واخت

واختی بادا وئردیم هاوایی گئتدی
سنه وئریله سی واختیم قالمادی
اولاندا خرجله دیم بئله دن – بئله
من واختین ائوینی ییخدیم، قالمادی
*
هر آیین هر گونون دوردوم قصدینه
توخوندوم کؤنلونه، دیدیم شصتینه
آجی گونلریمین توتوب اوستونه
واختیمی نار کیمی سیخدیم،  قالمادی
*
قالان بیر من اولدوم بیرده کی آدیم
اوچدو اللریم دن آرزوم – مرادیم
واختی توپلامادیم، واختی وورمادیم
بؤلدوم قالیغینی چیخدیم، قالمادی
*
واخت ائله ایتدی کی دوماندا - سیس ده
واخت ائله گئتدی گی هارای دا – سس ده
قویدوم اللریمی گؤزومون اوسته
بویلاندیم آردینجا باخدیم، قالمادی
سنه وئریله سی واختیم  قالمادی
*
شاعر : ائلشن عظیم