مینی ژوپ - میرزا حسین کریمی مراغه ای

نه گؤزل خوش یاراشیرمیش سنه ای جان مینی ژوب
حسنوه وئردی ترقی یوزه دوخسان مینی ژوب
ائوون آباد اولا عالمده مُد ایجاد ائیلین
صبریمی طاقتمی ائیلدی تالان مینی ژوب
نه دوتور قول قیچی نه یول یئرینده ییخوری
ائوون آباد ائلدون ایشلری آسان مینی ژوب
پسته‌نین اوستی آچیلدی کیلوسی ییرمی تومن
ائیلدی آغ کلمین قیمتین ارزان مینی ژوب
گتور ای ساقی می نابیله مست ائیله منی
نازا قویما دورایاقه سنه قربان مینی ژوب
گئجه گؤردوم یوخودا امر معاشیم دوزه لوب
آلمیشام قوینوما بیر شوخ بالا جئیران مینی ژوب
اویانوب گؤردوم اولوب خطه‌ی بغداد خراب
دیدیم ای وای سنه لعنت گله شیطان مینی ژوب
بیزیم آرواددا باخور قیزلارا کم کم اویانور
گئینوب تازه بو بئیمان قزی بئیمان مینی ژوب
گر چی ایجاد ائیلیوبدور بو مدی خارجه لی
واقعاً جای تعجبدی مسلمان مینی ژوب
آدی زهرا ننه‌سی فاطمه احمد آتاسی
اهل قرآنیدی بودلار قالوب عریان مینی ژوب
ننه‌سی بیر قیزا ائیلوردی نصیحت کی قیزیم
یوزی قویلی اگیلوب سئچمه بادمجان مینی ژوب
چوخ گؤزتله بو لباسین بالا امنیتی یوخ
سنی بیردن گؤره‌سن ایتدی پشیمان مینی ژوب
عمله گلسه متاعون داخی گلمز عمله
ائدور اوضاعوی بالمره پریشان مینی ژوب
خیلی مشگلدی اوزین ساخلیا ات گؤرسه پشیک
دؤزه بیلمز گؤره پول‌سوز سوبای اوغلان مینی ژوب
قویروغا مشتری یوخ قصابین احوالینه باخ
اوزماندان کی اولوب بئیله فراوان مینی ژوب
نه قدر مد گؤروسن خارجه سوغاتیدی لیک
بولارین جمله‌سی تک بیریانا بیریان مینی ژوب
اللرون وار اولا خیاطه خانم اؤلمویه سن
همی دالدان یاراشیر همده قاباقدان مینی ژوب
هوسون اولسا گئداخ انزلی‌یه رامسره
لب دریاده ائدر گؤر نئجه طوفان مینی ژوب
کیم خدایا گوره‌سن آچدی بو خلقین اوزینی؟
نه حیا قویدی نه ناموس نه وجدان مینی ژوب
آدین اسلام قویان خارجه تقلید ائله مز
پوزوب اسلامی نه دین قویدی نه ایمان مینی ژوب
یئل اسنده گئدیری فوری گؤبک دن یوخاری
گیزلین اسراری ائدیر ملته اعلان مینی ژوب
دین و ملت اشاقا گئتدی اتک لر یوخاری
تا گؤراخ هاردا وئرر سئرینه پایان مینی ژوب
اقتصاد اهلیدی ایرانلار اسراف ائله مز
همی کم خرجیدی هم مفته هم ارزان مینی ژوب
حیف اولا بو قوجالار مدلاری رسوا ائله دی
قورومش بود قره ایرگه نملی باخ یان مینی ژوب
بیزیم ایشکده بیر آز قوشقونا تغییر وئروب
دالی یانمش بودا ایستور اولا حیوان مینی ژوب
خیردالوب خیردالوب آخر تومان اولدی پاچا بند
قیسسالوب قیسسالوب ائتدی دونی دوران مینی ژوب
ای کریمی مودووی سنده دگیش اول ژیگولی
شعر و شاعر مینی ژوب دفتر دیوان مینی ژوب