ائله سئوگی بیلینمه سین – جانای رضوان

شاعر: جانای رضوان

گؤزلریندن بیر شکیل چک
آرخاسیندا دومان اولسون
او شکیلده آخشام چاغی
سئویشمه‌گه زامان اولسون

ساچ‌لارینی تؤک اوزونه
قاش‌لارینی آت یوخاری
اوره‌گینه قوربان اولوم
گؤز آلتی باخ منه ساری

سئوگی دولو دونیامیزین
آدینی سنه چیخمیشام
الینی قوی اوره‌گیمه
بئله یامان داریخمیشام

گؤزلریمین قاراسیند
یازدیم آدین سیلینمه‌سین
یاساق اولموش بو سئوگیده
ائله سئو کی بیلینمه‌سین
*