بلی دئییب یول ارکانا گلمیشم - عاشیق علی عسگر

بلی دئییب، یول ارکانا گلمیشم
نقش اولوب سینه مده عشقین کتابی
چشمی -  نبوته عاشق اولموشام
بیر سوالا وئررم یوزمین جوابی
*
گوهر سؤزوم مجلیسلرده یاییلیب
عارف اوندان مطلب آلیب آییلیب
عبادت ائیله ین مؤمن سایلیب
سخاوتین اوندان چوخدو صوابی
*
حاقدی سؤزوم یئتیره سن اثباتا
یئمه ربا، میل ائیلمه غیباتا( غیبته )
شریعت ده حرامدی زینا – لففاتا
اوندان بد یازیلار خمری – شرابی
*
خالیقیندن اوتان مندن اوتانما
شجرت الموتی، هئچ سهل سانما
میعادا قائل اول، غافل دولانما
حاقدی میزان، صراط، قبیر عذابی
*
اگر ذرّه قالسا خمسون، ذکاتین
هرگز قبول اولماز سومو صلاتین
حاق یانیندا مهر اولنماز براتین
سالارلار بوینونا اوددان طنابی
*
دینده یارپاغا سسله نر قوشون
درک ائیله جمع اولسا ادراک و هوشون
سورولدو کروانین، کئچدی تای - توشون
فرمان - قدرتین بودور خطابی
*
آلدانما دنیانین بو فناسینا
گول اولما گوهر خزاناسینا
اؤزون یئتیر شاهین آستاناسینا
دردلره درماندی درین ترابی
*
یازیق علی عسگرم زار و بینوا
ائله ایش توت اولسون دردینه دوا
آلدانیبسان نفسه، تاپیبسان هاوا
درک ائیله ییب قانمامیسان حسابی