آراسیندا - عاشیق علی عسگر

تزه آشنالیقلا کؤهنه دوستلوغون
فرقی وار قیش ایله یاز آرا‌سیندا
نامردده قایدادی، کسر باسدیغین
هر کس حساب چکسین اؤز آرا‌سیندا
*
قودرتدن اوجالان ظلم ایله ائنمز
حاق‌دان یانان چیراق باد ایله سؤنمز
دوست دوستدان اینجییر، قلبینده دؤنمز
اولار بیر آز ارکی ناز آرا‌سیندا
*
علی عسگرم, غم و محنت دی یوکوم
فیل چکمز بو دردی, من نئجه چکیم!؟
حاق ایله ناحاققی آختاران حاکم
تاپار قولاق ایله گؤز آرا‌سیندا